عدنا مع ... مين اللي هيقعد على كرسي الاعتراف .. الآن مع الضحية العشرين ..المهندس/ Ahmed Hussien

17
كنت اقترحت قبل كده موضوع كرسي الاعتراف اننا هنلعبه بس لما يبقى عدد الأعضاء المتواجدين كبير واحنا دلوقتي بسـم الله ما شاء الله عددنا يشجع على اللعب .. مين هيلعب معانا .. يلا عايزين نتجمع عشان نختار مين اللي هيقعد على الكرسي :P:(

الضحية الأولى: وائل بيومي :D
الضحية التانية: لوليـــتا :D
الضحية التالتة: خالتو صفـــــــاء:D
الضحية الرابعة: شـــــــــادي :D
الضحية الخامسة: ريـــــــــــم :D
الضحية السادسة: نــــــــــورا :D
الضحية السابعة : زغباويـــــة - شعلة الموقع - :D
الضحية الثامنة: الباشمهندسة:D
الضحية التاسعة: مـــــورا:D
الضحية العاشرة: مـــــــــــــادا -عبقرينو الموقع- :D
الضحية الحادية عشرة: Monem -الريــــــس- :D
الضحية الثانية عشرة: يـــــــــــارا :D
الضحية الثالثة عشرة: الأستـــــاذة:D
الضحية الرابعة عشرة: TOTOOMEX :D
الضحية الخامسة عشرة: عمو عبد المنعم :D
الضحية السادسة عشرة: شيماء مصطفى :D
الضحية السابعة عشرة: هاجر :D
الضحية الثامنة عشرة: Lady Rasha Reda :D
الضحية التاسعة عشرة: :D لولو الزغبي
الضحية العشرين: المهندس/ Ahmed Hussien {{uf:2542}}

 

إضافة 2011-09-05
MaDa
11058
غير محدد
تعديل 2015-03-02

التعليقات

wael pauomi osman 2011-09-05
انا معنديش مشكلة أول متطوع هههههههههههههههه
بس بشويش
MaDa 2011-09-05
كده بقينا اتنين .. يلا يا جماعة فين الباقي .. متخفوش الأسئلة من المقرر :D
زغباوية 2011-09-05
طيب ربنا يستر بقينا 3
MaDa 2011-09-05
هنبدأ أول ما نبقى 5
زغباوية 2011-09-05
ماتمشيها 3 وخلاص يامادا
MaDa 2011-09-05
يعني اتنين على واحد .. هيبقى حرام .. هو محدش عايز يلعب ولا ايه ؟
الباشمهندسة 2011-09-05
انا هتفرج بس :D
MaDa 2011-09-05
لالالالاالالا هتلعبي معانا .. كده بقينا اربعة :D
فاضل واحد ونبدأ
الباشمهندسة 2011-09-05
لا لا لا ...انا الحكم مابلعبش ... وبعدين اقدامي شوية صغيرة وهاقوم احضر الاكل :(

انتوا ابتدوا والبقية تأتي ان شاء الله
زغباوية 2011-09-05
ابدأياعم قبل ماتبقوا 2 ولو حلوة الكل هايجي جرى علشان انا كمان عايزة اقوم
MaDa 2011-09-05
طيب مين اللي هيقعد على الكرسي فينا يا حضرة الحكم :D
نعمل كولو بامية :D:D:D
زغباوية 2011-09-05
وائل اعتقد كان اول متبرع معانا يالا نضحى بيه
MaDa 2011-09-05
وائل هرب :D:D
MaDa 2011-09-05
شكلنا كده هنأجل اللعب ل بالليل يكون الكل فاضي ولا مطبخ ولا شغل :P
Noura 2011-09-05
انا جيييييييييييييت
wael pauomi osman 2011-09-05
back
MaDa 2011-09-05
اوبا احنا كده ممكن نلعب دلوقتي .. يلا مين اللي هيقعد على الكرسي ؟؟
wael pauomi osman 2011-09-05
خش عليا قبل ما يجي زبون
انا فى الشغل
MaDa 2011-09-05
ههههههههههههههههههههههه طيب يلا يا جماعة دلوقتي وائل على كرسي الاعتراف .. كل واحد هيسأل سوؤال بالدور ومحدش يسأل سؤال جديد الا لما وائل يجاوب :D
wael pauomi osman 2011-09-05
د انا قلت انت اللى هتبدأ اوك
ولا بيهمنى
MaDa 2011-09-05
اول سؤال سهل عشان نسخن : عرفنا بنفسك من واقع البطاقتين الشخصية والعائلية :(:D
wael pauomi osman 2011-09-05
الاسم: وائل محمد بيومى
السن:27
خريج تجارة انجليش وشغال مصمم جرافك وخاطب ادعولى ربنا يتتملى على خير بقى
MaDa 2011-09-05
ربنا يوفقك ويتتملك بخير يارب :(
MaDa 2011-09-05
هستنى دقايق لو محدش سأل هسأل انا :D
wael pauomi osman 2011-09-05
د انت شكلك ناويلى
MaDa 2011-09-05
ههههههههههههههههههه لا خالص :P
الباشمهندسة 2011-09-05
ربنا معاك ويتملك علي خير
طيب عرفت زيدوني من مين ؟
wael pauomi osman 2011-09-05
سؤال جامد اشك ان وراه مغزى
عن طريق محرك البحث
الباشمهندسة 2011-09-05
مش فاهة الرد ؟؟ تقصد انك كنت بتدور علي حاجة ولقيت اجابة في زيدوني مثلا ولا شدك الاسم فحبيت تدخل ؟.... ده مش سؤال ده استفسار عن الاجابة :(
MaDa 2011-09-05
:D
wael pauomi osman 2011-09-05
كنت بدور على اجابة سؤال وطلعلى الاجابه كانت من موقع زيدونى
بصيت كده لاقيت انو موقع متخصص فى الاجابه على اى اسئلة مطروحة قلت بس هو ده قمت عامل اشتراك وقتى
ولما دخلت واتعرفت عليكم لاقيت انو كمان موقع مشاركه اجتماعية قلت عصفورين بحجر واللى زاد كمان انكو ناس زى العسل كلكو والله
MaDa 2011-09-05
ربنا يكرمك انت اللي عسل والله :(
MaDa 2011-09-05
بما إنك خاطب بقى .. تنصح الشباب العازب بإيه وتنصح نفسك بإيه :D
wael pauomi osman 2011-09-05
انصح الشباب العازب واقوله ان الجواز نص الدين توكل على الله
بس حط فى اعتبارك حاجتين مهمين جدا
1-لازم تعرف انك هتتحرم من حجات كتير كنت بتعملها قبل الارتباط فا لو مكنتش بتحب الانسانه دى بكل وجدانك وعلى استعداد انك موافق تضحى بناقص منها
2- المسؤليه لازم تكون ادها ادام نفسك قبل اى حد
MaDa 2011-09-05
ربنا يكرمك ويبارك فيك :(
wael pauomi osman 2011-09-05
وانصح نفسي بانى احاول اخفف من عصبيتى شوية على كل حاجه
MaDa 2011-09-05
وانا كمان :D
MaDa 2011-09-05
طيب اسأل انت نفسك سؤال وجاوب عليه :D
wael pauomi osman 2011-09-05
لا صعبة دى هههههههههههه
هو امتى العجله هتدور ؟ :(
wael pauomi osman 2011-09-05
تصدق يا مادا الناس شكلها مقلقه
MaDa 2011-09-05
هههههههههههههههههههههههههههه احنا نكمل بقى مدام ابتدينا وهم هييجوا دلوقتي :D
MaDa 2011-09-05
اوصف نفسك في خمس كلمات :D وممكن تزود لو عايز :P
wael pauomi osman 2011-09-05
طيب عايز افهم حاجه هو امتى المفروض دورى ينتهى ونختار اللى بعده ؟
MaDa 2011-09-05
لما نشبع منك ههههههههههههههههههههههه :D:P
wael pauomi osman 2011-09-05
1-طيب
2-حنون
3-شجاع
4-دماغى جزمة
كفاية 5 اصلى ملتزم بالاسئلة هههههههههههه
MaDa 2011-09-05
هههههههههههههههههههههههههه
MaDa 2011-09-05
حلم حلمته وفشلت في تحقيقه وحلم لسه محققتوش ونفسك تحققه ؟
wael pauomi osman 2011-09-05
لو عالاحلام اللى فشلت فى تحقيقها ددى كتير جدا الحقيقة
الحلم اللى نفسي احققة انى اعيش حياة مستقبلية كريمة فى حدود تحقيق الالتزامات الاساسية
MaDa 2011-09-05
ربنا يحققلك كل احلامك وميجبش فشل تاني ابدا :(
MaDa 2011-09-05
شكلي انا اللي هفضل أسأل .. طيب نكمل بالليل عشان يكون العدد كبير ولا ايه رأيك ؟
wael pauomi osman 2011-09-05
شكرا
wael pauomi osman 2011-09-05
لسه كنت هقولك ومش شرط يكون عالسايت عشان يجاوب المهم بس نجيب رجلين حد مكانى لحسن كده السكاكين ممكن تكتر
MaDa 2011-09-05
ههههههههههههههههههههههههه متخفش داحنا هنريحوك ونوضبوك :D:D
safaa 2011-09-05
بجد لعبة حلوة ممكن تدخلونى معاكوا
بس عاوزة اسأل وائل
هل انت تعرف العضو حاتم لانه كمان نفس المجال بتاعك
safaa 2011-09-05
يارب ياوائل تحقق كل احلامك
wael pauomi osman 2011-09-05
لا متشرفتش بمعرفتة
Noura 2011-09-05
انا اسأل سؤال فولي ( عملت ايه في المشكلة الي كنت بتسأل عليها وأخدت بإجابة مين ) :(
wael pauomi osman 2011-09-05
ريم بصراحة اكتر واحدهكانت عجبانى ردودها
Noura 2011-09-05
كده تمام
MaDa 2011-09-05
نورا وخالتو شغلوا اللعبة تاني :D
MaDa 2011-09-05
لو بقيت رئيس الجمهورية ومتاح ليك تنفذ قرار واحد بس وتسيب الحكم .. هتقرر ايه ؟
wael pauomi osman 2011-09-05
عدالة اجتماعية
Noura 2011-09-05
هشتكنا وبشتكنا ياريس
MaDa 2011-09-05
هههههههههههههههههههه
MaDa 2011-09-05
دورك يا نورا :P
Noura 2011-09-05
في إيه :p
MaDa 2011-09-05
تسألي :D
Noura 2011-09-05
اها هههههههههههه حار امخمخ بس ثواني
safaa 2011-09-05
انا كدة فاضلى 7 دقائق واقوم اشوف الاكل اللى على النار ..مليش دعوة
wael pauomi osman 2011-09-05
وانا مضطر استأنف علشان وراية شوية شغل اكمل معاكم بعد الغدا
زغباوية 2011-09-05
ايه ده كله ايه ده كله؟
زغباوية 2011-09-05
دورى مادخلتش خطيبتك الموقع ليه؟:D حتى تبقى طريقة تتعرفوا على بعض اكتر:(
السؤال بجد بقى اتعرفت على خطيبتك ازاى؟؟؟؟
الباشمهندسة 2011-09-05
تصدقي يا زغباوية اني كنت هسأل نفس السؤال بالظبط :( :( توارد خواطر
loleta1 2011-09-05
ربنا يوفقك مع خطيبتك واللعبه لذيذه طب مافيش فترة صباحية عشان ربات المنازل اللي زيي خصوصا أني كنت ناويه أبتدي بس وائل سبق؟
MaDa 2011-09-06
يلا يا وائل جاوب عشان تقوم انهرده من على الكرسي ونقعد عضو تاني :P
wael pauomi osman 2011-09-06
عن طريق الصدفة كانت معايا فى الجامعة نعرف بعض شكلا
وبعدين ضيفتها عن طريق واحد صاحبتها بعتالى مايل وانا لما يجيلى مايل فيه ايميلات كتير بعمل اد لكل الاميلات اللى بشك انها بتاعت بنات هههههههههه
المهم لما دخلت ماسينجر كلمتها سالتنى جبت المايل بتاعها منين قلتلها الحقيقة بردوا عملتى بلوك :)
وبعد فترة عشان ساكنين قريب من بعض اتقابلنا صدفة فى الشارع كل واحد داخل بعربيته فى وش التانى انا مخدتش بالى عشان مبابصش عل ىحد وانا ماشى هيا خدت بالها وفكت البلوك
وابتدا المشوار هههههههههه تقريبا لما شافتنى فى العربية اعجبت بيا
safaa 2011-09-06
حلو قوى الاعتراف دا ياوائل...هو انا هيقالى كدة ..لا مش لاعبة معاكوا
wael pauomi osman 2011-09-06
ههههههههههههههه
زغباوية 2011-09-06
يالا مين الضحية التانية
الباشمهندسة 2011-09-06
MaDa ان شاء الله ...طباخ السم بيدوقوا اول واحد ...مش كده ولا ايه :(
زغباوية 2011-09-06
يالا حد يبدأ يسأل مادا
الباشمهندسة 2011-09-06
ايه رأيك في بنات الجيل بتاعك ؟
wael pauomi osman 2011-09-06
تعلالى
الباشمهندسة 2011-09-06
عجبك السؤال يا وائل .... ابقي فكرني اسألهولك لما تعقد علي الكرسي :(
safaa 2011-09-06
بعد اية ما هو قعد وائل على الكرسى وخلاص
MaDa 2011-09-06
ايه ده انا مش هقعد دلوقتي خالص .. اختاروا حد غيري وخلوني في الآخر :D
زغباوية 2011-09-06
دخلت او بمعنى ادق وقعت خلاص يالا جاوب بقى واهى مرة تفوت ولا حد يموت وماتقلقش هاندخلك تانى فى الاخر:D
loleta1 2011-09-06
طب خلوني بداله عشان انا مش بدخل باللليل
MaDa 2011-09-06
لوليتا الضحية التانية :D
انا هروح منكم فين :P
MaDa 2011-09-06
خليكي فاكرة السؤال يا بشمهندسة لما اقعد هجاوبك :(
زغباوية 2011-09-06
انا هابدأ عملتى غدا ايه النهاردة ؟؟؟؟؟؟؟؟هههههههههه
loleta1 2011-09-06
طيب أبدؤا الأسئله
MaDa 2011-09-06
يلا جاوبي على سؤال زغباوية عشان اسأل انا كمان :D
loleta1 2011-09-06
ممبار وفته
MaDa 2011-09-06
اهئ اهئ اهئ انا جوعت .. لوليتا ممكن اعزم نفسي على الغدا انهرده :):)
زغباوية 2011-09-06
اوووووووووو ماليش فيهم يالا مين هايسأل
loleta1 2011-09-06
لأ
طبعا أعزم زيدوني كلها
MaDa 2011-09-06
ههههههههههههههههههههه طيب يلا جاوبيني بقى :D
MaDa 2011-09-06
لو اتحكم عليكي تدخلي الجيش هتعملي ايه :D
زغباوية 2011-09-06
سؤال سهل يامادا لانها دخلته قبل كدا فى ليبيا
MaDa 2011-09-06
انتي بتغشيشيها يا زغباوية :D
زغباوية 2011-09-06
اصلها حكت لنا قبل كدا
loleta1 2011-09-06
هأدخله زي مادخلته قبل كده كلنا فداء الوطن
زغباوية 2011-09-06
طيب هاسال تانى لو مسكتى وزراة الثقافة هاتعملي ايه؟؟؟
loleta1 2011-09-06
أكتر حاجة هأعملها هي دورات تدريبيه لجميع الأعمار على أنواع الفنون البسيطه ونشاطات للأطفال وكمان معارض
loleta1 2011-09-06
معارض لبيع المنتجات دي ودخلها يبقى للبلد
loleta1 2011-09-06
يعني ثقافه وشغل فراغ للأولاد وكمان دخل للبلد
MaDa 2011-09-06
شطورة يا لولي .. :(
loleta1 2011-09-06
أيه رحتوا فين يلا اللي بعده
MaDa 2011-09-06
ايه اكتر موقف في حياتك حسيتي فيه انك مظلومة ؟
loleta1 2011-09-06
لما بابا كان بيحاول بشتى الطرق يدخلني طب واناكنت عايزة فنون ولما وافقني خلاص فهمني إن فنون تطبيقيه زي الجميله بيدرسوا نفس الحاجات فدخلني فنون تطبيقيه لأنها قريبه من البيت وانا بحب رسم الأشخاص يمكن لو دخلت فنون جميلة كانت أضافت أكتر لموهبتي في رسم الأشخاص بس هو كان ليه نظرة إن فنون جميله فن من أجل الفن لكن فنون تطبيقيه فن يطبق في العمل
loleta1 2011-09-06
وكمان إتظلمت من خطيبي السابق لأنه كان شديد الغيره عليا وشك فيا بسبب كلام أصحابه البنات عني بعد خمس سنين أرتباط
loleta1 2011-09-06
اللي بعده
MaDa 2011-09-06
ايه اللي انتي مش حققتيه ونفسك بنتك تحققه ؟
safaa 2011-09-06
أكيد ماكنش يستهلك يالولو...
الباشمهندسة 2011-09-06
معلش علي مقاطعة اعترافات لوليتا انا جت لي فكرة ان اختيار اللي يقعد الكرسي يكون عمل غير تطوعي يعني اللي يقعد له عدد اسئلة وليكن 10 او 15 وهو في الاخر يختار مين اللي يقعد بعدة ولو اللي بعده ماقعدش نعملوا نداءات في الموقع ولو ماقعدش يبقي ننقصة 10 درجات كلنا من مشاركات ليه وده طبعا عشان اجراء غير قانوني ان احنا ننقصة من السيستم.

انا هسأل بس لما تجاوبي يا لولو علي مادا .
زغباوية 2011-09-06
حلو ياباشمهندسة
زغباوية 2011-09-06
وجميل اوى يالوليتا شوفتى ليا نظرتى فى الوزرا برضوا:(
MaDa 2011-09-07
فكرة حلوة يا بشمهندسة :(
loleta1 2011-09-07
انا مؤيده لأقتراح الباشمهندسه عشان اللعبه تسخن:-(
انا فشلت في أني يكون ردي جاهز وحاسم على الناس اللي بتغيظني وبتستغل طيبتي لأني طيبه زياده على اللزوم وذوق برضه زياده عن اللزوم وكمان أتعودت إني أعدي وأضغط على أعصابي ونفسيتي نفسي بنتي تكون وسط وتكون أذكى مني وردها جاهز وتعرف تاخد حقها وتحط كل حد في وضعه بدون خروج عن الأدب وماتخليش حد يستغل طيبتها ويؤذي مشاعرها ونفسيتها
loleta1 2011-09-07
بصوا كل اللي عنده سؤال ليا عن أي حاجة يكتب سؤاله ومش لازم يستنى إجابتي فوراأنا هأرد على كل الأسئلة بلا أستثناء:-(
safaa 2011-09-07
كلامك صح يالولو انتى والباشمهندسة ...وبكدة هكون بعدك على طول فى الكرسى...ربنا يستر!!
loleta1 2011-09-07
تمام عندك أي سؤال ليا؟
safaa 2011-09-07
بتنظمى وقتك ازاى وما هى الاولوية عندك
loleta1 2011-09-07
عشان أنظم وقتي بأتعرف على نفسي وقدراتي وواجباتي وأرتبها وأنفذها
يعني انا ربة منزل ومتزوجة وعندي بنوته زي القمر وبحب الفنون والفن وبحب الناس وبحب النظام
يبقى رقم واحد بيتي لازم يكون نظيف وزي الفل وطلبات زوجي وطلبات بنتي وانا شخصيا زي الفل
رقم 2مطالبي الشخصية زي الرسم الدخول على النت
فبنام بدري وأصحى بدري أعمل مرور كامل على البيت وبعدين أفطر بنتي وأجهز للغداء أتبل اللحم مثلا وقطع الخضار وبعد كده بأدخل على النت وزوجي بيرجع على 5 من 3ونص بأقفل النت وأبدأتحضير الغداء وتوضيب نفسي وبنتي لإستقبالة وتنفيذ مطالبةه وبالليل بعد ماينام بأقوم وأمارس بقى حاجة تشحني بالإيجابيه زي الرسم أوالكتابه أو القراءةأو سماع الأغاني وهكذا
بس أهم حاجة إني مابأجلش عمل اليوم للغد وإيدي في بيتي أول بأول عشان مايصعبش عليا وبأنفض الكسل ولازم أنفذ كل ده عشان انا أرفض تماما إني أكون مقصرة أو مهمله في بيتي أونفسي
والحمدلله بقالي 5 سنين على كده
safaa 2011-09-07
هايلة يالولو بس مش عارفة اديلك +1 ...ماهو سى مادا مخليها كلها تعليقات
loleta1 2011-09-07
خلاص إديني سؤالك اللي بعده
safaa 2011-09-07
انا اعرف انكى صريحة جدا ..هل الصراحة دى بتسبب لكى مشاكل مع من حولك ؟ملاحظة
ممكن الاحتفاظ باى شىء متخصص بشؤنك العائلية
loleta1 2011-09-07
لأانا بقول الصراحة واللي فقلبي على لساني صراحة خاصة بيا أناوالأهم أني مابكونش صريحة مع الآخرين إلا إذا طلب رأيي برضه عشان مأجرحش حدومأتدخلش في شئون حد
أما بالنسبالي ساعات الصراحة والحق مابتعجبش اللي قدامك يعني لو قلت مثلا إني بحب الأغاني برغم كونها نوع من الملهيات وماأقدرش أستغنى عن سماعها في ناس بتعتبرني تافهه أو ضايعة برغم إني مش بأقصر في واجباتي ولافروضي
وفي ناس بتبقى عايزاكي تكدبي عليها بس مابقدرش يابخت من بكاني وبكى عليا ولا ضحكني وضحك الناس عليا مابغيرش مبدأي
يعني خطيبي السابق ذكره زعلني لأنه أتكلم مع بابايا بشكل مش ظريف فرفضت أرد عليه ولأنه مريض بالغيره كلم زميلاته في الشغل بتاعي وطلب تقرير عني لأعتقاده إني شايفه شوفه تانيه وكان ليا زميل في شغلي وانا بأوزع شكولاتة خطوبتي قاللي انا زعلت لأنه سبقني وخطبك ورديت بدبلوماسية كل شيئ قسمه ونصيب وبكرة تلاقي اللي يستاهلك
زميلات خطيبي غيرانين مني قالوله فلان بيكلمها ويلاحقهاواجهني قلتله ده زميلي ومافيش بنا أي شيئ خاص بس عايز الحق حصل وقالي كذا وكذا وكذا وهو كان معودني على عدم الكذب ماعجبوش الكلام وفسخنا الخطوبه في ناس قالتلي ليه قلتي كده أنتي بتغيظيه ده راجل زي أي راجل شرقي ورديت انا
مابكدبش وكان سهل قوي أكدب وأكسبه بس هأخسر نفسي
MaDa 2011-09-07
برافو يا لوليتا :(
MaDa 2011-09-07
نفسك في ايه دلوقتي حالا ؟
loleta1 2011-09-07
نفسي أتعلم عزف على الجيتار ههههههههههههه
MaDa 2011-09-07
هههههههههههههههههههههههههههههه
MaDa 2011-09-07
لو باب البيت خبط دلوقتي .. نفسك يبقى مين اللي على الباب ؟
loleta1 2011-09-07
محصل الكهربا عشان الفاتورة بسب التكييف هتبقى مذهله وانا عايزة أدفعها وقلبي يرتاح
الباشمهندسة 2011-09-07
مين اقرب حد الي قلبك ....الزوج الام الاخت الصديقة؟
loleta1 2011-09-07
الحبيب ههههههههههههه
MaDa 2011-09-07
ههههههههههههههههههههههههههه :D:D
الباشمهندسة 2011-09-07
لا سؤالي ماتفهمش .... اقصد تحبي تفضفضي وتشكي لمين طبعا بعد ربنا ... عشان الشكوي لغير الله مذلة :(
MaDa 2011-09-07
بدون قطع الكلام .. لوليتا هتختاري اللي هيقعد بعدك تن شاء الله بس يارب تقومي عشان انتي شكلك حبيتي الكرسي ومش هتقومي الا لما ننزل التحرير ونخلعك ههههههههههههههههههه :D:D
safaa 2011-09-07
لو اى حد من اللى بيلفوا بالبضائع فى الشقق وخبط عليكى وانتى لوحدك فى الشقة هتعملى اية؟
loleta1 2011-09-07
ماقلتلك الحبيب مش مصدقاني اللي بحبه بفضفضله
safaa 2011-09-07
معلش خليها تجاوب على اخر سؤال
loleta1 2011-09-07
انا مش هأقوم غير لما تزهقوا مني انا شخصيا معاكوا للصبح،وعايزةطنط صفصف بعدي لأنها حبيبتي وأحبها تبقى ملزماني على طول
safaa 2011-09-07
وانا كمان يالولو ..ويالا وافقى على الصداقة عندك على الفيس بوك
loleta1 2011-09-07
ولا هأعبروا انا حتى محصل الكهربا والغاز مش بأفتح لهم غير ومعاهم البواب الدنيا مش أمان وانا ست لوحدي مع بنتي ماينفعش أفتح لحد ماأعرفوش فبرد وأقولهم يمشوا
safaa 2011-09-07
بجد انتى راااائعة
safaa 2011-09-07
يالا بقى ابتدوا معايا خلينى اخلص
MaDa 2011-09-07
يعني كده لوليتا قامت خلاص .. ولا ايه ؟
اي يا لولي كفاية كده وندي فرصة لخالتو ولا لسه شوية ؟:(
safaa 2011-09-07
يالا جهزوا كل الاسئلة بس هجاوب على مهلى ومحدش يزعل منى
loleta1 2011-09-07
ياصفف ياحبيبتي نفسك في أيهماعملتيهوش زمان وممكن يتعمل دلوقتي
MaDa 2011-09-07
خالتو صفاء دلوقتي على الكرسي :(
loleta1 2011-09-07
ماتخافوش هأقعد تاني بس كمان شويه القعده فيه مريحة والله
MaDa 2011-09-07
اوكشن يا لوليتا بس دلوقتي خالتو صفاء هي اللي على الكرسي وأكيد هتلاقي اسئلة كتير من كل اللي في الموقع :(
safaa 2011-09-07
انا كان نفسى اكمل تعليمى واشتغل..ولانى تزوجت وانا فى 2ثانوى فمكنش ينفع اذاكر وانا معى اطفال صغيرة
MaDa 2011-09-07
ايه اصعب موقف قابلتيه في حياتك واتعاملتي معاه ازاي ؟
wael pauomi osman 2011-09-07
شفتى مين من اللى معانا على موقع زيدونى فيس تو فيس ؟
الباشمهندسة 2011-09-07
لازم ازنقك .... بتحب مين اكتر واحد في اولادك وبناتك ؟؟؟؟
ها ردي بأمانة واوعي تعملي زي بتوع التليفيزيون وتقولي كلهم زي بعض
MaDa 2011-09-07
صعب سؤالك يا بشمهندسة :D
MaDa 2011-09-07
يا جماعة بعد خالتو صفاء تجاوب على الأسئلة ياريت محدش يسأل الا لما اللي قاعد يجاوب عشان مش يبقى في كذا سؤال ورا بعضه :(
safaa 2011-09-07
علشان كدة اول ما عرفت اقعد واكتب على الكمبيوتر وخداها جد قوى وكأنى بشتغل
safaa 2011-09-07
ياجماعة الباب بيخبط شوية واجلكم
زغباوية 2011-09-07
عندك 3 اسئلة ياصفصف يالا جاوبى علشان اسئل
والباشمهندسة ولادها كلهم عارفين مين اكتر واحد صفصف بتحبه فى ولادها ومش زعلانين ولا حاجة
زغباوية 2011-09-07
بعد ماتجاوبى ياصفصف عندى كلمة هاقولها
safaa 2011-09-07
اسفة على التأخير
safaa 2011-09-07

اصعب موقف قابلتة..الايام العصيبة اللى شوفناها كلنا ايام الثورة والمظاهرات اللى كانت موجودة وخوفى على الناس والشباب اللى فى ميدان التحرير وكأنهم اولادى بس للاسف معملتش حاجة غير اننى كنت بدعى لهم وخلاص
safaa 2011-09-07
واحدة واحدة عليا ياجماعة..هأخذ نفسى الاول
safaa 2011-09-07
بالنسبة لسؤال وائل
بقول لة انا اعرف ناس كتير معانا منهم اولادى وطبعا ابنى الكبير وصاحب الموقع وكمان اصحاب الاولاد وكمان ولى اقارب كثيرة ومنهم كبير وصغير
زغباوية 2011-09-07
طيب جاوبى على سؤال الباشمهندسة علشان اسئلك
safaa 2011-09-07
بالنسبة لسؤال الباشمهندسة وهى زوجة ابنى monem
انتى عارفة ان بحب اولادى كلهم زى بعض ..بس قلقى عليهم هو اللى بيختلف
الباشمهندسة 2011-09-07
تحسي انها بتتهرب من السؤال يا زغباوية مش كدا .... وراكي وراكي :(
safaa 2011-09-07
وانا تحت أمرك
safaa 2011-09-07
يالا قولى يازغباوية
زغباوية 2011-09-07
هى جاوبت بين السطور ياباشمهندسة اللى بتحبه هى اللى ذكرت اسمه ههههههههههه
زغباوية 2011-09-07
لو معاكى مليون جنيه تعملى بيها ايه؟؟؟؟؟؟
الباشمهندسة 2011-09-07
ياسلام ياسلام هي دي الاسئلة يا زعباوية :p :o
زغباوية 2011-09-07
يالا جاوبى ياصفصف
safaa 2011-09-07
اول حاجة هعملها 1- نروح نحج انا وبابا
2- اشترى شقة لحاتم حبيبى
3- وطبعا اطلع فلوس كتير للمحتاجين
ولو هفتكر حاجة تانية هقولها على طول
الباشمهندسة 2011-09-07
طب عملتي حساب الدعاية لموقع زيدوني في المليون ده :(
الباشمهندسة 2011-09-07
سؤالي : لو حبيتي تسأفري برة تختاري اي بلد تعيشي فيها ؟
safaa 2011-09-07
اكيد طبعا عاملة حسابى ...وكمان اية !! ..دا انا هرش عليكم رش شديد جدا بس يجوا الاول وهتشوفى هعمل اية
safaa 2011-09-07
اروح ميلانو ..لانى عشت فيها كام شهر مع زوجى.. وكانت من اسعد ايام حياتى
الباشمهندسة 2011-09-07
عيني يا عيني علي ايطاليا ومواني اطاليا :(
safaa 2011-09-07
انا شايفة انوس على الموقع ليه مش بتسألينى قبل ما انزل من على الكرسى
زغباوية 2011-09-07
طيب انتوا اتفقتوا على عدد الاسئلة اللى هاتتسئل للضحية ولا لسة
MaDa 2011-09-07
ازاي انتي وعمو عرفتوا بعض واتجوزتوا.. ؟ :(
Noura 2011-09-07
اولا :انا عايزة نصيبي في المليون جنيه
ثانيا بقا:ليه بقا حضرتك اتجوزتي بدري كده
safaa 2011-09-07
لان اختى الكبيرة متزوجة اخو عمك عبد المنعم وعمك شافنى يوم الفرح بتاعهم دا عمك هو اللى قالى بعد كدة..
وفى الفترة الاعدادى والثانوى كان بيتقدموا لى كتير وواحد منهم راح لزوج اختى وطلب ايدى منة ..بعدها عمك اتقدم وخطبنى وكان يوم
14- 9 -96
safaa 2011-09-07
وحاضر يانورا اوعدك لما يجيلى المليون.. لكى نصيب كبييييير قوى فية ومش هنسى ..زمان ماكنتش اقدر اتكلم واقول حاجة ..اللى ماما وبابا يقولوا علية هو اللى يمشى وعلى ايامنا كانت البنت بتتزوج فى سن صغير
safaa 2011-09-07
هة خلصتوا اسألة ولا لسة فية حاجة تانية
Noura 2011-09-07
سيدي يا سيدي عالحب وسنينه
يعني عينيكي مجتش عليه كده ولا كده قبل هو مايشوفك ;)
زغباوية 2011-09-07
اعترفى اعترفى:(
الباشمهندسة 2011-09-07
سنة 96 احنا هنخم ياصفصف :( :( :(
زغباوية 2011-09-07
هههههههههههههههههههههه حلو حلو يبقى انا كدا عندى 10 سنين هههههههههههههههههه يادقيقة الملاحظة ياباشمهندسة:P
MaDa 2011-09-07
ربنا يخليكو لبعض :(
safaa 2011-09-07
انا ااسفة ياجماعة تاريخ الخطوبة هو14-9 1969 دا حتى محفور على الدبلة
ويا نورا كنت اول مرة اشوفة لما جة عندنا يخطبنى ..حتى هو يبقى يقول لكم
safaa 2011-09-07
شكرا يامادا
shady 2011-09-08
يا جماعة انا فاتنى الموضوع دة كان نفسى اسألكم بس يلا ماليش نصيب فى الرمة اللى جاية ان شاء الله ولما تبتدى تلعبوها ابقى ابعتلى رسالة على الفيس بوك يا سى مادا
shady 2011-09-08
المرة*
loleta1 2011-09-08
ياسلام ياشودا أنت تؤمر كل مانتجمع هنديلك إخطار عشان تبقى معانا وعشان كمان تشرف الكرسي بقعدتك ونسألك برضه
safaa 2011-09-08
اوعوا حد يقومنين ..لسة شوية ...دى لعبة حلوة ...يالا اسألوا
shady 2011-09-08
طيب انا ها اسأل بقى
اية هيا اهم حاجة فى حياتك؟
واية اكتر حاجة بتكونى مبسوطة وانتى بتعمليها؟
واية الحاجة اللى نفسك تعمليها لحد دلوقتى ولسة ما تحققتش؟
انا لسة بسخن
safaa 2011-09-08
اكيد ولادى واحفادى وطبعا زوجى..بس اوعى تقول لة كدة لا يتقل عليا
-بكون مبسوطة لما اساعد عمك عبد المنعم فى تحضير منتج من منتجات النحل(حبوب اللقاح) وخصوصا لما يكون حد محتاجها وبحمد ربنا عليها لما المريض يخف..وكفاية كدة مش هتكلم تانى ياشادى فى الموضوع دة لحسن مدير الموقع يفكر انها دعاية
الحاجة اللى نفسى اعملها ولم تحقق حتى الان طبعا انى احج
وحاجة تانية..نفسى اعرف الناس كلها على حبوب اللقاح (خبز النحل ) وانا تكلمت عنها كتير فى الموقع لانها فعلا تستحق المعرفة..وبقول كدةعلشان لو حد قريب منة منحل او يقدر يعمل منحل علشان الكل يعرف اد اية هو مفيد وراااائع
loleta1 2011-09-08
طنط لو جالك حد من أولادك واقع في مشكله مالهاش حل أو معقدة حبتين بتعملي إيه وبتنصحيه بإيه؟
safaa 2011-09-08
اولا انصحة بالتوجة والتقرب الى الله وبالهدوء النفسى وساعتها بتتحل بأذن الله ولو معقدة بخلى زوجى معانا فى حل المشكلة لانة حكيم جدا
زغباوية 2011-09-08
ايوة بتنصحيه بالهدوء وتقلقى انتى مش كدا؟؟؟:(
الباشمهندسة 2011-09-08
ليه التسيح ده :(
زغباوية 2011-09-08
هو مش كرسي الاعتراف صحيح ياصفصف شكل الكرسي عجبك:P
loleta1 2011-09-08
عايزين ضحية جديدة أختاري ياصفصف بما اننا متجمعين
safaa 2011-09-08
اكيد عجبنى الكرسى ..لكن لازم انزل علشان حد تانى يقعد علية ..ولو انة مرييييييح جدا ...يالا ياشادى استعد لاجابة السؤال
وانت فى الغربة ياشادى وقتك بيضيع ازاى طول اليوم ولو عندك اى مشكلة بتلجأ لمين وتفضفض معاة
shady 2011-09-08
مممم الكرسى جالى كدة بسؤال على طول بدون تمهيد ,,, طيب
انا بقى بشتغل محاسب مالى زى ما انتو عارفين وساعات بكون فاضى وساعات بكون مشغول جدا بطريقة ما يتحملهاش انسان يعنى لاما فاضى لاما فى ستين تيلفون على المكتب وعلى الموبايل وناس عايزة ايميلات وفاكسات وابلغ العملاء بحاجات وكلام من دة كتير غير طبعا مسؤلية الفلوس وسندات القبض والصرف يعنى من الاخر اليوم كله بيضيع فى الشغل والنت هو صديقى العزيز اللى بيسلينى فى الغربة ومن غيره ها احس بوحدة فظيعة انا فعلا مش بشوف التلفزيون على طول على النت فيس بوك وتويتر ومكتوب ويو تيوب واضاف اليها مؤخرا زيدونى , ولما بتكون عندى مشكلة جامدة قوى يعنى ساعات بكلم والدى علشان هو رأيه دايما صح وبنسبة كبيرة قوى قوى قوى بس انا اصلا بطبعى كتوم ومش بحكى لحد ودايما بحب اعتمد على نفسى فى كل حاجة وعندى الشجاعة انى اواجه اى مشكلة وبحاول لو دخلت فى مشكلة كبيرة ومش هقدر اكسب منها حاجة بحاول على قد ما اقدر انى مخسرش وما ارجعش لورا بس كدة , اللى عندة اسئلة يقول يا جماعة انا معنديش اى مشكلة فى الصراحة
safaa 2011-09-08
طيب اية رأيك فى الموقع الجديد زيدونى وبصراحة
shady 2011-09-08
واللهى ومن قلبى موقع جميل هو مش تواصل اجتماعى بس هو مفيد والواحد بيستفيد منه و كمان اعضائه محلينه ومخلينه زى السكر بتعليقاتهم الجميلة والجو الاسرى والالفة اللى موجودة وتحسى انك كل الاعضاء محترمين ودى حاجة مش سهلة هو فى ناس واخداها جد حبيتبن بس برضة فى ناس بتحب تهظر وتضحك وتفيد وتستفيد وانا من الناس دى واتمنى النجاح للموقع من كل قلبى علشان طبعا صاحبه ابن خالتى وعلشان هو موقع مفيد ودى حاجة كويسة وانا بشجعه ومستعد اشجعه بأى طريقة لو اتطلب منى حاجة
زغباوية 2011-09-08
طيب وبكل صراحة مين بيضايقك فى الموقع وليه؟؟؟؟؟بالرغم من انى عارفة الاجابة
shady 2011-09-08
على فكرة انتى مش عارفة الاجابة اصلا لان واللهى مش مضايق من اى حد فى الموقع هو احيانا بيكون فى اختلاف فى وجهات النظر بس دة علشان التفكير مختلف وكل واحد بيبص للحاجة من وجهه نظره هو لكن عمرى ماشيلت من حد انا ممكن اضايق بس بيكون ساعتها بس لكن بعديها بشوية الموضوع بيكون اتنسى وكمان احلى حاجة هنا اصلا ان كلنا اخوات واصحاب
زغباوية 2011-09-08
طيب كويس طمنتنى افتكرت انك زعلان منى ولاحاجة علشان ساعات مبعرفش انقى كلماتى وبكون مدب
زغباوية 2011-09-08
سؤال بجد بقى نفسك فى ايه عايز توصله؟؟؟؟؟
shady 2011-09-08
انا نفسى اكون مدير مالى وا ادارى وانا عارف ان شاء الله اانى هكون فى يوم من الايام كدة علشان كل زمايلى اصلا بيقولولى انى ادارى كويس وفى ناس بتشوفنى فى الشئون القانونية للموظفين علشان انا صارم معاهم ومحدش بيعرف يحور معايا وعايز بيت محترم و وظيفة محترمة وعربية محترمة كأى شاب طموحاتى مش كبيرة قوى وفيلا وبورش والكلام دة وربنا يقدرنى عليها يارب
safaa 2011-09-08
شادى: عاوزة اعرف منك اية الى ناقص فى الموقع ومش موجود
shady 2011-09-08
واللهى انا شايف الموقع تمام جدا بس هو لو فيه حاجة يومية بتنزل عليه هايشد الناس اكتر يعنى مثلا كل يوم معلومة طبية , او كل يوم معلومة منزلية او نصيحة زوجية او اسرية او حتى حكمة بالتالى العضو ها يخش كل يوم علشان يقرأ االملومة بتاعت اليوم ودة ها يشد الناس اكتر وكمان لو اتظبط موضوع الرسائل دة بين الاعضاء للتهنئة او شات جماعى بس مش اكتر دة اللى انا شايفه حاليا
Noura 2011-09-08
انا اسأل بقا : نفسك تعمل ايه دلوقتي حالا ؟
shady 2011-09-08
fنفسى انزل اجيب كارت شحن علشان ارغى شوية فى التيلفون ومش لاقى المحفظة وفيها الاقامة والرخصة والفلوس ومش عارف اعمل اية وضيفى لكل دة انى جعان وعايز اشترى حاجة اكلها
safaa 2011-09-09
بعد 6 ساعات.... ياترى لقيت المحفظة ياشادى لانك قلقتنى بس علشان الاوراق اللى فيها
shady 2011-09-09
ايوة لقيتها ونزلت وجيبت كارت شحن وجيبت اكل واتعشيت فى مطعم تركى بحبه جدا والحمد لله
safaa 2011-09-09
طيب الحمد لله قلقتنى عليك ياشادى خلى بالك بعد كدة ...وبنا يسترها معاك
زغباوية 2011-09-09
اولا ربنا يوفقك وتحقق كل اللى نفسك فيه واكتر
ثانيا الحاجات اللى شايفها فى الموقع كلها جميلة وافكار حيوية مش بتقولها ليه فى موضوع الاستفسارات
ثالثا بالهنا والشفاوقولنا بقى كلت ايه فى المطعم التركى:D
shady 2011-09-09
ربنا يخليكى يا خالتو
شكرا يا زغباوية اكلت حاجة اسمها طاجب لحمة بالجبنة وسلطة خضراء بس كدة
MaDa 2011-09-09
معلش جيت متأخر .. أحييكي يا خالتو على إجاباتك ويارب الكرسي يكون عجبك :(

