حد عندة ذكرى ظريفة؟

7
خطرت على بالى فكرة كل واحد مننا فى حياته مر بمواقف طريفة وذكريات ظريفة لاتنسى بمرور الزمن ليه مانكتبهاش ونكتب أستفدنا بأيه أنا شخصيا هبدأ واللى يتحمس يحكى

 

إضافة 2011-05-26
loleta1
14181
غير محدد
تعديل 2011-05-28
loleta1
14181

التعليقات

بسمة امل 2011-05-26
انا ذاكرتي دلوقت ابيض هفكر واقول
loleta1 2011-05-26
راجعى وهتفتكرى بس حطيها على شكل أجابة مش تعليق يابس بس
زغباوية 2011-05-28
فكرة حلوة بس الاول انشط الذاكرة لو كانت موجودة اصلا
عبد المنعم 2011-06-09
السامر اللى عملتيه ده جميل جدا يالوليتا ..
عبد المنعم 2011-06-09
ممكن تطورى الفكرة وتحوليها الى جلسات استماع جماعية للفضفضات النفسية بهدف الوقاية من المتاعب الداخلية ..
loleta1 2011-06-09
مرسى ياعمو بس الفكرة بتاعة الجلسات دى شبه العلاج بتاع زوزو وأنا أول واحدة فضفضت نفسياوأرتحت من متاعبى الداخلية
زغباوية 2011-06-10
شكرا يالوليتا يالا مستنياك في العيادة ياعبد المنعم مافتحتهاش بقالي فترة
starwar 2011-09-29
+1

الإجابات

8
وانا صغيرة كنت شقية كتير وغاوية نط وجرى وبهدلة وفى ليبيا كنا بنعمل كتير زى رحلات مفتوحة فى الغابات هناك فكان فرع شجرة مايل ومسنود على شجرة واقفه وكنت يومها لابسة جيبه نصها ستريت والباقى بلسيه
كنا بنطلع لنص الفرع وننط وفجأة أخذتنى الجلالة وكملت الفرع لأخرة ونطيت وأتعلقت من الجيبة فى غصن كان بارز وماأخذتش بالى منه اللطيف انى ماكنتش طايله الارض ولا طايله طرف الجيبة عشان أفكة وأنزل وكنت بعيدة عن صحابى المهم بعد جهد وفلفصة قدرت أفك نفسى وفوجئت ان قدامى متر قماش وهو البليسيه بعد ماتفك بقيت عمالة أكور وألم وكانت ليله وشبكتها بدبوس
بس حرمت بعد كدة البس جيبة بلسية أو أعمل نفسى فلحوسه
إضافة 2011-05-26
loleta1
14181

التعليقات

أم العيال 2011-05-28
مجرمة طول عمرك يالوليتا
MaDa 2011-05-31
هههههههههههههههههههههههههههه
starwar 2011-09-29
هههههههههههههههههههه
6
من المواقف مع اولادي

1. كان عمي معزوم عندنا وهو بيسلم على ابني وكان عندو ثلاث سنوات
ابني حط ايدو على بطن عمي وقاله : هو انت بطنك كبيرة اوي كدة لية ، ( مش هقلكو انا ازاي جبت الوان )


2. اخوي لما اتجوز قبلناهم بعد شهر فبنتي كان عندها اربع سنين قالتلها طنط انت مش حامل ولاايه يلابقى عايزين نونو .


إضافة 2011-05-28

التعليقات

الباشمهندسة 2011-05-28
ايه الاحراج ده .....يعملوها الصغار ويقع فيها الكبار
loleta1 2011-05-28
+1هههههههههههههه عيال مجرمه يابسمة بس براءة الاطفال مابتتكررش ربنا يخليهالك
زغباوية 2011-09-07
فينك يابسمة مش باينة ليـــــــــــه ممكن تطمنينا عليكى
4
أنا بقي مرة واحده بتجيبلي خضار لحد البيت وأول ما ابني اللي عنده 3 سنين ونص شافها قالهاانتي ريحتك وحشة ليه كده
تخيلو بقي منظري ومنظرها
إضافة 2011-05-28

