عايز تعرف مين المصري ؟؟؟

5
عايز تعرف مين المصرى ؟؟؟

أنا المصرى ...
ابن نكتة .. ودمى خفيف ..
مهما اكون مهزوم و ضعيف..
... أضحك من حالى و اللى بيا

حمال أسية ..
شيال هموم..
مش بس همومى أنا لوحدى ..
والناس كمان من حواليا

إيدى تتلف ف حرير ..
بافهم فى حاجات كتير ..
مش بس سبع صنايع ..
دول قرَّبوا يبقوا مِية

الفهلوة و الحداقة ...
الخفة و الفتاكة ...
دى حاجات بدايتها عندى ..
واتولدت على ايديا

مشاعرى سابقة عقلى ..
واتأثر بالأغانى ...
وكل ما اشوف هنادى...
برضه تدمَّع عينيا

باصدق السياسى ..
واخاف من قلب قاسى..
وادعى لكن فى سرى ..
ع الشلة المفترية

باتفلسف ع المواجع ...
وباسلِّم ع اللى راجع ...
وارسمله جمل و كعبة...
وادعى يكتبها ليا

باحب الصوت العالى ..
والأفراح و الليالى ...
والنُقطة و المجاملة ...
دول دايماً دِين عليا

عروسة المولد و حصان..
الزينة و فانوس رمضان..
وعيدية و بمب وصواريخ
وموالد شى الله يا اوليا

وباحب الفول م العربية ..
والراديو ساعة الصبحية..
والبخت و كلمات متقاطعة ..
والشاى دا أهم من الميه

واشترى أصناف جديدة ..
لو بــِيه أو ع الحديدة ..
ما دام مكتوب عليها ...
واحدة و التانية هدية

من غير ما اروح مدارس ..
قلبى عارف و حاسس ..
فجرك يا بلدنا راجع ..
مهما اتأخر شوية

{{uf:1425}}

 

التعليقات

الباشمهندسة 2012-06-26
حلوة القصيدة
عبد المنعم 2012-06-26
وان شاء الله لن يتأخر
safaa 2012-06-27
جميلة
Ahmed Hussien 2012-06-27
حلوة جدا
Fayez Eneim 2012-06-27
قصيدتك؟ لو قصيدتك وقعي باسمك في نهايتها ولو لغيرك عليك كتابة اسم قائلها.
zedony.com - A mmonem.com production. عن زيدوني - Privacy Policy