MaDa 2011-09-09
بما ان شادي بقى هو اللي قاعد على الكرسي .. جاوب بقى :D

ايه هو اكتر وقت بتحس فيه بالغربة .. أي غربة?
safaa 2011-09-09
دا حلو جدا يامادا ...على الاقل الواحد بيطلع كل اللى عندة
MaDa 2011-09-09
الحمد لله إنه عجب حضرتك :(
shady 2011-09-09
شوف يا سيدى اكتر وقت حسيت فيه بالغربة كان مرتين
كان فرح واحد من اصحابى القريبين منى قوى ومحضرتوش وتانى مرة كانت خطوبة صديق عمرى ودعمت لما اتفرجت على الكليبات والناس واللمة وكان نفسى اكون جمبه فى يوم زى دة
MaDa 2011-09-09
فعلا احساس وحش اوي :)
MaDa 2011-09-09
الحياة في مصر أحسن ولا في السعودية احسن ؟؟
shady 2011-09-09
لاء فى السعودية ياباشا انا فى مصر جيبت 4 كيلو مانجا ب 100 جنية يعنى صباح الخير يا مصر الواحد محتاج يبقى مرتبه ما يقلش عن 3000 علشان يعرف يعيش وياكل كويس
MaDa 2011-09-09
ده بالنسبة لمستوى المعيشة .. طب بالنسبة للناس .. للنظام ... إلخ
يعني لخصلنا الفرق بين هناك وهنا من كل الجوانب :(
shady 2011-09-09
صباح النظام هنا فى السعودية كل حاجة نظام اصلا يعنى الاجنبى او السعودى مايعرفش يضحك على الحكومة مثلا يعنى لو مأجر عربية وعملت بيها مخالفة بتنزل عليك انت مش على العربية حتى لو كنت اتصورت بالكاميرات او الرادار مش زى مصر مظلومين بتوع تأجير العربيات وكل الناس هنا بتقف فى اشارات المرور حتى لو الساعة 5 الفجر ومفيش كاميرات ولا فى عساكر مرور للعلم , لو واحد معدى على رجله الناس تستناه يعدى الاول وبعد كدة هما , فى اى مكان بنك او قطاع حكومى فى مكان مخصص للسيدات ممنوع دخول الرجال فيه حتى الاطفال طالما عمرهم يزيد عن 6 سنين ممكن تشترى كل حاجة من لبس او السوبر ماركت الصغير جدا بالصرافة مش محتاج تنزل بفلوس اصلا كل حاجة ليها نظام وطوابير ومدخلين كل حاجة على الانترنت الشوارع نظيفة جدا والاسفلت حتى مختلف وطبعا انا بحس على بسوق وتحس قد اية العربية بتكون مستريحة على الارض غير مصر , لو مثلا روحت اشتريت كيس سكر او رز ولقيت التاريخ منتهى بترفع سماعة التيلفون المحل يتقفل على طول , طبعا فى كوسة و واسطة وممكن يتفتح تانى بس فى فرق شاسع الناس اصلا عايزة تبقى منظمة مع انهم بدو ومخهم طخين اصلا , لكن المصريين مش بيحبوا النظام ولا الطوابير لانهم شعب فهلوى ودة طبعا للطبقة الغير متعلمة الاكثر فى مصر , وهنا فى حاجة اسمها مرور شكل العربيات وهيا ماشية اصلا محترمة غير مصر خالص كله داخل فى بعضة يا مادا محدش هنا بيستخدم الة التنبيه بتاعت العربية خالص انا نزلت مصر صدعت كل واحد ماشى يدوس عليه كأنه بيطلع فلوس و حاجة اخر قرف يعنى ,
MaDa 2011-09-09
لكي الله يا مصر :)
عشان كده عايز اقولك .. سنتين وهتلاقيني عندك بإذن الله :(
shady 2011-09-09
انت عارف هنا لو عربيتك عطلت عربية شرطة معدية من جمبك تقف معاك وفيها معدات علشان تساعدك فيها وصلة بطارية وكوريك والعسكرى هو اللى يعمل كدة بنفسه وكمان فيها حديد من قدام علشان يقدر يزقك لحد ورشة التصليح و لو توهت بالعربية فى حاجة اسمها امن الطرق تتصل بيها وتدلك على الطريق اللى انت عايزاه ولو مش عارف توصل او تخرج على طريق عمومى بيحددو مكانك وبيجولك ويوصلوك لاقرب مكان تعرف تمشى منه , مهما حكيتلك هكون مقصر يارب اشوف مصر كدة
MaDa 2011-09-09
يارب يا شادي :(
الباشمهندسة 2011-09-09
مرحبا بك علي الكرسي .... ياتري بتلاقي معاملة كويسة من العرب عندك ولا في اضطهاد زي مابعض المصرين ما بيقولوا.... وبتتصرف مع ده ازاي ؟
shady 2011-09-09
واللهى يا باشمهندسة مفيش اضطهاد ولا حاجة بس احيانا بيكون فى تفرقة عنصرية بيفرقوا بينك وبين السعودى وبيميزوهم فى حاجات كتير بس ترجى وتقولى ماهى بلدهم برضة بس انا شغال مع ناس كويسة ومش بتفرق بين الناس وانا اصلا شخصيتى مش بتتحمل دة يعنى لو حسيت انى قليل اكيد هسيب الدنيا كلها وارجع بلدى حتى لو هنا بيدونى مليون جنية فى الشهر , بس فى المطار بتلاقى للسعودين فقط طابو مخصص , فى طلوع الرخصة للسعودين اسهل من الاجانب , السعودى حر يشتغل فى اى حتة ويقدر ياخد حقه من مكتب العمل لكن الاجنبى مايشتغلش الا عند كفيله مش بنفس القوة دى فى مكتب العمل, المرة الوحيدة اللى حسيت بالفرق كنا فى فرح بنت صاحب الشغل ولقيت اننا متخصصلنا مكان والسعودين مكان على الاكل بس يعنى لان هنا الفرح عبارة عن عشاء كبير ولازم لحمة ورز وكدة بس لقيت كل المدرين المالى والادارى وكل الناس قاعدة معانا حتى اشوية سعوديين كانو معانا علشان كدة قول عادى يعنى مهو معانا سعودين برضة وكان نفس الاكل على فكرة
الباشمهندسة 2011-09-09
كل اللي انت قولته وده ومفيش اضهاد ماهو ده الاضطهاد بعينه لكن جايز انت ربنا موقعك في ناس كويسة لكن اكيد فيه مصريين كتير بيعانو
shady 2011-09-09
لا هو بالنسبة لموضوع المطار او الرخضة فهيا بلدهم ولازم يكون المواطن مميز وعلى فكرة مصر المواطن فيها مميز , بس موضوع الشغل دة نظام البلد واللى مش عاجبوا ما يشتغلش هنا ومش الاجانب هما اللى هيغيروا نظام البلد
shady 2011-09-09
زى ما الاجانب فى مصر لازم يحترموا قانون مصر يعنى مثلا لو سعودى سايق عربية على سرعة 120 كيلو و وقف فى كمين مش ها يروح يقول للظابط احنا عندنا السرعة 120 وما تدنيش مخالفة اكيد ها يدفع علشان هو لازم يحترم قانون البلد اللى هو فيها واحنا كمصريين مش بنحب حد يدخل فى بلدنا ويعمل اللى هو عايزه يبقى لازم نحترم وجهة نظرهم وعلى فكرة مش السعودية بس اللى كدة كل الخليج والله اعلم اوربا وامريكا ازاى
safaa 2011-09-10
شادى:مين اكثر حد تحس انه بيحبك قوى وخايف عليك دائما ..مع مثال لذلك
shady 2011-09-10
واللهى صعب احدد الموضوع دة لان بفضل ربنا فى ناس بتحبنى جدا وبتخاف عليا واكيد ماما وبابا واهلى وليا كمان كام صاحب كدة قريبين جدا منى غير بقى البنات مقولكيش :P
safaa 2011-09-10
انا عارفة ياشادى ان انت هتقول كدة بس انا بنكشك علشان تقول لى ماما وابلغها بالكلام الحلو دة
Reem 2011-09-11
يانهار اربعه قعدوا على الكرسى وانا معرفش مش كان حد يقولى يا جماعه عشان ادخل معاكوا ف الحوار عموما حصل خير هههههههههه
MaDa 2011-09-11
لسه فيها واديكي دخلتي يا ريم .. ومكانك في الكرسي محجوز بس شادي ينزل من على الكرسي ونشوف مين اللي هيقعد يمكن تكوني انتي :D
shady 2011-09-11
اية هو دة يا مادا انا نزلت هو انا هقعد العمر كله ولا اية , انزلى ياريم بيتك ومطرحك
MaDa 2011-09-11
ههههههههههههههههههه خلاص شادي نزل من على الكرسي واختر ريم تقعد مكانه :D
يلا يا ريم :D
الباشمهندسة 2011-09-11
فين ريم .... هربت ولا ايه .... هو الكرسي بيزحلق ولا ايه :(
MaDa 2011-09-11
اسألي يا بشمهندسة وهي اول ما تقعد تجاوب .. هتروح مننا فين :D
الباشمهندسة 2011-09-11
ياريم ... ايه رأيك في شباب اليومين دول ... اللي من جيلك طبعا؟
MaDa 2011-09-11
هو ايه حكاية السؤال ده يا بشمهندسة :D
الباشمهندسة 2011-09-11
بحب اعرف توجهات بنات وشباب الجيل الحالي باعتباري سابقه بجيل عنكوا ياتري هتقولوا كلام زي اللي احنا في عمركو كنا بنقوله ولا فيه جديد ... نوع من مواكبة العصر :(
MaDa 2011-09-11
تمام .. يلا يا ريم جاوبي :(
Noura 2011-09-11
سؤالي : ياؤيت ياريم تقوليلي شجرة العيلة بتاعتك اللي هنا في زيوني ؟ :(
زغباوية 2011-09-11
وسؤالى: ايه هو حلمك اللى عايزة تحققيه؟؟
Noura 2011-09-11
وقولي ال cv بتاعك ياريم ؟
Reem 2011-09-11
ايه يا جماعه كل الاسئله دى براحه لاعليا شويه
اولا سؤال البشمهندسه شباب الجيل ده بحس انه هو مستهتر وميقدرش يشيل مسؤليه بس مش كلهم بس معظمهم بقى كده وكمان اخلاقهم بقت مش حلوه خالص وتصرفاتهم كمان وقليل لما تلاقى شاب محترم دلوقتى اصلا الواحد بيخاف ينزل الشارع بسببهم وكمان لبسهم برضو بقى وحش وطريقه كلامهم بس ياريت بعد الثوره يكونوا اتغيروا واتعدلوا شويه
خلاص كفايه عليهم كده هههههههه
MaDa 2011-09-11
فعلا الواحد بقى بيخاف ينزل اخته او مامته الشارع بس هم مش بيرضوا وبينزلوا برضه :)
Reem 2011-09-11
سؤال نورا بصراحه انا مكنش ليا شجره عيله هنا خالص معرفش حد هنا غير محمد بس وهو كمان اللى قالى على زيدونى فدخلت واشتركت فيه وعد كده جت سما ومحمد ودول اخواتى التوام بس
MaDa 2011-09-11
محمد اللي هو مادا يعني :D
Reem 2011-09-11
سوال زغباويه انا نفسى ابقى مهندسه شاطره واعرف استفيد من اللى بتعلمه كويس بجد وبعد كده بقى ياتى الجواز والاطفال وكمان نفسى اخلى ماما تحج لان كل م تيجى تعمل حج او عمره يحصل حاجه ومترحش ربنا يسهل
Noura 2011-09-11
ان شاء الله ربا يكتبهلها وتحج وتدعيلنا بقا على الله تنسي تقوليلها
Reem 2011-09-11
الاسم:ريهام علاء الدين
السن:19
انا بدرس ف هندسه شبرا ف تانيه اتصالات
عندى 4 اخوات وانا الكبيره كفايه كده
Reem 2011-09-11
ههههههههههه لا مش هنسى يا نورا ان شاء الله بس هى تروح الاول ههههههههه
Noura 2011-09-11
هندسة شبرا يعني جارتي وجبتي ريم دي من فين :D
Reem 2011-09-11
طيب حلو اوى احنا جيران اهو يعنى لازم تقفى جنبى بقى وتخليكى حنينه عليا شويه ف الاسئله هههههههههه
Reem 2011-09-11
لا ريم ده اسم الدلع عشان كده كتبته لكن انا اسمى ريهام
shady 2011-09-11
ريم انتى بقى شايفة ان الولاد معظمهم بقى مستهتر ومايقدرش يتحمل المسؤلية واخلاقهم بقيت ذفت , بما اننا فى لعبة صراحة يبقى قولى كمان رأيك فى بنات اليومين دول , اللى مفيش حد بيشكر فى واحدة اتجوزها ولا بتعرف تعمله نص اللى مامته بتعملهولو :(
shady 2011-09-11
وهل dيقدروا يشيلو مسؤلية بيت واطفال ولا لاء
Reem 2011-09-11
لا البنات مش بيقدروا يشيلوا المسئوليه بسهوله قبل الجواز وبيبقوا برضو مستهترين لكن بعد الجواز معظمهم بيتحمل المسئوليه اللى هما فيها بس الراجل هو الاساس لازم هو اللى يشجعها ويقف جنبها ويساعدها ولازم هى تحس ان جوزها يقدر يحميها ويحافظ عليها عشان هى كمان تقدر تتحمل المسؤليه ومتكنش خايفه واكيد طبعا الزوجه مهما عملت مش هتوصل للى كانت الام بتعمله فى الاول لحد م تتعود وتتاقلم على كده وكمان البنات معروف انهم بيبقوا مدلعين عن الاولاد
Reem 2011-09-11
والبنات بقى لبسهم مش حلو خالص وضيق يعنى بقوا حاجه تكسف وهما بيكونوا السبب ف اللى الاولاد بيعملوه لانهم بيدوا ليهم الفرصه لكده بس مش كلهم برضو فى بنات محترمين جدا الحمد لله
MaDa 2011-09-11
اللهم صلي على النبي ايه الحلاوة دي :(
MaDa 2011-09-11
اسأل انا بقى :D
- لو انتي بتحبي و خيروكي بين أعز أصحابك وحبيبك تختاري مين ؟
- هتشتغلي بعد الجواز ولا لأ ؟
- هتعملي ايه لو انتي بتحبي شخص ومتقدريش تعيشي من غيره وأهلك رفضوه ؟
Noura 2011-09-11
جامد جدا يا مادا يالا بقا جاوبي ياريم عشان تعرفي اني كنت حنينة ومسألتش اصلا :D
safaa 2011-09-11
انتى صعبانة عليا ياريم خلى سؤالى لبكرة لانك تعبتى من كتر الاسئلة
Reem 2011-09-11
لا يامحمد مفيش مقارنه بين الصاحب والحبيب ده حاجه وده حاجه تانيه خالص وعمر ما هيحصل انى اختار حد فيهم لانهم الاتنين مهمين عندى مقدرش اعيش من غير الاتنين وبصراحه لو خسرت صحبتى هتبقى حياتى تعيسه مع حبيبى من غير صحاب وعمرى م هنسى الموقف ده ابدا
Reem 2011-09-11
اما بالنسبه للشغل فانا عايزه اشتغل بعد الجواز دى حاجه اساسيه
السؤال التالت بقى هحاول اقنعهم بيه وهما اكيد هيوافقوا لما يعرفوا انى مقدرش اعيش من غيره بس انت متقطعش هههههههههه
Noura 2011-09-11
ههههههههههههههههه يا مقنع :(
Reem 2011-09-11
ههههههههه لا ياخالتو براحتك لو عايزه تسألى اسألى انا موجوده
shady 2011-09-12
sواللهى ياريم بالنسبة لكلامك على البنات فهيا اجابة دبلوماسية فيها من الواقع وانتى معترفة انهم مدلعين ومفيش واحدة هاتبقى زى مامتها بس انا عارف ان فى بنات اخر جدعنة واخر حلاوة كمان بس احنا بنتكلم على الاغلبية للأسف . وبالنسبة لردك على الرجالة انا ها ارد عليكى بحكمة:-
ليس كل من يطلق عليهم "رجال".. هم رجال... فكلمه "الطير" تجمع بين الصقر والدجاجه
safaa 2011-09-12
-أيه أكثر حاجة عندك بتحبي تعمليها بمزاج عالى( الدراسة او المساعدة فى شغل البيت او المطبخ او القرأة والاطلاع على ماهو جديد )
- أكثر حد من أسرتك اقرب الى قلبك
loleta1 2011-09-12
بجد سياسية شاطرة ياريم يعني بتعرفي تهربي من السؤال وتلفي معناه
وحلوة حكمة الصقر والدجاجة دي
انا سؤالي ليكي ياريم لو أتحطيتي في موقف صعب ياإما تكدبي وتخبي وتجاملي ياإما هتواجهي مواجهة ممكن تخسرك حد هتعملي إيه؟
وبما إنك صديقة واحدة بتكتب شعر قوليلي رأيك في كتاباتي بكل صراحة
Reem 2011-09-12
ههههههههه ايه رايك يا نورا هما دول بنات شبرا هههههههه حلوه الحكمه دى يا شادى فعلا عندك حق فيها بس ان شاء الله الاتنين يتغيروا للاحسن
Reem 2011-09-12
والله يا لوليتا انا فعلا بحاول اهرب للانى اصلا مش بحب اكون فى موضع اسئله خااااااااااااااالص بس هو فى اسئله كده تحسى انها مينفعش انها تتسأل اصلا لانها عمرها م هتحصل خالص
Reem 2011-09-12
اكتر حاجه بحب اعملها بمزاج اوى لما بكون ف المطبخ لانى مش كتير بدخله بس يوم م بدخل مبحبش حد يقف معايا وبعمل كل حاجه بهدوء هههههههه عشان كده باخد وقت وبيكونوا ماتوا من الجوع
واكتر حد قريب لقلبى هو بابا واخويا الصغير
Reem 2011-09-12
ليه بس الاسئله الجامده دى يا لوليتا حظك انك قعدتى على الكرسى قبلى وانا مكنتش موجوده عشان اسأل ماشى ماشى هجاوب بصى انا لو اتحطيت ف موقف صعب هحاول اهرب منه من غير م اكدب ع قد ما اقدر ممكن اخبى حاجات عشان المشكله متكبرش بس اكيد مش هاكدب ولو الواحد ده قريب منى اوى اكيد هواجهه بكل حاجه لان هو هيكون عارفنى وعارف اللى انا كنت اقصده وبعد م الموقف يخلص بقى ابقى اصالحه لوحدنا كده هههههههههه
loleta1 2011-09-12
هممممممممم عموما ياريم أنتي اللي هتختاري مين يقعد بعدك وانا ماعنديش أي مانع تختاريني وانا أجوابلك عن كل سؤال لو من المريخ أحنا مابتفرق معنا الأسماء
Reem 2011-09-12
والله انتى كتباتك حلوه والكلمات كمان بس بحس انها مش راكبه على بعضها يعنى السجع ف الكلام والجناس والقافيه مش بتكون واحده عشان كده لما بحب اقرا قصيده احبها تكون ماشيه مع بعضها ف القافيه بس والله انتى كتباتك حلوه وانا اصلا على فكره ماليش ف الشعر خالص ومش بعرف اكتبه يعنى ممكن متخديش على كلامى
Reem 2011-09-12
ههههههههههههه لا يا ستى كفايه عليكى كده نشوف بقى حد تانى ناخده كبش فدا هههههههههه
loleta1 2011-09-12
يلا بسم الله حلال الله أكبر ،مين بقى؟
Reem 2011-09-12
انا هختار نورا جارتى بقى ههههههههههه
loleta1 2011-09-12
أه حبيبة قلبي يانورا
زغباوية 2011-09-12
اهلا ياشابة داحنا هانروقوكى
ايه اكتر اكلة بتحبى تعمليها وبتطلع حلوة منك واكتر حاجة بتحبى تاكليها؟
loleta1 2011-09-12
لما بتعملي جريمة ماماكي بتعمل معاكي أيه؟وبتعرفي تهربي من الموقف ولاأيه؟

الباشمهندسة 2011-09-12
@ ريم: كل اجاباتك حلوة وعجبني ان مفيش حد عرف يجرجرك في سكتة

@ شادي: حلوة الصقر والدجاجة .... طب كنت خليها كتكوت عشان يبقي مذكر :(

@ نورا: منورة الكرسي ..... تعاليلي

ايه رأيك في الارتباط عن طريق الجامعة .... ورأيك في جواز الصالونات ... تفتكري مين فيهم يعمر اكتر؟
loleta1 2011-09-12
وعايزة الcvبتاعك كمان زي ريم مخلصة بتشتغلي مرتبطة مخبوطه كده ولا لسه ماحصلتلكيش الحادثة؟وأهم حاجة بحبها فيكي ونفسي أسألك عنها جايبة اللماضة بتاعتك دي من مين؟
Noura 2011-09-12
ههههههههههههه ماشي ياريم كنت شاكك مع اني كنت متأكد استنوني بقا
Noura 2011-09-12
اكتر حاجة بكون مبسوطة وانا بعملها هي اني العب بالالوان مع العلم اني مبعرفش ارسم والخرز والترتر واي حاجة فيها الوان ، واكتر حاجة بحبها وبتمزك وانا باكلها هو السمك
shady 2011-09-12
انا رأى لو انتى فاضية بعد الضهر تروحى محو الامية علشان بتمزك بتاعتك دى ما تأكلش عيش اسمها بتمزج وجاية من المزاج اساسا :P
Noura 2011-09-12
لاء الحمدلله مامتي بتفضل تكتم في نفسها وتقولي نفسي اعيش لما اشوفك هتعملي ايه مع ولادك وطبعا بقا مش عايزة اقولك انا وولادي هنكون عاملن ازاي
Noura 2011-09-12
@ شادي : معلش والله ماخدتش بالي :p
Noura 2011-09-12
والحمدلله انا مبهربش من اي حاجة كله بالمواجهة :D
Noura 2011-09-12
ارتباط الجامعة مش بأيده خالص ...وجواز الصالونات حاجة فاشلة جدا وانا بتكلم عن نفسي طبعا لان انا قدامي ناس اتجوزوا كده وماشاء الله عليهم حلوين اوي ......... واللي ممكن يعيش اكتر هتبقا الجامعة وامري لله عشان هيكون في حب في الموضوع
Noura 2011-09-12
انا نورا محمود
24 سنة
ليسانس تربية
وبشتغل علاقات عامة في دار ايتام
واحنا 5 اخوات انا خير الامور فيهم لاني انا الوسطانية
وبالنسبة للماضة والله معرفش دا انا حتى هادية خالص ومحدش بيشتكي مني غير شوية ناس كده :D :P
MaDa 2011-09-12
@ريم : برافو عليكي مع انك ملحقتيش تقعدي وكان نفسي اسالك تاني بس ملحوقة :(
@شادي: موت من الضحك على مزك ومزج دي :D:D
@نورا : نورتي الكرسي وواضح ان الكل كان مستني الفرصة دي من زمان :D:P
MaDa 2011-09-12
أسأل أنا بقى :D
انتي دلوقتي بتشتغلي وده شيئ جميل جدا .. عايز أعرف حياتك اختلفت قبل الشغل وبعده ولا لأ .. وهتفضلي تشتغلي إن شاء الله ولا ممكن تقعدي لأي ظرف ما زي الجواز مثلا ؟
Noura 2011-09-12
انا قولتها قبل كده كلكو عليا ولا ايييييييييهه :D
Noura 2011-09-12
اكيد اختلفت كتيييييييييييير جدا ،تؤ تؤ اني اكمل في الشغل مااظنش واكيد ظروف كتير تخليني اقعد من الشغل واولهم الجواز :D
MaDa 2011-09-12
ايه هو الاختلاف بقى .. وايه هو طموحك وحدوده ؟
Noura 2011-09-12
الاختلاف وحش مش حلو مبقتش اشوف حد خالص لاني يدوبك ارجع من الشغل انام
طموحي بقا اني اعمل مشروع اشتغل فيه انا واصحابي مع اني عارفة انه هيفشل فشل ذريع عشان هكون انا واصحابي فيه وطموحي مش عالي اوي يعني كلها حاجات بسيطة ممكن تتحقق بفضل الله
MaDa 2011-09-12
تمام :(
الباشمهندسة 2011-09-12
انا اتصدمت فيكي يانورا ... مش عارفة ليه كنت فاكراك بنوتة في الجامعة بالكتير 19 سنة
عرفتي تخدعيني ....:(
استغلك بقي. ليه ماشتغلتيش مدرسة ولا ده عملك تطوعي
Noura 2011-09-12
ليه كدا هو انا كبيرة اوي والله انا مش عملت حاجة ولا كنتي جيبالي عريس :(
لاء انا اصلا مش بحب التدريس خالص ولو كنت بدخل الفصل كنت بلعب مع الولاد ومش بنشرح حاجة :D
MaDa 2011-09-12
انا بقى بعشق التدريس مع انه بعيد خالص عن تخصصي :(
MaDa 2011-09-12
ايه رأيك في المسلسلات التركي اللي غزت الدراما العربية .. واللي انا بكرهها وبتخنق منها :P
زغباوية 2011-09-12
طيب استفدتى ايه فى شغلك مع الايتام وايه اسواء واحلى مواقف بتقابليها معاهم
Noura 2011-09-12
انا بكره المسلسلات التركي دي موت بس بحب المسلسلات الكوري والياباني جدا :p
Noura 2011-09-12
انا عندي ابن خالتي يا مادا مهندس مع ايقاف التنفيذ وبيشتغل مدرس رياضة من اول اعدادي لحد كلية تجارة وسبحان الله بجد احسن من 100 مدرس خرج من كليتي وهو اللي كان بيذاكرلي في الثانوية العامة
MaDa 2011-09-12
انا كمان بشتغل في التدريس من وانا في سنة أولى بس الكلام ده بيني وبينك :(
Noura 2011-09-12
اما بالنسبة لشغلي يا زغباوية انا اتعلمت اني اتعامل مع الاطفال واني ابقا عندي طولة بال شوية كتير ( بس دا مبيحصلش على طول )