التعليقات

زغباوية 2011-05-28
طيب والبنت دى جاتلك تاني بعدها ولا حرمت؟؟
بسمة امل 2011-05-28
يانهار ابيض .
loleta1 2011-05-28
+1لأجامد الصراحه راحه ههههههههههههههه
أم العيال 2011-05-29
لأ ياستي أكل العيش بيخليها تيجي
saso 2011-06-02
ههههههههههههه مجرم
6
الموقف ده ماحدش في الدنيا عرفه خالص ولا حتي بابا وماما (اوعو حد يقول لهم)
أنا كنت راجعة من المدرسة الإعدادي وواقفة عند محل باشتري حاجة وكان فيه موتوسيكل راكن عند المحلوفجأةلقيت نفسي باتجر علي الأرض
أتاري المريلة كانت شابكة في حاجة بارزة من الموتوسيكلفين وفين بقي لما اللي بيسوق خد باله إن فيه حاجة غريبة حاصلة ووقف,,طبعا الشارع كله اتفرج عالمرمطة دي وصحابي فضلو يضحكو عليا اصحاب آخر حلاوة
إضافة 2011-05-28

التعليقات

الباشمهندسة 2011-05-28
عشان تتعلمي تحافظي علي مصروفك وماتشتريش حاجه بعد كده وترجعي للبيت علي طول
أم العيال 2011-05-28
ههههههههههههههههههههههه
زغباوية 2011-05-28
اعترفي اعترفي وايه تاني؟
loleta1 2011-05-28
+1ههههههههههههه
safaa 2011-05-28
بس لو أعرف مين دول أصحابك؟..الله يسامحهم..
MaDa 2011-05-31
كده عرفوا ههههههههههههههههههههههه
saso 2011-06-02
ههههههههههههه
saso 2011-06-02
ههههههههههههه
عبد المنعم 2011-06-09
واي تانى ياست دودو؟؟
الباشمهندسة 2011-06-09
جالك الموت يا تارك الصلاة :-)
أم العيال 2011-06-10
لأ خلاص والله مافيش حاجة تاني
4
انا موقفي شوفته كتير في الافلام العربي وكنا بنضحك عليه كنير بس لما حصلي كنت بقول في سري المثل المعتاد في المواقف المحرجة يا ارض انشقي وابلعيني :

لما زوجي جه يتفدملي وفي الزيارة التانية كنت داخلة بالصينية فيها كاسة السفن اب ولسه بقدمها له وبيمد ايده ياخدها لقيت الصينية اتقلبت والكاسة كلها وقعت على بنطلونه انا معرفش هو عمل ايه لاني ساعتها سيبتله الصالون بعد ما وجهي جاب كل الالوان ومشيت ومحاولتش اسأل لغاية النهاردة ايه اللي حصل
( وبين ده هو كان سبب تصميمه انه يتزوجني )
إضافة 2011-05-28

التعليقات

الباشمهندسة 2011-05-28
كانوا بيقولوا دلق القهوة خير .... ممكن نخليها دلق السفن خير :)
الاستاذة 2011-05-28
خيررررررررررررر قوي اهو فتح بيت بتلت عيال
زغباوية 2011-05-28
انا بقى نفسي اعرف هو عمل ايه في بنطلونه اللى اتبل ؟؟؟
الاستاذة 2011-05-28
معرفش
زغباوية 2011-05-28
طيب اسأليه حتى ترجعوا الذكريات القديمة
الاستاذة 2011-05-28
ما بلاااااااااااااااااااش
زغباوية 2011-05-28
طيب خلاص بلاش احراج
3
انا موقفي عكس موقف الاستاذة
لما جوزي جه يتقدملي بابا سالني عن راي وكنت مسكة صنية الشاي

قلتلو موافقه لقيت اخوي رد علي ويقول مش المفروض ترمي الصنية

وتجري تدخلي جوة (اصل انا وجوزي كن بنحب بعض )

وبابا قال لماما انا كنت حاسس طول عمري ان في حاجة بنهم
إضافة 2011-05-28

التعليقات

loleta1 2011-05-28
+1 ربنا يديم المحبه
5
زمان وانا صغيرة كنت غاويه ألبس لبس قصير وكنت بايتة عند عمتى وبيت عمتى كان مسافة 10 دقايق من بيت جدى المهم وانا عند عمتى ماكانش معايا هدوم تانى وانا باخذ شاور هدومى وقعت فى الميه وأتبلت وكنا خارجين
عمتى حاولت تنشفهم بكل الطرق المهم قالتلى بصى انتى تلبسى بطلون البيجامة دة (بنطلون احمر فى اخضر فى بنفسجى فى اصفر بأختصار فرح العمدة)ونربطه بأستيك تحت الشورت المبلول دة

وانا ماشيه مع أخواتى وسبقاهم وعايشه اللحظه ببص ورايا لاقيتهم ميتين من الضحك وبيشاوروا عليا وفوجئت ان فردة أتقطع أستيكها ودلدل البنطلون منها وانا بحاول أصلح الموقف أتقطع الأستيك التانى وباقى السكة قضيتها جرى وانا ماسكة رجلين البنطلون وكل الشارع بيضحك عليا ومن ساعتها حرمت ألبس قصير
إضافة 2011-05-28
loleta1
14181

