شوربة العدس سريعة التحضير ... بس بيتي

7
مش هضيع وقت في وصف حبي واحترامي وتقديري لشوربة العدس

المهم ...

أنا بحب شوربة العدس ثقيلة شوية ... وهي بالشكل ده لو اتسابت شوية بتنشف ... تمام كده؟

بفكر إني أنشفها بشكل كامل وبكده هتتحول لما يشبه البودرة ونعبيها في أكياس ونحطها في الفريزر أو الثلاجة لحد ما نطلعها ونصب عليها شوية مية مغلية ومفيش أسرع من كده

الفكرة اني خايف انها تبوظ أو ما تنشفش كويس أو تاخد بكتيريا أو أو أو.

ممكن حد يكون معلم في الموضوع ده يقيم الفكرة دي ويديني نصايح؟

ألف شكر للجميع!

 

إضافة 2012-01-20
غير محدد
تعديل 2012-01-23

التعليقات

زغباوية 2012-01-20
اولا: فكرة حلوة جدا جدا جدا ويكون لينا السبق فى اكتشافها وخروجها للناس زي كدا مافيه بودرة طعمية وبودرة بصل وبودرة تومان شاء الله الفكرة تنجح
ثانيا: بما انى بحب الاختراعات فممكن اجربها بنفسي واقولك النتيجة ايه



ادعولي اطلع لكم بودرة العدس:(
Lady Rasha Reda 2012-01-20
هههههههههههههه
mora 2012-01-21
لا والله الرحمه حلوه يا رونه مكفايه علينااحدث افتكاسة زغباوية متكونة من عدة افتكاســـــــــــات
الباشمهندسة 2012-01-22
@زغباوية :ها طلعت قماش ولا لسه؟؟
زغباوية 2012-01-22
لسة مابدأتش اجيب بس كل العناصر واقولكم ان شاء الله

الإجابات

3
اعتقد بقي ان طريقة العمل لازم تتغير يعني اصلا العدس مادة جافة ليه احولها لمادة طريه وبعدين انشفها طيب مانجرب نطحن العدس تماما ونضع باقي المكونات في صورة جافة زي البصل المجفف والتوم المجفف و بودة فلفل احمر بابريكا لاعطاء تأثير لون الطماطم والجزر سهل تجفيفة وطحنة وجميع التوابل الملح والفلفل والكمون اساسي وبعدين .... نجرب نصب عليهم ماء مغلي ونغطيهم زي الشاي الكشري كدا فترة ونشوف هيطلع ايه .... احتمال كبير جدا تطلع شوربة عدس مغشوشة

... طيب عشان ماتبقاش مغشوشة ممكن نحط ملعقة نشا مع الخليط الجاف في الاول عشان تدي تأثير البطاطس وبعدين نجرب نفس خطوات التحضير السابقة ... احتمال تطلع شوربة عدس مش مستوية قوي

... خلاص خلاص اخر حاجة بقي في الاول خالص ننقع العدس شوية في المياة الباردة وبعدين نعرضة للشمس ونسيبة يجف تمام ثم نقوم بطحنه .....

وبكدا يسعدني اقدملكوا شوربة عدس سريعة التحضير :D :D :D
إضافة 2012-01-22

التعليقات

زغباوية 2012-01-22
طيب جربيها بالطريقة دى وانا اجربها بالطريقة التانية ونعمل مسابقة نشوف مين الطريقة الاحسن ونفعلها وتكون حصري على زيدونى:(
زغباوية 2012-01-22
الحكام هايكونوا هم اعضاء الموقع بس محدش يقول دى طريقة مين
mora 2012-01-23
من رأى ولا تجربتك ولا تجربتها الاحسن كل واحده تحتفظ بحق الاختراع لنفسها (الخوف كله من زغباويه لحسن تكرهنى فى شوربه العدس اللى بحبها
الباشمهندسة 2012-01-24
:D :D :D
زغباوية 2012-01-24
هو انا اصلا مش بحبها بس بحب اجرب وهاحاول اجرب النهاردة ...دعواتكم:D
الباشمهندسة 2012-01-24
بالتوفيق ربنا معاكي بس ابقي البسي خوذة للوقايه :D


زغباوية 2012-01-24
هههههههههههههه مناسبة جدا
mora 2012-01-25
هههههههههههههه حلوه الخوذه جدا
زغباوية 2012-01-26
طيب انا في مرحلة التحميص دعواتكم:(
محمد عبد المنعم 2012-01-26
عاوز أدوق منها ... مفهوم؟
زغباوية 2012-01-26
من عنيا بس تطلع الاول :D
الباشمهندسة 2012-01-26
تحميص ايه اللي بتقولي عليها هو احنا هنقزقز لب ... اقصد عدس :D
زغباوية 2012-01-26
طيب اجففه ازاى؟؟ عموما مرحلة التحميص خلصت والحمد لله اتحول لبودرة وكدا فى انتظار الريس لما يجي ويدوق بس نعمل استعداداتنا من اسعاف وخلافه :D انا لسة ماجربتهاش بنفسي ربنا يستر:(
محمد عبد المنعم 2012-01-26
100 100 يا زغباوية بكره ان شاء الله
زغباوية 2012-01-28
الحمد لله التجربة نجحت والريس داقه وهو يقولكم عليه وبعد كدا ننزلها في الاسواق :D اقصد فى الموقع:(
mora 2012-01-29
الف الف مبروك يا زغباويه نجاح التجربه لولولولى
4
اليكم احدث نسخة من شوربة العدس السريعة:

5 ملاعق كبيرة عدس اصفر يتم طحنها فى المطحنة ..( طلعت ناعمة جدا )..

ضعى العدس المطحون فى حلة مناسبة ..

انا حطيت على العدس ما يلى :

7 فصوص ثوم مفرى ناعم -- ملعقتين بصل مفرى ناعم --ملعقة شطة حمرا مشطشطة -- ملعقة صغيرة من كل من :زنجبيل قرنفل كركم كمون كزبرة +

ملعقة كبيرة سكر .. حطيت 3 كوب ماء

حطيتها على النار مع التقليب الخفيف حتى لا يلتصق العدس الناعم بالقاع ولما حصل تمازج للمكونات سيبتها لما تغلى ووطيت النار .. 5 دقائق غليان ويكون عندك اجدع شورة عدس ..

طبعا كل واحد يحط الاضافات اللى بيحبها ممكن شوية شعرية او شوية كرفس او مقدونس او ملعقة زيت زيتون او حتة زبدة بلدى ..

الكمية دى كلت منها مرتين وباقى مرة كمان ..

بكدا نكون وفرنا مجهود ضايع فى تسويىة العدس اولا وبعدين نضربة فى الخلاط وبعدين نصفيه دا غير دهولة مواعين كتير ولازم نغسلها ..
\
يجب ان نهنىء اصحاب الفكرة الاصليين ونشكرهم ..

انا شخصيا فرحان جدا بيها والحاجة صفية واقفة مذهولة وبتضحك على ..
إضافة 2012-02-15

التعليقات

محمد عبد المنعم 2012-02-15
نفسي فيـــــــــــــــــــهــــــــــــــــا !!
زغباوية 2012-02-15
الله الله الله ايوة كدا زيدونى افكار
هو ده التعاون داانا طلع عينى فى تسويته وضربه فى الخلاط وبعدين تحميصه علشان يطله بودرة وبعد كدا اصب عليه المياه

يعنى بالطريقة بتاعتك توفير وقت وجهد
تسلم
zedony.com - A mmonem.com production. عن زيدوني - Privacy Policy