احــــــــــــــــدث الطرق الحديثة في التربية (الورقة المضادة 2×1)

7


مقدمة بسيطة :
انا عاملة للولاد ورقة كاتبة فيها كل الواجبات اليومية المفروض يقوموا بيها وكمان الافعال اللى عايزاهم ينتظموا فيها وعايزة اعودهم عليها....الورقة دى على هيئة جدول اسبوعى مثال:

-غسل الوجهه
-الصلاة
-السرير
-سماع الكلام
-معاملة الاخوات
-التنظيف
-وهكذا

وبعلم على هذه الواجبات صح او غلط حسب الفعل وكل اسبوع فيه هدية لاكتر واحد عمل صح واقل واحد عنده غلط ولسة عاملين هدية يومية للى ماعندوش ولا غلطة في اليوم علشان احمسهم اكتر لعمل الصح

طبعا الولاد متغاظين جدا فقرروا انهم يعلموا عليا انا كمان ويعملوا ورقة ليا فيها كل اللى عايزينه مني مثال:

-الضرب
-الزعيق
-والاهم بقى دخول الموقع لو دخلت عليه هايعلموا غلط :)

وطبعا الفكرة عجبتنى جدا علشان اقلل صوتى العالى على طول والخناق معاهم طول النهار وكمان اقرب منهم اكتر

وقولت كمان اضيف كام حاجة كدا عايزة اعملها واستمر معاهم فيها زى اللعب معاهم - تعليمهم اى مهارة (رسم - ابتكارات ......)
وكمان باعلمهم الثقة بنفسهم وافرغ الكبت اللى عندهم منى وانهم يقدروا يعبروا عن رايهم
يعنى باختصار 2×1 علشان بكدا اقدر اعودهم على السلوكيات المظبوطة وفي نفس الوقت اعود نفسي على الهدوء وتقليل الحدة والانفعال الدائم

وكل يوم بالليل نشوف مين فينا عنده غلط اكتر بس لسة لغاية دلوقتى مش عارفة هايعقبوني او يكافئونى ازاى :(

عايزة أرائكم وافكاركم

 

إضافة 2011-07-03
من تأليفي
تعديل 2018-03-11

التعليقات

loleta1 2011-07-03
+1 تمام ولعلمك ده كلام علمى وسليم وبيطبق وبيظبط سلوك الكبار والصغار بس ليه غلط دخولك لزيدونى
زغباوية 2011-07-03
علشان بسبهم ومش بلعب معاهم
أم العيال 2011-07-04
عساسيل قوي العيال دي وبيفهمو
+1 ده للولاد
زغباوية 2011-07-04
هاقوللهم
Albert 2011-07-06
+1 دي فكره حلوه, وكنا بنعملها مع العيال وهما صغيرين شويه. الحاجة الى هاتلقيها صعبه (احنا فشلنا فيها) هي اذاي تجددي في اسلوب المكافءة؟ علشان بعد شويه هايبقى موضوع روتيني بالنسبه لهم, وهيفقدوا الحماس.
انا كمان عجبتني فكره الورقه المضاده...علشان دي هاتخلى عندهم ثقه في النفس, وكمان هاتعلمهم يعبروا عن رأيهم بطريقه متحضرة.
ربنا معاكي ... وياريت تعرفينا تطور الموضوع من وقت للتاني.
loleta1 2011-07-06
فعلا يا البرت بس مكن تكون مكافئات بسيطه وكل كلم مره تكون مكافئه كبيرة زى خروجه حلوة ومميزة متلا
زغباوية 2011-07-06
الحمد لله لغاية دلوقتى بجدد ومفيش مشكلة في الموضوع ده واحدث ماتوصلت اليه ان اللى اليوم كله ماعندوش ولا غلطة بنديله نجمة ونعد النجوم اخر الاسبوع واكتر واحد ياخد مكافأة والمكافأت اللى بيحبوها كتير ومتنوعة
المشكلة بقى فى الورقة المضادة بيعلمولى غلط كتييييييير:-P
عبد المنعم 2011-07-08
الاطفال فى العصر ده كلهم جيل كهرمغنطيسى .. احنا زمان كنا بنلعب كورة شراب حافيين فى الشوارع .. يعنى هيطلعوا عنيكم فى التربية بالاسلوب القديم ولازم تطوروا اساليبكم والا يضيعوا شوية العقل اللى فاضلين عندكم !!!
loleta1 2011-07-10
يبقى انتى اللى مجرمه وشقيه يازغباويه مش هما بقى هههههههههه
mora 2011-07-23
+1
mora 2011-07-23
هو المفروض اعمل +1 لكل حاجة تعجبنى عشان صاحبها او صحبتها تعرف
انا لسه عملة الحركة دى دلوقتى بس انا ضفت نقط كتير لناس عجبتنى مواضيعهم
زغباوية 2011-07-29
عايزة تعلقي من باب التشجعيع ماشي مش عايزة براحتك او تقولي اللى نفسك فيه وبرضوا مش عايزة تقولى براحتك حتى كمان عايزة تزودى نقطك نكون ممنونين علشان بعد كدا الموضوع اللى نقطه بتزيد عن 6 بيدخل مسابقة احسن موضوع للشهر ولو مش عاجبك نقصي -1 براحتك *بس كدا كل ماتنقصي -1هاينقص مجموع نقطك نقطة علشان مانفتحهاش
mora 2011-07-29
يا بنتى دا اخوكى بيقولى انى لم اقيم الموضوع كما ادعيت وانا والله لم اخذ بالى شكلى وحش قوى يا رونة
mora 2011-07-29
طب لوليتا تقول عليا ايه
زغباوية 2011-07-30
لا ماتقلقيش بتحصلنا كلنا ...الكلام يعجبنا ونخرج من غير مانزود
زغباوية 2011-07-30
وماتقلقيش لوليتا بتعملها برضوا هههههههه
loleta1 2011-07-31
كلنا بنقع فى نفس الحفرة المهم مادام لفت أنتباهنا نعدل ونضيف النقطة
zedony.com - A mmonem.com production. عن زيدوني - Privacy Policy