احسن مواقف بجد لما بعرف اوفرلهم حاجة بيكونوا محتاجينها لان الشغل دا صعب لانك بتقنع الناس انهم يتبرعوا لحاجة ممكن تكون مش في دماغهم اصلا ولما بنخرج رحلة بقا صباح الشقاوة بنهيص مع بعض جدا
واسوء حاجة لما طبعا بفشل في اني افور حاجة يكونوا محتاجينها وتكون ملحة في وقتها ووكمان لما يجي حد ويسألني عن الولاد ازاي جبناهم بحكيلهم وممكن نعيط احنا الاتنين وكمان انا كنت بشتغل في دار قبل اللي كنت انافيها دلوقتي بس كانت ايتام معاقين فكانت حاجة بؤس وهما كانو حالاتهم شديدة واعمارهم قصيرة وفي ولد منهم مات وكمان راحت المسئولة عن الدار الله يكرمها اخدت الولاد اللي كانوا في الفرع اللي انا فيه وكنا متعلقين ببعض وبدلتهم مع ولاد من فرع تاني خالص فانا طبعا مقدرتش اكمل وسبت المكان خالص بس بجد هما واحشني مووووووووووووووووت :)
MaDa 2011-09-12
ربنا يكرمك يا نورا ويجازيكي خير :(
Noura 2011-09-12
شكرا يا مادا ها بقا هانزل امتا
MaDa 2011-09-12
انتي زهقتي ولا ايه .. لسه شوية :D
MaDa 2011-09-12
ايه هو الحلم اللي مش بيفارقك لحظة .. ونفسك تحققيه بفارغ الصبر ؟
Noura 2011-09-12
حلم احققه قريب ولا عالمدى البعيد
MaDa 2011-09-12
الاتنين :D
كنتي جاوبي وخلاص لازم تسألي :P
Reem 2011-09-12
انا بقى هسأل ايه مواصفات اللى انتى عايزه ترتبطى بيه ؟وايه اكتر حاجه ممكن تضايقك ف الشخص اللى قدامك ؟وايه اكتر مسلسل كورى بتحبيه ههههههههه عشان انا كمان بحب الكورى؟
MaDa 2011-09-12
يارب ارزق المسلسلات الكوري دي بقنبلة هيروشيمية عشان نرتاح :@
الباشمهندسة 2011-09-12
انا اول مرة اسمع عن المسلسلات الكوري ...انا اخري أوشين هي قديمة قوي ممكن منكم مايعرفهاش بس سمع عنها اكيد كانت مشهورة جدا في التسعينات
Noura 2011-09-12
حلم احققه قريب اني اطلع رحلة الكس مع صحباتي :( عشان بجد خلاص زهقنا وعايزين نغير جو عالمدي البعيد او الللي مش بعيد اوي هو اني اتجوز واخلف بنوتة
وفي حلم بس انا عارفة انه مش هيتحقق وهو اني الاقي بيتسي
انا تقريبا بحب كل اللي شوفته زي اغاني الشتاء وخريف في قلبي وجوهرة القصر
اوشين دي انا فاكراها من زمان وكانوا كل جيراني وقرايبي بيقولولي أوشين عشان احنا تحسي ان فينا عرق صيني او ياباني كده
Noura 2011-09-12
وعلى فكرة ياريم انا هنزلك اغنية مسلسل اغاني الشتاء عشان احنا جيران :p
MaDa 2011-09-12
هديكي -1 لو نزلتيها يا نورا :D
Noura 2011-09-12
وبالنسبة للمواصفات ياريم خدي عندك يكون طيب وحنين وبيعرف ربنا وميكنش بيلبس بنطلون لو ويست عشان انا بموت من الغيظ منهم وزي نيكول سابا ما بتقول فارس احلامي اللي بالي نفسي ميجرحنيش وميرتاحش الا في احضاني ابدا ميسبنيش .....إلخ
واكتر حاجة بتضايقني في اللي قدامي هو البرود عشان لما بشوف كدا بتجنن وبتعفرت وممكن اغلط
Noura 2011-09-12
ههههههههههههههههه طيب عشان خاطرك يا مادا هنزلها بس ها :p
MaDa 2011-09-12
لأاااااااااااااااااااااااااااا X_X
الاستاذة 2011-09-13
الله يقويكوا
بجد حاجة جميلة
ومع اني كنت تعبانة قوي
بس حاسة اني فوقت شوية من اللي قريته
يكفي اني بتعرف على ناس وكأنهم معايا في البيت
فعلا تواصل جميل
احييك يا مادا على افكارك الجميلة دي
واحيي كل اللي نزل الكرسي واعترف بكل صدق
هل من مزيد
safaa 2011-09-13
الف مليون سلامة عليكى ياأستاذة...واية رأيك فى الكرسى؟
...تحبى تقعدى علية...بجد دى قاعدتة مريحة جدا
الاستاذة 2011-09-13
الله يسلمك يا طنط وربنا يخليكي
بس بجد لسه ما فوقتش قوي ادعيلي وساعتها يبقى ربنا المعين على الكرسي
loleta1 2011-09-13
بصي يانورا أنتي سكرة وفعلا انا برضة أكتر حاجة تجنني في اللي قدامي البرود والهدوء والتعامل الميري بيبقى نفسي أديه بوكس عشان الوش الخشب يفك وقبل كده كان أتقدملي واحد بيضحك زي ليلى مراد قلتلة لو إنت آخر راجل في الكون مش ممكن أقبل ده أنت بتفتح بقك بالعافية وانا بقفلة بالعافية لايجوز
وبرضه يامادا انا شاطرة جدا في التدريس ومن زمان قوي من الأعدادي وأصحابي بيحبوني أذاكرلهم ولحد دلوقتي ماببخلش على حد بمعلومة أو شرح مدام انا فاهماها
وبالنسبة للمسلسلات هي ظريفة بس عايزة يتشال 3/4 كميتها لأن القصة تتخدم في 15 حلقة بس مش محتاجة كم الحلقات ده
وبجد فرحت بيكي وبشغلك حاجة حلوة ورضة أتخدعت في سنك كنت فاكراكي أصغر بس عادي انا كمان بيتخدعوا فيا كتير بس بيفتكروني أكبر من سني بكتير وأتشرفت بيكي ياقمر
بس ممكن أزنقك وأسألك مين أقرب شخصيات أتعرفتي عليها في زيدوني ولو غابوا تحسي أن في حاجة ناقصة في الموقع؟وبرضه إيه رأيك فيا لما بنكشك بيقى نفسك تعملي فيا أيه؟:-Dأصلي بحس أنك نفسك تقوليلي حاجة وبتسكتي فقلت أديكي الفرصة
safaa 2011-09-13
متى تكونى في أحسن أحوالك ؟
- في الصباح ام خلال فترة بعد الظهر ام فى المساء
وبتحبى ايه أكثر..مشاهدة التليفزيون او امام جهاز الكمبيوتر
Noura 2011-09-13
حمدالله على سلامتك يا استاذة ويارب يكون بعدك عننا ده بخير مش حاجة وحشة .
Noura 2011-09-13
انا مرة اتقدملي 2 في نفس الوقت واحد اسمه محمد زكريا والتاني اسمه احمد زكريا مش عايزة اقولك بقا قمة الفكاهة اللي كنت فيها الاتنين زي بعض في كل حاجة والله كنت هتجنن الفرق الوحيد بينهم ان محمد دا كان هادي هدوء رهيب لدرجة اني كنت بقول لمامتي انا بعد ما اتجوز هافضل نايمة عشان مش هلاقي حد اتكلم معاه واحمد كان مبيقفلش بوءه خالص وقلت لما انا هنام من الصداع اللي هو هيعملهولي وبجد كنت بموت في الفترة دي بس قولت لمامتي لو ما اتخطبتش لاحمد ابقي خله يجي يزورنا عشان قاعدته متتعوضش ومع الاتنين انا مكنتش واخدة راحتي ومكنتش عارفة اتعامل بطبيعتي ولا بشخصيتي خالص لما كنت هتجنن وانا كنت عارفة اني الاتنين مينفعوش معايا اصلا انا تقدري تقولي كدة شعنونة حبتين وبحب اضحك على طول ولاتنين برغم من سكوت واحد ورغي التاني الا انهم مكنوش ينفعولي برردو بس محدش صدقني
MaDa 2011-09-13
ميرسي يا أستاذة وحمدا لله على السلامة .. والكرسي مستنيكي ان شاء الله :(
MaDa 2011-09-13
ولا حلقة واحدة يا لوليتا .. انا بتشل منهم اصلا :)
وبالنسبة للتدريس فطبيعي عشان انتي شطورة :P
احكيلنا عن بتاع ليلى مراد ده في حد عنده ذكرى ظريفة :D
MaDa 2011-09-13
هم كانوا اخوات يا نورا ولا جايين مع بعض ولا ايه نظامهم ؟ :D
loleta1 2011-09-13
لأ مش هأحكي عايزة ذكرياتكم انا تقريبا جبت تاريخ حياتي في الموقع هأدي فرصة ليكم ولوفكرتوني بحاجة هأبقى أقولها
safaa 2011-09-13
اكيد تشابه فى الاسماء
Noura 2011-09-13
لاء بجد اللي انا بحبهم يمونوا موجودين كل الناس هنا في زيدوني مش حد واحد
وانتي يا لوليتا مش بستغرب اللي انتي بتعمليه فيا لاني مؤمنة بان ربنا بيسلط ابدان على ابدان يعني اللي باعمله في الناس بيطلع عليا تاني :D
لاء يا مادا والله ماكنوش اخوات ولا يعرفوا بعض اصلا وسبحلن الله واحد من الشرق وواحد من الغرب
بالنسبة لاحسن حالاتي بتكون من بعد الظهر يعني بعد الحر مايخلص لحد بليل بس مش بليل اوي
وانا مليش حاجة معينة بحبها من الكمبيوتر او التليفزيون لاني ملولةجدا وممكن اقفل الاتنين واشغل الراديو
Noura 2011-09-13
والله يا طنط مش تشابه في الاسماء بس في حاجات كتير دا الفرق الوحيد بس هو اللي انا قولته بس السكوت والرغي
Noura 2011-09-13
ها بقا هنزل امتااااااااااااااااا
safaa 2011-09-13
فكرتينى يانورا.. لما كان بيتقدم لبناتى اتنين مرة واحدة وساعات تلاتة ويترفضوا لاقل سبب هو فعلا النصيب ..عقبالك هم دلوقتى متزوجين منهم (زغباوية)
Noura 2011-09-13
ربنا يخليهم لحضرتك ويسعدهم يارب بس والله بتبقا حاجة رخمة موت
MaDa 2011-09-13
لو زهقتي وعايزة تنزلي .. انزلي واختاري اللي هيقعد بعدك بس بلاش انا .. خليني للآخر :D:P
Noura 2011-09-13
يعني خلاص كدا هنزل :)
MaDa 2011-09-13
انتي وراحتك لو زهقتي قولي ان انتي نزلتي واختاري مين هيقعد بعدك :(
Noura 2011-09-13
خلاص انا هنزل بس قول لريم بقا اني نزلتلها الاغنية :p وهختاااااااااااااااااااااااار زغباوية
MaDa 2011-09-13
كنتي ضيفة لذيذة يا نورا ويارب تكوني اتبسطي من الكرسي :(
MaDa 2011-09-13
يلا يا زوزو انتي بقيتي دلوقتي على الكرسي نورتي .. :(
Noura 2011-09-13
سؤالي بقا: عايزة cv ؟
وكمان ليه زغباوية وانتي اصلا رانيا ؟
وشجرة العيلة في زيدوني بقا على ما افكر في التقيل ؟
mora 2011-09-14
اه يا رونة جالك من لا يرحم استلقى وعدك بقى هههههههههه
loleta1 2011-09-14
يازوزو انا عرفت ان عندك 3 توائم مع اني ماشوفتهمش لما كنت عند أم العيال سؤالي أزاي واجهتي موضوع3×1 في الأول وهل زوجك كان متعاون معاكي؟و دلوقتي بعد ماكبروا حبة بتقولي حاجة حلوة أنهم قد بعض وجم مع بعض ووفروا وقت ومجهود ولا برضه الموضوع لسه متعب؟
mora 2011-09-14
رونة مكان اقامتك دلوقتى احسن ولا الاول وانتى معانا ولا مش فارقة كتير
MaDa 2011-09-14
عايز اعرف حياتك قبل الجواز كانت ازاي وبعد الجواز بقت ازاي من حيث كل حاجة :D
mora 2011-09-14
رانيا الحقى جاوبى قبل ما افتن عليكى ما احنا صحاب من زمان
MaDa 2011-09-14
وهل جوازك كان عن حب ولا تقليدي .. ؟
الباشمهندسة 2011-09-14
ايه اكتر موقف محرج الولاد بيحطوكي فيه ... وتبقي مش عارفة تردي او تتصرفي معاهم ازاي؟
loleta1 2011-09-14
؟رونيتا أنتي خلعتي ولا إيه ؟ماتخافيش أي سؤال من بره المنهج نحذفة بس تعالي:-D
الباشمهندسة 2011-09-14
الظاهر بتجيب للولاد هدوم المدرسة .... عام دراسي سعيد ان شاء الله علي كل الطلاب والطالبات :p
mora 2011-09-14
معذرة رانيا بتفول لكل الجروب انها هتدخل بكره ان شاء الله لان النت اوشك على النفاذ وهيا متغاظة جدا لانها كانت تتمنى تكون معانا النهاردة استنوها بكرة ان شاء الله
mora 2011-09-14
وعن نفسى انا اسفة انى مشركتش فى سوال حد لانى كنت فكرة انكم نجتمعين فى وقت واحد وبتسالوا الضحية زى الشات ع الفيس بوك اسفة انى فاتتنى الفرصة دى
MaDa 2011-09-14
اوك وميرسي يا مورا لاهتمامك :(
MaDa 2011-09-14
ولسة الفرصة قدامك .. احنا بنسأل عادي في اي وقت واللي على الكرسي بيجاوب .. يعني لو عايزة تسألي زغباوية دلوقتي اتفضلي .. وهي اول ما هتفتح هتجاوب على كله .. وبعد ما تنزل من على الكرسي هتختار عضو تاني يقعد وبرده تسأليه :P
mora 2011-09-14
اوكيه يا مادا
loleta1 2011-09-15
وحشتيني ياأحلى رونيتا وزوزو موقع زيدوني بجد الموقع ناقص من غيرك ومعلش هتنوري في أي وقت
ويامورا شاركي وإسألي وتابعي الإجابات اللعبة لذيذة وعايزين نجيب رجلك على الكرسي
زغباوية 2011-09-15
اولا شكرا جدا جدا جدا ليكوا علشان سألتوا عليا وانتوا كمان وحشتوني جدا وكنت عايزة ادخل بس النت عندنا قرب يخلص فمتفقين ان كل واحد يوم والنهاردة بتاعي:D
ثانيا :شكرا على شعلة الموقع يامادا مجاملة رقيقة منك
ثالثا :انتوا مصدقتوا تسألوني شكلكوا كدا كنتوا ناوينلي انا عملت فيكوا حاجة:(
رابعا هاجاوب على كل سؤال بإذن الله
MaDa 2011-09-15
دي اقل حاجة ليكي :( ويلا مستنين الإجابات :P
زغباوية 2011-09-15
اسئلة نورا:
ج1:الاسم: رانيا عبد المنعم
السن: 35 سنة اهئ اهئ اهئ:)
الحالةالاجتماعية: متزوجة واعول 3 توائم منة الله ومريم ويوسف
المؤهل: بكالوريوس تربية رياضيات (ولو حد عايز حاجة فى الموضوع ده مش هاقدر اخدمه) ودبلومة رياض اطفال والحمد لله انى خدتها نفعتنى جامد
الوظيفة: ست بيت مع سبق الاصرار ةالترصد :(
ج2: زغباوية لان الولاد جدهم اسمه الزغبي فبقينا مسمينهم الزغباوية وعندنا بقوا يسمونا كلنا عائلة الزغباوية
ج3 :شجرة العيلة دى كبيرة لان الموقع كله تبعنا
monem:اخى الكبير
safaa: مامتي
عبد المنعم: بابايا
د/الزغبي: زوجي
الباشمهندسة :زوجة اخي الكبير
hatem:اخي الصغير
tafatifi:اختي الصغيرة
ام العيال :اختي اخر العنقود
بيجست مان : عمي الكبير
اولا العمة او العمة او الخالة:شادي والدكتورة ومحمد حمدي واحمد والمهندس احمد
ومادا يبقى ابن بنت خال ماما
والباقي قرايبى او اصحابي يعني اسهل لى انى اقول اللى مش قرايبى علشان منساش حد
زغباوية 2011-09-15
اسئلة لوليتا:
واجهت الموضوع: بتساهيل ربنا فعلاومفيش غيرها ثم حبة نظام
زوجى كااااااااااااااااان متعاون جدا بصراحة
وحاجة حلوة طبعا انهم مع بعض سواء وهم صغيرين او لما كبروا الحمد لله لانى فعلا مقدرش على الحمل والولادة كل شوية سبحان الله ربنا بيدي فعلا على اد مابتقدري
والحمد لله فترة التعب والاجهاد وعدم النوم عدت بس فيه مشاكل تانية بتظهروحتاجين تفكير طول الوقت ومجهود برضوا بس أحسن الحمد لله
زغباوية 2011-09-15
سؤال مورا:
لا طبعا دلوقتى احسن بس عندي عيب جامد اوى ماليش اصحاب كتير هنا ومفتقدة لامة اصحابي والمقرأة والمشاريع الفاشلة اللى كنا بنعملها وكمان طبعا دلوقتى مفتقدة مساعدة ماما ليا علشان لو كنت لسة عندكوا كنت حملت عليها جامد
زغباوية 2011-09-15
سؤال مادا: هو انا عموما مابدقش ومابعملش مقارنات بين الماضي والحاضر بس هي الحياة ماهي الا محطات وانت شخصيتك واحدة مابتتغيرش وهي تكملة لبعضها هو بس بعد الولاد الواحد بقى عصبي اكتر من الاول
زغباوية 2011-09-15
سؤال مادا التاني:
جوازي كان تقليدي وقَلَب :(
زغباوية 2011-09-15
سؤال الباشمهندسة:
بصراحة ياباشمهندسة مش فاكرة جايز علشان الولاد محطونيش فى موقف رخم او محرج جامد او جايز لان الزهايمر عندي عالى ومابركزش اوى فى الحاجات دى
زغباوية 2011-09-15
انا كدا تقريبا جاوبت حد عنده اى سؤال ؟؟
MaDa 2011-09-15
ايون انتي لحقتي ولا ايه .. وبعدين انتي بتجاوبي اجابات مختصرة اوي :D
زغباوية 2011-09-15
كل ده مختصرة ماشي ياعم اسئل براحتك
MaDa 2011-09-15
علاقتك كانت عاملة ازاي باخواتك ومين كان اقرب حد ليكي وبتحكيلو دايما اسرارك .. وهل الولاد زي البنات ولا ايه ؟
بالتفصيل بقى :(
زغباوية 2011-09-15
ايه الاسئلة دى مش بعرف اجاوب عليها انا عموما هاحاول
هو انا ترتيبي التاني بعد واكبر بنت فكنت عاملة على طول عليهم الريسة الناظرة حاجة كدا وعلى طول بغلس عليهم وماما وبابا كانوا مدينى الفرصة دى فأكيد كانوا بيكرهوني
- بحترم اخويا الكبير جدا وبحبهم كلهم جدا جدا وبحس انى مامتهم وخصوصا لو حد عنده مشكلة او متضايق فعلا بفكر فى مشاكلهم
ودلوقتى طبعا المريسة دى خلاص راحت لحالها كلنا بقينا نشكي لبعض ونرغي كتيير بس طبعا الولاد مابيحبوش الرغي الكتير مع انى بحب اكلمهم كتير وهما كلهم مش راغيين ماعدا انا وام العيال اكتر اتنين رغايين فطبعا بنرغى احنا الاتنتين اكتر حاجة
مفيش اكتر من كدا تفصيل
loleta1 2011-09-15
يازوزو لما عرفتي إني أصغر مما توقعتي كنتي متفجأه كده ليه؟وياتري عن طريق زيدوني حاسة إنك بقى عندك خميرة أصحاب مش وحشة؟وعيزاكي تديني لقب لكل حد قريب منك في زيدوني توصفيه بيه أو شايفاه فيه زي شعلة اللي لقبك بيه مادا
زغباوية 2011-09-15
بس لما أكون نفسيتي مش متظبطة او عايزة نصيحة بكلم بابايا على طول بيخرجني فعلا من المود وانا أصغر برضوا كنت بحكيله واسراري كلها كانت معاه
زغباوية 2011-09-15
معلش يالوليتا وياشباب انا هامشي دلوقتى وافكر في سؤالك لانه صعب اوى توصفي حد هى بتيجي كدا فاجئة
عموما كل اللى عنده سؤال يكتبه واول مادخل هاجاوب على طول وماتزعلوش لو اتأخرت عليكم لغاية بس لما النت يشحن تاني ان شاء الله احاول ادخل من وقت للتانى فى السريع
MaDa 2011-09-15
طيب اختاري حد يقعد مكانك على الكرسي عشان ميبقاشفاضي ولما ترجعي تبقي تقعدي تاني .. ها تختاري مين ؟؟ ولا نستناكي ؟
زغباوية 2011-09-16
لا طبعا ماتستنوش هاعطلكوا كتير ...اصلا يوم الجمعة والسبت مش بدخل الموقع واذا دخلت بخرج بسرعة جدا
عموما من اللى دخلوا الموضوع ده وعلقوا عليه ناقص مورا والباشمهندسة والاستاذة وطبعا مادا ومادا اختار انه يكون اخر واحد وعشان انا ديموقراطية فممكن تختاروا بدالى حد من الثلاثة الباقيين حسب وقتهم
وشكرا ياجماعة استمتعت معاكوا :D
زغباوية 2011-09-16
بالنسبة لسؤال لوليتا
-علشان كتاباتك بحس منها ان عندك خبرات كتير وده بيدي انطباع بالنضج ولانى بحقد على كل اللى قبل ال30:D
-وطبعا بقى عندي اصحاب كتير الحمد لله وكمان قرايب ماكنتش اعرفهم كويس بقيت نفسي اشوفهم
-حاجة صعبة يالوليتا انى ادى لقب لكل واحد في الموقع وخصوصا ان احنا في الغالب بننقل مش من صميم تجاربنا او ابداعتنا بس ممكن تيجي فى لحظة، حد معين كتب حاجة من ابداعه الخاص فتقدري تحكمي عليه
ونلتقي مع ضحية اخري ها ها ها ها:D: D
انا نزلت من على الكرسي بس كنت فاكراه بيكهرب هههههههه:(
MaDa 2011-09-16
البشمهندسة هي اللي هتقعد .. يا زوزو ويارب يكون الكرسي عجبك مع انك مطولتيش بس هتقعدي تاني لما النت يتظبط :(
MaDa 2011-09-16
نورتي الكرسي يا بشمهندسة .. ويسعدني اني اول واحد اسأل :(
نبدأ بأسئلة خفيفة :نعرف الأول ال cv ؟
mora 2011-09-16
لو الزمن رجع بيكى كنتى تتمنى تكون حياتك زى ما انتى دلوقتى ولا كنتى تتمنى حاجة تانية
الباشمهندسة 2011-09-16
واضح ان الكل خايف مني ومش عايز يسأل هو انا بخوف للدرجة دي:(

عموما باشكر مادا ومورا علي الجراءة دي وان شاء الله الباقي يتشجع:(
safaa 2011-09-16
يالا ياباشمهندسة عرفينا الاول بالcv
الباشمهندسة 2011-09-16
الكرسي ... لطيف ومش بيشوك

@مادا موضوع الcv محرج قوي:
الاسم : مدام محمد عبد المنعم والدلع سحر.
السن : الحمدلله 33 وربنا يدمها علينا نعمة.
المؤهل: بكالوريوس هندسة قسم عمارة جامعة حلوان.
السكن : القاهرة
الحالة الاجتماعية :طبعا متزوجة وعندي ولدين شمس الدين وسراج الدين
اهم الهوايات : دخول موقع زيدوني :(
safaa 2011-09-16
انا يقى هسألك بتحبيى مين أكثر من اولادك
الباشمهندسة 2011-09-16
@مورا :طبعا الحمد لله علي كل شئ وربنا يبارك فيه وباحب اقول دايما
لو علمتم الغيب لإختارتم الواقع
الباشمهندسة 2011-09-16
@ صفصف...حبيبتي... دي حماتي ياجماعة للي مش عارف

انتي بترديهالي ياصفصف وبتسأليني نفس السؤال ماشي :(
طبعا بحبهم هما الاتنين زي بعض بس شمس الدين في تفاعل بيني وبينه عشان هو كبير وعنده 7 سنين لكن سراج صغير ومزهقني ومش بيعرف يتكلم خالص فطبعا العلاقة بيني وبينه بهدلة علي الاخر :(
Noura 2011-09-16
انا اسأل: اتعرفتي ازاي على زوجك ؟
وليه انتي كنتي مخدوعة في سني ؟
وماشاء الله على شمس وسراج ربنا يخليهم ويبارك فيهم
الباشمهندسة 2011-09-16
@نورا ... الأمورا

انا و جوزي تجمعنا قرابة بس من بعيد شويه يعني مامته safaa تبقي بنت عم بابايا واللي هو بالمناسبة hamada بس الحقيقة انا ماشوفتوش الا اول مرة لما جيه وتقدم لي فقط يعني ممكن تعتبرية جواز صالونات.

انتي عارفة لما الواحد يسمع مذيع في الراديو ويتخيل ويرسمله ملامح تتلائم مع نبرات صوته وطبيعة برنامجه زي بالظبط كدا انا لما كنت متخيلة ابلة فضيلة حاجة تانية خالص غير لما شفتها في التليفيزيون .... اهو نفس الحكاية معاكي انا مش عارفة ليه اول ماشاركتي في الموقع تخيلت اسمك مع تعليقاتك اللذيذة ومشاركاتك اللي دمها خفيف انك بنوته صغيرة في الجامعة سن 18 او 19 سنة دي طبعا مش حاجة وحشة جميل قوي انك تبقي محتفظة بالشقاوة دي لحد ديلوقتي .

وطبعا مرسي علي دعائك لشمس وسراج وعقبالك ان شاء الله عن قريب
Noura 2011-09-16
طيب بالنسبة انك تقريبا كان جواز صالونات عملتي ايه اول لما اتقدملك وخصوصا ان انتي كنتي في الجامعة يعني مش مقفول عليكي ؟
Noura 2011-09-16
ومتقلقيش والله يا باشمهندسة انا الشقاوة دي بتزيد عندي مش بتقل خالص ومش عارفة اعمل ايه ؟ :(
الباشمهندسة 2011-09-17
حلو حلو خليكي كدا بكرة مشاغل الحياة والمسؤليات هتظبطلك الموضوع ده بالتدريج :(

انا عملت اللي بنصح بيه اي بنت يتقدم لها عريس مهما كان سنها وهو:

الصراحة والوضوح والتأني

لازم تكون الواحدة صريحة في اجابتها علي العريس ولا تخجل انها تسال في ادق التفاصيل وتتناقش معاه في كل كبيرة وصغيرة لان ده بيعطي رؤية واضحة لمستقبلهم مع بعض هل هيبقي في تفاهم ولا سيطرة ولا استهتار كل حاجة كل حاجة ومع اول شك او بوادر عدم مصداقية لازم يكون ردها بالرفض جاهز بدون تردد ولو توفر القبول والتفاهم المبدئي لازم بردو تتأني في خطوة الخطوبة لانها مهمة ويتبني عليها تفاصيل كتير.

يعني تقعد مع العريس مرة واذا كان فيه قبول مبدئي يبقي لازم تقعد مرة واتنين وتلاته واربعة وتدرس وتتناقش وتحلل وتحط الخطوط العريضة قبل ماتوافق وتبدأ مرحلة الاتفاقات والالتزامات والخطوبة وده مش عيب.

طبعا في اهالي بيبقوا مستعجلين وشايفين انه عريس مناسب وبيأثرو علي البنت بطريقة سلبية نصحتي لا تهتهمي خلي قرارك بكامل ارادتك ومفيش مانع انك تاخذي المشورة بس من ناس تثقي في حبهم ليكي ومتاكدة اني مصلحتك تهمهم مش تسألي صحبتك اللي لسة متجوزيتش وبتحقد عليكي عشان جالك عريس ولا صديقتك اللي عايشة عيشة نكد مع جوزها اوعيلتها حتي وتضللك ...... واهم حاجة اهم حاجة اهم حاجة استخارة ربنا
MaDa 2011-09-17
ايه رأيك في الجيل الحالي من الشباب ؟
الباشمهندسة 2011-09-17
@مادا ...لاماضا

انا مش مختلطة بشباب الجيل الحالي باي صورة من الصورة فبصراحة شديدة هيبقي حكمي عليهم من خلال اللي بشوفوا في الشارع انا طبعا متاكده ان في شباب منهم واعي وجدي ولكن الصفة السايدة حاليا هي الاستهتار واللاوعي وعدم ادراك الواقع وعدم تحمل المسؤليات.

كل واحد بابي جايبله عربية لو مش بابي يبقي مامي مفيش مشكلة عايز يتجوز دي ماشي عايز يطلق ماشي فشل في الثانوية وماله يدخل جامعة خاصة مش لاقي شغل يعجبة يسافر برة يعني مشتت وتحس انهم مش رجالة لا عيال وخنافس لكن في ناس محترمة كتير المشكلة الحقيقية مش في الجيل ده المشكلة في اللي بعده يعني اللي ابوه اصلا شاب مايص زي ده هو يطلع ايه ؟؟؟ واحدة واحدة الاخلاق هتنعدم والتسيب هيزيد والاتدهور والانحلال هيكتر وهي دي ببساطة علامة الساعة الكبري وربنا يلطف بينا.
الباشمهندسة 2011-09-17
ونكمل بكرة عشان تصبحوا علي خير بقي :P
loleta1 2011-09-17
صباح الهندسة، بتحني لأيام الكلية والرسومات والمللي اللي بيفرق في شارع والعفاريت ؟وعلاقتك أيه بالهندسة بعد الزواج سلامات من بعيد؟وهل حاولتي تعملي حاجة عن طريق النت تصميمات أورسومات هندسية كشغل ومذاكرة ولا باباي مسطرتي ومرحبا مريلتي؟
الباشمهندسة 2011-09-17
طبعا ساعات كتير بحن للادوات بتاعتي المسطرة والكرسي والطرابزة والمثلثات وادوات التحبير وخلافة وساعات كتير لما ببقي عند ماما اعقد اطلع شوية حاجات واتفرج وبعدين اقفل قبل العيال ماتبهدل حاجة ولكن علاقتي بالكلية والدراسة الان لا تتخطي اتصالي بزميلاتي من الكلية واللي لا يتعدو 4 مهندسات وطبعا ده في المناسبات والاعياد وخفافي كده طول السنة ونعقد نحكي ذكريات ونتكلم في الجديد بردو.

وفي الحقيقة انا اصلا بشتغل في الهيئة العامة للابنية التعليمة من فترة قبل الزواج وحتي الان بس بقالي 5 سنين ونص اجازة رعاية طفل من وقتها انقطعت عن كل الاعمال الهندسية وده لان طبيعة شغل الادارة اللي انا فيه كمان ماكنش له علاقة بدراستي نهائي وبالتدريج ابتديت انسي كل حاجة واحدة واحدة واعتقد ان ايدي كمان ابتديت تتقل علي القلم ومسكة المسطرة ودي حاجة مزعلاني جدا بس بقول دايما في نفسي انا بادي رسالة اهم وهي رعاية بيتي واسرتي وان شاء الله اول ماتتيح ليا فرصة لن اتردد في استرجاع كل مافتني وبالذات في ظل التطور الرهيب و التكنولجيا اللي بقيت موجودة في حياتنا ديلوقتي وخاصة برامج الرسم الهندسي والاظهار المعماري
الباشمهندسة 2011-09-17
انا كدا بقالي 24 ساعة وزيادة قاعدة علي الكرسي الحمد لله الموضوع سهل وبسيط ....وعشان ممكن يبقي في صعوبة في الوصول الي الضحية اللي جاية .... احب طبعا تبقي الاستاذة هي من بعدي علي الرغم من انها ما شاركتش غير في تعليقات بسيطة ولكن جميل ان نقعدها علي الكرسي ونزنقها ....

واذا تعذر الوصول اليها خلال 12 ساعة القادمة يعني حتي 11:30 ليلا تبقي mora واذا تعذر الوصول اليها هي ايضا خلال 24 ساعة القادمة يعني حتي 11:30 ظهرا غدا الاحد ان شاء الله....

يبقي مفيش غيرك يا لاماضا .... اقصد MaDa
MaDa 2011-09-17
عجبتني اوي اجاباتك على سؤالي ويارب الحال يتعدل وينصلح ونرجع لدينا واخلاقنا :(
MaDa 2011-09-17
بس لسة بدري انتي مستعجلة ليه في أعضاء كتير لسة مسألوش .. لسة حضرتك على الكرسي شوية .. مش عايزين كروتة .. انا لسة عندي اسئلة كتيييير :D
MaDa 2011-09-17
مستمرين مع البشمهندسة :P

عايز اعرف بقى علاقتك عاملة ازاي بخالتو صفاء وعمو عبد المنعم حماتك وحماكي .. بتتعاملوا ازاي ؟؟
loleta1 2011-09-17
وانابقى عايزة أعرف أخبارك أيه مع ريس الموقع
؟ياترى فيه حكم دكتاتوري عندكم ولا الريس ديموقراطي في كل مكان؟وكمان هل بتتبادلوا أدارة الموقع وبتشيلي عنه شويه ولا الليله كلها عليه؟والأهم هتقدري تقنعيه يجي على الكرسي ونستجوبه ولامافيش أمل؟:-D
yara 2011-09-17
الحمد للة نا مششششششششششششش من الضحايا :-)
زغباوية 2011-09-17
مدام دخلتي يايارا يبقى استنى دورك
loleta1 2011-09-17
جيتي لقضاكي ياشابهوالدورالدورالدور الدور موعوده ياللي عليكي الدور هههههههههههه
زغباوية 2011-09-17
الدرو عليا في الاسئلة:
ياباشمهندسة عايزين نعرف ايه الحلم انتى حققتيه وحلم اخر نفسك تحققيه
وبزود على سؤال مادا ايه؟ اللى انتى بتحبيه فى اخوات جوزك وايه اللى مش بتحبيه(شوفتى زنقتك ازاى)وايه اللى بيزعلك منهم
shady 2011-09-17
لو تقدرى ترسمى مستقبل اطفالك تحبى تشوفيهم اية ؟ يعنى نفسك شمس و سراج يكونو اية ؟
MaDa 2011-09-17
هههههههههههههههه شفتي يا بشمهندسة كنتي عايزة تنزلي وتسيبي ده كله :D
الباشمهندسة 2011-09-18
ايه دا كله ... كل دي اسئلة ... يعني اروح اشتري لبس المدرسة وارجع الايكو حبسني في الكرسي ... وزنقني في الكورنر.... ماشي ماشي.... دا انا كدا قاهده بقالي 48 ساعة ... ممكن كدا الزق وماحدش يعرف ينزلني :(
الباشمهندسة 2011-09-18
اولا احب اقول ل yara هتتزنقي يعني هتنزنقي :(

@مادا:@ الحمد لله وماشاء الله ولا قوة الا بالله ...علاقتي بصفصف وعبدو حلوة جدا وبعتبرهم اصحابي علي الاخر يعني المعاملة بينا اخر دلع وده لانهم حبوبين وطيبين جدا جدا ودماغهم متفتح مش زي بقي حموات الزمن اللي فات امثال ماري منيب :(

وممكن تتأكد منهم وهما يردو عليك
الباشمهندسة 2011-09-18
@لوليتا .... العفريتا...حلو بعرف اقول افيشات انا كمان :(

والله ريس الموقع ده مفيش اطيب منه في الدنيا دي كلها الا صفصف مامته متفاهم جدا ومتعاون لابعد الحدود هو بس غيور حبة وقلوق شويه ومش فاضي علي طول والحمد لله ديمقراطي جدا جدا جدا بس في حاجات بالنسبة له تكون حساسة بيحب يفرض رأيه فيها وانا بحترم ده من حقة بردو ياجدعان ... ده الريس بتاعي

فيما يتعلق بشئون الموقع انا في البدايات اتعلمت منه حاجات كتير والحمد لله برمجتها وصممتها بس الحقيقة هو اللي شايل ديلوقتي اي برمجات لانها تفاصيل كتير ومش هفهمها بسرعة وكمان هتاخذ وقت أطول مني واعضاء الموقع مابيحموش :(
انا اصلا بتاعت طوب وخرسانة وكويس قوي اني ليا في الكمبيوتر عشان كدا انا مسؤلة حاليا عن فتح الصور والفديوهات ومتابعة التبويبات الحاجات البسيطة دي .

موضوع الكرسي ده مش صعب قوي بس لو دا حصل يبقي سؤالين او تلاتة بالكتير لانو زهوق ومابيحبش الانتظار وطبعا مشغول كان الله في عونوا وراه شغل وبيت وعيلين وست زي السكر لازم يراعيها وكمان ابنه الجديد زيدوني وان شاء الله احاول اخليه يبقي اخر واحد يقعد علي الكرسي بس ماوعدكوش :(
الباشمهندسة 2011-09-18
@زغباوية: الحمد لله اتعلمت واتخرجت واخذت شهاده عالية واتجوزت احسن راجل في الدنيا وخلفت اتحف طفلين اعتقدمفيش بعد كدا احلام يبقي طمع.... بس ممكن الواحد يطمع في كرم ربنا ويسأله الصحة والستر ونفسي قوي احج ويكون جوزي معايا ونكون لسة بصحتنا عشان نستمتع بالحج ... ومفيش مانع كدا لو اتكعبلنا في 2 او 3 مليون جنية في السكة يعني مش هيخصر .

بس حقيقي نفسي موقع زيدوني يبقي من احسن 100 موقع في العالم ويحقق الهدف الرئيسي منه وهو زيادة وعي وثقافة الناس الكبير قبل الصغير ويظل باحترامه ورقيه وتربع فوق كل الموقع الاخري اللي عايز تتقفل بالضبة والمفتاح وواخده الشباب في سكة اللضياع.

جينا للمطب الصناعي بتاع زغباوية اللئيمة
احب اقول وبكل صراحة اكتر حاجة بكرها في اخوات جوزي انهم مابيعرفوش يتفقوا علي حاجة ولو اتفقوا عليها بعد خمسين جولة كدا بردو حد فيهم بيخلف الاتفاق... مش كدا ولا ايه ؟ :(:(:(

وبحبهم كلهم زي اخواتي لانهم لذاذ ودمهم خفيف من كبيرتهم زغباوية لحد ام العيال ومرورا بtafatifi وطبعا الفنان الكبير حاتم .وعمرنا مازعلنا من بعض والحمد لله ... وربنا مايجبش زعل .
الباشمهندسة 2011-09-18
@شادي .... الهادي انت فينك بقي بقالك مده؟
عموما فيما يتعلق بولادي احب اتمنلهم الخير وانهم يبقوا احسن مني ومن ابوهم كمان بس الحقيقة ان عمري ماحد رسملي حياتي وبالتبعية مش هافرض حاجة عليهم وهسيبهم يعملوا اللي هما عايزينوا طالما صح ومقتنعين بيه والحقيقي بقي مابقاش فيه حاجة تفرح قوي ديلوقتي يعني الدكتور بيبيع اعضاء المرضي والمهندس بيخم في الاساسات والمدرسة بتديعي عيال دروس خصوصية والمحاسب بيتلاعب بالميزانية والاعلامي دلدول للحكومة او بيدخل السجن والطيار بيهرب مخدرات او بيتهموا انه ارهابي لما يقول ادعية قرأنية في الطيارة والشرطة بتضرب في الشعب .... يعني الامل بقي في المستقبل ان حال البلد يتصلح او تظهر مهن جديدة مكناش نعرفها والعيال تفلح فيها :(
الباشمهندسة 2011-09-18
اظن كدا انا عداني العيب وازح انزل بقي وانا شايفة mora علي الخط ديلوقتي فاحب اقولها انك الضحية التاسعة وماتحوليش تهربي اكيد هيوصلك التعليق ده .... لامفر ولا تراجع ولا استسلام .... سمي باسم الله واقعدي يا شابه :(

السؤال الاول والتقليدي تعرفينا بنفسك .... توكلي علي الله وجاوبي:(
Noura 2011-09-18
بردجو خلعتي بدري بدري يا باشمهندسة ماشي
كملي يا موراشجرة عيلتك في زيدوني ؟
الباشمهندسة 2011-09-18
انا خلعت بدري!!! ... انا بقالي يومين بحالهم قاعدة علي الكرسي مده ايدي مستنية الاسئلة وبعدين ده كاس وهيدور تاني علي كل الناس:(
mora 2011-09-18
يعنى عجبك كدا يا باشمهندسة حتى النت خاف منك وفصل وهو لسه شغال حالا
زغباوية 2011-09-18
@ الباشمهندسة اجابتك صحيحة 100 % بس كنت بناغشك شوية واشمعنى انا يعني اللى معملش مطبات صناعية ماهى البلد مليانة جت عليا:(
مورا: أدخلى ياشابة مستنينك
MaDa 2011-09-18
ماشي يا بشمهندسة نزلتي برده قبل ما نخلص اسئلة .. مش هنسيبك وهتقعدي تاني ان شاء الله .. بس أحييكي على إجاباتك :(
MaDa 2011-09-18
نورتي يا مورا الكرسي ويارب تتبسطي معانا :(
انا هسأل بعد ما تقواي ال cv :(
shady 2011-09-18
واللهى يا باشمهندسة انا بعمل حاجات كتير وحاسس انى مأثر حتى فى شغلى , وربنا يكرم اولادك ويكونوا احسن ناس ان شاء الله
مورا تعرفنا بنفسها علشان نعرف نسألها
الباشمهندسة 2011-09-18
@شادي: ربنا معالك ويعينك ... عموما لو انت بتعمل اللي عليك بذمة يبقي حالة عدم الرضا عن اداءك ده شئ كويس لانك بتبقي عايز توصل للافضل وبتكون دافع ليك للتجويد كمان وكمان

نورتي يا مورا يلا جاوبي
mora 2011-09-18
قبل ما اجاوب عايزة اقول لكل اسرة زيدونى انى مبسوطة جدا وانا معاكم وانى اول مرة اشترك فى موقع اصلا الموقع تحفة وانتوا احلى حاجة فى الموقع
MaDa 2011-09-18
يارب دايما يا مورا وانتي احلى :( .. يلا جاوبي بقى على أول سؤال عشان نسأل :D
mora 2011-09-18
يا ربى انت طلعتلى منين يا مادا
MaDa 2011-09-18
انتي خلاص قعدتي واتدبستي .. وابقي خلصي تارك من البشمهندسة :D:P
يلا قولي ال cv ؟
mora 2011-09-18
اولا اسمى مروه احمد
36سنة
بكالوريوس تجارة شعبة اداره اعمال
متزوجة وعندى محمد وحسين
اقامتى فى قها
MaDa 2011-09-18
ايه ده بلديات يعني :D
قوليلنا شجرة العيلة والأصدقاء المقربين في زيدوني ؟
mora 2011-09-18
زوجى اسمه احمد وهوابن عمى
ابنى الكبير اسمه محمد وهو فى كى جى تو وعنده 5سنين
ابنى التانى حسين وهو عنده 3 سنين
انا الاخت الكبيرة
وليا اخ اسمه محمد متزوج وعنده ولدين وبنت
واخت اسمها اسراء متزوجة وعندها ولد
وقبلهم بابا حبيبى ربنا يخليه يارب ويبارك فيه ومامتى حبيبتى
اما الاصدقاء من زيدونى فهم
1-حبيبه قلبى طنط صفاء
2-زغباوية ودى صديقتى الحميمة وكنا مع بعض فى المدرسة
3-ام العيال ودى بموت فيها
4- الاستاذ مادا بجد بعتز بصداقتك جدا لانك شخصية محترمةولذيذة جدا
mora 2011-09-18
وعلى فكرة فى اصدقاء بتعجبنى كتباتهم زى نورا ولوليتا وشادى والاستاذة والباشمهندسة
mora 2011-09-18
والاهم عمو عبد المنعم اللى مطنشنا خالص
mora 2011-09-18
ومش هنسى طبعا صاحب موقع زيدونى الاستاذ محمد
محمد عبد المنعم 2011-09-18
أولا:
أنا بعتذر عن طول وقت النحميل للمشاركات اللي لها تعليقات كثير زي دي ... عندي حلول للمشكلة دي لكن للأسف الشديد وقتي كله مش ملكي ... دعواتكم بقى!

