على اسم مصر التاريخ يقول ماشاء

5

على اسم مصر التاريخ يقدر يقول ما شاء


أنا مصر عندي أحب وأجمل الأشياء


باحبها وهي مالكه الأرض شرق وغرب


وباحبها وهي مرميه جريحة حرب


باحبها بعنف وبرقة وعلى استحياء


واكرهها وألعن أبوها بعشق زي الداء


واسيبها واطفش في درب وتبقى هي ف درب


وتلتفت تلقيني جنبها في الكرب


والنبض ينفض عروقي بألف نغمة وضرب


على اسم مصر


النسيم في الليالي وبياعين الفل


ومرايه بهتانة ع القهوة .. أزورها .. واطل


القى النديم طل من مطرح منا طليت


والقاها برواز معلق عندنا في البيت


فيه القمر مصطفى كامل حبيب الكل


المصري باشا بشواربه اللي ما عرفوا الذل


ومصر فوق في الفراندة واسمها جولييت


ولما جيت بعد روميو بربع قرن بكيت


ومسحت دموعي في كمي ومن ساعتها وعيت


*


مصر السما الفزدقي وعصافير معدية


والقلة مملية ع الشباك .. مندية


والجد قاعد مربع يقرا في الجرنال


الكاتب المصري ذاته مندمج في مقال


ومصر قدامه اكتر كلمة مقرية


قريتها من قبل ما اكتب اسمي بإيديا


ورسمتها في الخيال على أبدع الأشكال


ونزلت أيام صبايا طفت كل مجال


زي المنادي وفؤادي يرتجف بجلال




مصر .. التلات أحرف الساكنة اللي شاحنة ضجيج



زوم الهوا وطقش موج البحر لما يهيج


وعجيج حوافر خيول بتجر زغروطة


حزمة نغم صعب داخلة مسامعي مقروطة


في مسامي مضغوطه مع دمي لها تعاريج


ترع وقنوات سقت من جسمي كل نسيج


وجميع خيوط النسيج على نبرة مربوطة


اسمعها مهموسة والا اسمعها مشخوطه


شبكة رادار قلبي جوه ضلوعي مضبوطة


على اسم مصر

 

إضافة 2011-10-13
ahmed
14003
غير محدد

التعليقات

زغباوية 2011-10-13
حلوة اوى .....مين اللى كاتبها؟؟؟؟
ahmed 2011-10-13
صلاح جاهين
زغباوية 2011-10-13
شكرا
TOOTOOMEX 2011-10-13
جميله جدا انا بموت فيها وعندى اشعار كتير لصلاح جاهين وعجبى
TOOTOOMEX 2011-10-13
نسيت+1
الباشمهندسة 2011-10-14
ياخبر يا زغباوية مش عارفه مين اللي كتبها :o:o:o:o



طبعا دي اغنية واخدة شوية ابيات مش القصيدة كاملة لانها طويلة جدا
ahmed 2011-10-14
شكرا للاضافه
زغباوية 2011-10-15
بصراحة اول مرة اسمعها وماليش في الشعر اصل بس +1 على الاضافة
zedony.com - A mmonem.com production. عن زيدوني - Privacy Policy