عاش المجلس … عاش عاش
عاش المجلس … عاش عاش
كان متواطئ ، أو غشاش
هيا حياتنا دي تتعاش
من غير مدفع أو رشاش !
عاش المجلس راعي الثورة
رافع راسنا جوة و برة
كنا يا صاحبي جوا ف جرة
قامت ثورة وما طلعناش
عاش المجلس حامي الكل
شكل حياتنا هاتفضل ذل
قامت ثورة زي الفل
بس اتحجزت فالإنعاش
عاش المجلس باقي الماضي
عاش المليان … عاش الفاضي
قالوا : شعبنا هوا القاضي
ماتوا الشهدا و ماحكمناش
عاش المجلس … عاشت سينا
اللي ماحسيتهاش يوم لينا
دم ولادنا غالي علينا
بس خسارة راح ببلاش
عاش المجلس … عاشت مصر
عاش اللي هايسكن ف القصر
دامت لينا مرارة الصبر
عاش المجلس … و احنا بلاش
بدون تبويب
إضافة 2011-09-15
غير محدد
التعليقات