ثانيا :
طالما محدش بيسأل ... أنا هسأل:
الموقع هدفه زيادة الوعي والثقافة لكل الناس اللي بيتكلمو عربي عن طريق تبادل الخبرات ... هل بتحاولي تطبقي اللي بتقريه وبتشاركي بيه في الموقع حقيقي ولا الموضوع أقرب لملء الفراغ ... بمعنى آخر : هل استخدامك للموقع أثر إيجابيا على حياتك ... بدون أدنى نوع من المجاملة
mora 2011-09-19
اكيد طبعا اثر فيا يعنى على سبيل المثال عرفت معلومات مهمة عن الاطفال بحاول اطبقها هيا طبعا احيانا تصيب واحيانا تخيب بس بجرب
بحاول اقرا المواضيع الدينيه وطبعا بلا قى حاجات كانت خفية عليا
والاهم وبصراحة انا ملحقتش اقرا كل الموضوعات بس بحاول
mora 2011-09-19
وعلى فكرة انا مش بجامل دا بيقولوا عليا مدب عشان مبعرفش اذوق الكلام
بجد الموقع جميل اه صحيح عجبنى جدا اهتمامك برؤيه الصورة او الفيديو قبل عرضه وكمان التعليق على المواضيع
بجد موقع محترم جدا وجميل ومواضيعه شيقه
ان شاء الله فى تقدم دائم يا رب
واخيرا شكرا على الاهتمام والسؤال لحسن انا شكلى بقى وحش
مع انى والله مكنتش عايزة اقعد على الكرسى بس الباشمهندسة
ضحكت عليا وخلتنى امام امر واقع
MaDa 2011-09-19
ربنا يخليكي يا مورا .. وانا كمان بعتز بصداقتك جدا جدا :(:(
@monem: ربنا يعينك يا بشمهندس :(
MaDa 2011-09-19
اكيد انتي نزلتي القاهرة ووسط البلد .. عايزك بقى تقوليلي الفرق بين قها وبين المدينة وهل نفسك تفضلي في قها ولا تنتقلي للعيش وسط المدينة ؟
ملحوظة : قها طبعا دلوقتي وصلت لقدر كبير وهائل من المدنية :(
الباشمهندسة 2011-09-19
انا بفي عايزة اعرف شعورك بما انك عندك ولدين هل نفسك في بنت وايه رأيك في موضوع تنظيم النسل وشعار 2 ويس
mora 2011-09-19
مادا@
طبعا بنزل مصر دايما وبشترى كل حاجة من مصر وسط البلد مصر الجديدة المهندسين الهرم الخ هو فى حد مبينزلش مصر
الفرق انى عشت فى البلد دى احلى سنين عمرى وكمان اتجوزت فيها ومعظم اهلى فيها بس مش كلهم لكن مصر !!فيها الفسح وكورنيش النيل وشبرا اللى بموت فيها
بس بحب قها طبعا لكن لو حكمت الظروف بالانتقال لمصر مفيش مشكلة طبعا هاقلم نفسى عادى جدا
وطبعا حضرتك مش بتتريق لما بتقول قها وصلت لقدر كبير من المدنية دا من زمان دى مدينة كل حاجة عندنا من الابرة للصاروخ بس برده بشترى اغلب طلباتى من مصر
على فكرة التكاتك عملة عندنا شغل جامد قوى تلوث سمعى وبصرى حاجة ايه تخنق
قولى بقى انت لو عشت فى مكان اهلك واصحابك واحلى ناس اتعودت عليهم فى هذا المكان هتحس بايه لو فرضت عليك الظروف الانتقال لمكان اخر تسكن فيه؟؟؟؟؟؟؟؟؟؟
yara 2011-09-19
يالهوى يا مورااااااااااااا ان شاء الله مش هتنزنق ياترب ينسونى يااااااااااارب اعتبرونى فراغ فى الصفحة دى:-D :-D :-D
mora 2011-09-19
اما الباشمهندسة فردا على سؤالك
اولا ولدين ورا بعض حاجة صعبة جدا فى المعاملة والتوجيه ولا الخناقات بين الاتنين اكنك بترودى اسود او قرود او كلاب
بس هما زى العسل ولمضين وروحهم خفيفة بس لما يكونوا رايقين
طبعا انا من زمان من قبل ما اتجوز نفسى اخلف 3 اطفال يعنى تنظيم النسل عندى 3 مش اتنين
وبعدين بنت طبعا هتحلى الجو شوية ما هى البنت حياة البيت وكله نعمة وفضل من عند ربنا الحمد لله
Noura 2011-09-19
لاء يا مورا طبعا الجنة من غير ناس ماتنداس
mora 2011-09-19
لا متخافيش هيزنقوقى ويخدوكى على غرة زى ما حصلى من الباشمهندسة متخفيش شكة دبوس صغننة
mora 2011-09-19
ما ان بقول كدا برده والحمد لله انى بين اهلى وناسى دى احلى حاجة الحمد لله
Noura 2011-09-19
الله يكون في عونك بجدالبيت اللي كله ناشف كدا مفيش بنوته تعمل جو وشقاوة في البيت ربنا يرزقك ببنوتة يارب
mora 2011-09-19
ربنا يخليكى بس الشقاوة دى اساسى عندى كل يوم كل يوم والحمد لله بس والله دمهم خفيف جدا ومسكرين
Noura 2011-09-19
ربنا يخليهم ليكي وتشوفيهم احسن ناس في النيا والاهم انهم يكونوا بارين بيكي انتي ووالدهم :(
قولي بقا يا مورا عرفتي زوجك ازاي ؟
mora 2011-09-19
زوجى هو ابن عمى ومعرفتى به انه ابن عمى فقط ومعرفش حاجة عنه غير شكله بس جه عمو (حمايا )يوم وكلم بابا فى التليفون وقال جى عندنا معرفش ليه حسيت بحاجه حلوة لكن ايه بالضبط مش عارفة
مشى عمو من عندنا وبدات الحوارات المغلقة بين بابا وماما وجدتى مامه مامتى واخويا وانا زى العبيطة ولا فاهمة حاجة
وبعدين انفضت الجلسة واخبرونى وطبعا عشان بابا وماما بيحبوا احمد زوجى كانو بيمدحوا فيه والحمد لله صليت صلاة استخارة والحمد لله كنت مبسوطة
وتمت الخطوبة بعد امتحاناتى فى 2كلية تجارة
والله انا معرفت اى تفاصيل عن شغله او بيحب ايه الخ الا بعد ما لبست الشبكةوالحمد لله
mora 2011-09-19
زواج تقليدى مع ملرتبة الشرف بس خلال اسبوع بقى حاجة جميلة جدا الحمد لله
Noura 2011-09-19
هما الاهالي دول مبيتغيروش ابدا ابدا الطريقة واحدة مهما بعدوا ومر الزمن حاجة غريبة فعلا:(
mora 2011-09-19
لا يابيتغيروا كان الوضع مختلف تماما مع اختى الصغيرة على العكس تماما اصل الابهات كانو بيجربوا فينا الاول دا احنا كنا غلابة والله
Noura 2011-09-19
ههههههههههههه لاء والله الاسلوب واحد انا يمكن انا اللي واخدة راحتي انا اختي بابا قالها يا توافقي ياتوافقي وطبعا مكنش فيه مفر ففوافقت كوميديا صح
زغباوية 2011-09-20
يامورا ايه الصفة اللى بتحبيها فى جوزك واتعلمتيها منه؟وايه اللى نفسك يغيرها؟
زغباوية 2011-09-20
monem: انت اللى جبتوا لنفسم ايه يابنى اللى دخلك الموضوع المليان تعليقات ده عموما منور وفي انتظارك على الكرسي
mora 2011-09-20
بس انا يا نورا وافقت بمزاجى وبجد كنت هندم لو رفضت لان جوزى رجل بكل ما تحمله الكلمة من معانى
mora 2011-09-20
حرام عليكى يا رانيا اخوكى قال يجبر بخاطرى ومحدش معبرنى ايه الرخامة بتاعتك دى ولا انتى متغاظة انه مسالكيش
mora 2011-09-20
حمدل على سلامة النت عندك كفارة ومنورة الموقع يا جميل
زغباوية 2011-09-20
لا والله انا برأف بحاله من كمية التعليقات اللى فى الموضوع ده انه يقعد يقراها لانه فعلا مش فاضي
زغباوية 2011-09-20
وكمان مبسوطة انه دخل هنا علشان مكنتش متوقعة يدخل فيه وبمهدله الطريق انه يقعد عليه خليه بقى بعدك ايه رايك لما بس الاول نخلص عليكي من الاسئلة:D
mora 2011-09-20
رانيا@
بحب حنيته جدا ومواقفه الجميلة مع كل الناس بس كان نفسى اتعلم منه ازاى اوزن الامور صح لكن دايما يقولى انتى متعملتيش مع ناس ابدا طب والله اعمل ايه
بس دلوقتى ابتديت افهم بعض الامور بطريقة تتناسب مع الحياه اللى عيشنها
اما اللى نفسى يغيرها العصبية ثم العصبيه ثم العصبيه
mora 2011-09-20
تصدقى احنا فعلا لازم ندبسه ونخليه يقعد ع الكرسى بس المشكله
انه اننا لازم نجهز اسئله من العيار التقيل تتناسب معاه ولا ايه
بس اوعى يطردنا من الموقع انا معرفكيش هههههه
زغباوية 2011-09-20
لا متخافيش بس هاحاول اجهز له اسئلة جامدة فعلا
MaDa 2011-09-20
انا معجب جدا بإجاباتك كلها يا مورا .. بجد عاملة جو تحفة للكرسي :(
بالنسبة ليارا و للبشمهندس محمد فمش هيفلتوا وكمان عمو عبد المنعم .. كله هيقعد على الكرسي :D:P
mora 2011-09-20
ربنا يخليك يا مادا دا من ذوقك وان شاء الله مش هيفلتو بس المشكلة فى عمو عبد المنعم هنمسكه ازاى
MaDa 2011-09-20
سيبي الموضوع ده عليا :D
mora 2011-09-20
اوكيه لما نشوف
MaDa 2011-09-20
مورا خليكي فاكرة السؤال اللي سألتيه ليا عشان لما اقعد على الكرسي تبقي تسأليه :(
mora 2011-09-20
حاضر من عنيا
mora 2011-09-20
بس خليك فاكر انا سالتك السؤال من قبل متقعد ع الكرسى بس انت اقعد وهتشوف !؟؟؟؟؟؟؟؟
MaDa 2011-09-20
ربنا يستر عشان انا كل مرة بزوغ وبقول خليني للآخر :D
الباشمهندسة 2011-09-20
ماهو حرام كدا كفاية علي مورا ... زي مادبيستك في الكرسي هشيلك منه عشان ماتبقيش منفسنة مني خلاص كفاية عليك كدا اختاري حد تاني وسني سنانك تطلعي فيه القديم والجديد

بيني وبينيك كدا من غير ماحد يسمعنا اختاري مادا ... عشان هو بيتهرب بس ماتقوليش لحد ان انا اللي وزيتك عليه
mora 2011-09-20
يا وحشه والله ابدا دا انا بحبك بالرغم انى مشفتكيش خلاص مخصماكى
mora 2011-09-20
هو المفروض انى اختار على العموم امامى 3 اشخاص مادا عمو عبد المنعم الاستاذ محمد اختاروا انتو بقى ويا ريت بالترتيب من غير ما حد يتهرب من الكرسى
mora 2011-09-20
الاستاذ مادا بناء على طلب الجماهير وانا اولهم اتفضل الكرسى مستنيك
زغباوية 2011-09-20
اهلا يامادا منور (من حفر حفرة لاخيه وقع فيها) ها ها ها ها:D
أحلامك ايه او نفسك توصل لإيه؟دا كدا بس لغاية ماجهز اسئلة جامدة شوية
mora 2011-09-20
بناء على طلب الاستاذ مادا فى هذا السؤال
مادا لو عشت فى مكان اهلك واصحابك واحلى ناس اتعودت عليهم فى هذا المكان هتحس بايه لو فرضت عليك الظروف الانتقال لمكان اخر تسكن فيه
mora 2011-09-20
مادا
سؤالك المعتاد الcv بتاعتك
mora 2011-09-20
متنسوش يارا فى كرسى الاعتراف
الاستاذة 2011-09-20
ميرسي ليكي يا مورا وعلى اعجابك بالمواضيع بتاعتي
ربنايجبر بخاطرك
الاستاذة 2011-09-20
والحمد لله انكم وصلتم لمادا لانه قال انه اخر واحد يعني الكرسي هايقفل بعديه لان الزنقة وحشة قووووووووووووووي
الاستاذة 2011-09-20
وسؤالي ليه ايه افضل قرأتك
لان ماشاءالله ماشاءالله الثقافة عندك عالية قوي وافكارك معظمها ان ماكنش كلها جميلة
لدرجة اني بتمنى اني ابني يبقى زيك
انا مش بحسد والله
وربنا يبارك فيك يا ابني
MaDa 2011-09-20
قبل ما اجاوب
@البشمهندسة : ليه كده بس :D
@مورا : أهون عليكي داحنا بلديات حتى :P وبعدين لسه في يارا والأستاذة غير عمو وبشمهندس محمد .. يلا الخيرة فيما اختاره الله :(
@زغباوية : ربنا يخليكي على اللقب .. مع انه كبير اوي عليا :(
@الأستاذة : ربنا يكرم حضرتك انا لساني عاجز عن الرد ويارب ابقى عند حسن ظنك بيا ويباركلك في ابن حضرتك يبقى احسن الناس :(
MaDa 2011-09-20
استعنا على الشقى بالله :(
هبدأ بسؤال مورا ال cv :
الاسم: محمد سعد سعيد
السن : 20 سنة (بعد 3 شهور)
طالب في سنة تالتة بكلية الحاسبات والمعلومات جامعة حلوان
أعزب ونفسي أتجوز بقى :D
ساكن في شبرا الخيمة ومسقط رأسي .. حبيبة قلبي ♥ قها ♥
عندي أخت واحدة بس هاجر وهي معانا هنا في زيدوني .. (مصلحة مليش جيش) :D
♥ مامتي حبيبة قلبي ربنا يخليهالي يارب ♥
ان شاء الله المهنة .. مبرمج
MaDa 2011-09-20
سؤال الزغباوية :
انا احلامي ملهاش حدود .. طموح لأقصى درجة ممكن تتخيليها .. مثابر ولو فكرت في حاجة بوصلها الحمد لله ومش بتنازل او بسلم بسهولة .. ساعات كنت بضعف واستسلمت قبل كده لكن بعد كده اتعلمت اواجه واصمد ومستسلمش ابدا والحمد لله خطوة خطوة بحقق احلامي .. :(
بحلم ابقى مبرمج شاطر ومشهور .. عندي افكار ياما نفسي اخدم وانفع بيها غيري .. بحلم ربنا يجمعني على خير مع الانسانة اللي اختارها قلبي وميفرقش بينا ابدا .. بحلم اخلي ماما دايما مبسوطة ومرتاحة ومش ناقصها حاجة عشان هي تعبت عشاني كتييير اوي وعملت عشاني اللي محدش عمله .. وضحت بنفسها ونسيتها خالص عشاني وانا مهما عملت مقصر اوي اوي اوي في حقها .. في حلم كده كان زمان بيروادني وهو اني ابقى اعلامي كبير بس بعدت عنه ..
بحلم اني اعيش حياة كريمة ليست حياة ترف او بزخ .. لوكنها حياة بسيطة اهم ما يتوفر بها هو الرضا من الله والحب من الله والناس :(
بحلم بأولاد بارين .. عشانهم اضحي بأي حاجة .. راسملهم صورة في خيالي مش هرتاح الا لما يبقوا فيها ان شاء الله :(
safaa 2011-09-20
يارب احلامك كلها تتحقق يامادا
سؤال صغنن:
تقول لنا على مواصفات للفتاة اللى هتكون ان شاء الله زوجتك
MaDa 2011-09-20
سؤال مورا التاني:
اكيد هحس بالغربة والعزلة ومش هرتاح الا لما ارجع تاني .. لأن كل واحد بيحن لأصله وذكرياته والمكان اللي تربى فيه واللي فيه عاش اجما ايام عمره مع اجمل ناس عرفهم وحبهم .. بس اكيد دوام الحال من المحال والواحد لازم يتأقلم على كل جديد .. ومهما حصل هيفضل الأصل في القلب هو رقم واحد :(
MaDa 2011-09-20
ممكن تعيدي كتابة السؤال تاني يا أستاذة عشان مش واضح ؟
mora 2011-09-20
لو جتلك تذكرة سفر هديه تتمنى تكون لاى بلد وليه ومين يكون معاك فى الرحله دى
MaDa 2011-09-20
سؤال خالتو صفاء :
تكون مليحة .. ((( خجووووووووووولة ))) عاقلة .. محترمة .. رقيقة .. تفهمني من نظرة عيني دون أن اتكلم .. تحسن التصرف .. طيبة وحنينة .. ملتزمة .. مطيعة .. متفاهمة .. أصلها طيب .. صبورة .. ترعى الله في بيتها وفي اولادها وفيا .. اكون انا اهم حاجة في حياتها .. مخلصة .. قنوعة .. تجيد التعامل مع الآخرين .. صوتها منخفض .. تدفعني إلى فعل الخير وصلة الرحم .. تنبهني لأخطائي .. متواضعة .. كتومة وما بيني وبينها لنا نحن الاثنان فقط .. ست بيت شاطرة ( مش مهم اوي عشان انا هساعدها وهعملها كل اللي نفسها فيه بايدي ) .. قليلة الكلام ( مش رغاية ) .. بسيطة وغير متكلفة في مظهرها .. واقعية .. طيبة الكلام :(

بس كده يا خالتو :(
shady 2011-09-20
انت قنوع اوى يا مادا , المهم بقى انك تقدر تديها كل الحاجات دى برضة :(
MaDa 2011-09-20
هختار تايلاند عشان أجمل بلد في الدنيا وفيها مناظر طبيعية ملهاش حل وشعبها طيب أوي أوي ومنظمين جدا .. وهاخد معايا مراتي طبعا بس لما تيجي بس :P
MaDa 2011-09-20
أكيد يا شادي .. ربنا يقدرني واديها ده كله واكتر كمان :(
يلا اسأل بقى :D
shady 2011-09-20
شوف يا محمد انت ردودك كلها جميلة ومثالية وحتى فتاه احلامك مثالية برضة , سؤالى بقى هل انت شايف انك ممكن تلاقى واحدة مثالية كدة ؟ طيب هل انت شايف نفسك اصلا شاب مثالى وناجح؟ , انت شايف ان مجتمعنا دة ينفع معاه الانسان المثالى وينجح؟ , اكتر مكان بتحبه وبتستريح فيه وبتتمنى تكون لوحدك او معاك حبيبتك او مراتك , شايف نفسك هتكون اية كمان 5 سنين ؟ بتعمل اية لو حد استفذك فى الكلام وكان هو دتور فى الجامعة او ظابط فى القسم او مدير شركة بيعملك مقابة ؟ رد على كل الاسئلة دى يا عبقرينو من غير مثالية :(
Noura 2011-09-20
عيقرينو انت جيت وانا مش هنا بس لحقتك يا جامد ايه الحاجات الفظيعة اللي انت عايزها دي بس بما انك كتبتها تبقا لاقيتها ;)مش كدا ولا ايه ؟
Noura 2011-09-20
هطلب منك حاجة صعبة بما اني مش عارفة افكر فيي اسئلة دلوقتي يا عبقرينو انك تجاوب على كل سؤال سألته لكل واحد قعد عالكرسي :P
MaDa 2011-09-21
بالنسبة لفتاة أحلامي فالحمد لله هي موجودة وبحمد ربنا عليه ليل ونهار عشان رزقني بيها لأني لقيت فيها اللي عمري ما تخيلت او خطر في بالي انه يبقى موجود في انسانة في الزمن ده :(
انا شايف نفسي ناجح الحمد لله ولسه قدامي سكة طويلة ان شاء الله بس مش مثالي طبعا .. لأني عشان أحقق المثالية دي لازم تتوجد حاجات كتير حواليا .. حتى لو انا جوايا المبادئ والقيم المثاليه اكيد مهما عملت وحاولت عمري ما هوصلها لأنها ببساطة شديدة هتتنافر مع المجتمع اللي احنا فيه
وعشان نحققها محتاجين نغير مجتمع وفكر بأكمله :(
بس مش معنى كده اننا نستسلم وننجرف مع التيار .. لازم الواحد يقاوم ويعمل الصح مهما واجه من عقبات بل واننا نحاول على اد ما نقدر اننا نصلح الفكر ده .. ناخد بإيد المنحرف ونحاول نحطه على الطريق الصح .. وما دام كله لوجه الله وبننوي الخير ربنا هيقف جنبنا .. وعلى فكرة انا بتكلم عن تجارب شخصية :(

اكتر مكان بستريح فيه هو موجود على النيل.. مكان كده محدش يعرفه اوي بروحه دايما لوحدي لما ببقى متضايق هو في المظلات عندنا في شبرا .. بفكر في كل حاجة عملتها وبفضل اقيم تصرفاتي واحاسب نفسي .. وبمشي من هناك وانا مرتاااح اوي :(

كمان 5 سنين هكون لسه في بداية حياتي .. ان شاء الله أكون حققت حلمي وابقى مبرمج واكون اتجوزت من الانسانة اللي اخترتها :(

بالنسبة لموضوع الاستفذاذ .. فانا بارد لأقصى درجة تتخيلها بس مش دايما .. يعني الموضوع بيبقى حسب الموقف .. بس في الغالب بتصرف بعقل ومبتهورش واتعصب عشان مضيعش حقي ومخليش حد يركبني غلط .. :(
يارب تكون اجباتي واضحة :(
shady 2011-09-21
ربنا يكرمك بيها يارب وتكون ليك طالما هيا غالية عندك وقى كدة , بالنسبة لاجابتك ياسيدى زى الفل لكن حاسس ببعض المثالية فى موضوع المجتمع دة مع ان انا حذرتك وبصراحة موضوع كمان 5 سنين دة رد ممكن يرده اى حد لو عايز تبقى عبقرى لازم تشزف نفسك عبقرى وتبقى عارف هاتبقى ازاى كله طبعا بإذن ربنا انت الوحيد اللى تقلت عليك فى الاسئلة وجاوبت عليك وانتقدتك بكل صراحة علشان احنا رجالة زى بعض مش اكتر وربنا يقويك وينجحك وخليك واثق فى نفسك وربنا هايكرمك ان شاء الله
MaDa 2011-09-21
@نورا : بالنسبة للنقطة الأولى فالحمد لله لقيتها :P
بالنسبة للسؤال التاني .. فليه الافترا ده هو انا عملت حاجة فيكم :D:D
MaDa 2011-09-21
ربنا يكرمك يا شادي وبجد بدون مجاملة أقوى وأجمل أسئلة اتسألتها من ساعة ما لعبت اللعبة دي من زمان :(
ويارب انت كمان تحقق كل اللي بتحلم بيه ونحضر فرحك قريب بقى :P
shady 2011-09-21
حبيبى يا محمد ان شاء الله عن قريب , هسيب غيرى يسألك بقى وانسحب انا
زغباوية 2011-09-21
ايه الحاجة اللى تقدر تعملها للبلد او فى منطقتك حاليا وعملته اولو لسة ماعملتهوش ايه اللى خلاك ماتبدأش فيه
loleta1 2011-09-21
بما إنك لقيت فتاة أحلامك بتتصرف إزاي مع البنات اللي ماتعرفش وبتحاول يمكن تبقى عروس المستقبل؟أو عرايس العيلة ونظام الواد لبنت عمه وخاله والحاجات دي؟وبتتصرف إزاي مع البنات والولاد الموقعتيه اللي مابيصدقوا يلاقوا أتنين مبسوطين ويصروا على عكننة الجو؟
وبالنسبة للمثالية هل أنت شايف أنك فعلا مثالي وقدوة؟ ولا ليك عيوب وهل بتعرف تتصرف مع عيوبك صح وتتصاحب عليها ولا هي اللي بتغلبك؟ولو حصل وغلبتك بتعمل إيه؟ولو قابلت حد مش مثالي ومليان عيوب ممكن تتصاحب عليه؟أو لو حد حبيبك قوي أعترفلك بصراحه على عيوب جوهرية فيه تفضل مصاحبه ولاهتطرده من قائمة أصحابك؟ولوقابلت مشكلة جوهرية فحياتك ماتتحلش غير بطريقة غير مثالية تعمل إيه؟
كده يادوبك انا بصبح عليك يامادا أنت أخويا الصغير وبما إنك صاحب أقتراح اللعبة فالسؤال لينا بعشرة ليك:-Pولا إيه؟جاوب بقى:-D
shady 2011-09-21
ههههههههههههههههه شكل كله بيحيك وناويلك اتفرج بقى على الاسئلة , رد يا عبقرينو
Noura 2011-09-21
يا مادااااااااااااااااا انت فين فين الاجابة عالاسئلة بتاعتي
MaDa 2011-09-21
الهاتف الذي تتصلون به غير موجود بالخدمة .. ايه يا جماعة الحب ده كله .. مكنتش اعرف معزتي في قلبكم اوي كده :D:D

@نورا : انتي بتتكلمي بجد في سئالك ولا بتهرجي :O
@شادي : ارد على ايه ولا ايه .. ادعيلي يا شادي :)
@لوليتا : أحلى صباح يا لوليتا .. ماشي ماشي :D
MaDa 2011-09-21
أجاوب بقى وأمري لله :D
سؤال الزغباوية:
سؤالك جميل وليه علاقة بالموضوع اللي انتي طرحتيه قبل كده في اكتر من مشاركة .. من وانا طالب وحتى الآن بشارك في اعمال كتير تفيد المجتمع وتنميه .. شاركت في قوافل طبية مجانية لمساعدة اهالي الحي اللي انا فيه وغيره .. شاركت في حملات توعية كتير جدا زي حملة لا للتدخين وحملة لمواجهة الإدمان وتعاطي المخدرات وكنت بنزل الشارع وبتكلم مع الناس .. شاركت في تنظيم ثورة المترو اللي كان هدفها توعية الناس بالاتزام داخل المترو وعدم تشويهه والاتزام بأبواب الصعود والنزول وعدم التزاحم ودفع اللآخرين للمحافظة على سلامة الجميع .. وحاجات تانية كتير اوي استفاد منها كتير مش هقول كل الناس .. بس حققت الحمد لله نجاح كبير واتغير ولو جزء بسيط للأحسن .. وهو ده دور المثقفين والمتعلمين .. مش بس التوعية من خلال الكلام .. لا اننا نشارك ونعمل بإيدنا .. نعلم غيرنا الصح .. مش مجرد اننا نوجهه .. في اللي اتكلموا كتير لكن من غير نتيجة .. المشاركة المجتمعية وأعمال الخدمة العامة هي اللي بتجيب نتيجة .. الناس لما بتشوفنا بنعمل حاجة حلوة بتبدأ تفكر ليه منعملش زيهم وييجوا ويسألونا ويتناقشوا معانا .. يفهموا ويبدأ يغيروا .. في اللي بيقتنع وبيبدأ يغير من نفسه .. في اللي بيقول ده كلام فاضي وفي وفي وفي .. ولسه عندي أمل اننا نغير .. انا ومل اللي معايا هنعمل اللي نقدر عليه في شارعنا في الجامعة في المترو في الجناين .. في إشارات المرور وفي كل مكان .. مش مستنين حاجة من حد ولا بنعمل كده عشان شهرة .. هدفنا اننا نغير أي حاجة غلط حوايلنا وان شاء الله مكملين انا وشباب كتير معايا :(

في حاجات كتير لسه نفسي أشارك فيها وابدأ فيها .. في حاجات حاولت أبدأ فيها وواجهت احباطات سواء من الناس او من المسئوليين .. بس انا مبزهقش والفريق اللي معايا كله حماس وربنا معانا ونحقق كل اللي بنحلم ونبنفكر فيه :(
MaDa 2011-09-21
صعب اوي يا نورا اجاوب على كل الأسئلة دي وبعدين في اسئلة مش متناسبة معايا خالص يعني في عن الأبناء وعن الحموات وعن الشغل وكل ده انا لسه مليش علاقة بيه .. انتي اختاري منهم اللي انتي عايزاه وانا هجاوبك من عنيا :D
زغباوية 2011-09-21
مش عارفة اقولك غير ربنا يوفقك انت وكل اللى معاك وماتزهقش مهما واجهت ومصر مش هاتتظبط غير لو كل الناس بدأوا يشتغلوا كدا بجد ربنا يحقق كل اللى بتتكمنوه ويعينكم ويوقفلكم اللى يساعدكم
زغباوية 2011-09-21
طيب سؤال بقى مش بتقول اللى بتعملوه هنا على الموقع ليه ؟؟؟؟علشان الكل يستفيد واللى يقدر يعمل زيكم يتشجع وعلشان نحس ان فيه ناس مننا بتعمل وبتشتغل اهيه
MaDa 2011-09-21
عريضة لوليتا بقى اللي مليانة أسئلة كلها ملعوبة :P:D

بالنسبة لأول نقطة وموضوع البنات اللي متعرفش اني مرتبط واخترت الانسانة اللي هتشاركني حياتي فبتعامل عادي وبطبيعتي كأنهم اخواتي ده غير اني بريح نفسي وبقول بصراحة وفي وشهم بس طبعا بطريقة فيها شياكة عشان مجرحش احساسهم .. والحمد لله انا عديت من المرحلة دي بأمان من القرايب لكن الغُرب لسه شوية كل يوم في جديد :P وده عشان انا بتعامل مع الناس كلها بذوق وشياكة زيادة شوية وعشان انا بطبعي اجتماعي وعلاقاتي كتير وطول الوقت بتعرف على ناس جديدة فوقعت في مشاكل كتير بسبب كده بخصوص الموضوع ده .. والحمد لله كل بيعدي على خير في الآخر :(

بالنسبة للموقعتية فالحمد لله لسه مقابلتش حد منهم لأن كل اللي حوالينا أصحابنا وبيحبونا وبيتمنولنا الخير .. وحتى لو ده حصل فمفيش قلق لأن انا وهي عاقلين ومتفاهمين جدا جدا وعارفين بعض كويس وثقتنا في بعض ثقة عمياء الحمد لله وصعب اوي ان حد يقدر يأثر على الثقة دي او انه يهز صورة أي حد فينا عند التاني :(

مفيش انسان كامل فمقدرش اقول اني مثالي بكل ما تحمله الكلمة من معنى .. لكن الحمد لله انا طول عمري الطالب المثالي والأفضل بين كل اللي حواليا في كل شيء سواء الأخلاق او الدراسة او الثقافة او او وبحس دايما ده من نظرة الناس ليا ومن حبهم ليا اللي بشوفه دايما في تعاملهم وده بالإجماع من كل الناس اللي اعرفهم وكمان اللي بتعرف عليهم للمرة الأولى يعني بفضل الله مقابلتش حد او متعرفتش على حد الا وكانت نظرته ليا كده .. مش معنى ده كله اني خالي من العيوب .. لكن عيوبي الحمد لله مسيطر عليها وانا دايما معترف بيها وهي العصبية والغيرة والتسرع بس الحمد لله بسيطر عليهم .. غلبتني أحيانا واضعفت واستسلمت في اوقات ووقعت في مشاكل بسببها لكن سرعان ما بتدارك الموقف وبفوق وارجع تاني و الحمد لله بتعدي علي خير وبنتصر في الآخر وبحقق اللي انا عايزه :(

موضوع الأصحاب .. انا ليا أصحاب من كل نوع ومن كل سن .. لو قابلت حد فيه عيوب عادي ممكن اصحابه بس لو انا من جوايا مقتنع انه انسان كويس وممكن يصلح عيوبه دي لو لقى اللي ياخد بإيده ويساعده ولو ليا صاحب وفيه عيوب بفضل مصاحبه وبحاول اني أساعده لأني ببقى واثق انه من جواه كويس بس محتاج اللي يقف جنبه .. ومش بيأس بسهولة لكن لو هو من جواه مش مستعد ومش عنده الإرادة وحابب انه يتغير فبيبقى مجرد شخص عادي بالنسبة ليا مش صديق يعني مجرد السلام والسؤال في المناسبات المختلفة وولو احتاج مني اي حاجة أقدر اساعده فيها بس كده .. وعلى فكرة انا ليا اصحاب كتير جدا كده والحمد لله قدرت اني اغير فيهم حاجات كتير .. اللي كان بيدخن وبطل .. اللي كان مهمل في درساته ومكبر دماغه وبدأ يهتم ..... إلخ بجد ببقى في منتهى السعادة لما ده بيحصل :(

مهما حصل ومهما كانت المشكلة اللي انا فيها لو قدامي طريقة مش مثالية بس هتحل المشكلة وطريقة مثالية ومفيهاش غلط بس هتضرني او هتتعبني فبختار اني اتعب لأن ببساطة شديدة لو اخترت الطريقة اللي مش مثالية يبقى بضحك على نفسي لأن ربنا مش هيباركلي وهقع في مشاكل تانية اكبر واكبر .. فبختار الصح عشان ربنا يكرمن واكيد مدام بتعامل بضمير سليم ولوجه الله ربنا هيذلل كل الصعوبات والمشكلة هتتحل بس اهم حاجة اني انوي الخير ومفكرش في اي طرق ملتوية :(
MaDa 2011-09-21
ربنا يسمع منك يا زغباوية :(
وان شاء الله أي حملة او اي عمل خير او خدمة عامة هنوه عنه هنا واللي حابب يشارك يتفضل .. ده غير فكرة كده هتكون انطلاقتها من هنا من زيدوني هقولك عليها بس بعدين لما تكمل كل جوانبها :P
yara 2011-09-21
انا عاوزة العب معاكووووووووووووووووووووووووووووووووووو مليش دعوة
Noura 2011-09-21
لو بقيت رئيس الجمهورية ومتاح ليك تنفذ قرار واحد بس وتسيب الحكم .. هتقرر ايه ؟
ايه اصعب موقف قابلته في حياتك واتعاملت معاه ازاي ؟
جاوب على ما اكمل بقا :P
Noura 2011-09-21
يالا بسرعة الحقي اسئلي انتي كدا دخلتي خلاص يايارا
yara 2011-09-21
احم احم حيث كدة ....... وسعولى بقااااااااااااااااااااااااااااااااااااااا
لو صديق عمرك خان وغلط فيك هتسامحة؟
ولو كنت رئيس جمهورية اية اول قرار هتاخدة؟
الباشمهندسة 2011-09-22
اهلا اهلا .... هو انت اللي قاعد عكرسي معلش جيت متأخر بس ملحوقة

@مورا :طبعا انا ماقدرش علي زعلك ... المسامح كريم :(
@الاستاذة :مش هتهربي انا اصلا كنت مختاراكي بعد مني بس عرفت انك كنتي متوعكة فأجلناكي شويه لما تستردي صحتك... الف لا بأس عليكي وحمدلله علي سلامتك.
@شادي : خذ راحتك الموقع مافهوش تفرقة عنصرية بين ولاد وبنات قول اللي نفسك فيه طالما هو بدون تجريح او خروج عن اللياقة يبقي ولا يهمك اعترض واسأل وانتقد زي مانت عاوز بلاش حزب الرجالة وحزب الستات

@مادا :اولا ايه رأيك في اللقب بتاع مادا لاماضا عجبك ولا نغيره قول بدون احراج :D
ايه رأيك في الصداقة بين الولد والبنت من وجهة نظرك يعني ينفع يبقي ليك صحبات وتقبل ان زوجة المستقبل يكون ليها اصحاب رجال ؟
shady 2011-09-22
يا باشمهندسة مش حزب الستات وحزب الرجالة بس انا بقدر امسك نفسى لما اشوف اتنين بيتكلموا قدامى وما انتقدهمش , لكن لما انا اكون اللى بسأل مش بقدر امسك نفسى , وهحاول افهمك دة , يعنى انا ردى على محمد انه عايش فى ماية البطيخ ومسكت نفسى برضة وما قولتهاش مع اننا رجالة زى بعض وهو مش هايزعل مش عايز ابقى انتقد حد هو مرتاح لفكره و رأيه ويزعل منى , احنا داخلين اللعبة للتعارف والتسالى ليس اكثر
shady 2011-09-22
معلومة هو ربنا يكرمه ويتخرج وها بعرف ساعتها انا قولت كدة لية , علشان كلنا كنا زيه فى نفس مكانه , انا كنت فاكر نفسى ها اتجوز اول لما نتيجة رابعة طلعت , ادينى متخرخ بقالى 4 سنين ومفيش خطوبة لسة ومفيش الحاجات اللى الواحد حلم بيها , انا بعد كدة عملت stop وبقيت واقعى وعرفت انى علشان اغير الناس اهم حاجة اغير نفسى مش اغيرهم هما لأن الطوفان كبير وكان غيرى وغيره اشطر , وانا كاتب حاجة زى كدة كيف كان اختراع النعال
mora 2011-09-22
يا شادى تفائل بالخير تنله مين عارف يمكن ظروف مادا تكون افضل من ناس كتير ان شاء الله ربنا يكرمك ويفتح كل الابواب المغلقة كل حاجة ربنا كتبها عنده بمعاد ومسيرها تفرج ان شاء الله بس انت قول يا رب
ومتعقدش الراجل الواحد مهما سمع نصايح مش بيسمع ولا يهتم الا لما يجرب بنفسه
وساعتها هيكون هو الناصح الامين
MaDa 2011-09-22
قبل ما اكمل إجابتي
اولا اكيد انا عمري ما هزعل منك يا شادي لأنك بتعرض وجهة نظرك .. بس انا ليا تعليق على كلامك في موضوع اني عايش في مية البطيخ او اني متفائل زيادة عن اللزوم .. انا مبحبش احبط نفسي مهما كان كل اللي حواليا ميشجعش على كده .. مش معنى ان الواقع دلوقتي ان لما اتخرج واتمرمط ومحققش اللي بحلم بيه اول ما اتخرج يبقى دي النهاية .. الواقعية اللي بجد اني اخلق لنفسي واقع جديد واحقق فيه اللي انا عايزة .. هتقولي دي مثالية هقولك لا .. لأن في كتير مستسلموش للواقع ده وبداوا وكملوا المشوار ونجحوا وتغلبوا على الواقع اللي اللي انتي بتتكلم عنه .. مش معنى اني متفائل بإني هنجح في تحقيق كل احلامي يبقى انا كده مش واقعي .. انا طول حياتي وانا كده بتفائل وبحط هدف قدام عينيا وببقى واثق في الله ثم في نفسي اني هحققه .. مهما كان صعب المنال ومهما كنت هتعب عشان احقق الحلم ده .. المهم اني مستسلمش للإحباطات والعراقيل اللي هتبقى في سكتي .. على فكرة في غيري كتيييير اوي نجحو وانا واخدهم قدوة ليا وماشي على طريقهم وهم يمكن مش مشهورين لأنهم ناس عاديين مش هقولك انهم مثلا ناذج مشهورة وكده .. وانت ربنا يكرمك وتحقق كل اللي بتحلم بيه .. ويبعد عنك أي مشاكل تواجهها :(
shady 2011-09-22
ماشى يا مورا مش هعقده ولا حاجة انا قولت اسكت الباشمهندسة هيا اللى قالتلى انتقد , وكمان اتمنى ظروف محمد واصحابى واهلى وكل الناس تبقى بخير دى حاجة تفرح , وعلى فكرة هى المسألة مش مسألة مفيش , انا لو عايز اتجوز فى شهر هتجوز الحمد لله , بس الواحد شايف مستوى معين عايز يحققه فى بيته هو دة اللى كل الناس نفسها فيه , شقة محترمة , عربية , عفش كويس , يا مورا الوضع فعلا غصب عننا بقى صعب وانا مش مجامل انا واقعى ومكنتش عايز افتح سيرة علشان مش بحب المثالية انا بحب النجاح وعلشان برضة مش عايز حد يزعل منى , انا اقدر اكتب كتب عن المثالية بس انا مش بوشين علشان انا مش بعمل كدة , انا بحترم نفسى وبحترم الناس , لو لقيت حد عايز مساعدة مش شرط تكون فلوس فى اى حاجة بحاول اعملهاله , مش بحب اغلط فى حد ولاحد يغلط فيا , بحب افكر كويس انا بعمل اية , احب اكون متميز عن غيرى فى كل حاجة شغلى مظهرى كلامى افكارى ارائى مش بحب التقليدى خالص,, انا واقعى ليس اكثر كلنا بنتمنى الخير لكن مش هنقعد نستناه على جمب لازم تتحرك وتشوف مستقبلك وانت بكل ادب واخلاق , لازم تكون شاطر فى شغلك وتكون مدير بنك ومرتبك 50 الف جنيه احسن ماتكون الموظف المثالى وتاخد مكافأة 1000 جنيه , وكله بالادب والاخلاق والمخ اللى ربنا خلقههولنا علشان نفكر بيه , يارب تكونوا فهمتوا قصدى اية من غير محد فيكو يزعل وكل واحد له رأيه وتفكيره و وجهة نظرة اللى مقتنع بيها
MaDa 2011-09-22
أكمل إجابات بقى
سؤال نورا:
القرار هو تعيين نفسي رئيسا لفترة رئلسية جديدة :P
لا بجد هقرر إقالة كل الوزراء الموجودين وتعيين وزراء جدد من الشباب وان تكون مقاليد الحكم بالبلاد في أيديهم وأسلم الحكم لشاب بدره :(

