ياتري فاكرين يوم 24 /1 /2011 ؟؟

3
اتري هل اي حد فاكر كان يوم 2011/1/24 بيعمل ايه بالظبط ؟؟

وازاي كان اخر ايامه قبل ثورة 25يناير وقبل الحال مايتشقلب كدا ويتبدل؟؟

تذكره بسيطة ... الاهرام 24/1/2011

او النسخة كاملة علي

http://www.ahram.org.eg/pdf/Zoom_1500/index.aspx?cal=1&ID=45339

{{uf:904}}

 

الإجابات

2
في اليوم ده انا كنت بجهز حقيبة السفر عشان اول مايرجع زوجي من العمل كنا هنطلع رحلة للاسماعيلية مع حماتي العزيزة صفصف وابنتها اللذيذة زوزو وكان من المخطط قضاء وقت ممتع في اجازة ثلاثة ايام الاثنين 24يناير و الثلاثاء 25يناير والعودة الربع 26يناير وسارت الخطة في البداية كما هو متوقع وكان في اليوم دا مبارك المخلوع بيقول خطابه في عيد الشرطة واللي كان اول مرة يبقي 25يناير اجازة رسمية وكانت الدنيا مقلوبة في تونس رأسا علي عقب وفي نهار 25يناير2011 كانت المفاجأة في التليفيزيون واحنا هناك ان الدنيا مقلوبة في ميدان التحرير وكانت معظم تعليقات الحاضرين ان الامور هتهدأ والليلة هتنفض والناس هتتلم والصدمة بقي ان لما خرجنا في ميادين الاسماعيلية كانت الدنيا مقلوبة ايضا بس طبعا مش زي السويس واسكندرية والقاهرة وقتها وعدي اليوم عادي بس في حالة قلق وترقب وفي صباح الاربع مازال الزضع كما هو ويزداد اشتعال وعليه القرار بالعودة السريعة.

حد فاكر بقي قضي يوم 24 و25 ازاي قبل الثورة ؟؟؟
إضافة 2012-01-24

التعليقات

زغباوية 2012-01-24
ياسلام فاكرة اما كانت فسحة طيب ماتيجي نعملها جايز البلد تتظبط اكتر:(
HoSSaM 2012-01-24
سؤال بسيط :
هو مبارك مخلوع ولا متنحى

وما الفرق بينهما ؟؟؟ سواء لغوياً أو سياسياً ؟؟؟
محمد عبد المنعم 2012-01-24
المشكلة التانية كانت في لبنان مش في تونس ... أنا فاكر كويس جدا لما الناس كانت بتفكر تتغدا سمك ولا مخشي في حين أنا كنت قلقان ومترقب لأني كنت على علم باللي ممكن يحصل في اليوم ده من الإنترنت.

وأذكر إن زوزو المذكورة عاليه (اللي فيما بعد أصبحت ناشطة سياسية وكانت بتقول لا للنعديلات الدستورية عشان موضوع دستور 71) كانت بتحمي العيال ومكانش ليها في اللون خالص
زغباوية 2012-01-24
:( واكيد الفضل لله ثم الثوار اللى خلوها تقول رايها بكل صراحة
محمد عبد المنعم 2012-01-24
ببساطة ... هو لما لقى نفسه بيتخلع ... اتنحى ... يعني فوض طرف تاني بالليلة
HoSSaM 2012-01-24
يا باشا إيه الكلام دا
أنا لو سألت الأسطى الميكانيكى الغير متعلم هيقول كلام أحسن من كده

أحنا المفروض هنا فى منتدى ثقافى مبنى فى الأساس على المعرفه وأسمه زيدونى يعنى الكلام يكون بدليل

وسؤالى واضح: إيه الفرق بين مخلوع ومتنحى سواء سياسياً أو لغوياً
محمد عبد المنعم 2012-01-24
حري بك أن تضع سؤالك هذا في سياق يليق به حتى ينال قدرا وفيرا من المشاهدة والمشاركة والتفاعل وسأضع إجايتي هناك بدون تردد وبالمناسبة ستكون إجابة متواضعة (لقلة خبرتي السياسية واللغوية على حد سواء) ولكني أتوقع أن يجيبك أو يتفاعل معك من هم أكثر مني حنكة لغوية وسياسية

كلامي دمه تقيل مش كده؟ مش معنى إن الموقع تثقيفي في المقام الأول اننا منستخدمش كلمات خفيفة وذات معنى كل الناس فاهماه طالما لم نتطاول أو نخرج خارج حدود الأدب

HoSSaM 2012-01-24
لأ يا باشا أنا بتساءل فقط لأخبر البشمهندسه أنها تكتب عن مبارك وتصفه بالمخلوع دون أدنى درايه بمعنى الكلمه سواء لغوياً أو سياساً

مبارك فى جميع الأحوال هو رئيس سابق لمصر وهو صاحب أطول فترة رئاسيه تاريخياً فى حكم مصر وله ما له وعليه ما عليه.

أما عن سؤالى عن الفرق بين مخلوع ومتنحى ؟ فأنا لا أعتقد أن أحصل على أجابه صحيحه عليه فى موقع زيدونى لأن أغلب الأعضاء يعتمد فى معرفته بشكل مباشر على المنتديات أو صفحات الفيس بووك.

وأخيراً كلامك دمه مش تقيل ولا حاجه بالعكس لولا الأختلاف فى وجهات النظر ما تقدمنا للأمام
محمد عبد المنعم 2012-01-24
الفكرة انها سمعت ناس كثير بتقول كده فاتكلمت زيي وزي الناس بدون إعمال للفلسفة

يا عم عديها !!

الفكرة إننا عايزين نبتعد في الموقع عن المشاكسات النابعة من إحتلاف الإنتماءات أيا كان لونها ونحاول نركز على المفيد للجميع

والله الموفق
1
صراحة ان ماكنتش اعرف غير يوم 25 السنة اللى فاتت لما المظاهرات قلبت بجد لانه كان يوم عادى بالنسبة لى مش فارقة عن اى يوم ولانى ماكنتش مهتمة بالفيس بوك واصلا كنا في الاسماعيلية بنتفسح مش فاكرة اذا كان يوم 24 او 25 ويوم الجمعة هو اللى بدأنا نحس ان فيه حاجة كبيرة بتحصل
إضافة 2012-01-24
zedony.com - A mmonem.com production. عن زيدوني - Privacy Policy