اخيراً عرفت ليه اسمها رباعيات

3
مقتطفات من رباعيات صلاح جاهين لاقيتها مناسبة للأحداث الجارية:

خرج ابن آدم من العدم قلت : ياه
رجع ابن آدم للعدم قلت : ياه
تراب بيحيا ... وحي بيصير تراب
الأصل هو الموت و الا الحياه ؟

عجبي !!!
===============


ضريح رخام فيه السعيد اندفن
و حفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن
عجبي !!!
===============

أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام

عجبي !!!!
===============


يا باب يا مقفول ... إمتي الدخول
صبرت ياما و اللي يصبر ينول
دقيت سنين ... و الرد يرجع لي : مين ؟
لو كنت عارف مين أنا كنت أقول
عجبي !!!
===============


نوح راح لحاله و الطوفان استمر
مركبنا تايهه لسه مش لاقيه بر
آه م الطوفان وآهين يا بر الأمان
إزاي تبان و الدنيا غرقانه شر

عجبي !!!
===============


انا كل يوم أسمع ........ فلان عذبوه
أسرح في بغداد و الجزاير واتوه
ما أعجبش م اللي يطيق بجسمه العذاب
و اعجب من اللي يطيق يعذب أخوه
عجبي !!!
===============


يا طير يا عالي في الســــــما طظ فيك
ما تفتكرشي ربنا مصطــــــــــــــــفيك
برضـــــــــــك بتاكل دود و للطين تعًًًًودً
تمـــــــــص فيه يا حلو .. و يمص فيك

عجبي !!!
===============

قالوا السياسة مهلكة بشكل عـــــــــــام
و بحورها يا بني خشنة مش ريش نعام
غوص فيها تلقي الغرقانين كلهــــــــــم
شايلين غنايم .. و الخفيف اللي عـــــام
عجبي !!!
===============

و لو اتضنيت و فنيت وعمري انفرط
مش عاوز الجأ للحلول الوســـــــــط
و كمان شطط و جنون مانيش عــاوز
يا مين يقول لي الصح فين والغلــــط

عجبي !!
===============

لا تجبر الانسان و لا تخـــــــــيره
يكفيه ما فيه من عقل بيحيــــــره
اللي النهارده بيطلبه و يشتهــــيه
هو اللي بكره ح يشتهي يغيـــــره
عجبي !!!
===============

ولدي نصحتك لما صوتي اتنبــــــــــــح
ما تخفش من جني و لا من شبـــــــــح
و ان هب فيك عفريت قتيل إسألـــــــــه
ما دافعش ليه عن نفسه يوم ما اندبح

عجبي !!!
===============


هو ماينفعش نعمل مسابقة ونطلع المواهب بتاعتنا المدفونة ونعمل حتى لو ثنائيات:(
اللى عنده الموهبة يطلعها من غير مايفكر
بعد سنين كدا احفادنا يطلعوها ويقروها
جايز ياخدوا منها اللى فيه العبر
وعحبي!!!:(

 

إضافة 2012-06-06
منقول
تعديل 2013-02-05

التعليقات

Fayez Eneim 2012-06-06
الرباعيات اﻷولى فلسفة مجردة وقد يظن القارئ بشاعرنا اﻻمتلاء باليأس. استمرار قراءة باقي الرباعيات يوضح حقيقة موقف وثورية صلاح جاهين. تمنيت لو بدأت باﻷواخر والتي هي ليست فقط ملائمة للآن بل لكل عصر سكوت الناس على الطغيان والفساد.
زغباوية 2012-06-06
طويلة جدا يادكتور دى كدا بس مقتطفات عجبتني وفعلا تصلح لكل العصور
Fayez Eneim 2012-06-06
ﻻحظي أنها ليست قصيدة بل هي خواطر تهاجم المفكر أو الشاعر فيعبر عنها بذات لحظة هجمة الخاطرة بمنظوم في أربعة سطور.
Fayez Eneim 2012-06-06
وانتاج الرباعيات مستمر طوال حياة الشاعر وتتوقف بوفاته فقط.
زغباوية 2012-06-07
وتتنوع ايضا حسب حالته
ماكنتش اعرف انها كدا بس لما قريتها حبيتها
Fayez Eneim 2012-06-07
جمالها في عفويتها ودلالانها الروحية والنفسية العميقة.
زغباوية 2012-08-26
وللمزيدمن الجاهينيات:
رباعيات لصلاح جاهين
HoSSaM 2012-08-26
+1
zedony.com - A mmonem.com production. عن زيدوني - Privacy Policy