أصعب موقف واجهته في حياتي هو مشكلة مع عائلة والدي وبالتحديد اعمامي وكان السبب مشكلة كبيرة وصلت للقضاء .. لكي ان تتخيلي لما تقفي قدام اعمامك في المحكمة بسبب مشكلة عائلية والأصعب من ده ان الوالد يقف في صفهم مع ان هم المخطئين ومش عايز اقول المجرمين :)
واتعاملت معاه في الأول بعصبية وتهور وجنون لكن بوجود ناس كبير وعاقلة وقفوا جنبي ووجهوني صح ولولا هم بعد ربنا مكنتش المشكلة خلصت منهم عمو أحمد عبد العزيز والد شادي وعمو عبد المنعم وخالو حسن خليل (أخو خالتو صفاء) وخالو عادل أخو ماما والعيلة كلها .. بجد هو ده اصعب موقف عيشته واللي لحد دلوقتي بعاني نفسيا منه :)
shady 2011-09-22
يا محمد انا مش بحبطك ولا انا اقصد دة , وكمان مين قالك انى مغيرتش الواقع بتاعى , انا اساسا بقولك كل الكلام دة علشان تغير الواقع بتاعك , بص يا محمد انت ماتعرفش ال cv بتاعى علشان لسة ما تكلمناش , انا عمرى 25 سنة بشتغل مدير مالى لاكبر شركة تخليص جمركى فى ميناء جدة الاسلامى بالسعودية , ودى جت فى الاول حظ وكانت لفترة 8 ايام فقط وانا اثبت كافأتى لدرجة انهم رفدو المدير وخلونى انا وانا المسؤل عن كل حركة مالية بالشركة وبتدخل فى اكتر من 80% من الشؤن الادارية للشركة من تعين موظفين او رفد او جزاء , يا محمد انا بحمد ربنا انى ناجح واخت خبرة فى 3 سنين مكنتش ها اخدها فى 20 سنة , اللى بيحطم طموحات الناس دة بيكون انسان فاشل وعايز النس فاشلة زيه , بس انا انسان ناجح وعايزك انجح منى وانا اكبر منك فى السن والخبرة ولو زعلان من النصيحة بلاش منها وما تزعلش حقك عليا قدام الموقع كله
MaDa 2011-09-22
لا والله انا مزعلتش خالص وانت مفمتش قصدي .. انا فهمت كلامك كله وانا عمري ما برفض نصيحة من حد سواء اكبر مني او اصغر مني .. انت كلامك كان من خلال تجربة انت عيشتها وخبر ةانت اكتسبتها زي ما قلت .. انا مهما كان لسة قدامي سكة طويلة ولسه هكتسب خبرات كتير تانية .. ومهما كانت الخبرات اللي عندي فمش هتقارن بخبراتك ودي حاجة انا متأكد منها .. كل اللي حبيت اقوله اني بعيش بتفكيري وبطريقتي مهما كان ايه اللي حاوليا .. مش معنى كده اني بعزل نفسي عن المجتمع اللي انا فيه والظروف اللي حواليا .. لا انا اللي بخلق الواقع ده لنفسي وانا بمجهودي وفكري وبمساعدة اللي حواليا بوصل للي انا عايزة والحمد لله لحد دلوقتي من ساعة ما اتولدت مفيش حاجة بحطها في دماغي الا وبحققها وربنا يكرمني ويارب واحقق كل اللي بحلم بيه .. وربنا يزيدك نجاح وتقدم ونشوفك في اكبر مكان وتوصل للمستوى اللي بتحلم بيه وزيادة .. ومتقولش كده تاني عشان انا مزعلتش واحنا بنتكلم وبنتناقش ومفيش اي مجال للزعل خالص :(:(
MaDa 2011-09-22
سؤال يارا:
بالنسبة لموضوع صديق عمري فهي حصلت وسامحته ونسيت اللي حصل ومهما عمل عمري ما هستغنى عنه ولا حتى هشيل منه في قلبي ولا هعايره في يوم باللي عمله :(
أول قرار هاخده لو بقيت رئيس جمهورية هو تسليم الأرض الصحرواية دي للشباب اللي قاعد مبيشتغلش واوفرلهم سكن هناك ومرافق وكل اللي محتاجينه عشان يزرعوا ويبنوا هناك ويعمروها .. وتبقى عمار ومدن ينتقل الناس ليها ونحل مشكلة الزيادة السكانية ونعمل اكتفاء ذاتي ومنحتجش حاجة ولا معونة من حد :(
MaDa 2011-09-22
سؤال البشمهندسة:
بالنسبة لمادا لماضا فنوبروبليم :D
بالنسبة للسؤال التاني فرأيي ان الصداقة بين الرجل والمرأة ممكن تبقى من أنجح الصداقات واللي مبتتوجدش بين الأصدقاء اللي من نفس النوع يعني بين الرجال والرجال او النساء والنساء .. ولكن الصداقة بين الولد والبنت او الراجل والست لازم يكون ليها حدود ومعايير ومتبقاش مطلقة زي الصداقة بين الرجل والرجل .. والحدود والضوابط دي اللي بيفرضها علينا هو ديننا ومجتمعنا وعاداتنا .. ويمكن في المجتمع الشرقي بينظروا لأي صداقة بين الرجل والمرأة نظرة شك لأنها خارج نطاق الزواج وتكون فكرة الصداقة البريئة مجرد ظل :(
وعشان المجتمع لشرقي يتفهم ان ممكن تكون في صداقة بين الرجل والمرأة او بين الشاب والفتاة في إطار الاحترام والمشاركة في العمل إلخ لازم يغير فكر كامل وعادات مترسخة وموروثة عن الأجداد ..
انا ليا صديقات وبنتعامل مع بعض عادي جدا ولكن في حدود الأخلاق والاحترام لأنهم في الاخر زي أختي بالظبط واللي مش هقبله على أختي مش هقبله عليهم :(
بالنسبة لزوجة المستقبل فانا مش هكدب عليكي انا غيور جدا جدا ومببقاش متصور انها تكلم راجل غيري .. بس لو الراجل ده مثلا صديق في العمل او صديق دراسة مثلا والكلام بينهم يكون في حدود معينة وهي تشركني في هذا الكلام فمفيش أي مشكلة من ده برغم اني هبقى من جوايا قايد نار لكني ثقتي فيها ملهاش حدود وهتبقى غيرتي دي غيرة طبيعية لشدة حبي ليها فقط وانا كمان بنفس المنطق هشركها في حواراتي مع أي صديقة ليا في العمل وتكون دايما في الصورة عشان نسد أي طريق للشك وتفضل العلاة قوية والثقة في محلها دائما :(
زغباوية 2011-09-22
في انتظار الفكرة ويارب نقدر نساعد فيها
سؤال خفيف بقى لو معاك مليون جنيه(واو انها مابقيتش تعمل حاجة اليومين دول:O) تعمل بيها إيه؟
MaDa 2011-09-22
اول حاجة هعملها هطلع ماما تحج وهجيبلها أي حاجة نقصاها .. وهجيب لأختي كل اللي هي عايزاه .. وهفتح مكتب برمجة صغنون كده على أدي وأبدأ بيه المشوار .. واللي يتبقى بقى من نصيب العروسة :D .. بيتهيألي هيفضلها كتير :P
الاستاذة 2011-09-23
هايل قوي كل اللي قريته من اسئلة لردود سواء من مادا او غيره
وجميل قوي المناقشة اللي حصلت بين مادا وشادي بس يا شادي الواقعية مش لونها كحلي قوي كده والحياة برده مش كلها جد قوي كده وكله بيعدي وكفاية ان ربنا ساترها معانا والانسان علشان يحس بقيمة حياته لاااااااااااازم يتعب كتير او قليل حسب المواقف اللي بيمر بيها امال فين تحابيش الحياة وبهاراتها اللي من غيرها تبقى حياتنا ماسخة
وبالنسبة لسؤالي يا سيد مادا بسيط خالص خالص كنت عايزة اعرف بتنمي افكارك ازااااااااااي
والسؤال الاهم لي بعد قرأتي لردودك اوصل بأبني ازاي علشان تفكيره يبقى زيك يعني تنصحني اتصرف معاه ازاي في تربيته ونشأته وللعلم انه عنده 7 سنين ونص بس تفكير النت والكمبيوتر والاي باد والموبايل ايوة طفل بس عايزة تفكيره يتزبط شوية بص انا مش عارفة اوصلك سؤالي
بس تنصحني بإيه في تربيتهم من وجهة نظر التربية اللي مامتك ربتهالكم ومن وجهة نظر اللي انت ناوي تعملوا مع اولادك بإذن الله بعد ما تتزوج
معلش انا بحب اخد افكار واللي ينفعني اعمله واتمنى ان اللي تكتبه يفيدني
والله معك
shady 2011-09-23
انا مش بقول ان الدنيا سودا على فكرة , بس هيا مش وردى يا جماعة وكلنا عارفين دة , المشكلة بالنسبة للرجالة معقدة بكتير عن البنات , البنات بيتعبوا وبيشيلو المسؤلية بعد الجواز لكن قبل الجواز الراجل هو اللى لازم يشيل مسؤلية علشان اصلا يقدر يتجوز , متر الشقة بكام دلوتى ؟ الدهب بكام ؟ العفش بكام ؟ ولو اصلا اشتريت شقة هتوضبها بكام ؟ لو فى رجالة معانا اكيد كانوا هايفهو قصدى اية خصوصا لو كانو داخلين على جواز :( وياريت حد من رجالة الموقع يقول رأيه فى كلامى علشان تصدقوا :(
shady 2011-09-23
الإنسان الذي يعتمد على الآخرين في رفع معنوياته يفقد نفسه حين يفقدهم
الاستاذة 2011-09-23
للباشمهندسة:
شكرا على السؤال عن الصحة-وبعدين بعد مادا ماينفعش حد تاني يقعد-دا انتوا بتسلخوا الواحد--ارحمنا يا رحيم
..
لشادي:
بص للحياة نظرة تفائلية ولو شوية صغيرة وخد في بالك ان حالنا احسن من حال ناس كتير ومش لازم اتجوز وعندي اغلى شقة وافخم عربية وحساب قد كده في البنك
لأ الاعتدال حلو وكل شئ بإذن الله بيتم ويوم ما ربنا يهديك لبنت الحلال فكتير من نظرتك للحياة هاتتغير ويا رب تتغير للاحسن وربنا يناولك اللي بتحلم به
shady 2011-09-24
انا متفائل على فكرة وعلشان كدة بلعب اللعبة دى :(
لو متشائم كان زمانى نايم , لكن طول مانا صاحى وبفكر عمرى ما بتشأم ولا ولا بيأس ومتوب فى ال cv ان عندى القدرة على استخاذ القرار , اكيد مفيش متشأم ها يعمل كدة ولا يقعد على الموقع الحلو دة علشان يتعلم حاجات جديدة:(
زغباوية 2011-09-24
شادى: عجبنى كلامك اوى واحنا عارفين ان الدنيا مش وردى خالص بس لسة مادا في فترة الوردى بتاعته ومش عايزين نسودهالو دلوقتى هى هتسود لوحديها ههههههه
وعجبتني اوى حكمتك :
الإنسان الذي يعتمد على الآخرين في رفع معنوياته يفقد نفسه حين يفقدهم
وعايزة بس اكملها انه كمان بيدمر لما مابيلاقيش منهم رد الفعل اللى عاوزه منهم وللاسف انا كدا
shady 2011-09-24
@ الاستاذة
هو الواحد مش عايز رصيد فى البنك ولا حتى عربية فى بداية حياته هو بس عايز شقة ويعرف يتجوز :(
@ زغباوية
ربنا يخليكى وكلى الحكمة زى ما انتى عايزة , على فكرة انا اساسا ساعات كتير بزود على حكم انا قراتها وبكتبها هنا كا اجتهاد شخصى بتحصل معايا كتير وبحاول انقى كلام يتفق مع الحكمه ويكون كان ناقصها فعلا
@ مادا
انت ممكن تنزل من على الكرسى وتختار حد وكفاية قوى اللى حصل لحد كدة :(
safaa 2011-09-24
بس ياترى مين اللى هيقعد عليه المرة دى!!ياريت تكون ام العيال او الاستاذة
زغباوية 2011-09-24
ولسة كمان يارا والريس
الاستاذة 2011-09-24
لأ مادا مابنزلش الا لما يجاوب على باق الاسئلة
safaa 2011-09-24
نسيتى باباكى يازغباوية اومال مين غيرك اللى هيقعدة على الكرسى دا
yara 2011-09-24
لية يا زغباوية كدة يا زغياوية كدة؟ هاة؟ انا كنت عملتلك اية يعنى عشان تقولى ياراااااااااا اديكى فكرتيهم بيا ينفع كدة يعنى؟؟؟؟؟؟؟؟؟؟؟؟؟؟؟؟؟؟؟؟؟؟ لو شفتك هعضك عضة :-P
safaa 2011-09-24
يالا اتكلى على الله واقعدى يايارا ....دا جميل ومش هتندمى
وانا هقولك اول سؤال عن cv بتاعتك
MaDa 2011-09-25
قبل ما أنزل لسه في سؤال للأستاذة هرد عليه وبعدين هختار اللي هيقعد بعدي ان شاء الله :(

@شادي : شكلك زهقت مني بس انا هريحك وهنزل مع اني مبسوط جدا وارتحت اوي لما اتكلمت معاكم وخصوصا انت وزي ما اتفقنا بقى اول ما تنزل مصر ان شاء الله :P
@زغباوية : ان شاء الله هخليها دايما وردي والسواد مش هيعرف ليا طريق :(
@يارا : مش محتاج حد يفكرني :P
MaDa 2011-09-25
سؤال الأستاذة:
بالنسبة لأول جزئية وهي تنمية الأفكار .. الأفكار بتتخلق في لحظة يعني من معلومة بعرفها من كلمة أسمعها من موقف بعيشه أو بشوفه وهكذا .. انا بنمي أفكاري عن طريق مصادر كتير جدا زي القراءة في كل المجالات ومن مختلف المصادر يعني كتب , انترنت .. وأيضا عن طريق الحوارات والمناقشات مع الأكبر مني سنا وخبرة .. عن طريق التجربة ودي اهم نقطة بمعني اني مش بخاف مني اي شيء جديد عليا وبجرب بنفسي وبغلط مرة واتنين لكن في الآخر بوصل للصح بنفسي وبعلم نفسي شيء جديد .. ((((التركيز)))) في فكرة واحدة والإصرار على النجاح فيها مهما كانت العراقيل اللي بتواجهني والتصميم على تنفيذها وبمجرد نجاحي فيها ببدأ في التفكير من تاني في فكرة تانية .. في كل شيء بون ملتزم وبعمل حساب للوقت والظروف اللي حواليا .. يعني خلاصة القول هي ان الثقافة والتجربة والاجتماعية والطموح والمجهود الشخصي والتركيز هم الأساس وسهل اوي ان حضرتك تخلقي جو زي ده لابنك .. يعني تشجعيه انه دايما يبتكر .. لو بوظ حاجة في البيت تشجعيه انه يصلجها بنفسه .. تشركيه دايما في الحوارات سواء بينك وبين والده .. او بينك وبين أصحابك .. تشجعيه على القراءة عن طريق الوسيلة اللي يحبها .. توفري له جو اجتماعي عشان يقدر يكون صداقات وعلاقات مع ناس جديدة تحت مراقبتك طبعا .. تحسسيه انه دياما محل ثقة .. كل ده هيخليه دايما متطلع للأمام وبيفكر كل يوم في شيء جديد ومفيد :(

والدتي بنا يخليهالي يارب مش بس اللي ربتني وكونت شخصيتي .. الحمد لله انا ربنا كرمني بمجموعة من الأساتذة العظام جدا ربنا يارب يجازيهم كل الخير ساعدوا في ده وكان ليهم دور عظيم جدا .. ماما في البيت كانت دايما بتعلمني الأخلاق والأدب وازاي اتعامل مع الغير والصلاة طبعا وحفظ القرآن دول شيء أساسي والمحافظة على الصلاة في المسجد ده غير انها من وانا صغير بدأت في تأسيسي للتعليم في كل الموادوالحمد لله لما دخلت المدرسة مواجهتش اي صعوبات او مشاكل في الدراسة بسبب المتابعة والاهتمام منذ الصغر .. علمتني كمان اني اعمل الصح مهما كان ومهما اللي قدامي غلط فيا انا اعمل الصح برده ومقولش اشمعنا ده عمل وهكذا .. وأساتذتي اللي انا قلت عنهم دول هم عشرة عمري واللي لحد دلوقتي علاقتي بيهم مستمرة ودايما معاهم كأنهم اخواتي الكبار .. اهتموا بيا في الدراسة وغير الدراسة علموني ازاي افكر وازاي اتعامل مع مشاكلي .. اواي ابقى متفوق وازاي انظم وقتي .. كانوا خير قدوة ليا عشان كده انا مرتبط بيهم لح دلوقتي وعلاقتي بيهم أكتر من الإخوات ولسة بروح المدرسة وبزورهم غير مقابلاتنا بره :(

انا كمان ان شاء الله نواي اعمل كل ده مع ولادي .. اهتم بيهم من وهم صغيرين .. أحفظهم القرآن وأعلمهم الصلاة والمحافظة عليها .. اعلمهم الاحترام والأدب وازاي بتعاملوا مع الأكبر منهم واللي في سنهم .. ازاي يختاروا اصحابهم .. ازاي يفكروا في مشاكلهم .. ازاي يعتمدوا على نفسهم .. اصاحبهم واحسسهم ان انا في سنهم مش اكبر منهم .. اقرب من دماغهم اوي .. الطفل دايما بيبقى محتاج ده .. بيبقى محتاج تبقى المسافات بينه وبين والديه تبقى قريبة اوي عشان ميخدش جانب منهم ويعيش في عزلة مع نفسه ويبقى الوالدين في دنيا وهو في دنيا .. الاهتمام بيهم مش مجرد اللبس والغذاء والترفيه وبتأمين المستقبل .. الاهتمام هو ببناء شخصية تكون قادرة على العيش في هذه الحياة تحت اي ظروف ويبقى عنده القدرة على حل المشكلات اللي هتواجه بنفسه .. وعلى رأي المثل ابني ابنك ومتبنيلوش .. :(

انا حاولت على اد ما اقدر اجاوب على سؤال حضرتك يا أستاذة .. ويارب تشوفي ابنك أحسن الناس ويبقى دايما في مراكز عليا ويتفوق على الكل ومتحطيش حد للتفوق ده او انه يبقى زي حد بل يبقى افضل منه :(
MaDa 2011-09-25
انا كده خلصت يا جماعة وهنزل من على الكرسي :)
بجد متشكر اوي ليكم كلكم واتبسط اوي وقضيت وقت ممتع واول مرة احس بمتعة اللعبة دي هنا مع اني بلعبها كتير بس اول مرة اتسأل في حاجات محدش فكر انه يسألهالي من أصحابي .. يارب مكونش تقلت عليكم ومحدش يكون زعلان مني .. وربنا يعلم انا مخبيتش حاجة وقولت كل اللي في قلبي وجاوبت بصراحة .. والله على ما اقول شهيد :(:(

ان شاء الله هختار Monem الريس عشان يقعد على الكرسي اللي هو مكانه أصلا بما انه الريس .. فالكرسي يتاديك يا بشمهندس .. اتفضل ومتزعلش مني بقى :D:P

احنا عارفين ان حضرتك مشغول كان الله في العون بس احنا هنسأل اللي نفسنا فيه وحضرتك تبقى تجاوب على مهلك واحنا مش مستعجلين :D:D:D
MaDa 2011-09-25
@خالتو صفاء : معلش أجلي سؤال يارا لما تبقى تقعد بقى عشان الريس هو اللي قاعد دلوقتي :(
safaa 2011-09-25
حاضر يامادا
safaa 2011-09-25
يالا ادخل ياريس وقول لنا على الcv
محمد عبد المنعم 2011-09-25
هو انتم مش قادرين تستنو لحد ما أنفذ إمكانية تحميل التعليقات الأخيرة فقط في الأول عشان سرعة تحميل الصفحة دي

عموما كده هيجبرني إني أشتغل بهمة أكثر ... أصلي أنا كده متضرر!

ال CV:
محمد عبد المنعم حسين ... 36 عام ... ونص ... ماجيستير هندسة حاسبات ... التخصص سفتجة متينة (جاية من سوفت وير الكمبيوتر) ... بس خلاص ... كل الباقي أسرار :-D
MaDa 2011-09-25
الحالة الاجتماعية يا بشمهندس .. الرتبة العسكرية :P
محمد عبد المنعم 2011-09-25
متجوز ... ولو كنت اتخرجت من كلية عسكرية كان زماني يقيت مقدم بقالي يجي سنة :-D
loleta1 2011-09-25
إيه مفهوم الحريه الشخصية عندك؟وهل بتدي نفسك الحق في التحكم في اللي حواليك حتى لوهما مش بيعملوا حاجة غلط؟ولولاقيت حد من أخواتك وقرايبك بيعمل حاجة مش عجباك بتتناقش معاه ؟ولا بتنفذ وبعدين نتناقش؟
ولو حد من ولادك بعد عمر طويل أختار عروسة مش عجباكوا ستايل بقى وفانكي هتتصرف معاه إزاي؟
محمد عبد المنعم 2011-09-25
عادي ... طالما الإنسان بقى عاقل هو حر في تصرفاته بشكل مطلق طالما لم يؤثر بشكل مباشر على الآخرين ... لكن كل اللي بحبهم زي إخواتي وقرايبي وكله كله ... وده بيتكرر كثير ... معنديش أي حرج إني أوجه النصح ليهم بشكل مباشر وغير مباشر لو حسيت انهم مش على الطريق الصح ... لكن لو الإختيار تم خلاص والفاس وقعت في الرأس مبحبش أعيد وأزيد وأقول ليه عملت كده وبتاع ... بخليني في دلوقتي وبأقبل الموضوع بدون حواجز نفسية.

وطبعا مفيش حاجة اسمها بنفذ ... أنفذ فيما يخصني فقط طبعا

موضوع إبني ... أنا مش هستنى لما إبني يجيب حد زي ما بتقولي ... التربية بتبدأ من بدري عن كده بيجي 20 25 سنة ... في سن الجواز ممكن أشرحله بشكل منطقي سلس وغير نمطي عواقب الإختيار المنيل ده إيه ... وأتأكد إنه فهم كلامي 100 في ال 100 وبعد كده هو صاحب الإختيار ... وبعد كده مراته هتبقى زي بنتي ولها مني كل الحقوق بتاعت زوجة الإبن من حب ورعاية وإحتضان ... زيها زي لو كانت ليا بنت مش عاجبني تصرفاتها بالظبط ... هل أستسهل وأتبرأ منها وأخلص ؟ طبعا لأ
loleta1 2011-09-25
بتقسم وقتك إزاي مابين شغلك وبيتك وولادك وموقعك؟وهل حاسس أنك مدي كل منهم حقه؟ولو مش كده بتحاول تظبط النظام إزاي؟
محمد عبد المنعم 2011-09-25
ميزة الشغل عندي إن معظمه بيبقى من البيت ... يعني وسط الأسرة ... ودي نعمة كبيرة جدا من ربنا ... فأنا بأتوكل على الله ... بنام قليل ... متطلباتي قليلة ... وبشتغل شوية هنا شوية هنا وشوية هنا وشوية هنا ... الأولوية للي مقصر معاه أكثر ... زوجتي طبعا شايلاني في موضوع الولاد ومقدرة الظروف جدا ... صحيح أنا كده حاسس إني بتحرق يوم ورا يوم ... لكن لما بنعمل حاجة كويسة هنا ولا هنا سعادتنا بيها بتنسينا ... مش لازم الواحد يعيش 100 سنة يعني ... كفاية قوي 99 سنة بس مليانة إنجازات إن شاء الله
Noura 2011-09-25
إن شاء الله العمر كله يا باشمهندس
جتلك من فين فكرة الموقع ؟
زغباوية 2011-09-25
اهلا منور الكرسي ياريس
كدا هانضمن ان موضوع تحميل الصفحة علشان التعليقات الكتيرة هايتنفذ بسرعة
للأسف مش عارفة اظبطلك سؤال متين بس هاحاول اعصر دماغي

س1: ايه الحلم اللى حلمتوا وانت صغير وحققته وايه اللى ماحققتهوش وندمان عليه وايه اللى نفسك تحققه؟؟؟

س2: قولنا صفة فيك مش عجباك ونفسك تتخلص منها؟؟؟؟

س3: الصفات الاساسية اللى بناءاً عليهااخترت زوجتك؟؟؟
Noura 2011-09-25
برافو يا زوزو انا كنت عايزة اعرف بردو هو اختار الباشمهندسة ازاي؟ وشافها فين اول مرة ؟وبناءا على ايه تم الاختيار؟ ويا بشمهندس كل الاسئلة اجباري مش اختياري
محمد عبد المنعم 2011-09-25
الليلة إن شاء الله هظبط التعليقات الطويلة وأجاوب على الأسئلة
زغباوية 2011-09-25
في انتظارك ياريس
زغباوية 2011-09-25
طيب خد السؤال ده: ما الذي استفدته من الموقع كمدير وكعضو عادي والمواضيع اللى فعلا استفدت منها
shady 2011-09-25
انا هسألك سؤال واحد
الحياة طول ما احنا عايشين فيها بتخلى الواحد لازم يقدم و لو شوية تنازلات علشان الحياة تمشى سواء كانت فقى العمل فى البيت مع الاصدقاء , هل انت من النوع اللى بيتنازل بسهولة , ولو اتنازلت هل بتأنب نفسك على كدة , ولو حصل مرة تانية واتعاد الموقف للمرة التانية هل ها تتنازل برضة علشان انت اتعودت وعايز تكبر دماغك وما تعملش مشكلة على الفاضى ولا ها تعمل اية
MaDa 2011-09-26
حضرتك ما شاء الله متفوق من وانت طالب يعني طلعت الأول على المحافظة في الإعدادية وما شاء الله متفوق في حياتك العملية .. سؤالي بقى عن الحسد .. هل كنت بتعمله حساب ولا مكنتش بتفكر فيه او عارفه بس مش خايف منه وبتقول خليها عليه .. وهل نظرتك ليه دلوقتي زي ما هي ولا اتغيرت .. كلمنا عن الحسد عموما في حياتك وهل ليك ذكريات ومواقف معاه ؟؟
محمد عبد المنعم 2011-09-26
تعبتوني ... بالليل هجاوب على الأسئلة إن شاء الله
safaa 2011-09-26
ربنا يعينك
زغباوية 2011-09-26
مبروك تظبيط الاخطارات ربنا يعينك
MaDa 2011-09-26
مبروك ومستنيين الإجابات :(
Noura 2011-09-26
لولولولوللللللللللللللللللللللللللللللللللللللللللي
مبروك ياريس يالا بقا فين الاجابات
محمد عبد المنعم 2011-09-26
إحم إحم ... بسم الله الرحمن الرحيم
محمد عبد المنعم 2011-09-26
سؤال @noura:

1- من زمان وأنا بنتقد المواقع العربية لأنها كلها نسخ من بعضها بدون تقديم شيئ جديد يذكر غير الألوان الفاقعة والصور الثقيلة
2- كنت بتغاظ جدا جدا لما بشوف حد بيقول أي كلام ويقوم باعته إيميل ل500 من إصحابه وهكذا بيتناقلو الجهل بدون ما يبقى هناك طريقة لتصحيح المعلومة لل30 مليون اللي شافو الميل ... كان نفسي أعمل حاجة تبقى بديل للإيميل في المواضيع اللي زي دي وتبقى أفضل كمان من الفيسبوك لأن الفيسبوك لا يسمح للزوار باستعراض المشاركات
محمد عبد المنعم 2011-09-26
@زغباوية س1
وأنا صغير كنت صغير قوي على إني يبقى ليا حلم ... كنت ساذج جدا ... لكن الحمد لله كل شيئ حصل في حياتي هو الأفضل ... حتى لو معرفتش إنه الأفضل دلوقتي بيتضح إنه الأفضل بعد كده

الحلم اللي متربي على الغالي دلوقتي عندي إني أفسخ العقد مع الشركة اللي شغال فيها - حتى لو هنفذ الشرط الجزائي - ويبقى عندي شركة في مكان هادي ونظيف جنب البيت اللي ساكن فيه والشركة دي بتعمل برامج كمبيوتر غير تقليدية تخدم مصر والعالم وبتدخل مليارات الدولارات سنويا لمصر (لشركتي في الواقع) ... أدفع زكاتها صح ... تصرف على أعمال خيرية صح ... وربنا يتقبل ده. يحضرني هما دعاء بحبه جدا: اللهم إني أسئلك علما نافعا ورزقا طيبا وعملا متقبلا
محمد عبد المنعم 2011-09-26
@زغباوية س2
متردد جدا ... أصدقائي بيقولو عليا إني بندولي ... صحيح دي صفة مش عاجباني بشكل عام لكن إنا شايف إنها كانت السبب في حاجات كثيرة عملتها كويسة الحمد لله ... فأتمنى إني أعرف أوظفها كويس بدون ما آخذ مساوئها ... (للأخوة المهندسين أذكركم إن أنجز منحنى للأداء الحركي هو underdamped response المليئ بالتردد)
محمد عبد المنعم 2011-09-26
@زغباوية س3
بصراحة اللي أنا فاكره إني كنت محتاج (ده طبعا بالإضافة للدين يعني الأخلاق) واحده عاقلة

طلعت أكثر حد عاقل في الدنيا ... لكن إختياري ده كان توفيق من الله وليس ذكاء مني ... لأني ما كانش عندي أي نوع من الخبرة قبلها تسمح لي إني آخذ قرار إنها تصلح لي أو لأ ... زي ما ذكرت في أحد الإعترافات إني متردد جدا جدا ... يعني مش سهل عليا في الأمور اللي زي دي إني آخذ قرار ... سبت نفسي ... والحمد لله الإختيار ما كانش هيجي أفضل من كده
محمد عبد المنعم 2011-09-26
@noura

الموضوع كله إني طلبت من أمي وجدتي (الله يرحمها) وإخواتي البنات حصر كل المرشحات لمنصب الخطيبة ... عملت شيت إكسل ... عملت حصر بالمعايير المطلوبة ... حطيت أوزان للمعايير دي ... إبتديت أحط بيانات المرشحات ... كانو 5 أو 6 مش فاكر ... جمعت النقط ... أول واحدة كسبت طلعت قريبتي بس ما كنتش شفتها قبل كده ... توكلت على الله ... اتقدمت لها ... وافقت ... طلعت بعد كده أحسن ست في الدنيا ... بس عرفت بعد كده إنها ما كانتش طايقاني أول مرة

طبعا لا أرشح لحد إنه يعمل كده ... اللي حصل معايا لا يمكن إنه يتكرر مع حد ويصيب ثاني أبدا
محمد عبد المنعم 2011-09-26
سؤال @Mada بتاع العساكر وحجات كده
مش فاهم قصدك إيه ... حضرتك تقصدني أنا؟
محمد عبد المنعم 2011-09-26
@زغباوية
إللي استفدته من الموقع إني لقيتني وسط أهلي وحبايبي كل يوم مش كل أسبوع ... استفدت كمان إني بشكل غير مباشر خليت ناس غالية عليا تبتدي تقرأ وتبحث وتتدبر.

استفدت كمدير خبرات فنية مجربتهاش قبل كده لأن الموقع وبرمجته مش هي مجال خبرتي الأساسي
Noura 2011-09-26
ايه دا الهندسة والكبيوتر في الجواز كمان
mora 2011-09-26
ما شاء الله غبت يومين كل دى اسئله ع العموم مؤقتا اسال الباشمهندس سؤال
ما هو السؤال الذى تتمنى الاتسأل فيه ولو فرض هل ستجاوب عليه ام لا
وما هو السؤال الذى لو سؤلت فيه ستجاوب باستفاضة واستمتاع وهل فعلا سؤلت فيه ولا لسه
محمد عبد المنعم 2011-09-26
@shady
فعلا أنا من النوع اللى ممكن بيتنازل لأني ببساطة متردد جدا وبحاول أتحرى عدم الخطأ وطبعا معرفش الخير فين ... لكن أنا عمري ما بأنب نفسي خالص

الموقف لو اتكرر ثاني ... في الأول هعمل فيها سبع البرمبة وفي الآخر هسامح ... ليس عن ضعف ... لكن خليط من التسامح وتكبير الدماغ زي ما قلت

طبعا أنا بتكلم عن المواضيع البسيطة ... لكن كل واحد بيبقى مع ذلك عنده مواضيع مفيهاش تسامح حتى من أول مرة
محمد عبد المنعم 2011-09-26
@سيMaDa

على فكرة ... أنا ما منتش الأول على المحافظة ولا حاجة ... أنا كنت الأول على المدرسة الوحيدة في المدينة ... بس مش أكثر ... طبعا ساعتها مكنتش أفهم الحاجات دي خالص

دلوقتي نظرتي إن الخوف من الحسد مينفعش يمنعنا إننا نعمل حاجة كويسة أيا كانت خوفا منه ... وخصوصا إن الموضوع بسيط ... توكل على الله واظبط النية ... قضيها أدعية الصباح والمساء:
@@

عايز أقول كمان إن المصريين دول شعب عجيب جدا جدا جدا ... يموتو في الفشخرة وفي نفس الوقت يموتو من الخوف من الحسد ... حاجة مزعجة جدا

أكيد حصلت لي بلاوي شديدة لكن والله يا أخي أنا بنسى جدا جدا ومفيش حاجة معلقة معاية خالص والحمد لله ... النسيان زي ماهو صفة وحشة دي نعمة كبيرة جدا جدا ... كان زماني خسران ناس كثير جدا جدا حسد وغير حسد
محمد عبد المنعم 2011-09-26
mora@

انتي عملتي زي اللي أول ما شاف الكعبة ودعا ربنا إنه يبقى مقبول الدعوة :-(

مفيش سؤال معين في ذهني خايف منه ... ولو جالي السؤال ده هضطر أجاوب عليه طالما مفيهوش إفشاء سر لحد مثلا

أما السؤال اللي أتمنى أنه يجيلي ... برضه مش في ذهني لكن أنا بشكل عام بحب الحوارات البناءه وبحب أستفيض في الإجابة عن الأسئلة الأسئلة بشكل عام
safaa 2011-09-26
يارب اوعدنا بزيارة الكعبة
MaDa 2011-09-27
سؤال آخر :
لو حد انتقد حضرتك بشدة سواء أكان نقد موضوعي وفي محله او نقد ظالم .. بتتعامل ازاي في الموقفين ؟؟ وهل بتتقبل فكرة النقد من الآخرين عموما ؟
MaDa 2011-09-27
وعلى فكرة ماما اللي قالتلي ان حضرتك كنت اول المحافظة في الإعدادية :(
safaa 2011-09-27
فعلا يامادا وانا عندى المجلة محتفظة بيها حتى الان ...دا غير انه اول واحد يبتكر برنامج لمكافحة فيروس (تشرنوبل) ودى مكتوبة فى مجلة نصف الدنيا يوم الاحد 23 مايو 1999 العدد484
MaDa 2011-09-27
بسم الله ما شاء الله .. عقبال ما يشوف ولاده ونشوف أولادنا زيه كده ان شاء الله :(
MaDa 2011-09-27
سؤال كمان :D
هل تجد أهمية لفرق العمر بين الزوجين بحيث يكون الزوج اكبر سنا عن الزوجة ؟؟ ولماذا ؟؟
shady 2011-09-27
هو انا ها اطلب منك طلب يا باشمهندس انا مش هطلب منك صورة الشيت بتاع الاكسل ,لكن ها اطلب منك طلب خاص لاخوك اية هيا المعاير المطلوبة وعلى اى اساس وزنت المعاير
زغباوية 2011-09-27
فكرتني بالذكريات الجميلة وخصوصامن واحنا صغيرين وايام الشيت وايام تجهيز الموقع
طيب هل استفدت معرفيا حاجات جديدة ومهمة من مواضيع الموقع ؟
محمد عبد المنعم 2011-09-27
@MaDa
أنا أكثر واحد ممكن يتقبل النقد لأني بحب أراجع نفسي على طول ودايما أول حاجة بتيجي في دماغي إن النقد ده في محله إلى أن يثبت العكس ... وللأسف حاجات وحقوق كثير ضاعت مني بسبب الموضوع ده ... بس الحمد لله طبعا
محمد عبد المنعم 2011-09-27
@MaDa
مش أنا المناسب للسؤال ده لكن أعتقد ان الموضوع موضوع تقبل اجتماعي ليس إلا ... كمان هل الراجل والست لما يبقو عندهم 50 سنة هم الإثنين مثلا ... عينيه مش هتروح هنا ولا هنا مثلا
محمد عبد المنعم 2011-09-27
@shady
انت ادتني عنوان هايل لموضوع حابب أتكلم فيه جدا ... هحاول أفتكر أنا كتبت إيه في الشيت وهضيف بعض نتائج الخبرات المكتسبة كمان
محمد عبد المنعم 2011-09-27
@زغباوية
بإعتبار إني على كرسي الإعتراف أنا للأسف هعترف بشيئ مش كويس ... أي مشاركة طويلة مبقرأهاش كلها ... وبدوس +1 طالما مفيهاش هلس مباشر أو هجس ... في الأول كان نوع من جبر الخواطر لكن دلوقتي لازم أكون عادل وأدوس +1

طبعا أنا عرفت حاجات كثير لكن مفيش حاجة معينة في دماغي دلوقتي لكن أنا مثلا عجبتني جدا القصة دي:
وضَعت الكاميرات في بيتها فانظروا ماذا حدث -- قصة حقيقية --
ودي اللي خلتني أفكر في موضوع المسابقات
محمد عبد المنعم 2011-09-27
إيه ... مش كفاية كده؟ انتو استحليتوها؟ فين الأستاذ اللي هيختار حد تاني؟
MaDa 2011-09-27
لسة شوية في ناس مسألتش .. وبعدين حضرتك اللي هتختار اللي هيقعد بعدك :(

سؤالي بقى : لو قدام حضرتك فرصة عمل في الخارج تسافر ولا تفضل هنا في مصر ؟
محمد عبد المنعم 2011-09-27
لو عندي زنقة جامدة للمال هسافر لمدة وجيزة ومحدودة ... بس أنا أساسا مبفضلش أشتغل نظير راتب ... بحب الحرية ... بحبها قوي قوي قوي ... نفسي فيها بقى
safaa 2011-09-27
كفاية يامادا فى ناس كتير عاوزين يقعدوا على الكرسى
يالا شوفوا مين
Noura 2011-09-27
لاء ياريس مش تقوم لسه هنسأل
MaDa 2011-09-27
حاسس بحضرتك ويارب تنولها يارب :(
MaDa 2011-09-27
ما هي الطريقة المثلى من وجهة نظر حضرتك لتحصيل المعرفة :(
محمد عبد المنعم 2011-09-27
القراءة في نفس الموضوع والمواضيع اللي حواليها من مصادر متنوعة والتجربة العملية كلما أمكن ذلك ... تدبر المعاني الفيزيائية للمعادلات في الرياضيات والفيزياء إلخ إلخ إلخ وتطبيقها على كل شيئ ممكن حولك
safaa 2011-09-27
انتم كلكم عليه ولا ايه
Noura 2011-09-27
هو احنا عندنا كام ريس يا طنط لحد دلوقتي هو واحد بس
MaDa 2011-09-27
ايه علاقة حضرتك بالرياضة سواء تشجيع او ممارسة .. وهل بتشجع اولادك على ممارسة الرياضة منذ الصغر ولا لا ؟؟
محمد عبد المنعم 2011-09-27
علاقتي بالرياضة لا تتعدى علاقة التقدير ... أنا بقدر الرياضة ... ولا أمارسها ... أحب وأشجع أولادي عليها طبعا ولكن مبحبش مشاوير النادي والإلتزام بالتدريبات وكده ... أجيب وقت منين يا أخواننا؟!
MaDa 2011-09-27
علاقة حضرتك بالسياسة .. فكرك .. انتماءك .. دورك ومشاركتك ؟؟
محمد عبد المنعم 2011-09-27
علاقتي بالسياسة علاقة حب من بعيد لبعيد ... يعني أنا جوايا سياسة نار ... بتستوي وهتطلع كمان كام سنة كده ان شاء الله ... ليس لي أي إنتماءات سياسية وفكري في السياسة إني ميصحش حد يبقى له إنتماء سياسي ... حاجة كده ملعوبة بس في وقتها إن شاء الله
الباشمهندسة 2011-09-27
ياااااااااه .... كل ده حصل في اليومين اللي فاتو طيب اسألك في ايه بقي .... دول ماخلوش حاجة ليا خالص :(

انفد بجلدك بقي واختار حد تاني يقعد مكانك :D
زغباوية 2011-09-28
فرحنا جدا جدا بوجودك معانا ياريس وعايزة اعرف اخر حاجة احساسك وانت قاعد على الكرسي ايه؟
MaDa 2011-09-28
القدوة .. عايز حضرتك تكلمنا عن الأشخاص اللي اتخذتهم قدوة في حياتك وأثروا في حضرتك ازاي ؟؟
محمد عبد المنعم 2011-09-28
@زغباوية
حاسس إني جات لي الفرصة لأول مرة وعرفت أفتح قلبي وأقول كلام طول عمره نفسه يطلع لكن مفيش فرص للأسف ... لسة عندي كلام كثير وأفكار لكتب هألفها إن شاء الله لما أحس بشوية فراغ إن شاء الله
محمد عبد المنعم 2011-09-28
@MaDa
موضوع القدوة دعه يا إما معملش معايا شغل ... أو مش فاكر.

