أكلتي المميزة

3
لكل واحدة فينا طريقتها الخاصة فى عمل الأكلات المختلفة وبتكون متميزة بيها وبيكون ليها طعم أحلى وممكن تعجبنا أو ناخد بالنا منها

ممكن كل واحدة تكتب لنا طريقتها فى أكلتها أو ايه اللى بتعملوا علشان تكون مميزة وأطعم فى كل الاطباق المميزة بتاعتها أو أكلتها وعرفت طريقتها:(

مثلاً أنا أكلت سلطة بابا غنوج وسلطة زبادى عند الباشمهندسة وفعلاً كانت طِعمة جداً وعرفت طريقتها بس هاسيبها هى تقولكم عليها:D

يالا ياباشمهندسة ابدائي:(

 

إضافة 2012-08-04
من تأليفي
تعديل 2013-04-22

التعليقات

الباشمهندسة 2012-08-04
ايه الاحراج دا ... يعني مفيش حاجة عجبتك في اكلي غير السلطات :p
زغباوية 2012-08-05
كل اكلك طِعم ولذيذ بس احيانا حاجة بتعلق معاكي وبعدين لسة الكنافة والكفتة بالكوسة ....الخ الخ الخ :D
Lady Rasha Reda 2012-08-08
حلو السوال أوى ، بس جابلى فكره تانيه مهمه أوى فى رمضان كتيير بيتبقى طعام ، ممكن كل واحده تقولنا كبف تحيي الطعام البايت تانى يوم و لا بتعمل فى أيه ،، و كمان ممكن كل واحده تقولنا أيه ممكن الحاجات اللى هى بتعملها مقدما ،، و تبقى جاهزه طول الاسبوع ، أو حتى طول الشهر
زغباوية 2012-08-08
فكرة حلوة وفكرت فيها قبل كدا بس نسيت اعملها يالا اعمليها سؤال علشان نجاوبك

الإجابات

4
اولا احب اقول ان تأثير الثمار المستخدمة في الاكل بيبقي لها دور اساسي في الطعم يعني احيانا بيبقي الخضار طازج ومسكر وخالي من البذر بيساعد علي ان الطعم يبقي حلو ومتميز.

بابا غنوج

ثمرة البابا غنوج نغسلها ونضعها علي صاج فوق النار ونقلبها حتي تنضج ومن علامات النضج احتراق اجزاء من القشرة الخارجية وتفتح اجزاء منها وخروج سائل وحتي تبرد نضع فصين ثوم وملح وفلفل وكمون وفلفل اسود وقليل من الطحين وقليل من الخل وملعقة سكر و نهرسهم مع الباذنجانة المشوية وهتطلع ان شاء الله تحفة.

سلطة الزبادي
نجيب كوب زبادي ونضع عليه ملح وفلفل وخل وسكر بسيط وثوم واهم حاجة الخيار يكون مقشر ويقطع صغير جدا واخيرا رشة نعناع ناشف مطحون بردو ان شاء الله هتطلع تحفة

وبالهنا والشفا
إضافة 2012-08-04

التعليقات

زغباوية 2012-08-05
تسلمي ياباشمهندسة بس هانكروت فين باقى اكلاتك المميزة
الباشمهندسة 2012-08-07
حد تاني يجاوب ... وبعدين دا انتي كل اكلك زغبوي مميز :(
زغباوية 2012-08-08
:(
زغباوية 2012-08-08
كنت مستنية اقول فى الاخر لما الناس كلها تكتب بس بما ان مفيش حد جاوب فهاحاول افتكر كام تركاية بتخلي اكلي اطعم من الطريقة التقليدية
Lady Rasha Reda 2012-08-08
أنتى طلعتى بتحطى المكون السرى زىى السكر،، فى ناس كتيير بستغرب لما بتسألنى عن سرى و أقولهم السكر ، و فى بعض الاكلات خل العنب أو الابيض
زغباوية 2012-08-08
يالا يارشا مستنين تركاتك وطرق اكلك المميزة
الباشمهندسة 2012-08-09
انا بأضع السكر كمكون اساسي مع اي وجبة فيها خل او صلصي بتشيل المزازة وبتعمل اعتدال في الطعم
3
بسم الله الرحمن الرحيم

نبدأ بالمكرونة البشاميل:
بحس انها بتكون اطعم لما بحط على العصاج بعد مايستوي فلفل الوان وياسلام بقى لو زيتون طرنشات بتكون اطعم وألذ كتير وطبعا البشاميل يكون كتير

الفراخ بالزيتون والفلفل الوان:
بمناسبة الحديث عن الفلفل الالوان والزيتون الطرنشات فبعمل بيهم فراخ بطريقة سهلة وصحية مافيهاش اى انواع دهون ولا دسم:
- بسوى الفراخ منها فيها وعليها بصل وطبعا بهاراتك كما تحبيها
- وياسلام لو تتبليها قبلها بكام ساعة بزبادى وصويا صوص وزعتر وليمون او خل
- لما تستوي احط عليهم الفلفل والزيتون
وبالهنا والشفا

لما افتكر حاجة تانية هاقولكم عليها بس جربوا الطرق دى وقولوي رأيكم

إضافة 2012-08-08

التعليقات

Lady Rasha Reda 2012-08-08
أنتى كده خلتيها مكرونه بشاميل زغباويه ،، أول مره أسمع عن الفلفل الالوان ، شفت قبل كده صلصه
زغباوية 2012-08-08
ههههههه جربيه هاتلاقيه بيدى طعم حلو جدا
الباشمهندسة 2012-08-09
احب اضيف ليكي كام تريكة حلوة جدا في البشاميل:
1- ممكن تحطي جبنة رومي مبشورة مع العصاج بتدي طعم تحفة.
2- ممكن تستغني عن العصاج تماما وتخليها خضار مشكل فقط فلفل وبصل وزيتون وجبنة جميع الانواع اسطنبولي وبرميلي ونستو كمان لو حابة وموتزريلا ورومي طبعا اللي موجود عندك وجزرة مبشورة وطماطم مكعبات ... بتنفع قوي لما يكون المفروم غير متوفر أو فيه زنقات مالية :(
3- انابحب جدا بعد طبقة البشاميل الاخيرة احط بقسماط ناعم فوق الوش ورشة سمنة او زيت بتعمل طبقة مقرمشة شبة البانية بتبقي احلي من اللي بيحطو البشاميل فقط طبقة اخيرة وممكن تتحرق احيانا.

واي خدمة وبالهنا والشفا
زغباوية 2012-08-09
المواهب بتطلع اهيه :(
هى ممكن تنفع كمان النباتيين اللى مالهومش فى اللحمة ولا العصاج
zedony.com - A mmonem.com production. عن زيدوني - Privacy Policy