صيانة منزلية

7
ضغط المية فى الشبكة عندنا ضعيف بسبب الفساد المتبادل بين المسئولين والمقاولين .. ما عليتا .. علشان اشغل السخان لازم افتح حنفية البانيو وكمان حنفية الحوض ويدوب السخان يدينى شعلات طولها اقل من 1 سم .. انزل تحت الدش بتيقى علقة .. المية نازلة ضعيفة وفاترة .. وفى البرد الشديد السنة دى اصبح الحمام عندى عملية تعذيب ..

لازم آخد موقف .. ايه هو ؟ تغيير الماسورة اللى داخلة عندى . بدأت التفكير .. والحسابات .. العملية هتصرف ييجى 400 جنيه + 100 اجرة ..

قررت انفذ .. لكن لقيتنى بابحلق فى محبسين تحت السخان .. ومحبسين تحت الحوض ومحبسين تحت البانيو ... انا شايفهم من زمان وهما بيتركبو .. لكن طبعا البيه السباك لازم يقنعك باهميتهم وطبعا لما الحمام بيكون كله على الارض بيكون همك انه يتلم باسرع ما يمكن ..
الحاجة البديهية اللى كلنا عارفينها ان الخط المستقيم هو اقصر مسافة بين نقطتين .. وكلما عوجت الخط فانت بتطول المسافة .. فى المية بقى كل ما تعوج طريقها فانت بتقلل اندفاعها .. باختصار كل كوع وكل محبس فى الطريق بيعوق سريان المية ..

فورا بنفسى اشتريت كوعين واربع نبول وفكيت المحبسين اللى تحت الحوض وركبتهم وفتحت الميه وانا ملهوف على النتيجة .. اللله الله يامعلم .. ميه ميه .. تانى يوم كررت العملية فى المحبسين اللى تحت السخان .. 200% التكلفة 28 جنيه ..

ماتسيبش الصنايعى يعمل اللى هو عايزه .. المحابس دى كلها مالهاش اى لازمة لان فيه محبس لعموم الحمام .. لكن هو بيبيعلك بضاعة وانت مش عارف انه نصاب !!

 

التعليقات

HoSSaM 2012-02-15
+1
الناس أتعلمت الكسل والأعتماد ع الغير مع إن فى حاجات كتير بنجيب فيها الصنيعيه المفروض نكون عرفينها من باب الصيانه المنزليه:(
Lady Rasha Reda 2012-02-15
انا الصنيعيه بيكرهونى علشان ما بسمعش كلامهم ، و يقولى يا هانم اللى انتى عايزاه ده غلط ، و انا أقوله انا عايزه غلط
،، دول شر لابد منهم
زغباوية 2012-02-15
100 100 اى حد عنده مشكلة يقول لعبد المنعم على طووول
Hager 2012-02-15
ايه الجمال ده يا عمو والله انت خصارة في البلد دي بس عندى سؤال بالنسبة للناس اللي زي حلاتي زيرو في الصيانة أجرب أصلح وعلى ضمانتك ولا نخلينا في الصنيعية أحسن منعا للخساير .
HoSSaM 2012-02-16
لأ جربى يا هاجر وأتعلمى فى حاجات خسايرها من كبيره ومادام نويتى على كده ونيتك خير أكيد ربنا هيكون معاكى ويحفظك من كل سوء أو يحفظ البيت من خسايرك:D
Hager 2012-02-16
هههههههههههه ماشي انا هعمل بالنصيحة بس هلعب في المضمون .
zedony.com - A mmonem.com production. عن زيدوني - Privacy Policy