اللاكيه المغسول(دهانات)

2
خطواته ايه علشان يطلع مظبوط وناعم؟؟؟

 

إضافة 2012-03-10
غير محدد

التعليقات

safaa 2012-03-10
+1 بس ماليش فيه

الإجابات

3
هيطلع عينك فى تنفيذه .. والافضل تدهنى بلاكيه مط مش لميع .. الفكرة انك بتأسسى البطانة وتخدمى عليها كويس قوى ثم تدهنى اول وش ولمل ينشف تصنفريه بصنفرة ناعمة جدا ولما ينشف تلقطى بالمعجون ما انكشف من الوش الاول ولما ينشف المعجون تصنفرى تانى وتدى وش لاكيه ولما ينشف تدوسى بالصنفرة تانى وتاطدى ان الصنفرة تكون بالميه دائما .. وتفضلى على كدة حتى تكونى طبقة محترمة من اللاكيه المطفى وطبعا هيكون ناعم من كتر الصنفرة .. هيه؟؟ ناوية برضه ؟!!
إضافة 2012-03-11

التعليقات

زغباوية 2012-03-14
جميل جدا بس عايزة اعرف أسس البطانة وأخدم عليها كويس ازاى؟؟؟؟؟
عبد المنعم 2012-03-15
انا باقول بلاش مقاوحة احسن لك ولصحتك وللعيال .. وممكن اشرح لك الموضوع بعد عدوة حلوة .. لا عندك طبعا !!!
زغباوية 2012-03-18
ههههههههه تنور بس عايزين نشرح للى بيحب يدهن بنفسه وماينفعش نعزمه على الغدوا دى :D وشكرا
عبد المنعم 2012-03-19
اصلا ما حدش بيتكلم فى الموضوع دا غيرك
زغباوية 2012-03-19
ماشي ياعبدوا:) بس على فكرة فى اصحابى هما اللى دهنوا بيتهم بنفسهم واكيد قبل مايدهنوا دوروا على الطريقة واكيد فى ناس بتحب الموضوع ده زيي كتير ليه مانساعدش فى كدا
عبد المنعم 2012-03-20
اللاكيه عموما محتاج تاسسيه بمعجون اللاكيه وده بيتركب من زنك واسبيداج بنسبة 2:1 وزيت بوية مغلى .. وتفضلى تقلبى وتدوبى فى قلوب الناس لغاية ما يصبح طريا متماسكا مرنا .
الحيطان لو قديمة بنعمل لها صبفرة شاملة .. لو على المحارة هنشتغل على طول .. سكينة معجون عريضة وقاشطة علشان تاخدى من واحدة للتانية وانت بتشتغلى وتبتدى تسحبى السكينة بميل على الحائط لفرد طبقة رقيقة من المعجون وتستمرى حتى تغطى كامل المساحة .
لو اتاكدتى ان المعجون تصلب هنعمل صنفرة ناكل بيها خطوط المعجون المتبقية من العملية الاولى ونفرد طبقة تانية من المعجون ونخللى اتجاه سحب السكينة متعامد على اتجاه المرة اللى فاتت..
كررى طبقات المعجون على كيفك لانك هتصنفرى بعد كل مرة ودا معناه انك بتاكلى من سمك الطبقات السابقة بهدف جعل الحائط تام النعومة .
لما تصبح طبقة المعجون بسمك حوالى 1مم وناعمة جدا ومستوية تقدرى دلوقت تدى البطانة .
والبطانة عبارة عن ما تبقى من المعجون ونزود هليه زيت اكتر ونحط عليها نسبة من اللون النهائى للحائط ثم نبدأ فى دهان الحائط مرة واتنين وتلاتة وكل مرة نتاكد من جفاف الطبقة السابقة .
هنبدأدلوقت ندهن اول وش لاكيه .. يدوب نخف قوام اللاكيه بملء فنجان صغير من التنر او اى مخفف آخر ونقلب وندهن اما بفرشة واما الاسهل بالبكرة ذات العصا ( الروللة).. ولما ينشف كويس هندى وش تانى بس من غير تخفيف ولما ينشف كويس جدا ندى كمان وش .. لغاية ما فلوسك تخلص ونفسك يتقطع ..ما علينا ..احنا اسسنا كده طبقة لاكيه ممكن نصنفر فيها بصنفرة زيرو يعنى ناعمة جدا وبخفة وكل ده والصنفرة مبلولةحتى لا يتخربش اللاكيه .. ايه الهدف من الصنفرة بقى والعذاب ده كله ؟؟ ان الدهان فى النهاية ما يكونش بيلمع !!!
طب ما حنا قلنا من الاول ندهن بلاكيه مط مش لميع ونوفر وجع القلب !!!
مبسوطة كده ؟؟
زغباوية 2012-03-20
100 100 ايوة كدا تشكر يأسطى عبدوا تسلم ايدك والله ينور:(
zedony.com - A mmonem.com production. عن زيدوني - Privacy Policy