لكن بالعكس ... كوني أكبر إخواتي كان بيزود عليا شوية موضوع إني أخلي بالي من تصرفاتي بشكل أكبر من العادي شوية ... قبقت عادة ولحد دلوقتي كمان
زغباوية 2011-09-28
كمدير للموقع كلمة توجهها لاعضاء الموقع قبل ماتقوم من على الكرسي
محمد عبد المنعم 2011-09-28
أحب أقول:
أتقو الله فيا وساعدوني شوية
:-(
زغباوية 2011-09-28
حاضر من عنيا بس انت قول ايه اللى عاوزه بالظبط غير الاساسي اللى بنعمله
MaDa 2011-09-28
عايز حضرتك توصف كل واحد من اخواتك زي ما بتشوفه دايما :D
زغباوية 2011-09-28
حلو السؤال ده جاوب بقى ياريس
MaDa 2011-09-28
:P
محمد عبد المنعم 2011-09-28
تليفونات بقى ... كفاية بقى ... حرام!
MaDa 2011-09-28
يلا جاوب يا بشمهندس :D:D
MaDa 2011-09-28
سؤال لكل اللي موجودين .. دلوقتي بقى انا مش عامل اللعبة دي مجانا .. في 11 ضحية كل ضحية ب +1 والمقال تقييمه 8 بس .. عايز حقيييييييييييييييي :D:D:D
shady 2011-09-28
+1 :(
MaDa 2011-09-28
قفشتك يا شادي :D
shady 2011-09-28
انت تعرف لو مقال او فيديو اكيد كان زمانى زودتك من زمان لكن اللعبة دى بتخليك مركز فيها بغض النظر عن موضوع التقيم
MaDa 2011-09-28
انا بهزر يا شادي وبراحتك يا كبير :P
yara 2011-09-28
بردو انا مش موجودة هييييييييييييييييييييييية
MaDa 2011-09-28
متستعجليش انتي اللي جاية على فكرة :P:P
محمد عبد المنعم 2011-09-28
انتهى الموضوع ... تم اختيار yara
MaDa 2011-09-28
على فكرة يا بشمهندس من شروط اللعبة ان اللي قاعد مينزلش من على الكرسي الا لما يجاوب كل الأسئلة وحضرتك مجوبتش على سؤالي .. جاوب وبعدين هنقعد يارا :D

السؤال تاني .. عايز حضرتك توصفلنا اخواتك كلهم زي ما بتشوفهم دايما :(
محمد عبد المنعم 2011-09-28
أساسا أنا مبسبش تخيل لحد زي كده في دماغي ... ثم أنا مبتكلمش على حد وهو مش موجود ... ده ردي ... اللي بعده
MaDa 2011-09-28
هههههههههههههههههههههههههههه مشاي يا بشمهندس خلاص :D:D
MaDa 2011-09-28
ماشي*
MaDa 2011-09-28
يلا يا يارا بيتك ومطرحك .. داحنا هنوضبوكي نيها نيهاهاهاهاهاهاهاهاهاها :D:D:D
safaa 2011-09-28
يالا ياجميلة انتى اقعدى وقولى لنا ال cv بتاعتك
زغباوية 2011-09-28
اهلا ياشابة منورة الكرسي
عايزة تحققي ايه فى حياتك يعنى احلامك ايه؟؟؟؟؟
MaDa 2011-09-28
ايه اصعب موقف عشتيه واطرف موقف واهيف موقف وموقف بتتمني يحصلك ؟ :D:D
shady 2011-09-29
اية الحاجة اللى بتكرهيها فى حياتك , بصفة عامة وشاملة
الباشمهندسة 2011-09-29
طبعا من الواضح ان يارا بتتهرب بس علي مين يلا شباب ... مطاردة ... هجوم ... كتفوها :D:D :D :D

لو تقدملك واحد وعايز يتجوز في شهر ويسافر للعمل بالخارج وهو انسان كويس وفيه قبول هل توافقي تسافري وتسيبي اهلك ولا ترفضيه علي الرغم من اته كويس .... هل البلد اللي رايحها ممكن تأثر في قرارك يعني لو مثلا امريكا اكيد مش زي قنا :(
yara 2011-09-29
سؤال زغباوية -- انا احلامى كلها انى اعيش فى امان وسلام وحب مش عاوزة حد يكرهنىولا حد يقول عليا كلمة وحشة نفسى احس ان مصر دى هية تركيا بجمالها ونظافتها وكل حاجة نفسى اخل ف اطفال واحفظهم القران الككريم كللللللللللللللللللللللللة ويبقوا متفوقين ونفسى فعربية هامر:-P :-(

مادا بقا -- كل دى اسئلة خف عليا شوييييييييية اصع موقف عشتة لما واحد هجم عليا وحاول يغتصبنى بس الحمد للة ملمسش منى شعرة بس لمس ايدى لان فى راجل جة فلحظتهااااااااااا وانقذنى منة اينعم دماغة اتفتحت بس انقذنى ربنا يخليية
واظرف موقف لما كنت شتم واحد والحمد للة لقتة فوشة وخسرنا بعض هههههههههههههههههههههههههه
واهيف موقف لما عكملت محشى ونسيت احط شوربة واتحرررررررررررررررررررررررررررررررررررررررررررررررررررررررررق واتحرق (قلبى ) معاة اهئ اهئ :-P :-P :-) :-)
*
موقف بتمنى يحصلى انى اقابل واحد واحبة من اول نظرة بس ( حب محترم) وحط تحتها مليون خط يا دودو اى خدمة انت تؤمرنى بس

سئال بشمهندسة قلبى وحببتى --ممكن اوافق طلما انسان كويس مش هقول لا بالعكس هساعدة وهقف جنبة اكيييييد
لا مفيش حاجة ممكن تاثر فيا طول مانا مع ربنا وبفكر صح وحاطة دينى واهلى ادامى
loleta1 2011-09-29
ربنا ياخده وياخد كل اللي زيه:-) ياترى يايارا بتتقبلي النقد وبتتصرفي أزاي لونقد مش عجبك؟
yara 2011-09-29
ايون بقبل النقد طبعا بس بزعل بصرحة سعات بس بردو مش بجرح الى قدامى عشان ميبقاش فى بينا زعل او كدة بس طلما النقد صح بحا ول اغير من نفسى والله
زغباوية 2011-09-29
مش من عادتى اسئل السؤال ده علشان العضو براحته حابب يقول يقول مش حابب له كل الحرية

فين الCV بقى؟؟؟
yara 2011-09-29
انا يا ستى اسمى يارا البارودى عندى 18 سنة بلعب تنس واخدت بطولات وصوتى حلو بعرف اغنى
وبكتب شعر زى ما انتى عارفة وفكلية فنون تطبيقية وعندى اخ واخت ضغننين يعنى اناالكبيرة و بابايا نائب مدير عام فجرنال الاهرام وكدة يعنىىىىىىىىىىىىىى
زغباوية 2011-09-29
جميل جدا انك بتلعبي رياضة وياريت تستمري عليها بس هو فيه تنس في القليوبية ولا انا قديمة اوى
safaa 2011-09-29
بجد اصيلة يايارا
yara 2011-09-29
فى طبعا لحد دلوقتى فى نادى الشباب دا والى بيجى يدرب واحد من بنها ومتمكنننننننننن
زغباوية 2011-09-29
اوكيه هاحاول اجرب اتدرب عليه واسال في النادي عندنا
اختارتى كليتك ازاى عن حب ولا التنسيق
yara 2011-09-29
عن حب انا اصلا 92 % ملحقتش ولا هنسة ولا حتى فنون تطبيقية وجالى تجارة بنها وانا اصلا كنت هموت على فنون تطبيقية وتعبت اوى فبابا دخلهالى خاص فى جامعة 6 اكتوبر بس الكلية مش المعهد اسمهاcollege of applied arts 6-october uni.بس يا حببتى ملحقتهاش على 1 % لما كنت هتجنن وانا عملى رياضة اصلا
loleta1 2011-09-29
بما أنك بقى حبيبتي وطلعنا بنات كليه واحدة عامله أيه بعد أول كام يوم دراسه؟وأيه أنطباعك على مواد الكليه ودكاترتها؟وياترى مبسوطة أنك دخلتيها؟
yara 2011-09-29
يالهووووووووووووى انا لسة مدخلتش دا يوم الحد لسة كل الجامعت داخلة يوم 1-10 يا بنتى ههههه
loleta1 2011-09-29
هو مين بيسأل مييييين؟:-Pعموما أيوه كنت ساكنة في أكتوبر وكليتي كانت فنون تطبيقية اللي في القاهرة بس المواد الدراسية والدكاتره هما هما؟هنا وفي اكتوبر بس جاوبي برضه حتى لوداخله يوم بيبان يايارا؟
yara 2011-09-29
لسة مدخلتش والله خالص هدخل يوم الاحد الجاىى
loleta1 2011-09-29
طيب الغي السؤال ولو عايزة مساعده انا موجوده،عندك اخوات؟
yara 2011-09-29
اة يا قطتى عندى اخ ف 1 ثانوى واخت ف 5 ابتدائى
shady 2011-09-29
على فكرة يا يارا انا سئلتك سؤال وانتى ما رضتيش عليا ردى على السؤال يا يارا
yara 2011-09-29
معلش يا شادى انا متاسفة ماخدتش بالى
والاجابة --- بكرة الكدب اوى ومتاكدة وواثقة ان اى حاجة بتتبنى على الكدب بتنتهى مهما طال الزمن علشان كدة مش بكدب ابدااااااااااااااااااا وبكرة الخيانة بردو بما تحملة الكمة من معانى..... بس يا سيدى
الباشمهندسة 2011-09-30
من الاجابات استنتجت انك عايشة في القليوبية ....صح

هل كنتي تتمني انك تعيشي في بلد تانية او في القاهرة او الاسكندرية العواصم الشديدة دي ولا مبسوطة وراضية بيها ؟
yara 2011-09-30
بصراحة انا بعشق اسكندرية عشق ملوش حدود وعارفة كل حتة فيها االبراهيمية والشاطبى والمعمورة حبيبتى والمنتزة والرمل والمنشية وخالد وبحرى وكل الحتت دى حفظاها بشوارعها الداخلية بكل حاجة فيها وبتمنى اعيش فيها ولو فى اوضة وصالة ..... وفى نفس الوقت بحب بنها اوى وبشتقلها والله حتى لما كنت فشرام الشيخ كانت وحشانى اوى ونفسى ارجع وامشى فى الشارع واشوف الناس وكدة وعمرى ما استعريت انى بنهاوية او استقللت بيها لااااااااا بالعكس دنا اى حد فى اليكس بيسالنى مبقولش من القاهرة بقول من بنها
mora 2011-09-30
برافو عليكى يا يارا دى بنها بقت تحفة على فكرة كليتى كانت فيها بس بصراحة بنها احلوت اكير من الاول
MaDa 2011-10-01
انا بعشق حاجة اسمها بنها :(
طيب سؤال كمان : لو صديقة ليكي طلبت منك مساعدة وانتي ياعدتيها وبعد كده اكتشفتي انها كدبت عليكي .. وانتي اصلا عشان تساعديها كدبتي في البيت وبسببها حصلتلك مشكلة .. هتتصرفي ازاي معاها ومعاهم في البيت :D؟؟
MaDa 2011-10-01
*ساعدتيها
الاستاذة 2011-10-01
بنها العسل
مين اللي ما يحبش بنها
فعلا يا يارا (اي نعم انا جاية متأخر) بس فعلا بنها من الاماكن اللي تتحب وحبنا لها مش لانها مكان جميل لأ ده لانها بلدنا اللي اتولدنا فيها واتربينا فيها ولنا فيها ذكريات جميلة
ومتهيقلي ان كل انسان مسقط رأسه زي ما بيقولوا هي احب بلد ليه
السؤاااااااااااال بقى انت بإذن الله لما تتأهلي وتتجوزي تحبي تتجوزي في بنها ولا براها
لاني اعرف بنات كتير كان شرط جوازهم انهم يكونوا بره بنها


mora 2011-10-01
الاهل الاصحاب البلد الحياه بصفة عامة ايه اكتر حاجة اثرت فيكى وايه مدلول كل كلمة بالنسبة لك
وبتطبقى سياسة الاخت الكبيرة على اخواتك ولا ايه
الباشمهندسة 2011-10-04
فينيك يايارا نمتي علي الكرسي ولا عشان الدراسة...معلش اختاري حد بعدك .... بيني وبنيك كدا وماتقليلهاش فيه عندك الاستاذة هي اللي دخلت في مقاله كرسي الاعتراف ولسه ماقعديتش عليه ... :(
الاستاذة 2011-10-04
خدي ربع جنيه وسبيني في حالي يا باشمهندسة
هوانتي ماعندكيش اخوات بلاستيك ولا ايه؟
safaa 2011-10-04
على فكرة الكرسى جميل ومرييييح جدا يااستاذة اميرة.. اقعدى عليه وانتى تشوفى بنفسك يالا اوعى تكسلى
زغباوية 2011-10-04
يالا يااستاذة هاتستريحي اوى مستنيينك
يالا قوليلنا ايه الحلم اللى لسة ماحققتيهوش
الباشمهندسة 2011-10-04
في الحقيقة انا مليش اخوات بنات بس كل عضوات الموقع بحبهم زي اخواتي .... دانا بخدمك عشان تقولي كل اللي نفسك فيه من غير قيود ... مستنينيك بقي :D
الاستاذة 2011-10-04
امري لله طالما ان كلكم علي
بس رفقا بالقوارير
يعني بالراحة عليا دانا غلبااااااااااااااان
الاستاذة 2011-10-04
الحلم اللي لسه ما حققتهوش ويارب يارب يارب يتحقق
اني اشوف ولادي زي مابحلم وفي احسن الاخلاق والمراكز
آآآآآآآآآآآمين
ده بالنسبة لولادي وبالنسبة لي وبكل صراحة الحلم اللي ماحققتهوش اني اخس والنبي
MaDa 2011-10-05
عايزين Cv عشان اللي مش عارفين حضرتك :(
الاستاذة 2011-10-05
الاسم/امــينة
والشهرة/اميرة
متزوجة وعندي 3 اولاد
ندى-9
محمد-7
منة اخر العنقود-4
مدرسة (استاذة)رياضيات ع
مواليد 1/11/1973
رقم 2 في اخواتي ماحنا 4 اخت اكبر مني واخين اصغر مني
معرفتي بالموقع ان tfatifi اخت الريس تبقى زوجة اخويا يعني انا عمتها :D :D :D
الاستاذة 2011-10-05
اهو عرفتو كل حاجة مش كفاية كده وانزل بقى
علشان غيري ياخد فرصته
safaa 2011-10-05
انتى احلى عمة فى الدنيا يامرمر..وربنا يخليكم لبعض
mora 2011-10-05
يا هلا يا هلا بالاستاذة اخيرا منورة والله
mora 2011-10-05
يا ترى بتحبى مهنة التدريس ولا ايه وبتقعدى تذاكرى مع اولادك ولا باب النجار مخلع واصلا بتلاقى وقت ليهم وللبيت وللشغل
loleta1 2011-10-05
بلاحظ إنك بتجمعي قصص كتير حلوه إنتي بتحبي القراءة وخصوصا القصص والقراءه من هواياتك وكمان حابه أعرف هواياتك المفضله؟وإيه حاجة شدتك وقريبه من نفسك في الموقع؟:-(
زغباوية 2011-10-05
ربنا يحققك كل اللى بتتمنيه
ايه اللى فادك من اشتراكك فى زيدوني
الاستاذة 2011-10-05
للاسف بحبها جدا وخصوصا الرياضيات بحس ان فيها نوع من التحدي مع الذكاء
بس برده للاسف الطلبة مش مديين فرصة للواحد لان المعلومات عارفينها قبل كده من الدروس الخصوصية فمعلوماتي بالنسبة لهم قديمة لكن الجديد معاهم التمارين اللي ما اخدوهاش بتبقى في ملعبي لاني بحس فيها اني بفيدهم وبياخدوا معلومة جديدة

طبعا بذاكر مع اولادي على قد ما اقدر لانهم لغات وانا في الانجليزي فظيعة مش عايزة اقول يعني من الاخر بتعلمه معاهم وبالنسبة للوقت فمعظمه لهم ولكن الشغل والاولاد جاي على حساب البيت شوية
وعلشان كده عملت في شغلي اجازة نصف اجر علشان اظبط الدنيا اللي تاهت عندي
الاستاذة 2011-10-05
انا بحب قرأة القصص جدا وخصوصااااااااا قصص الاطفال بموت فيها بشتريها لاولادي علشان انا اقرأها
بحس ان في القصص مواعظ وحكم ومعاني كتيرة مفتقدينها في حياتنا وفي قصص كتير اثرت في وفي تفكيري للامور بطريقة افضل ووضحت لي حاجات كتير كانت ملخبطة عندي
بصراحة هوايتي وانا صغيرة كانت جمع العملات ولسه الى الان بجمعها لو صادفت
لكن هوايتي دلوقتي هي المطبخ بحب اخترع اكلات بطريقتي وأألفها والحمد لله معظمها ان ماكنش كلها بتتطلع جميلة بس للاسف ماليش في الحلويات الشرقية
لكن مع مذاكرة العيال وواجباتهم اللي ياعيني عليهم ما بتخلصش مابقتش لاقيه وقت لي في حياتي
ياللا اهو كله علشان مصر تعيش :P
loleta1 2011-10-05
طيب بمناسبة إنك مدرسه عندك كام تلميذ في فصلك؟ولوكانوا كتير بتتصرفي إزاي؟وإيه رأيك في الرأي اللي بيقول أركز مع 7من النوابغ ولايضيع تركيزي مع الفصل كله ومايطلعش حد متفوق؟
الاستاذة 2011-10-05
آمين يا رب العالمين
فادني كتير اولا في القصص اللي انا بنزلها وفي الاسئلة اللي ماكنتش تخطر على بال حد يسألها ومع انها موجودة في عقول معظمنا واجابات هذه الاسئلة والمواضيع الجميلة اللي استفدت من معظمها
وثانيا وهو اهم حاجة استفدها ان بقى لي ناس كتير اعرفهم وبحبهم في الموقع حتى من غير ما اعرف شكلهم بسبب التواصل اللي موجود في زيدوني
الاستاذة 2011-10-05
عندي في كل فصل 30 طالب لان مدرستنا رياضية ودي كثافتها ماتزدش عن كده
اما الرأي ده اللي اول مرة اسمعه فامش بحبه ده شعار المدرسين الخصوصين مش شعاري
بالعكس انا لما بشرح لطالب مستواه متوسط او ضعيف والقيه استوعب ومشي معايا في الحل فببقى في قمة سعادتي
لكن في الفصل مااقدرش اركز مع الضعيف بس او المتفوق بس لازم اقسم الوقت على الكل بقدر المستطاع وربنا اللي بيعين ادعولي
الاستاذة 2011-10-05
يااااااااااااا باشمهندسة يا زنقتيني وخلعتي احب اقولك وبكل ثقة-----------------------------------------------------------------------------------------------كل ســـــــــــــــــنة وشمس طيــــب------------
---وعقـــــــــبال100 سنــــــــــــــة------------
الاستاذة 2011-10-05
معلش يا مورا نسيت اقولك ميرسي ليكي وده نورك ونور كل اعضاء زيدوني
TOOTOOMEX 2011-10-05
محجبه ؟ وايه اخبار الطاعات؟ وبتتمنى ايه لزيدونى وللى فى زيدونى؟
الباشمهندسة 2011-10-05
اولا يا استاذة انا مخلعتش انا بس مش عايزة اقطع الارزاق وازنق علي الاعضاء التانيين واديكي فرصة تشمي نفسك من طابور الاسئلة دا

ثانيا بشكرك علي التهنئة نيابة عن شمس و Monem كمان

ثالثا احنا كمان سعداء بوجودك معانا في زيدوني

رابعا بما انك مُعلمة ايه رايك في موضوع اعتصام او اضراب المدرسين في الفترة اللي فاتت ويا تري شاركتي فيه ولا لأ ... وليه؟
الاستاذة 2011-10-05
محجبة من 2/ع والحمد لله ومش متزمدة ولا متفتحة قوي فخير الامور الوسط واهم حاجة ان الانسان يراعي ربه في تصرفاته
اتمنىلزيدوني ان ربنا يبارك فيها وتحقق لصاحبها اللي بيتمناه
اما لاعضاء زيدوني فبتمنى ان ربنا يحقق لهم كل امانيهم ويكونوا في سعادة وهدوء بال
الاستاذة 2011-10-05
أأأأأأأأأأأأه من الاعتصام ده للاسف اتنفذ بغباء لاني مابحبش حد ياخد حد بذنب حد
لأ انا ماشاركتش فيه لكن مدرسة اولادي شاركت فيه وطبعا فات اسبوع من التدريس فبالتالي كوموا على العيال منهج الاسبوعين في اسبوع
اشارك في ايه يا باشمهندسة دي كانت مهزلة ناس عاملة وناس لأ وفي نفس المدرسة كمان وناس بتشرح وناس لأ
انا عن نفسي اشتغلت من اول يوم مانا قلت قبل كده اني براعي بنا في تصرفاتي واحلل القرش اللي باخده لاولادي
انا مش بقول كده من باب المثالية لأده فعلا اللي حصل وللعلم مدرستنا كلها ماعملتش اعتصامات ولا اضراب وكان رأينا كلنا واحد
وربنا يهدي ويسترها معانا
safaa 2011-10-06
لو جالك عقد عمل فى الخارج يامرمر تسافرى ولا تقعدى فى بلدك احسن
الاستاذة 2011-10-06
لما اتكلمت مع زوجي بعد سنة من الزواج وكان معايا ندى لسه مولودة قالي انه ماعندوش مانع وابعتله المرتب اول بأول علشان يتزوج واحدة تربي العيال او البنوتة
فلو كنتي مكاني تعملي ايه يا طنط؟؟؟؟؟؟

انا كده كده مابحبش السفر للعمل اصلي فقر--لاني جربته مع مامتي وبابايا وكنت شايفة تعبهم قد ايه في الوقت اللي معظم الناس كانوا بيتعملوا معاهم على انهم قاعدين في بنك بيصرف لهم كل يوم ملايين ده غير ضريبة الغربا واللي هي الصحة وحرقة الدم والضغط والذي منه
اينعم الحاجات بتيجي لنا واحنا في بلدنا بس برده الاسم في بلدنا مش في الغربة
safaa 2011-10-06
عندك حق يامرمر ...وعمك عبد المنعم كدة برضة يادوب قعد سنة وماكملش الثانية وزهأ ورجع مع انه كان متدلع جدا هنالك واى طلب منه الشركة تنفذة فورا
الاستاذة 2011-10-08
بصوا بقى يا اعضاء الموقع
انا خللت من القاعدة على الكرسي
ورجلي وجعتني فكفاية علي كده
وخصوصا ان الكل انشغل في كليته او شغله
ماهي للا سف الاجازة خلصت
انا هانزل بقى
الباشمهندسة 2011-10-08
نورتي الكرسي وكان ختامها مسك ... وممكن نبقي نعيد اللعب مرة تانية ومش هتفلتي بسهولة
الاستاذة 2011-10-08
تعيشي يا باشمهندسة
ولما تيجي الاجازة يبقى يحلها الف حلال
ان شاء الله
الباشمهندسة 2011-10-08
اجازة مييييين ... الجمعة والسبت من كل اسبوع ان شاء الله يبقي فيه ضحية
yara 2011-10-08
بص يا مادا ة اكييييييييييد هقاطعها وهعاتبها عشان كدة ميرضيش ربنا خالص ومش هساعدها فاى حاجة مهما كانت
الاستاذة 2011-10-08
مين بس يا يارا اللي زعلك وهاتخصميه كده
الباشمهندسة 2011-10-08
ايه دا ... ايه دا ... دا فيه موضوع كبير قوي احكيلنا يا yara واحنا نساعدك تتصرفي بحكمة وبدون تهور ومن غير ماتخصري حد
محمد عبد المنعم 2011-10-08
يا جماعة ده كان رد على سؤال قديم ل MaDa
الاستاذة 2011-10-08
آآآآآآآآآآآآآه
ده كان سؤال لمادا صفحة 34
loleta1 2011-10-09
نورتينا ياأستاذه،وقلبك أبيض يايارا،ومين هتختاروا يكمل المسيره على الكرسي
زغباوية 2011-10-09
اعتقد توتومكس اللى عليها الدور
TOOTOOMEX 2011-10-09
طب ليه كده
زغباوية 2011-10-09
علشان نتعرف عليكى اكتر
وانا هابدأ مش هاسالك عن الcv جايز ماتكونيش حابة تقوليه بس لو عادى مفيش مشكلة
السؤال بقى ايه هى احلامك اللى حققتيها واللى لسة ماحققتيهاش
TOOTOOMEX 2011-10-09
لسه محققتش اى احلام بس انا نفسى اكمل فى الجامعه واخد الماجيستير والدكتراه بس انا مش فاضيه خالص وطبعا اشوف ولادى احسن اولاد
loleta1 2011-10-09
أو ممكن تكتبي منه اللي يعرفنا عليكي
زغباوية 2011-10-09
ممكن ده يتحقق لما اولادك يكبروا شوية وهاتحسي بمتعة كبيرة وانتى بترجعي تدرسي من تاني وتذاكرى مع اولادك وده ممكن يكون حافز كبير ليهم برضوا
TOOTOOMEX 2011-10-09
اسألى يا لوليتا وانا هجاوبك
الباشمهندسة 2011-10-09
منورة الكرسي يا توتو

ايه اللي انتي عاوزة توصليلة بالماجيستير والدكتوراة ... الشغل ولا التدريس ولا العلم ؟

وايه اكتر حاجة استفدتيها من الموقع وايه اكبر عيب شيفاه في الموقع؟
TOOTOOMEX 2011-10-10
انامش بحب الشغل بصراحه انا عاوزه اكمل عشان العلم نفسه وانا طبعا استفدت حاجات كتير من الموقع المعلومات ثريه وكفايه صحبتكم الحلوه العيب انه لسه محدود بس ده طبعا عيب هيتغير بمرور الوقت
safaa 2011-10-10
بتنظمى وقتك فى بيتك ازاى ياتوتو ...وايه هى الاولويات عندك
TOOTOOMEX 2011-10-10
انا مش بشتغل فطبعا الوقت بيبقى كبير مدرسة الاولاد قريبه من البيت بنزل بيهم المدرسه وارجع افطر واقعد شويه اتابع الاخبار واتابع زيدونى واكمل يومى اروق السراير واعمل الاكل وانزل اجيب الاولاد ونعمل الواجبات ونزاكر واليوم بيخلص الاولويات الزوج ثم الاولاد
زغباوية 2011-10-10
انا هازود على سؤال الباشمهندسة ايه اكتر حاجة معلقة معاكى او فاكراها دايما او موضوع استفدتي بيه من الموقع سواء موضوع او اجابة او حتى تعليق يعنى حاجة مهمة عرفتيها ومش ناسياها
TOOTOOMEX 2011-10-10
لا دى حجات كتير ايه اكتبهالك كلها مش ممكن
زغباوية 2011-10-10
ماشي ياتوتو طب حاجة واحدة او 2 او حتى 3
TOOTOOMEX 2011-10-10
هاتانى ولا كفايه
زغباوية 2011-10-10
لا خلاص كدا حلو اوى
الاستاذة 2011-10-10
الاول يا جميل توتو مكس دي جاية من ايه؟
والتاني يا جميل برده نفسك تعملي موضوع الماجيسير والدكتوراه عن ايه؟؟؟؟؟؟؟؟؟؟؟؟؟؟
TOOTOOMEX 2011-10-11
توتو ده اسمى من وانا صغيره بيندهولى بيه فى البيت ومكس من اسم حبيبى وزجى وابو الاود اما عن الماجيستر والنا فى الكليه كنت بحب مادة الاقتصاد جدا فلو اتيحت لى الفرصه هعمل فيها
safaa 2011-10-11
يارب تحققى كل ماتتمنيه
زغباوية 2011-10-11
ربنا يوفقك وتحققي كل اللى نفسك فيه
TOOTOOMEX 2011-10-12
شكرا جزيلا
MaDa 2011-10-12
سؤالي سهل جدا :D
ممكن توصفي كل واحد من أفراد أسرتك يعني بابا وماما وإخواتك زي ما انتي دايما بتشوفيهم :P
safaa 2011-10-12
ياترى مين ياتوتو اللى هييقعد على الكرسى
TOOTOOMEX 2011-10-13
الوالد رحمه الله كانت احسن راجل فى الدنيا على الاقل بالنسبه لى وامى ربنا يشفيها ويخليهالى ست عظيمه ربتنا وعلمتنا الاصول والحب والاحترام اما اخواتى دول حبايبى اخين واخت هما كل اللى ليه بحبهم جداااااااا وهما اخدين كل صفات الوالد الصلاه والالتزام وصفات الوالده وربنا يخليهم ليه
TOOTOOMEX 2011-10-13
عم عبد المنعم ان الاوان
زغباوية 2011-10-13
ربنا يخليكوا لبعض ويشفي ماما
زغباوية 2011-10-13
نبعتلكوا كلنا رسايل انه يجي عايزينه يعترف
MaDa 2011-10-13
ربنا يخليهالك ويشفيها ويعافيها يارب :(
MaDa 2011-10-13
الكرسي مستنيك يا عمو .. كل اللي قعد على الكرسي يبعت لعمو عبد المنعم رسالة فيها رابط الكرسي وننشرلله الرابط في مشاركاته .. كلنا وراه لحد ما يقعد على الكرسي :D:D:P
TOOTOOMEX 2011-10-13
تييت تييت عمو تييت يالله
MaDa 2011-10-14
أول سؤال .. عايز أتعرف لى حضرتك من واقع البطاقة الشخصية والعائلية .. وشجرة العائلة في زيدوني :(
safaa 2011-10-14
توتو حبيبتى ...ربنا يبارك فيكم ويشفى ماما ويطمأنك عليها
TOOTOOMEX 2011-10-16
اللهم امين
safaa 2011-10-16
معلش ياجماعة عمكم عبد المنعم لسة متأثر بالاحداث اللى حصلت عند ماسبيرو بس بنقووول( الصبر جميل )
زغباوية 2011-10-16
يارب البلد تهدى وعبد المنعم يدخل
TOOTOOMEX 2011-10-17
ههههههههههههههههههه
الاستاذة 2011-10-18
انا عن نفسي مش عايزة اسأل عمو
انا عايزة اقرأ ردوده بس
safaa 2011-10-18
ومين سمعك يامرمر انا كمان عاوزة اسمع اجاباتة ...ويمكن وقتها
تطلع الاسئلة لوحدها له من غير ما نفكر...
طيب ممكن نديلة فرصة كمان يومين تلاتة ولو مقعدش...أنا هقعد بدالة
واجاوب
عبد المنعم 2011-10-20
عاوز ايه ياد انت وهى وهو ؟؟؟
عبد المنعم 2011-10-20
وفين الكرسى دا انا مش لاقى حاجة اقعد عليها اصلا ؟؟؟!!!
الاستاذة 2011-10-20
ايه ده انا مش مصدقة عينيا عمو حن ورد على الشعب العربي
احمدك ياااااا رب
زغباوية 2011-10-20
انا اول واحدة هاسألك ايه الحلم اللى انت حلمتوا واتحقق وايه اللى نفسك تحققوا وايه اللى كان نفسك تحققواوماحققتهوش
الباشمهندسة 2011-10-20
ياسيدي الكرسي اهو اتفضل اقعد واسترخي خالص



عرفنا بنفسك بقي عايزين C.V تفصيلي
عبد المنعم 2011-10-21
مش لاقى حتة اكتب فيها !!
loleta1 2011-10-21
انت تكتب في أي حته ياكبير منور الكرسي ياعمو
زغباوية 2011-10-21
ايوة ايوة هانتلكك بقى مرة مش لاقى كرسي ومرة مفيش مكان ماهو الموضوع كبير اهوه جاوب وبلاش تلاكيك يالا علشان هاتجاوب هاتجاوب
safaa 2011-10-21
دا حتى الكرسى دا شكلة مريح جدا ....طيب ما انا اقعد علية وخلاص
عبد المنعم 2011-10-22
انا نفسى اكتب والله .. بس مش عارف زز مرتبك .. اول مرة اتحط فى الموكف ده .. احذرونى .. محلش !!! اشوفكم فى فرصة تانية .. بس احصابى تهدى شوية ..
عبد المنعم 2011-10-22
الحمد لله لقيت فرصة .. اعرفكم بى بقى :
عبد المنعم حسين عبد المنعم خضر .. مختصر .. لان الباقى طويل ويتصل بسلالة لها كل التقدير ..
متزوج واعول ..
هواياتى القراءة والنحل واللب الابيض ..
اكلتى المفضلة الملوخية بالارانب او الحمام ورز بالشعرية عليه صلصة البامية بالليمون ..
احب السياسة واعتبر نفسى من المندسين .. ولمل اسمع اسم مصر اعيط على طول ..
احب ام كلثوم القديمة وعبد الوهاب وفيروز وقليل من الاخرين ..
عندى 58 سنة وكنت بالعب كل حاجة وانا صغير وخصوصا الجمباز ..
اتعرفت على احد اسرار اليوجا وانا عندى 30سنة ..

