العيش البلدي

6
أنا هاسأل سؤال بس بشرط.... مافيناش من تريقه.

أنا نفسي جداً جداً فى عيش بلدي، ممكن حد يقولي مكوناته وطريقه عمله؟ نفسي يطلع زي الي كنت بشتريه من الفرن في مصر.

 

إضافة 2011-07-18
Albert
1384
غير محدد

التعليقات

الاستاذة 2011-07-18
+1
safaa 2011-07-18
لية بتقول كدة دا احلى عيش هو العيش البلدى وخصوصا مع الملوخية بس ياترى فية عندكم ملوخية خضراء ولا لا +1
safaa 2011-07-18
احلى شيء انك لما تنزل مصر تجيب اسرتك وتيجيى عندنا وتقضوا معانا يوم وانا هعلملك مراتك ازاى تعمل العيش خطوة خطوة
زغباوية 2011-07-18
انا شوفت شيف في التليفزيون وهو بيعمله وهاحاول اجيبلك الطريقة
Albert 2011-07-18
شكراً يا تانت ورينا يخليكي. أنا لما انزل مصر ان شاء الله لازم هاجيب مراتي وبناتي ونيجي نزوركوا، مش علشان العيش، بس علشان نستمتع بأعدتكم الحلوة. إحنا عندنا ملوخية مجمدة مش طازة، بس رانيا مراتي بتعملها حلوة أوي، ناقصها العيش البلدي زي ماقلتي.
أنا مستني يا زغباوية ...

الإجابات

3
بص انا مش عارفة المقادير بس فاكرة ماما كانت بتعمل ايه كانت يا سيدي بتحط دقيق اسمر اللي فيه ردة على دقيق ابيض على ذرة ملح على خميرة بيرة وتعجنهم بالماية كويس جدا وبعدين تعمل العيش بالشكل الدائري وتدفيه كويس في مكان دافي وتسيبه لغاية ما يغمر خالص وبعد كده كانت تسويه ساعات في الفرن وساعات على عين البوتاجاز---------
اصل احنا كنا زي حالاتك متغربين بس بأمانة ماما ربنا يديها الصحة ماكنتش بتعرف حاجة اسمها مستحيل فاكانت معيشانا كأننا في مصر بنسبة كبيرة،وعلى العموم هاتأكد من المقادير والوصفة واكتبهالكم
إضافة 2011-07-18

التعليقات

زغباوية 2011-07-18
+1
Albert 2011-07-18
شكراً يا استاذة، وانا مستني المقادير، وكمان إيه درجة حرارة الفرن؟ علشان أنا جربت طريقه من على النت، بس طبقة العيش الي من فوق طلعت سميكة جداً ( ده طبعاً غير ان الطعم كان مختلف كمان). فمعلش اتعبي معايا واكتبيلي كل حاجة بالتفصيل، وشكراً مقدماً.
3
الطريقة فى فرن الخبيز
المقادير:
2كيلو دقيق
معلقتين خميرة بيرة
ذرة ملح
معلقة صغيرة سكر
ميه دافية

الطريقة:
دوبى الخميرة والسكر فى شوية مية صغيرين
حطى الدقيق فى حلة او طبق بلاستيك وعليه الملح و شوية ميه دافية وتتزود بالتدريج لحد ماتتكون عجينة لينة نوعاما
ضيفى عليه الخميرة

وغطيه فى مكان دافى لمدة ساعة لو فى الصيف وساعتين لو فى الشتا
ودى مرحلة التخمير

وبعدين تقطعيه على ردة ناعمة ولو مش حابة يبقى دقيق
وتسيبيه تانى يرفع نص ساعة

وبعدين هنحطه على المطرحة وتحته ردة ودا شكلها



وتفرديه وبعدين نحطه فى الفرن

اما اللى فى فرن البوتاجاز فده هنقلل له الميه شوية زى عجينة الفطير
وهنقطعه برضه على ردة ونسيبه ير فع نص ساعة

ونولع الفرن والشواية مع بعض لانه بيحتاج نار عالية
ممكن تفتحى الفرن بس وبعدين تطلعيه تحت الشواية بس ده هياخد وقت
او يستوى من تحت وتقلبيه على وشه يتحمر



على فكرة المقادير دى بتعمل حوالى 26 رغيف متوسط الحجم
منقـــــــــــول
إضافة 2011-07-21

التعليقات

Albert 2011-07-21
شكراً جداً جداً يا زغباوية، هجربه في اسرع وقت وأعرفك النتيجة.
محمد عبد المنعم 2011-07-21
أنا أفرجت عن الصور خلاص
زغباوية 2011-07-21
mnem:شكرا واسفة جدا انها من موقع اخر بس لغاية ماتظبط لنا الصور
البرت: هاحاول ان شاء الله اجيب لك طريقة اخرى
Albert 2011-07-23
زغباوية: أنا جربت العيش امبارح ... ألطريقه شكلها صح، بس بيتهيقلي المشكله في الدقيق. أنا استعملت ٧٥٪ دقيق اسمر و ٢٥٪ دقيق ابيض. الدقيق الأسمر شكله مختلف عن الدقيق المصري. على العموم أنا هاشتري دقيق نوع تاني وهاعرفك النتيجة. 
زغباوية 2011-07-29
الدقيق الاسمر على فكرة هو الردة واعتقد ان نسبةالاسمر كدا كتيرة اوى كدا بتهيألى العجينة طريت اوى صح ولا ايه؟؟؟اعتقد اعكسها يعنى خلى الاسمر هو 25% والابيض 75%
زغباوية 2011-07-29
ولو باظت ماتحطش دقيق اسمر خالص يادوب بس ترشه من فوق ومن تحت فقط على العيش اللى لسة هايدخل الفرن

ومعلش الحياة تجارب :-(
Albert 2011-07-29
أصل الدقيق الأسمر الي هنا مخلوط عليه نسبه كبيره من الدقيق الأبيض، بس بيتهيألي عندك حق، هاغير النسبه زي ماقولتي وأعرفك. هو طلع زي عيس السن وده بيتهيألى معناه زي ماقولتي ان الدقيق الأسمر كتير. 
زغباوية 2011-07-29
ربنا يستر هههههههه
zedony.com - A mmonem.com production. عن زيدوني - Privacy Policy