سبيشيال فور Monem تتر مسلسل ارابيسك

6

كلمات: سيد حجاب
ألحان: عمار الشريعي
غناء: حسن فؤاد


و ينفِلِت من بين إيدينا الزمان
كإنه سَحبة قوس في أوتار كمان
و تنفرط الايام عود كهرمان
يتفرفط النور و الحنان و الأمان
و ينفلت من بين إيدينا الزمان
الشر شرق و غرب داخل في حوشنا
حوشوه لا ريح شاردة تقشقش عشوشنا
حوشوا شرارة تطيش تشقق عروشنا
و تغشنا المرايات تشوش وشوشنا
و تهيل تراب ع الهالة و الهيلمان
الغش طرطش رش ع الوش بوية
ما درتش مين بلياتشو أو مين رزين
شاب الزمان و شقيت .. مش شكل أبويا
شاهت وشوشنا تهنا بين شين و زين
ولسه ياما و ياما حنشوف كمان


ويرفرف العمر الجميل الحنون
ويفر و يفرفر فرفة قانون
وندور نلف ما بين حقيقة وظنون
وبين قسى هفهاف
وهفة جنون
دنياك سكك حافظ على مسلكك
وامسك فنفسك لا العلل تمسكك
وتقع فخيه تملكك تهلكك
اهلك يا تهلك
دنتا بالناس تكون
ويرفرف العمر الجميل الحنون
ان درت ضهرك للزمن يتركك
لكن سنابك مهرته تفركك
وإن درت وشك للحياة تسبكك
والخير يجيك بالكوم وهمك يهون
ويرفرف العمر الجميل الحنون

 

إضافة 2011-10-30
tafatifi
5264
غير محدد
تعديل 2018-07-23

التعليقات

محمد عبد المنعم 2011-10-30
تشكرات كثيرات ... حلو قوي انهم مع بعض ... كل ما كنت بفتكر واحدة الثانية بتضيع من دماغي

بس الكلام طلع مش شديد قوي ولا حاجة بس المزيكا جميلة
tafatifi 2011-10-30
لأ الكلام جميل برده
safaa 2011-10-30
بجد جميلة +1
الباشمهندسة 2011-10-30
+1 كنت بحب اسمع التتر بتاعها قوي
ahmed 2011-10-30
يارتني مدير الموقع عشان الناس تبعتلي هدايا (بلد بتاعة شهدات صحيح)ههههههههه
ahmed 2011-10-30
+1
tafatifi 2011-10-30
شهادات
ahmed 2011-10-30
معلش يبقالك الف
زغباوية 2011-10-31
ايوة حتى المسلسلات كان ليها مذاق اخر
+1
zedony.com - A mmonem.com production. عن زيدوني - Privacy Policy