احب البدنجان المخلل والزيتون الاسود الدلع والاخضر الحراق .
اشرب الشاى بالقرنفل او الجنزبيل او الريحان وبعد الاكل لازم الليمون
اشرب ماء كثيرولازم اعمل اى مجهود ميكانيكى يوميا ..

طبعا مريت بالمراحل الطبيعية لنمو الانسان ..والحمد لله عديت المراحل كلها زى الشعرة من العجين ..
احب الحنية واحيانا حب العزيز وبالذات السودانى الاسوانى والكاجو..
بعد اذنكم دلوقت .. عندى حاجة اهم ..
زغباوية 2011-10-22
منور ياعدوا بس هاننصب من اولها 58 سنة برضوا ماشي هانعديها:(
زغباوية 2011-10-22
1- طيب ايه الحلم اللى لسة ماحققتهوش بالرغم من مرورك بالمراحل الطبيعية لنمو الانسان:( وايه اللى انت حققت
2-عايزين تدينا خلاصة تجربة فى سطرين او اكتر للشباب
safaa 2011-10-22
تلاقي القلم هو اللى غلط يارنيا متبقيش وحشة كدة
عبد المنعم 2011-10-23
هل انا هافضل اتكلم لوحدى كدا ؟؟ ولا انت تسال وانا اجيب ؟حددوا .. علشان لسه هنبتدى ..اللى كتبته امارح دا مجرد تسخين .. دا انتم هتقروا بلاوى .. ورونى بقى الاسئلة .. بس اعرفوا ان السؤال الهايف هيترد عليه بتهكم ..
زغباوية 2011-10-23
طيب اللى يدخل هايسألك وانت تدور على كل الاسئلة وتجاوب عليها
ماجاوبتش على رقم 2
الباشمهندسة 2011-10-23
هنا سؤال لعبدو
حاسس انك بعد العمر ده عملت ايه عشان البلد وايه اللي كان نفسك تعملوا وماكنتش قادر بس تقدر تعملو ديلوقتي ... زي مثلا ترشح نفسك عن دائرتك وحاجات زي كدا.... يعني بتفكر تخدم اهلك وناسك ومدينتك ازاي ؟
MaDa 2011-10-24
حضرتك من أكتر الناس المثقفين اللي انا قابلتهم .. وكمان حضرتك حققت معادلة صعبة انك قدرت تواكب العصر وتستخدم التكنولوجيا الحديثة في تحصيل المعرفة ونشر فكرك وثقفاتك وخبرتك .. السؤال بقى : ازاي حضرتك قدرت تحقق ده وهل القراءة كانت السبيل الوحيد وهل فكرت تعلم اللي انت اتعلمته ده للغير وتنقل خبراتك ومعلوماتك دي عشان الكل يستفيد ولا لا ؟ :(
عبد المنعم 2011-10-25
طب بس بعد اذنكم الليلة دى لان ضرسى بيزن ..
زغباوية 2011-10-25
ايوة ايوة هانبدأ التلاكيك تاني عموما احنا مستنيينك ماورناش اى حاجة عندك كدا 3 اسئلة ماجاوبتش عليهم
الباشمهندسة 2011-10-25
الف سلامة ياعبدو ... منتظرينك لما تخف ان شاء الله
زغباوية 2011-10-25
كدا مفيش تلاكيك الموضوع بجد والف سلامة عليك
الاستاذة 2011-10-25
الف سلامة يا عمو
عبد المنعم 2011-10-26
جميل قوى التواصل الاجتماعى ده .. اشوفكم بعد ساعتين ان شاء الله
عبد المنعم 2011-10-26
ردا على سؤال زغبوبة الاول:
اللى لسه ماحققتوش - ودا تعبير غلط - والصح : ايه الى ربنا عملهولك- .. اللى نفسى انا انا واللى معششة جوايا ان ربنا يرزقنا حجة .. قولى يارزاق يا كريم ..

السؤال التانى : النصيحة الخلاصة صعب تنفيذها على شباب الايام دى.. وهى القراءة .. عمرك سمعتى عن شاب بيقرا اى حاجة ؟؟ لكن انا هاقول اللى كنت باعمله ... قراءة فى جميع افرع العلم والمعرفة .. لتوسيع المدارك والافق الفكرى ولتخليق المنطق الذاتى داخل العقل حتى اتمكن من البعد عن التقليد او التكرار .. يعنى اعمل لنفسى بصمة نفسية ذاتية مختلفة زى ما بصمة الاصبع مختلفة عن كل البصمات .. على ان يصب ذلك فى خانة الايجاب وليس السلب .. يعنى لا اصبح معقدا .. او متكبرا .. او فذلوكا .. بل ان اكون واعيا بمعنى التيقظ الكامل لكل ما افكر فيه او اعمله وان اكون جاهزا بالبدائل المتعددة لكل حالة .. وان اكون سريع الاستجابة بايجابية .. كفاية رغى بقى يا اخى !!!!

اجابة سؤال الباشنهندسة :

حضرتك كل ما اشوف حاجة غلط لازم اصلحها .. كل معلومة خاطئة باصححها ..كل سلوك معوج باضبطه .. كل مفهوم ملتبس باشرحه ..دا اصبح طبعى من زمان قوى .. ودا يفسر لك انى لو اترشحت فى اى حاجة سياسية فالنتيجة واحدة من اتنين : اما يرفدونى واما ادخل السجن
وبيتهيالى ما اهونش عليكى ..


الرد على مادا :اولا كلمة ( تواكب ) ما احبهاش لانها مستهلكة من الحزب المعفن .. ثانيا : حضرتك مفيش حد بيحقق حاجة .. اللى بيحقق ربنا .. وما على الانسان غير انه ينوى باخلاص .. ويحب اللى فى ايده باخلاص وبدون تذمر ولا تافف ولا تكبر ... هل ربنا بيهدى اى حد ؟؟ لا !! لكن بيهدى اللى عاوز يتهدى ..

الشق التانى من سؤالك: طبعا مفيش فرصة قدامى ما اعلمش اى حد فيها .. او اشرح.. او اوعى ..او اعمل بنفسى اى حاجة لاى حد .. او اساعده ..


اديكم شايفين ما اخدتوش فى ايدى نص ساعة ... فين بقى الاسئلة اللى قعدتم تخوفونا منها !!!!
محمد عبد المنعم 2011-10-26
طب خد السؤال المتين ده:
وللا بلاش ... لما أشوفك أحسن
زغباوية 2011-10-26
اولا شوفت بقى كنا عايزين نسمع الكلام الحلو والجامد ده
المشكلة انى مش قادرة اجيب اسئلة تكون على اد دماغك العالية دى انت عايز اسئلة من العيار التقيل وانا على ادى بس هاحاول
عارفة انك سافرت كتير استفدت ايه من سفرياتك وايه احسن بلد عشت فيها وبتحبها وليه؟؟؟؟
ناوى تنتخب مين سواء مجلس شعب او رئاسة؟
عبد المنعم 2011-10-27
رد على المدير : انت عاوز تفهم الناس انى ربيتك على القهر ؟ بتسوا سمعتى ؟ ما تسال اللى انت عاوزه احنا ما عندناش حاجة نخاف من نشرها !! ( ايه رايك فى الطلقات السريعة دى ؟)..
عبد المنعم 2011-10-27
اوروبا كلها جميلة .. وكل بلد لها جمال خاص بيها .. وكلها نطيفة .. نطافة تخليكى تحسى ان بلدنا عبارة عن زريبة بهايم قذرة ..الناس برة بتلاقيهم قاعدين على الارصفة تاكل ايس كريم .. الرصيف بيلمع .. حاجة تقرف !!!

مفيش حد يتعالى على حد .. الكل فعلا سواسية كاسنان المشط اللى بنقول عليه فى الاسلام .. احنا شعوب كاذبة ومنافقة ..

كل واحد فى شغله زعيم .. الرئيس زعيم شغله .. الزبال زعيم شغله .. يالهوى على الزبال فى اوروبا !!!

عمال النظافة الداخلية يحترمهم الجميع .. ما شفتش حد بيهين حد .. ولا يكلمه بالاطة .. مفيش كدب .. مفيش غش .. العمال ..حتى الصغيرين منهم كل واحد عنده عجلة وموتوسيكل وعربية ..

ليه بقى دا كله ؟؟ لييييييييه؟؟؟؟ العدالة الاجتماعية !!!!! الحد الادنى والاقصى للاجور : ادمية الانسان وكرامته ..

وجاية تقوليلى انتخابات ؟؟ بلا ستين نيلة ..!!!

لو لقيت شباب من الثوار مرشحين نفسهم هانتخبهم ولو ما لقيتش هابوظصوتى ... لكن للرئاسة هانتخب البرادعى انشاء الله ..
safaa 2011-10-27
خلاص كفاية عليك كدة ...كتر الف خيرك
هو فى احلى من مصر وشعب مصر ياباشمهندس عبد المنعم...معلش كل واحد حر فى اللى بيقولة...دا كفاية بس ساعةالشدة بيكونوا يد واحدة
الاستاذة 2011-10-27
خلاص يا عمو كرهتنا في نفسنا
ده كفاية علينا القول المأثور
( ارفع راسك فوق....انت مصري )
زغباوية 2011-10-27
شكل الكرسي عجبك صح؟؟؟؟
طيب خد دى
عارفة ان ولادك متربين احسن تربية والكل يشهد لهم بحسن السير والسلوك:D
تنصحنا بإيه في تربية ولادنا وكنت بتعمل ايه مع ولادك وكان عندك اهداف وانت بتربيهم ولا بتعيش اللحظة وخلاص؟؟؟؟
safaa 2011-10-27
مش فاكرة يارانيا مسلسل يوميات ونيس من اول جزء كانت الاقارب تقول زى بابا مابيعامل اولادة
عبد المنعم 2011-10-28
لا مؤاخذة يا زغبوبة ... ولادكم مش زى ولادنا ..ايامنا مش زى ايامكم .. اكلنا زمان غير اكلنا دلوقت .. صح ؟ ثقافتنا زمان غير فضائيات الايام دى .. ولذلك عليكى الالتزام باقصى درجات الحلم ...
عبد المنعم 2011-10-28
طبعا القعدة على كرسى زى ده والناس كلها بتسال يخللى الانسان يعذر القيادان اللى بتحط على الكرسى غراء !!!
MaDa 2011-10-28
لو حضرتك قابلتك مشكلة كبيرة جدا بتتصرف ازاي .. بتحاول تحلها لوحدك ولا بتلجأ لربنا ثم لأي حد قريب منك ويقدر يساعدك ولا ممكن تستسلم .. عايز أعرف تفكير حضرتك بيبقى إزاي عند مواجهة أي مشكلة ؟ :(
وربنا ميجبش مشاكل أبدا
dr,dream 2011-10-28
you are very nice , all of you , i am glad to join this group.
زغباوية 2011-10-28
د/دريم مدام علقت على هذا الموضوع يبقى دورك القادم
dr,dream 2011-10-28
is it a trick or what? lol
loleta1 2011-10-29
سكر ياعمو وعندك حق شعوب بره بيطبقوا الأسلام بلا مسلمين وأحنا هنا مسلمين بلا تطبيق للأسلام سؤالي ليك ياعمو بتعمل ايه لما بتتناقش مع حد منطقي ولمض ؟وأيه أكتر حاجة بتعجبك في موقع زيدوني واكتر حاجه نفسك تغيرها؟
عبد المنعم 2011-10-31
لما ازهق منه فعلا باشوح بايدى فى وشه مع نظرة قرف واسيبه وامشى ..
اللى عاجبنى فى موقع زيدونى ان النساء اصبحن يمثلن قوة .. وعلينا ان نخشاهن ..
نفسى اغير جنسيتى .. بس برضه ابقى فى مصر .. باحبها جدا جدا جدا ...
عبد المنعم 2011-10-31
رد على مادا : المشاكل نوعين على وجه العموم .. نوع ممكن يتحل ونوع غير قابل للحل .. صح ؟؟ النوع الاول له بدائل وخيارات متعددة .. بادور على الاسرع الاسهل الاامن الاقل خسارة والاقل تكلفة سواء مادية ولا معنوية ..

النوع اللى مالوش حل عاوز فلسفة .. تعلم نفسك كيف تعيش مع ما تكرهه.. حتى يحدث الله امرا ..
زغباوية 2011-10-31
ياعيني على الاجابات طيب ممكن تبص في الصفحة السابقة للتعليقات هاتلاقي اسئلة برضوا
عبد المنعم 2011-11-01
انتى هتمشورينى بين الصفحات ليه ؟ كل صفحة رديت على الاشئلة اللى فيها خلاص !! .. فين بقى الاسئلة اللى بجد ؟؟ دا انتم طلعتم اى كلام .. فيييييين الاسئئئللللهههه!!!!
عبد المنعم 2011-11-01
اللى عنده حاجة .. ياللا قبل ما نصطاد دكتور دريم !!! ( دبستهلكم اهه )...
الباشمهندسة 2011-11-01
الله ينور يا عبدو
زغباوية 2011-11-02
شكلنا وحش ياجماعة عمليين نداء للراجل في كل مكان ولما يدخل مايلاقيش اسئلة كتير .....محدش عارف يجيب اسئلة ولا ايه ؟؟؟الكرسي هنج ولا ايه؟؟؟
الهمة شوية ياعضاء
mora 2011-11-03
اخيرا يا عمو اول ما يشتغل النت بعد انقطاع دام اسبوعين الاقيك منور كدا دا انا حظى وحش ع العموم اخاف اسئلك اى سؤال بعد اجاباتك دى يا عمو
mora 2011-11-03
ع العموم يا طنط صفاء لينا عتاب بعدين عشان مبلغتنيش وايضا الاستاذه رانيا
عبد المنعم 2011-11-03
يا مورا كلنا تحت امرك .. انا عملت زى كل المسئوين وصبيت على الكرسى غراء قبل ما اقعد !!! ومش هاقوم الا بعد ما تسالينى زى ماانت عايزة
زغباوية 2011-11-03
جمد الله على السلامة يامورا
الاستاذة 2011-11-03
حمدالله على سلامة النت يا مورا ويا رب ما يخسر تاني
زغباوية 2011-11-03
يال ياستى اسئلي براحتك
MaDa 2012-01-25
تلبية لطلب شيماء باللعب فهي أحق واحدة بالجلوس على الكرسي .. يلا يا شيماء المايك معاكي :D

أول سؤال
عرفينا بنفسك من واقع البطاقة الشخصية والبطاقة العائلية .. يعني cv كامل عنك :D
الباشمهندسة 2012-01-25
ما هي هوياتك المفضلة وكيف تخططين لاقضاء اجازة منتصف العام؟
mora 2012-01-25
تعرفى كان نفسى جدا ادخل كليه الاداب قسم علم نفس بحب علم النفس جدا
شيماء مصطفي 2012-01-25
انتي ف كلية ايه ؟
شيماء مصطفي 2012-01-25
أنا شيماء مصطفي . .19 سنة . .ف أولي أداب علم نفس كلية البنات . .ومن محافظة الجيزة . .عندي أخت واحدة أصغر مني .
mora 2012-01-25
يا ترى انبسطى من موقع زيدونى وهل اضاف لكى شيئا وما رأيك فى المواضيع التى يكتبها الاعضاء
شيماء مصطفي 2012-01-25
الباشمهندسة :
أنا بحب القراءة ، الرسم ، وكرة السرعة .
وكنت مخططة إن أول حاجه أعملها ف الأجازة أروح معرض الكتاب وروحت امبارح بعد الأمتحان ، وعموما ف الأجازة بروح المكتبة أو النادي .
شيماء مصطفي 2012-01-25
اه استفدت كتييير طبعا .
mora 2012-01-25
اتخرجت من كليه التجاره اداره اعمال
شيماء مصطفي 2012-01-25
ما شاء الله . .يعني بردو أكبر مني . .هو أنا أصغر واحدة هنا ولا ايه ؟:D
mora 2012-01-25
لا عندك يارا السنه اللى فاتت كان عندها 18 سنه
شيماء مصطفي 2012-01-25
طب الحمدلله في حد ف سني
mora 2012-01-25
وريم عندها 19 سنه وبعدين مش بالسن عن نفسى محستش ان فى حد كبير او حد صغير بجد وبدون مبالغه حسيت ان كلنا متقاربين جدا ومفيش فروق فى السن
شيماء مصطفي 2012-01-25
اه طبعا مش بالسن . .بجد كلكم صحبه جميلة اتشرفت بيها.
mora 2012-01-25
واحنا كمان اتشرفنا بيكى جدا يا شوشو
MaDa 2012-01-25
أولا : ازيك يا شيماء منورة الكرسي :D
ثانيا : انتي اللي هتتسألي فمش من حقك تسألي خالص :D:P
ثالثا : في أعضاء في سنك بالظبط زي يارا أولى فنون تطبيقية وسما ومحمد علاء أولى علوم طبية .. انا عندي 20 سنة وريم كمان تمتهم من كام يوم كده يا مورا :D وإيناس :D
رابعا: العضوة هاجر اللي هي أختي :D خريجة آداب عين شمس قسم علم نفس دفعة السنة اللي فاتت يعني لو محتاجة أي حاجة في أي وقت وفي أي مادة اسأليها وهي مش هتتأخر عليكي

خامسا : سؤال
انتي دخلتي كلية الآداب تنسيق ولا حبا فيها وكذلك بالنسبة للقسم خصوصا انه قسم صعب جدا :(
safaa 2012-01-25
شيماء ايه أحلى شيىء عجبك فى موقع زيدونى وايه الحاجة اللى مش موجودة وتحبى انها تضاف للموقع؟ واخبار معرض الكتاب ايه السنة دى
يشجع للزيارة ولا لأ
شيماء مصطفي 2012-01-25
MaDa
أنا ف 2ث كنت علمي وكانت طموحاتي حاجات تانية خالص بعدين حصلت ظروف وجبت مجموع وحش فطبعا حولت أدبي وماكنتش شايفة إن في أي كلية من أدبي عاوزة أدخلها بس من ساعة مادرست علم نفس حبيته جداً وقررت إني أدخل أداب علم نفس والحمدلله جالي أداب وأنا الي اختارت علم نفس
أول رغبة ولو ماكنش جالي علم نفس كنت هحول من أداب لأي حاجة تانية بس الحمدلله قبلت ف قسم علم نفس .
محمد عبد المنعم 2012-01-25
طلب بعيد عن موضوع الكرسي:
محتاجين بعض المقالات (ياريت في شكل مسلسل) بتشرح العلم النفس لأنه من العلوم المهمة اليومين دول لأن مفيش جد فينا للأسف خالي من مرض نفسي. وده بالظبط اللي كنت بدور عليه من يجي شهرين ، حد تخصص علم نفس يشارك المذكرات بتاعته عندنا

وطالما كنت اتكلمت فبالمرة هسألك عن الموضوع الي كنتي بتدوري عليه ولقيتيه في زيدوني أول مرة
شيماء مصطفي 2012-01-25
safaa
أكتر حاجة عجبتني إن أي معلومة محتاجاها بلاقيها وحتي لو حاجة مش موجودة ممكن أسأل عنها وألاقي الأجابة . .وكمان فكرة إن الموضوع الي قرأته يبقي بلون مختلف عن الموضوع الي مش قرأته . .والي أحب أنه يضاف للموقع إن يكون في معلومات أكتر عن الأعضاء . .أو يكون في شات بس شات جماعي عشان نقدر نتناقش من خلاله أو نتعرف علي الأعضاء من خلاله .
شيماء مصطفي 2012-01-25
محمد عبد المنعم
تقريبا كده كان موضوع الإسعافات الأولية.
وبالنسبة لموضوعات علم النفس . .تقصد أنا ولا هاجر أخت MaDa ؟؟
شيماء مصطفي 2012-01-25
معرض الكتاب :
اه يشجع جداً للزيارة بس كان محتاج عجلة:D عشان نقدر نلف . .أنا بإذن الله هروح تاني قبل الدراسه ويكون يوم من أوله عشان أنا روحت بعد الأمتحان كنت مرهقة مادخلتش كل الصالات والوقت ماكفاش .
محمد عبد المنعم 2012-01-25
هاجر خلصت فأكيد مش محتفظة بالمذكرات

طيب برضه بالمرة سؤال ثاني ... مين من أعضاء الموقع انتي عرفتيه على الموقع يعني جه عن طريقك؟ ... بصراحة في عدد كبير أنا معرفهوش دخل الفترة اللي فاتت اللي كنت فيها مشغول
شيماء مصطفي 2012-01-25
بصراحة لسه ماحدش دخل عن طريقي :) أنا لسه قايلالهم امبارح . .بالنسبة لحكاية المذكرات ماعنديش أي مشاكل بس أبدأ امتي ؟ و ب إيه ؟
محمد عبد المنعم 2012-01-25
بالكلام العام والبسيط الأول وواحدة واحدة الموضوع ممكن يتطور ... يعني محتاجين مواضيع الناس متوسطة الثقافة تحس إنها استفادت لما تقراها ... طبعا بدون تكليف نفسك مالا تطيقي
MaDa 2012-01-26
@ الريس : أعتقد ان هاجر عندها حاجات كتير ممكن تفيد هبلغها إن شاء الله :(

@شيماء : ربنا يوفقك إن شاء الله في المجال اللي انتي فيه وهو مجال روعة طالما انتي حباه وان شاء الله تتفوقي وتبدعي فيه :(

سؤالي بقى :
ايه اول انطباع خدتيه عن الجامعة وشايفة الحياة الجامعية عاملة ازاي والفرق بينها وبين المدرسة وحبيتي ايه اكتر بعد مرور اول ترم عليكي :(
الباشمهندسة 2012-01-26
ياتري ليكي في السياسة وايه رأيك في اللي حصل من سنة واللي بيحصل ديلوقتي في مصر باعتبار انك لسه جيل جديد خالص :( ؟؟
loleta1 2012-01-26
أهلا بيكي ياشوشو ويسعدني إن موضوع الإسعافات الأولية اللي كتبته لفت إنتباهك وضمك لعيلة زيدوني .اناشخصيا بحب علم النفس ودرست جزء منه هو والفلسفه وإيه مأحكلكيش على دماغي وصلت بيّا لفين.أحب أسألك أخبارنفسيتك في التعامل مع دكاترة علم النفس إيه؟وبما إنك بتحبي الرسم هل هو حاجة عابرة ولاّبتحاولي تتطوريها وتمارسيهابإحتراف؟كمان بتتصرفي إزاي في البيت بما أنكم بنتين ومافيش أولاد وأنتي الكبيرة متحملة للمسؤليه؟
زغباوية 2012-01-26
منورة الكرسي ياشابة جت رجليها ماجت رجليها:D
اولا:انا مع محمد في مقالات علم النفس وانا علشان خريجة تربية فكنت باخده وبحبه جدا وعندى كام كتاب محتفظة بيهم لغاية دلوقتى وبرجع لهم وقت اللزوم
ثانيا السؤال: باؤيد الباشمهندسة في سؤالها وسؤالى التاني: هل ليكى تجارب مع العمل التطوعي او الخيري؟؟؟
safaa 2012-01-26
ياجماعة مش تسيبوها لما تخلص الجامعة الاول وبعدين تسألوها على العمل التطوعى والخيرى ..طيب انتى لما كنتى فى الجامعة كنتى بتعملى اعمال خيرية!!
زغباوية 2012-01-26
للأسف ماكنش فيه وعى ولا كنا بنسمع عن الجمعيات الخيرية اصلا بس دلوقتى الشباب اصبح واعي وفاهم وبيشارك من وهما فى اعدادى وابتدائى كمان مش جامعة بس
safaa 2012-01-26
اذا كان كدا ماشى
شيماء مصطفي 2012-01-26
MaDa
أنا في كلية البنات نظامها مختلف شوية وطبعا مافيهاش مظاهر الترفيه الي في الجامعات التانية يعني يعتبر أنا لسه ف مدرسة ثانوي بنات زي ماكنت :D ، في الأول كنت مستغرباها جدا وكنت ناوية أحول وكنت بقول دي سجن بس بعد كده لاقيت انها احسن في حاجات كتييييير وإن شاء الله هكمل فيها ومش هحول منها .
شيماء مصطفي 2012-01-26
الباشمهندسة
أنا رأي إن الي حصل ده حاجه عظيمة ماكناش نحلم بيها . .وف الأول كنت زي كل الناس خايفة وحاسه إن مش ممكن الثورة تنجح . .بس الحمدلله أهي نجحت ولحد الآن بعتبر إن الثورة مازالت مستمرة لأن في مطالب كتيير لسه ماتحققتش و ف نفس الوقت أنا ضد المطاالب الفئوية الي بتعطل مصالح البلد . . .وعندي أمل ف مجلس الشعب الجديد.
شيماء مصطفي 2012-01-26
أهلا بيكي يا لوليتا . .الرسم بالنسبة لي حاجة عابرة كده مش لدرجة الإحتراف . .بالنسبة لحكاية المسئولية أنا لحد فترة قريبة جدا ماكنتش بتحمل حتي مسئولية نفسي وكنت معتمدة ع ماما ف كل حاجة وكان كبيري أوي البيض أو رز معجن :D بس السنة دي ولأول مرة ماما سافرت السعودية حوالي شهرين وبجد ف الشهرين دول اتبهدلت بهدلة :D عمري بقيت مسئولة إني أحضر أكل وأتابع أختي ومذاكرتها وأنضف البيت وأروح الكلية وأذاكر بس بجد الشهرين دول اتعلمت فيهم حاجات كتييير جدا وأهم حاجة اني حسيت أد ايييه ماما بتتعب جدا معانا واحنا مش حاسين ومن ساعتها وانا ابتديت أساعدها وأحاول اخفف الحمل عنها شوية .
شيماء مصطفي 2012-01-26
بالنسبة للعمل التطوعي أو الخيري كنت بروح في الأجازة نشاط اسمه كوني جميلة كنا بحفظ قرآن وندرس تجويد ونتعلم أشغال يدوية وكنا بنروح دار أيتام وإن شاء الله هروحه الأجازة دي . .. ولو حد فيكم من القاهرة في نشاط جميييل جدا للأطفال تبع نفس الجمعية دي ف ميدان لبنان ف مسجد حسين شريف بيكون برنامج النشاط : فقرة للقرآن و أحكام التجويد وفقرة ثقافية وفقرة تلوين وأغاني جميلة وفقرة لعب ويوم الأربعاء من كل أسبوع بيكون رحلة وبيكون من الساعة 9صباحا ل الساعة 1ظهرا ..لو تحبو تشتركو لأولادكم.
زغباوية 2012-01-26
الله عليكى ياشيماء ...شوفتى ياصفصف نظرتى للشباب الواعى كانت صح ازاى
معلش ياشيماء استفدتى ايه من العمل او بمعنى اخر تقوليلنا ايه علشان نعمل زيك
شيماء مصطفي 2012-01-26
اتعلمنا نعمل حاجات كتيييير بس أحلي حاجه بجدالراحه الي الواحد بيشعر بيها لما بيساعد حد ومش شرط المساعدة دي تكون مساعدة مادية . .يعني مثلا الدار الي احنا كنا بنروحها دي الناس الي مسئولين عنها كانو موفرين للأطفال معظم احتياجاتهم المادية ووسائل التعليم والترفيه لكن فرحتهم بتبقي ماتتوصفش لما بيجي حد يزورهم ويقضي الوقت معاهم واحنا كمان بنكون مبسوطين جداجدا . . .واكيد كل حد مننا جنبه حد محتاج مساعدته ولو بكلمة كويسة أو ابتسامة .
شيماء مصطفي 2012-01-26
انا اتكمت كتيييير أوي . .زمانكم بتقولو عليا رغاية :D
MaDa 2012-01-26
لو زهقتي من الكرسي قولي ونختار حد تاني بس احنا لسه عايزين نعرف عنك أكتر :D
احكيلنا كده عن الرز المعجن ده :D واول طبخة طبختيها ورأي أختك في أكلك :P
شيماء مصطفي 2012-01-26
هههههههههه هو معظم الأكل الي عملته ف أول فترة ماما سافرت فيها كان إما ناقص ملح أو مش مستوي كويس أو بيلزق ف الحله . .بس فاكرة إن أكتر حاجة غاظتني :@ لما وقفت طوول اليوم أعمل صنية بطاطس بالفراخ واما بسأل بابا ها ؟ ايه رأيك ؟ قالي هيا حلوة بس لو مستوية كانت هتبقي أحلي :) . .وبالنسبة لأختي ماكانتش تقدر تعترض لأنها ماكانتش بتساعدني خالص . .ومدرستها قريبة من بيت تيتا كانت معظم الأوقات بتروح عند تيتا وتتغدا هناك وتيجي وساعات كنت بصعب عليها كانت بتجبلي أكل معاها وتقولي خدي أكل شبه بتاع ماما أهو :D .
MaDa 2012-01-26
ههههههههههههههههههههههههههههههههه انتي لازم تزوري مطبخ زيدوني كتييير أوي بقى معانا هنا عمالقة المطبخ وطبعا على رأس الجميع خالتو صفاء :(
فكرتيني بأول طبخة لأختي :D:D
safaa 2012-01-26
ربنا يخليك يامادا ... بس يالا قولنا اول طبخة عملتها هاجر كانت ايه!! وبسرعة وقبل ماتدخل على الموقع وتشوفها
safaa 2012-01-26
شيماء قولى لنا بتنظمى يومك ازاى وانتى فى البيت وايه أكتر حاجة بتحبى تعمليها وانتى مبسوطة
شيماء مصطفي 2012-01-26
لو ماما طالبة مني حاجة أعملها بعملها الأول بعدها معظم يومي إما ع النت إما في القراءة ونادرا لما بتفرج ع الTV .
وأكتر حاجة بحب أعملها : أي حاجة جدو بيطلبها مني :D
safaa 2012-01-26
ما شاء الله عليكى ...ربنا يبارك فيكى
شيماء مصطفي 2012-01-26
وفيكم جميعاً
MaDa 2012-01-27
ايه رأيك في الكرسي ده يا شيماء ويا ترى هتختاري مين بعدك ؟ ولو اتحطيتي في موقف وكان الحل انك تكدبي هل ممكن تكدبي عشان تحليه ولا تقولي الصراحة :D
safaa 2012-01-27
ايه رايك ياشيماء فى انجى؟
شيماء مصطفي 2012-01-27
الكرسي لذيذ :D . . هختار لوليتا وانجي p:
انجي مواضيعها جميلة وعاوزاها تاخد مكاني ف الكرسي :(
MaDa 2012-01-27
لوليتا قعدت قبل كده .. يبقى انجي هي الضحية التالية :D
شيماء مصطفي 2012-01-27
أوك . .وانا بما إني عاوزة أتعرف عليها اكتر يبقي زي ما مادا طلب مني هطلب منها تعرف نفسها :(
زغباوية 2012-01-28
طيب حد يقولها ولغاية لما انجي تيجي يبقى شيماء مكملة معانا
ايه اخر كتاب قريتيه بما انك بتحبي القراية وبتحبى تقري لمين وايه الكتاب اللى عجبك وشدك
MaDa 2012-01-28
ههههههههههههههههههههههههههههه ده تحايل على الكرسي يا زغباوية :D:D
زغباوية 2012-01-28
طيب بس لغاية لما انجى تدخل
MaDa 2012-01-28
ممممممممم وانا كمان هسأل شيماء .. بتحبي مصر ازاي ؟
على فكرة السؤال ده صعب اوي :P
زغباوية 2012-01-28
هههههههههه انت اللى بتتحايل على الكرسي دلوقتى ههههههه:D
MaDa 2012-01-28
هههههههههههههههههههه تحايل جماعي لا ضرر فيه :D
شيماء مصطفي 2012-01-29
أخر كتاب قرأته كان اسمه عيشها صح ، بحب أقرأ كتب محمود المصري وابراهيم الفقي وياسر نصر . .الكتاب الي عجبني وشدني كتاب استمتع بحياتك للعريفي .
شيماء مصطفي 2012-01-29
بالنسبة لمادا أحب أقولك :D :

loleta1 2012-01-30
بجد ياشوشو 10/10 فعلا زي ماهي حبها بحلوها ومرّها وضحكتيني موت في موضوع الطبخ ده والله حصلت فيّا قبلك لأوانا آخر العنقود وماما وخالتي سافروا لمصر وكنت بتطبخ لبيتنا وبيت خالتي وانا كل علاقتي بالمطبخ كانت شم الريحه من بره وكنت بعمل مسقعه وأتلخبطت بين الخل ومية الورد عشان أزايزهم شبه بعض وكانت مسقعه مالهاش حل بس كلوها من الجوع ههههههههههههههه وميرسي لإختيارك ليّا .
@مادا:على فكره انا ماعنديش مانع أجدد قعدتي على الكرسي في أي وقت بس إحنا بندّي فرصه للكل عشان يجرب القعدة عليه ولمّا تحتاجوني عليه انا سداده:-(
أرجع وأسألك ياشوشو طيب أخبارك إيه دلوقتي مع الطبيخ؟وهل فكرتي تجربي طبخة من النت وخاصة زيدوني؟وإيه أكبر مشكلة واجهتك فحياتك حتى الآن وواجهتيها إزاي؟
شيماء مصطفي 2012-02-07
لا دلوقتي بقيت أعرف أعمل حاجات كتير. .أه جربت مرة كيكة بس فشلت جدا:D بس كانت من فترة ، وجربت تارت البسكويت بالشيكولاتة وطلع حلو ، ومن زيدوني عملت الزبادي بالخيار الي قولتو عليها . .وأنا غالبا ف المشاكل بكون سلبية وبستسلم بسهولة جدا :) .
safaa 2012-02-07
شاطرة ياشوشو ومع الوقت هتعرفى تعملى كل حاجة طالما عندك استعداد للتعلم
شيماء مصطفي 2012-02-07
إن شاء الله
MaDa 2012-02-08
انا بقول نلحق هاجر وهي متظمة في الدخول على زيدوني ونسألها قبل ما تهرب :D
نورتي الكرسي يا شيماء وهنرجعلك تاني أكيد :D
MaDa 2012-02-08
منتظمة
MaDa 2012-02-08
انا هسأل أول سؤال بس طبعا مش هقولك ال cv عشان انا حافظه :D

عايز اعرف ايه سر حبك لعلم النفس ؟؟
زغباوية 2012-02-08
اهلا بيكى ياهاجر معانا نورتي القاعدة
اما انا هاسألك عن
افضل عالم فى علم النفس بتحبي تقري كلماته
وافضل كتاب في علم النفس
وبتطبقى اللى درستيه في حياتك ولا لا
واثر عليكي علم النفس فى ايه

بس حاجة بسيطة:D
Hager 2012-02-08
بالنسبة لسؤال مادا سر حبي لعلم النفس انه اداني الفرصة اني أصلح من نفسي كتير وكمان فرصة اني أساعد الناس على تخفيف آلامهم لن أشد ألم هو ألم النفس.
MaDa 2012-02-08
جميل اوي الكلام ده :(

طيب قولي ال cv عشان اللي مش عارفينك هنا :D
شيماء مصطفي 2012-02-08
أها :( انا عاوزاكي تقولي الcv
شيماء مصطفي 2012-02-08
وأنا عوزة أعرف ايه الكورسات الي أخدتيها وفادتك ؟ وبما اني ف نفس مجالك تنصحيني بإيه ؟
Hager 2012-02-08
بالنسبة للأسئلة البسيطة خالص بتاعة زغباوية أول حاجة في علماء كتير بحب أقرألهم لأن كل واحد له وجهة نظر ورأي مختلف بس أهمهم (فرويد،كارل روجرز،مصطفى زيور،يونج،سولفان)
وطبعا مقدرش أحدد كتاب واحد بس ممكن أذكر (تفسير الأحلام لفرويد،التحليل النفسي لأوتوفنخل،علم النفس التجريبي لأحمد خيري).
بالنسبة للتطبيق فتقريبا بطبق كل اللي درسته في حياتي وده بيساعدني كتير.
وعلم النفس أثر عليا في اني بدأت أعرف نفسي أكتر أكتشف فيها حاجات جديدة وبدأت أعرف الناس أكتر أقدر أتعامل معاهم بشكل احسن وعلم النفس خلى نظرتي للحياة أكتر واقعية.
Hager 2012-02-08
بالنسبة للcv اسمي هاجر سعد سعيد السيد
السن 22سنة
تخرجت في كلية الآداب جامعة عين شمس
الدرجة العلمية ليسانس آداب تخصص علم نفس
حاليا بحضر دبلومة تربوي وان شاء الله كمان سنه هقدم على الماجستير
الباشمهندسة 2012-02-08
منورة ياهاجر ,,, هل فعلا كل الاطباء النفسيين من كتر الحالات اللي بيقروها ويقابلوها هما كمان يتاثروا ممكن يتعقدوا نفسيا يعني يتعدوا?
وهل يصح ان طبيب نفسي مريض نفسيا ان يعالج الاخرين ولا داممكن يؤثر علي تحليل وتشخيص الحالة?
يعني باب النجار مخلع :(
Hager 2012-02-08
سؤال الكورسات أنا لحد دلوقتي ما اخدتش كورسات لكن ممكن أقولك علي كورسات تفيدك فيه تدريب على اختبار بينيه الصورة الخامسه ده اختبار ذكاء مهم وهطبقي الصورة الرابعة منه في سنة التخرج إلا لو نزله الصورة الخامسة للجامعات وكمان في كورسات تخاطب للتعامل مع زوي اضطرابات الكلام وكورسات في كيفية التهعامل مع زوي الاختياجات الخاصه وفي الكلية ممكن تعرفي كورسات جديدة من الدكاتره لكن كل الكورسات دي بتساعد في الشغل لكن على مستوى الدراسة فالكتب والمراجع أهم وأفيد.
Hager 2012-02-08
ردا على الباشمهندسة الطبيب النفسي بشر وممكن يتأثر بالحالات اللي بيعالجها لكن الطبيب الماهر يقدر يتخلص من التأثير ده لكن مش لدرجة انه يتعدي إلا لو كان عندة قابلية عالية للمرض النفسي ودول قليلين طبعا لو الطبيب مريض نفسي لا يمكن يقدر يعالج المرضى وأكيد هيأثر بالسلب على الحالة لكن في حاجة كويسه اوي بيعملها كتير من الدكاتره النفسيين انهم قبل ما يبدأو عملهم كمعالجين بيخضعوا نفسهم لجلسات تحليل نفسي عند أحد الدكاترة المخضرمين ويصلح أي خلل نفسي عنده قبل البدء في العمل وكمان الاجراء ده بيتعمل كل فترة للتخلص من الآثار اللي ممكن تسيبها الحالات اللي بيعالجها.
MaDa 2012-02-08
طيب ممكن تحليل سريع كده لشخصيتك وايه العقد النفسية اللي بتعاني منها :P
loleta1 2012-02-08
طيب حيث كده ياد.هاجر مستقبلا ،ممكن تقبليني كأول زبونة مستديمة عندك وإيه عقد وسلبيات وبلاوي كتير مش هأحرمك من حاجة.
بماإنك بنوتة وحيده مع أخ فظييع زي مادا كنتي بتتعاملي إزاي مع إنّي عارفه إنّوا طيب ؟
إيه إهتماماتك ومواهبك بعيداً عن علم النفس؟
ولو كنتي مادخلتيش علم نفس كنتي تحبي تطلعي إيه؟
محمد عبد المنعم 2012-02-08
ليس سؤال
بأكرر طلبي اللي محدش حاول يساعدني فيه ... عايز إما ملخصات كتب مبادئ علم نفس أو سلسلة مقالات متظبطة خصيصا لزيدوني

سؤال خارج السياق يستحق مقالة منفصلة
أنا شايف إن كل اللي بنعاني منه في مصر سببه علة نفسية ألا وهي التفاخر سواء عن قصد أو شغل عقل باطن وسواء عن غنى (أو علم أو سلطة أو أو أو) أو عن تطلع ... ما اسم هذه العلة في علم النفس وكيف نواجه نفسنا بهذه العلة ونحاول نصلحها. والأهم إزاي نصلح من الناس اللي حوالينا اللي

سؤال داخل السياق
عايزين أمثلة لعلل نفسية كانت عندك وقدرتي تتخلصي منها
MaDa 2012-02-08
هاجر هتضربني :D:D
زغباوية 2012-02-08
وانا بضم صوتى لمحمد فى اول اقتراح وتاني اقتراح عايزين ربط الواقع بعلم النفس
سؤالى بقى واحنا بشر عاديين مادرسوش علم نفس يظبطوا نفسهم ازاى؟؟؟؟؟؟؟؟؟؟؟؟؟
وهل التنمية البشرية كافية ان تظبطنا
زغباوية 2012-02-08
ماتقلقش يامادا دا احنا ماصدقنا متخصصة تدخل معانا لاو ايه علم نفس يعنى زباينها هاتكون كتييييييييييييير :(
MaDa 2012-02-08
ههههههههههههههههههه ربنا يستر بقى :D
Hager 2012-02-08
طبعا أنا كدة ادبست رسمي بس ماشي مش مشكلة
بالنسبة لسؤال لوليتا فأنا هواياتي الرسم وكتابة القصص القصيرة والمقالات الصحفية وتحويل أي حاجة مالهاش لازمة لديكور أو لعب في البيت وكمان بحب أشتغل حاجات هاند ميد ليه أجدد بيها هدومي أو شنطي أما بالنسبة لو ما كنتش درست علم نفس كنت أحب ايه فكان نفسي أشتغل مرشدة سياحية بس كان العائق موضوع اللبس والحجاب علشان عرفت ان مفيش شركات سياحة بتشغل محجبات في الارشاد السياحي.
Hager 2012-02-08
طبعا سؤال مادا سؤال خبيث أخوية وانا عارفاه بس برده هرد اتعلمت اني ما اكشفش كل جوانب شخصيتي لأي حد مرة واحدة واني أنتظر وأشوف نوايا الغير عشان ما أسمحش لحد انه يستغل أي صفة لصالحة بشكل يأزيني ودي نصيحة اتعلمتها من دكتور ليه وجابت نتيجة وكمان كنت أحيانا بتسرع في الحكم على الناس بسبب الصور المسبقة اللي لما بلاقي الواقع مخالف ليها كنت بحكم بشكل سيئحتى لو الشخص جيد في الحقيقة واتعلمت اني اتعامل الأول مع الناس بعد كدة أحكم وكنت صلبة ولا أتقبل الاختلاف بسهولة بدأت أحاول أكون مرنة في التعامل مع الاختلافات اللي حولي .............كدة كفاية يا سي مادا ولا عندك حاجة تاني.
Hager 2012-02-08
بانسبة لطلب محمد انا أول مرة اعرفة وأوعدك اني احاول أنفذهولك وبالنسبة لموضوع العلة النفسية عند الشعب المصري ففي رأي الشخصي اللي ممكن يكون صح وممكن يكون غلط اننا عندنا أزمة حرية ان الشعب المصري ومن غير زعل مش فاهم الديموقراطية ومش قادر يفعلها رغم انه بيطالب بيهالأنه من قديم الأزل ونرجع للتاريخ احنا طول عمرنا معتمدين على الحكام في تسيير أمورناوعندما تمنح الحرية لشعب لايستطيع استغلالها تنقلب لفوضى زي اللي بيحصل دلوقتي وكمان عندا علة نفسية قادرة انها تدمر كل حاجة هي العدوان الكبوت نتيجة للقهر اللي عاش فيه العب ورضي بيه بخنوع مش بس في عصر مبارك لأ ده من عصر الفراعنه ونقدر نرجع للتاريخ
Hager 2012-02-08
سؤال زغباوية عن التنمية البشره هي فعلا بتساعد بس مش بدرجة كبيرة والموضوع مش محتاج دراسة لعلم النفس لكن محتاج مكاشفة الذات بمعنى مصارحة مع ذاتي أحاول اعرف ايه عيوبي من خلال الناس اللي هم مرايتي بس طبعا مش أي ناس الناس القريبين مني وواثقه فيهم وفي حبهم لية وأبدأ أحاول أصلح العيوب دي ودايما أدور على البدايل وماتحجرش عند نقطة معينة وكمان القراءة في بعض الكتب السهلة المعدة للقارئ العادي نقدر نكتشف حاجات في نفسنا ما كناش نعرفها ونلاقي الحلول ليها ونفذها ولو قفلت خالص مع الواحد يروح لأقرب مركز ارشاد وتوجي وفي هناك اخصائيين بيساعدوا على حل المسائل السهلة الصغيرة
زغباوية 2012-02-09
شكرا ياهاجر
التالي
هو مش سؤال ولكنه رجاء او طلب
ممكن بما انك بتكتبي قصص ومقالات وبتعملى اعمال يدوية تحطيهالنا على الموقع نفسنا ننمي الابداع فى الموقع ونشوف شغل الاعضاء
safaa 2012-02-09
يالا ياهاجر ماتبخليش علينا بمواهبك وابداعاتك
loleta1 2012-02-10
فعلا وانا مبسوطة أن سؤالي كشف المواهب دي وفعلا ياهاجر ياريت تفيدينا بأفكارك الفنية من وقت للتاني .وأتمنى اكون افدتك .احب اسألك لو جاتلك فرصة مدفوعة الأجر
للسفر تحبي تروحي فين ولومسموح تاخدي شخص واحد تاخدي مين؟
زغباوية 2012-02-11
معلش ياهاجر هاتقل عليكي بس سؤال لابد منه فى وجود متخصصة زيك
ايه الفرق بين بينكم وبين دارسى طب قسم علم نفس بمعنى اخر ايه الفرق بين الطبيب النفسي والمحلل النفسي(هل هذا مسمى صح ام خطأ)سؤالين فى سؤال
Hager 2012-02-11
سؤال لوليتا حلو أوي ولو فعلا في فرصة أسافر يبقى هروح طابا وهاخد صاحبتي الأنتيم ونقضيها رغي وفضفضة وتأمل هى تكتب شعر وأنا أرسم.
Hager 2012-02-11
زغباوية أسألتك دايما في الجول هو بس في تصحيح لمسمى المحلل النفسي هو الاسم الصح معالج نفسي psychotherapist أو اخصائي نفسي والأخصائي كعمل بيندرج تحته تخصصات في فروع مختلفة زي الاكلينيكي وده خاص بالمشكلات والأمراض النفسية وفية التربوي الخاص بالمشكلات التربوية وفي مجالات تانية كتير أما الطبيب النفسي psychiatrist فهو خريج كلية طب بشري حصل على درجات علمية في الدراسات الخاصة بالأمراض النقسيةالعقلية واتخصص في علاجها وكمان هو يقدر يوصف عقاقير علاجية للمرضى على عكس المعاج النفسي لكن المعالج النفسي بيكون خرج آداب زي حلاتي وممكن يكون حاصل عل الماجستير والدكتوراه أو لا لكن المهم انه يكون مؤهل لمزاولة المهنة وطبعا شغل المعالج النفسي بيكون أعمق من الطبيب وده والله مش تحيز ده واقع أنا شفته والمعالج بيكون أعمق وبيتوغل في نفس المريض بشكل أكبر لكن الطبيب اعنماده الأكبر على الأدوية
زغباوية 2012-02-12
شكرا هاجر بس احجزيلي معاكي مكان في الرحلة وهاقعد ساكتة:(
Hager 2012-02-13
يا سلام بس كده تنوريوتبقى دي الأجازة اللي اتفقنا عليها
زغباوية 2012-02-13
:(
MaDa 2012-02-13
يا ترى مين الضحية ال 18 :D
loleta1 2012-02-14
,انا بأقترح (ليدي رشا رضا أوshmais )لأنهم متواجدين دايما والأمر متروك ليكي ياهاجر.
mora 2012-02-15
معلش يا هاجر بعتزر عن عدم مشاركتى لكى بأى سؤال ان شاء الله تتعوض
MaDa 2012-02-15
مش هزعلك يا لولي .. يلا الدور على رشا رضا :D
MaDa 2012-02-15
يلا ورونا الأسئلة اللي في الجول :D
safaa 2012-02-15
يالا يارشا جمدى قلبك وقولى على ال c v ...دا جميل جدا الكرسى:(
الباشمهندسة 2012-02-15
ايه سر اختيارك للياباني بالذات في دراستك ورائيك ايه فيه تنصحي بدراسته ولا بلاش تعقيدات ???
أم العيال 2012-02-16
أزيكو أزيكو أيكو ماليش أي سؤال أنا بس قلت أصبح عالناس الحلوةبس
علي فكرة ياباشمهندسة رشا صيني مش يابانيعلي ما أتذكر
الباشمهندسة 2012-02-16
معلش معلش ... اخذت بالي بعد ما كتبت التعليق وقلت اسبها هي تصحح المعلومة :D
زغباوية 2012-02-16
ممكن انتهز فرصة اللخبطة اللى حصلت دى واسأل ايه الفرق بين الصينى واليابانى مع انى معرفش اى لغة فيهم:D
Lady Rasha Reda 2012-02-16
السلام عليكم و رحمته الله و بركاته على الموجودين و الناس كلها
Lady Rasha Reda 2012-02-16
أبدا بــ السيره الذاتيه!!

الاسم: رشا رضا حسين عبد المنعم
30سنه زوجه و أم لطفلين (عبدالله أحمد على و ياسين أحمد على)،،
مترجم حر صينى عربى إنجليزى

درست بكليه الالسن جامعه عين شمس ، و كورسات عديده و متنوعه فى مجال الترجمه و البحث و الادب المقارن،

و درست بصوره حره الهندسه الوراثيه،والعديد من المجالات الثقافيه الحره،،،،،،

أمتهنت الترجمه الحره منذ عام 2002،، مما أتاح لى الفرصه للتعرف على العديد من مجالات الحياه، و منها الرخام و السياحه و الافلام الوثائقيه و الصناعه و التجاره و الاستيراد و التصدير و التكيفات و الدراجات الناريه، ة غيرها،،،،،،،،،،،

عشت الحياه الكشفيه حتى عام 2003، و أعتزلتها بعد قياده عشيره كليه الالسن سنتين و نصف، وحصلت على العديد من الكورسات الكشفيه ، و نلت العديد من الجوائز المتنوعه!!

هواياتى : القرأه فى مختلف نواحى الحياة،
الكروشيه (خبره 15 سنه من العمل المتواصل)، الرسم على الزجاج و الحرير ، الاعمال اليدويه بوجه عام ، الشطرنج ، و البحث عن المعلومات المفيده على الشبكه العنكبوتيه،

مش عايزه أطول عليكوا ،ده كده مختصر من
Lady Rasha Reda 2012-02-16
أه نسيت " الموسيقى ، انا عازفه عود ، و أحب ألعب على القانون و الايقاع
Lady Rasha Reda 2012-02-16
ليه أخترت الصينى :

هو أخترنى،،

فى الاول انا أخترت ألسن بعد صيدله ، و الحمد لله أن أختار لى الله الالسن، عشقتها، لم أكن عمرى ممن يحفظون ، و لكن فهمت فى اللغه و الترجمه ، مش هاتصدقونى لو قلت لكم أنا أفهم اللغه و حتى الكلمات و المرادفت ، فن

ثم أخترت الاستمرار باللغه الصينيه، علشان هى أغلى ترجمهالورقه الانجليزى 3 جنيه ، الصينى 70جنيه ، و زى ما حسيتوا أحب التحديات

يعنى مثلا كليه التربيه و الاداب و الاسن و أى مركز تانى ممكن بكل سهوله يدرس اللغات الاوربيه،كام خريج إنجليزى كل سنه فى مصر ، متعدوش ، و لكن كام خريج صينى ،، أد 500 نصفهم و أكتر بيتجوز و يقعد فى البيت ، هايفضل كام ،

بس كده
Lady Rasha Reda 2012-02-16
الصينى و اليابانى و الكورى و غيرها من لغات شرق أسيا هى لغات رمزيه و منغمه و معربه، لغات ذات حضاره ،

إنما معظم اللغات الاوربيه ، مأخوذه من اللغه الاتينيه
Lady Rasha Reda 2012-02-16
كيف تفرقى بينهما ، بس لو أنتى عارفه أى لغه فيهم هاتعرفى تفرقى ،

يعنى لو جبيت أغنيه أسبانى مثلا و أخرى ألمانى ، كيف تفرقى بينهم ، لو أنتى سمعتى أو قرأتى قبل كده حاجه منهم و لو حتى بالويم يعنى ،
Lady Rasha Reda 2012-02-16
تمام كده أى خدمه هأشوف العيال و الواجب لغايه لما حد يسأل ، و لا كده خلاص ؟؟؟؟؟!!!!!!!!!!!!
Lady Rasha Reda 2012-02-16
أرشح من بعدى حسام أحب أتعرف عليه
زغباوية 2012-02-16
لسة بدري ياشابة
السؤال التاني:درست بصوره حره الهندسه الوراثيه درستيها ليه؟؟؟؟ وفين؟؟؟؟

وطلب مش سؤال بما ان ليكي فى الاشغال اليدوية مش بتحطي لنا اعمالك ليه على الموقع

وكدا انا بعرفك لاول مرة

السؤال الثالث استفدتى ايه من الحياة الكشفية وبدائها للولاد من سن كام؟؟؟
عبد المنعم 2012-02-16
ما ردتيش على سؤال زغبويه يا رشا .. وانا كمان عايز اعرف انهى لغة فيهم بتتكتب راسى وانهى افقى ؟
user305 2012-02-17
انا احمد من القاهرة اتمنا ان اعرفكم وهذا موق
http://www.zorpia.com/sweetaly533/comments/comment_id=72012239#c72012239
ع
user305 2012-02-17
موقعى
user305 2012-02-17
محمد عبد المنعم 2012-02-17
يا user305 الروابط من النوعية مبتشتغلش لأنها رابط داخلي بالنسبة ليك
loleta1 2012-02-20
منورة ياليدي رشا.بماإنك ليكي في الصيني يبقى أكيد حصلت معاكي مواقف كتيرة إيه اكتر موقف مضحك؟وكمان درستي الهندسة الوراثية بصفة عامة ولاّتخصصتي في جزئية معينة لو حصل هي أيه وأستفدتي منها في حياتك بأيه؟عجبني جدا إنك ليكي في الفنون الرسم والموسيقى ياريت تضيفي أعمالك على زيدوني وكمان مين عرفك بزيدوني وأكتر حاجة شدتك في الموقع وهل إستفدتي في من زيدوني في الفن والموسيقى؟وهل من الممكن ناخد منك ولو نبذة عامة عن اللغة الصينية في زيدوني؟
safaa 2012-02-20
سؤالك جميل يالولو
loleta1 2012-02-20
ميرسي ياصفصف:-(
safaa 2012-05-28
يالا يالولو الزغبى اقعدى على الكرسى وقولى لنا
1- أكلتك المفضلة ايه؟
2- أحلى حاجة بتحبى تعمليها وانتى فى البيت ؟
3- ايه الحلم اللى تتمنيه فى حياتك ونفسك يكون حقيقة؟
لولو الزغبى 2012-05-28
اكلاتى المفضله :
- محشى ورق العنب
- البيتزا
- البطاطس فى اى حاجه
احلى حاجه بحب اعملها و انا فى البيت :
- اكتب
- اشتغل شغل يدوى ( عقود بالخرز - مفارش كروشيه )
- انى اقعد ع النت
الحلم اللى بتمناه :
- انى اتفوق فى رياضتى المفضله و اكون فى فريق
- اتمنى اكون دكتورة
- اتمنى يكون ليا دور فعال فى الحياه السياسيه فى بلدى و افيد بلدى
زغباوية 2012-05-28
ربنا يوفقك يالولو وتحققي اللى نفسك فيه
لا ده انتى عايزة روقان علشان افكرلك في كام سؤال حلو كدا
الباشمهندسة 2012-05-28
لأ بقي ... ده كلام كبير ولازم البداية تبقي مظبوطة ونعرف سنك ومؤهلك الدراسي وايه هي الرياضة بتعاتك .... وكدا cv مختصر
مها شاهين 2012-05-28
يارب يانور عيني يحقق لكي كل امنياتك ويحفظك يارب
safaa 2012-05-28
ربنا يبارك لكى فيها وتشوفيها عروسة وتشيلى احفادك يارب
loleta1 2012-05-29
بالظبط يالولو إبدئ بالcv
لولو الزغبى 2012-05-29
ماشى cv مختصر
اسمى الاء
سنى 14 سنه
داخله 3 اعدادى
رياضتى المفضله هى كره الطايرة و اتمنى احقق فيها انجاز

loleta1 2012-05-29
أولاً إنتي هايله مدتلكيش السن دي خالص توقعت إنك أكبر عشان عاقله قوي وربنا معاكي وكويس إنك من محبي الرياضه والأعمال اليدويه ,ودلوقتي أسألك عرفتي الموقع منين؟وأيه أكتر حاجة شدتك ليه ؟وأول موضوع فيه لفت إنتباهك ؟وأيه ممكن تفيدينا فيه في مجال الرياضه؟
لولو الزغبى 2012-05-29
بجد شكرا اوى لحضرتك :(
-تمام انا عرفت الموقع من مامتى هى مسجله فى من زماان بس انا سجلت فيه من شهر او اقل تقريبا بس
-اكتر حاجه شدتنى ليه الحوار و النقاش و روح الاسرة اللى فيه و طبعا الحوار و النقاش فى السياسه لانى سياسيه جدا
-صراحه اول موضوع لفت انتباهى فيه مش فكره اوى بس افتكر انها كانت حاجه سياسيه
-معلوماتى فى مجال الرياضه تتلخص يعنى فى كره الطايره طبعا قواننها و كل حاجه فيها و كره القدم شويه بس ممكن افدكوا مثلا فى اى معلومات صحيه للرياضيين على حد معلوماتى :(
loleta1 2012-05-30
حلو طبعاً أي معلومات بتفيد الجميع ،وتحياتي لماما الزيدونجيه الأساس اللي طالع منه الفرع ده ،وحاجه حلوه قوي إنك سياسيه من بدري كده تقريباً في ناس كتير زي سيادتي لسه متعرفين على السياسه قريب ،سؤالي بقه بما إنك داخله على شهاده بتقسمي وقتك إزاي بين الدراسه والترفيه؟وبما إننا في اوقات التغيير إيه اكتر حاجه نفسك تتغير في التعليم؟واخبارك إيه مع الرسم؟والأجازة بتقضيها إزاي؟
safaa 2012-05-30
بصراحة يالوليتا هى الاسرة جميلة كلها ولو دخلت تكتب فى زيدونى هتعمل شغل عالى جدا ..بس الاول ندعى كلنا ان ربنا يوفق اخوها محمد هو فى الثانوية العامة ويارب يجيب مجموع عالى ويكون زى والدة يارب
زغباوية 2012-05-30
مع لوليتا فى سؤالها بتنظمى وقتك ازاى؟
بتحبي تقري ايه ولمين؟؟؟؟وبتكتبي ايه؟؟؟؟
ونفسك ايه لمصر؟؟؟؟
لولو الزغبى 2012-05-30
- بقسم وقتى ازاى فى الدراسه ايام التمرين بتاعى بتبقى 3 ايام انا بروح منهم يومين بس يوم منهم بيبقى الجمعه و طبعا من قبل الدراسه ببقى قاريه و لو بعض الدروس فى اى ماده بحس انى ادخل المدرسه ابقى مجمعه اى حاجه كده و طبعا بذاكر كل حاجه مع المدرسه اول باول و قبل امتحانات نص السنه او اخر السنه بعمل جدول اقسم فيه مذكرتى طول المده قبل الامتحانات بحوالى 3 اسابيع و بذاكر بقى على حسب الجدول دا و ربنا بيوفق الحمد لله
- اخبارى مع الرسم مش كويسه خااالص انا مبعرفش ارسم انا فى التعبير الفنى اللى هو اشخاص بقى و كده لالا مليش فيه بس تصميمات ابتكاريه تمام جدا و الحمد لله مش همتحن رسم تانى :( :(
- الاجازة بقضيها بروح التمرين و هاخد كورس انجليزى ان شاء الله و انا متطوعه مع جمعيه خيريه و بشتغل معاها
لولو الزغبى 2012-05-30
- اكتر حاجه نفسى تتغير فى التعليم اول حاجه طبعا نفسى يغيروا المناهج و يعدلوا فيها كتير لان فعلا المناهج صعبه اوى و كلها حشو و حاجات مش مفيده اوى و نفسى المنظومه كلها تتغير نفسى مفهوم المدرسه عند الطلاب يتغير كل اما حد يتسأل عن مدرستوا بيبقى خلاص هاين عليه يشتم فيها و دا غلط احنا بنطلع من الامتحانات ناسين درسنا ايه بنحفظ و ندخل نسمع و نطلع انما مبنستفدش حاجه فى حياتنا العمليه اه طبعا معلومات مهمه بندرسها بس برضو حشو فى المناهج بطريقه مش ممكنه نفسى كمان منظومه الثناويه العامه دى تتغير كلها الطلاب لازم يحبوا يحضروا فى المدرسه و المدرسين ياخدوا مرتب يريحهم ميطروش يدوا دروس خصوصيه و بالمناسبه انا من اشد محاربى الدروس الخصوصيه بس للاسف الناس بتلجأ ليها علشان مافيش شرح عدل فى المدارس المدرسين نفسهم بيبقوا داخلين الفصول عاوزين يرموا فى وش العيال الكلمتين بتوع الدرس و يخرجوا لازم نحس اننا بنستمتع و احنا فى المدرسه علشان نحبها كمان عاوزة اغير موضوع المدارس الحكوميه اللى الشرح و المعامله فيها زفت اوى لازم المدارس دى تتغير لازم الطلاب يحبوا المدارس لان الاب و الام فى اى اسرة اكيد بيبقوا عاوزين ولادهم يتعلموا كويس و بيفضلوا يفكروا احنا عاوزين فلوس علشان مدرسه خاصه و دروس و كتب و لبس المدرسه بيبقى فعلا تعب على اى اسرة انما لو التعليم كويس فى المدارس الحكوميه هيبقى مافيش مشكله او هتقل المشكله و العبء ع الاسرة شويه كمان الانشطه فى المدرسه تتحسن شويه كتير الانشطه تقريبا ممكن نديها مقبول مافيش صرف كويس ع الانشطه كمان الجداول جداول الحصص دى مشكله كبيرة جدا احنا بناخد ساعه ونص رياضيات مثلا بعدهم ساعه ونص عربى و الساعه و نص دول بيبقوا حصتيين بعدهم e بعدهم علوم كل دا مابيراعاش فيه قدره الطالب على استيعاب المعلومه كويس بنبقى قاعدين بنعد الدقايق و الثوانى علشان نخلص من اليوم و نروح البيت لازم حصص الانشطه تزيد شويه علشان نعرف نفصل بين الماده و الماده اخر حاجه بقى تعامل التلميذ مع الطالب للاسف المعامله بتبقى اكترها خوف انا بحترمها علشان الدرجات بحترمها علشان متزعقليش و دا غلط انا لازم احب المدرس او المدرسه بتوعى و من منطلق حبى ليهم هحترمهم انما مش احترمهم خوفا منهم
دا رأيي فى التعليم و اسفه ع التطويل
لولو الزغبى 2012-05-30
- بحب اقرأ روايات كتب تنميه بشريه قصص قصيره نثر
- لمين انا قرأت ليوسف السباعى و اللى بحب قصصه جدا و قرأت لاحسان عبد القدوس و بحد اوى اسلوب مصطفى لطفى المنفلوطى فى الكتابه و قرأت بعض الروايات بس مش لمصريين هى مترجمه للعربى
- بحب اكتب ايه يعنى بكتب ساعات شعر بس على قدى كده و بكتب زى خواطر كده و اخيرا بكتب فى السياسه
- نفسى ايه لمصر نفسى حاجات كتير اوى نفسى مصر ترجع تانى رائده بجد فى كل حاجه نفسى يرجع تانى الجامع الازهر مناره العلم فى العالم كله نفسى علماء مصر يعملوا ابحاثهم و اكتشافتهم هنا مش فى اى بلد تانيه نفسى نحب بلدنا اوى و نخاف عليها و نعليها نفسى يكون فى مشاريع كتير اوى فى البلد يشارك فيها كل مصرى صغير او كبير نفسى نهتم بالصناعه اوى و ترجع منتجتنا تنافس فى الاسواق العالميه و نهتم بالزراعه كمان و منتجاتنا الزراعيه ترجع تنافس برضو فى الاسواق العالميه نفسى اشوف مصر فى يوم من الايام بتقود العالم كله نفسى تنتهى التدخلات الامريكيه و الاوروبيه فى شؤنا الداخليه و طبعا نفسى نحسن علاقتنا بالدول العربيه اللى تقريبا نهاها مبارك و اكتر حاجه نفسى فيها هى اننا نرجع كرامة المصرى تانى فى بلده قبل ما نرجعها بره بلده كرامته و احترامه لنفسه قبل احترامه لغيرة و نرجع كرامة المصريين بره فى اى حته فيها مصريين بيشتغلوا فيها يتعاملوا معامله كويسه و كريمه نفسى نقضى ع العشوائيات و نبنيها مناطق صالحه للاستخدام الادمى نفسى نقضى ع البطاله فى مصر نفسى نشارك كلنا فى القضاء على الفقر و الجهل و الاميه نفسى مصر ترجع مصر
الباشمهندسة 2012-05-31
لأ دا انتي ماشاء الله شديدة قوي لازم الواحد بقي يفكر بتمعن قبل ما يسالك .... استني علي الكرسي حبة اروح ارتبلك سؤالين واجي :(
زغباوية 2012-05-31
بسم الله ماشاء الله ....ربنا يوفقك يالولو.
ايه اللى عجبك فى الجمعية الخيرية علشان تطوعي فيها وايه اللى شايفاه ناقص لهم ؟؟؟؟
لولو الزغبى 2012-05-31
انا اصلا بحب اوى اشارك فى الاطعام مثلا او فى اى نشاط خيرى يساعد الناس فلقيت ان اشتراكى فى جمعيه خيريه بتشارك فى مجالات كتير و ليها انشطه كتير هيوفرلى اللى انا عاوزاه فاشتركت فى الجمعيه و الحمد لله شغاله معاهم كويس
اللى شايفاه ناقص للجمعيه لا يعنى الحمد لله فى ناس بتتطوع فى الجمعيه و ناس بتتبرع كتير و ناس الحمد لله بتبقى متعاونه معانا و مؤمنه بينا لحد كبير اوى بس اكيد طبعا عاوزين تعاون اكتر و تعاطف اكتر
زغباوية 2012-05-31
:( حيرتينى يالولو مش عارفة اسالك ايه تاني:(
بدعي بس ان الزغباوية الصغار يطلعوا زى الزغباوية الكبار وربنا يوفقكم ويهديكم ويصلح لكم الحال
لولو الزغبى 2012-05-31
ربنا يخليكى يا طنط شكرا :(
الباشمهندسة 2012-06-01
ايه رايك في شباب وشبات جيلكم الحالي وتصرفاتهم ايه اللي بيضايقك او يعجبك منها وكمان ايه رايك في ازواق اللبس اللي في السوق حاليا
لولو الزغبى 2012-06-01
رأيي فى شباب و شبات جيلى الحالى
هو طبعا الانفتاح و عصر التكنولوجيا و النت و الفيس بوك اللى موجودين دلوقتى مهواش وحش بس يمكن بيدى فرصه للناس انها تعرف بعض و تكلم بعض و بالتأكيد فى ناس من جيلى بيستخدموا دا غلط جداا او بيفهوا عدم الرقابه و الانفتاح دا بشكل خاطأ جدا و بيرتكبوا اخطاء بالتأكيد و يمكن جيلى الحالى دماغه مش مفيده شويه او مش عارفين يوظفوا دماغهم كويس يعنى بكل صراحه ساعات بحس ان فى شباب و شبات من جيلى دماغهم فاضيه مش مهتمين بحاجه خالص دماغهم فى الخروج و السهر و النت و برامج المسابقات و مسلسل فاطمه اللى هبل البنات دا يعنى جيل مالى دماغه بحاجات فاضيه بس انا برضو بأكد ان الجيل دا لو اتوظف كويس هينتج حاجه و اللى بيضايقنى طبعا الانفتاح اللى بدون روابط و فهم الحريه الخاطىء و الاستخدام الخاطىء برضو ليها
لولو الزغبى 2012-06-01
رأيي فى ازواق اللبس
و الله هو فى لبس محترم وشيك و حلو و برضو فى لبس مش محترم فى السوق موجود الاتنين الفكره بقى فى الاختيار انتى تختارى لبس شكله عامل ازاى محترم او لا و دا من وجهه نظرى بيرجع للتربيه و قناعه الشخص بنفسه يعنى انا مقتنعه باللى باشتريه ولا لا شايفه ان اللبس دا مناسب لتربيتى و مجتمعى و دينى ولا لا و اكيد بعمل حساب دا و انا بختار و فى ناس مبتعملش حساب لحاجه و بتلبس اللى عاجبها و خلاص حتى دون ان تنظر لقواعد مجتمعها
safaa 2013-02-20
السلام عليكم
يالا قولنا على ال cv بتاعتك وايه حلمك اللى عاوز تحققة
Ahmed Hussien 2013-02-20
احمد حسين.. مهندس كهرباء شعبة الكترونيات صناعية و تحكم اتخرجت عام 2012، و ان شاء الله داخل الجيش قريب :(
نفسي بعد فترة الجيش اكمل في مجال الميكاترونك، و بحلم اني اسافر المانيا
safaa 2013-02-20
اهلا بك معانا ياباشمهندس وان شاء الله ربنا يحقق لك امالك
safaa 2013-02-21
ايه رأيك فى موقع زيدونى وفى المواضيع التى يكتبهاالاعضاء
Ahmed Hussien 2013-02-21
شكرا لحضرتك ربنا يخليكي و انا سعيد اني موجود معاكم :(

موقع زيدوني موقع مفيد جدا و عمل رائع من البشمهندس محمد ويستحق الإحترام،و إن شاء الله الموقع من تقدم إلى تقدم.. و معظم المواضيع و المشاركات باستفيد منهابصورة مباشرة او غير مباشرة لأنها بتخليني أبحث عن المعلومة.. و هكذا تنتشر المعرفة
safaa 2013-02-21
:( هو فعلا موقع مفيد ورائع طول مافي شباب مخلصة ومحترمة وبتحب تنشر كل ماهو مفيد للاخرين وطبعا انت منهم
Ahmed Hussien 2013-02-21
شكرا جدا لحضرتك، وسعيد جدا بالكلام ده :( و بصراحة كل الأعضاء في الموقع ناس محترمة جدا و مشجعين ايجابين جدا
safaa 2013-02-21
أشكرك وانا بس بسخن لحد الشباب ماتدخل الموقع ويشتركوا فى الاسئلة
Ahmed Hussien 2013-02-21
ان شاء الله منتظر كل الأسئلة
safaa 2013-02-21
باذن الله
شيماء مصطفي 2013-02-21
ايه هي هواياتك المفضلة ؟
Ahmed Hussien 2013-02-21
بحب دخول المطبخ جدا.. غريبة ؟! :D
زغباوية 2013-02-21
ههههههههههه جميل بتحب تدخل وتخرج على طول ولا بتحب تطبخ ايه؟؟؟؟
ولماذا المانيا بالذات؟؟؟
Ahmed Hussien 2013-02-21
بتطبخ على قدي :D اكتر حاجة باعرف اعملها الإسباجتي باللحمة المفرومة و صلصلة الطماطم
Ahmed Hussien 2013-02-21
المانيا متقدمة جدا في مجال الـAutomation والـmechatronics و مجالات تانيه كتير.. و إن شاء الله انا عاوز اكمل في المجال ده
زغباوية 2013-02-21
كويس لما نفتح مطعم زيدوني اكيد هانستعين بيك :D
ربنا يوفقك ويحقق لك احلامك واكثر
زغباوية 2013-02-21
بتحب تقرا؟؟؟ وايه؟؟؟ ولماذا؟
Ahmed Hussien 2013-02-22
نعم بحب القراءة.. مش حاجة محددة بس بحب كتب التاريخ، علشان بشوف الانسان كان فين و بقى فين و كمان الروايات ممتعة برضو
MaDa 2013-02-22
السلام عليكم :( هنسخن بسؤالين ع الماشي كده :D
1 - متجوز ولا لسه - الحمد لله - على البر :D وهل بتفكر في الموضوع ده دلوقتي ولا شغلك ومستقبلك واخدين كل تفكيرك ؟

2 - بأمانة شديدة هل لديك أي حماس للعمل داخل مصر في مجالك لو سنحت ليك الفرصة وترفض أي إغراءات برة مصر ولا مش هتتنازل عن السفر ؟
Ahmed Hussien 2013-02-22
1- لا يا Mada مش متجوز - الحمد لله :D- لسه على البر، بس على فكرة الجواز مش بيعطلك عن مستقبلك.. و فعلا الفترة دي انا بخطط للمستقبل و خصوصا اني داخل الجيش :D

2- انا كنت اقصد بالسفر اني ادرس و احصل على شهادة في تخصصي، انما ان مش هشتغل بره مصر و ده قرار نهائي بالنسبة لي و على فكرة الشغل في مصر في بعض الشركات الكبيرة بيتيح لك الفرصة انك تسافر خارج و مصر و ترجع تاني
أحمد سمير 2013-02-22
سؤال للباشمهندس أحمد
إيه هى نقطه ضعفك؟ فلوس؟ ستات؟ منصب؟ عربيات؟ علم؟
أو أى حاجه تانيه انت شايف إنك ضعيف قدامها
Ahmed Hussien 2013-02-22
نقطة ضعفي الانترنت.. بقعد قدامه بالساعات و بحاول كل شوية اقوم من قدام الكمبيوتر بس برجع تاني بسرعة :D
safaa 2013-02-22
:( وعلشان النقطة دى بالذات أقرأ المقالة دى : إرشادات لمدمني الكومبيوتر
Ahmed Hussien 2013-02-23
شكـــــــراً :(
شيماء مصطفي 2013-02-23
شايف نفسك إزاي ؟يعني ايه اللي بتحبه ف نفسك ؟وايه اللي نفسك تغيره فيها ؟
Ahmed Hussien 2013-02-23
انا بحب اني باستمرار بفضل الاعتماد على نفسي في اي موقف،، اما اللى نفسي اغيره هو العصبية علشان بتخليني افقد التركيز
زغباوية 2013-02-23
لو توصلت لعلاج العصبية قولي:)
Ahmed Hussien 2013-02-23
ان شاء الله :D
شيماء مصطفي 2013-02-23
Ahmed Hussien 2013-02-23
شكـــــــــرا جدا يا شيماء :(
زغباوية 2013-02-24
شكرا ياشيماء
safaa 2013-02-24
تحب مين يقعد مكانك على الكرسى ياباشمهندس ..يالا اختار ولو ان اغلب الاعضاء مش بيدخلوا كتير من اللى بيحصل فى البلد اليومين دول :)
شيماء مصطفي 2013-02-24
عــفــواً.
زغباوية 2013-02-24
قبل ماتقوم من على الكرسي:
- لو لم تكن مهندسا ماذا كنت تحب ان تكون !!ولماذا! ولو انى اعرف ان الهندسة بالذات لابد وان تكون حاببها وما ينفعش تدخل غيرها

- لو لم تكن مصريا لوددت ان تكون .......(اكمل)

- ايه رايك فى اللى بيحصل فى مصر اليومين دول وايه الحل!!!

- ايه السؤال اللى كنت متوقع ان نا نسأله ولم نسأله
mora 2013-02-25
عن نفسى هغير النمط واقولك ربنا يوفقك فى حياتك وتحقق كل اللى نفسك فيه ان شاء الله
Ahmed Hussien 2013-03-02
اولا اسف على التأخير في الرد.. غصب عني كنت مسافر، فارجو المعذرة :(

@safaa: يعني مفيش حد معين.. بس اخر تعليق كان من mora فيبقى مبروك عليه القعدة على الكرسي :D

@زغباوية:
-هو فعلا انا من اللى اخترت مجال الهندسة بإرادة تامة،،، بس سعات بتخيل نفسي شيف لأني بحب احضر الأكل جدا :D

-لو لم أكن مصريا لوددت أن أكون مصـــريا :(

-باختصار.. عقلية ادارة البلد لم تتغير، و الحل التوافق + عدالة انتقالية + تخطيط سليم(تحت سليم 100 خط).

-مفيش الصراحة مكنتش متوقع اي اسئلة

@mora: شكرا ليك و انا ايضا اتمنالك كل الخير
zedony.com - A mmonem.com production. عن زيدوني - Privacy Policy