التعليقات

بسمة امل 2011-05-28
انت سكر
loleta1 2011-05-28
ربنا يخليكى بس حقيقى كنت مشاغبة جدا وليا مواقف طريفة لاتعد ولاتحصى والأجمل أنها كانت تجارب طبيعيه
starwar 2011-09-29
+1 هههههههههههههههه فاكره ياميسي
4
انا ليا ذكريات مضحكة كتير اوي اوي وفاكرها كلها .. المعروف عني ان انا كنت عفريت وانا صغير بس اوفر اوي مش الشقاوة العادية بتاعت الأطفال ومازلت هههههههههههههههههههه هحكيلكو كام موقف كده

مرة كنت بلعب كورة في أودة نومي وماما كانت في البلكونة .. المهم انا عمال العب وارزع الكورة في الحيطة وفي مرة بشوط الكورة فجت في السقف وكان في دواية لمبة بس فاضية فاتكسرت منها حتة .. جبت كرسي وحطيته على السرير ووقفت عليه عشان اشوف الدواية اتكسرت ولا لا .. بمد ايدي وبمسك الدواية ايدي لمست المسمار بتاعها .. المفاجأة ان الكهربا كانت واصلة وحد كان مشغل مفتاح اللمبة هههههههههههههههههههههههه
صرخت وقلت آآآآآآآآآآآآآآآآآآآآآآآآآآآه بصوت عالي اوي .. ماما جت بسرعة عشان تشوف ايه اللي حصل وهي مخضوضة طبعا فانا عشان معرفهاش ان انا كسرت الدواية واتكهربت .. رحت مكمل بع ال آآآآآه يا عيني يا ليل كأني بغني يعني ههههههههههههههههههههههههههههههههههه قالتلي انت مجنن قلتلها معلش يا ماما كنت بغني ههههههههههههههههههههههههههههههههههه
إضافة 2011-05-31
MaDa
11058

التعليقات

loleta1 2011-05-31
طفل بس مجرم+1
MaDa 2011-05-31
ههههههههههههههههههههههههههههههه
زغباوية 2011-05-31
هههههههههههه لا زكي
4
انا مرة عملت تجربة في طابور الصباح في المدرسة وانا في ثانوي .. كيف تستخم طفاية الحريق عشان أعلم الطلبة ازاي يستخدموها .. جبت جردل وحطيت فيه ورق وشوية بنزين ورحت مولع النار وبعدين بدأت استخدم الطفايه وبما ان انا مكنتش قادر اشيلها فبهدلت الدنيا ههههههههههههههههههه .. كنت بطفي المديرة وسطف المدرسين مش النار هههههههههههههههههههه ايام
إضافة 2011-05-31
MaDa
11058

التعليقات

loleta1 2011-05-31
+1يلا أخيراأكتشفوا أن البياض اللى هما فية أصلة طفاية
MaDa 2011-05-31
هههههههههههههههههههههههههههههههه مع مادا في الغسيل مفيش مستحيل
loleta1 2011-05-31
لأ ملعوبة هههههههههههههه
starwar 2011-09-29
هههههههههههههههه
3
الذكرى اللي عمري ما بنساها في حياتي وانا صغير كنت عايز انزل العب في الشارع وماما قفلت عليا ونزلت .. كان عندي 9 سنين المهم انا واقف في البلكونة وشايف العيال بيلعبوا وانا محبوس فقررت انزل .. جبت الشاكوش والزرادية والمفك والعدة اللي موجودة كلها وفكرت افك المفصلات واخلع الباب وانزل .. وبدأت فعلا وفكيت المفصلات جيت اشيل الباب طبعا من تقله وقع بس الحمد لله مش عليا .. بس وقع على الكرسي اللي ورا الباب وانكسر من نصه كده بقى في رقعة
فضلت قاعد جنب الباب مصدوم ومش عارف اعمل ايه آخر ما زهقت نزلت العب وسبت الباب واقع والشقة مفتوحة على البحري واول ما شفت ماما راجعة ومعاها بابا جريت على فوق ورميت نفسي على الأرض كأن الباب وقع عليا وانا مش قادر اتحرك هههههههههههههههههههههههههههههههههههههههههههههههههه
وجابوا النجار صلحوا الكسر ده وحط خشبة والمفروض كان بابا هيدهنها .. انا بقى عكيتها قلت اخبي الخشبة دي .. الباب كان ابيض .. جبت انا قلم فلمستر اسود ولونته ههههههههههههههههههه
إضافة 2011-05-31
MaDa
11058

التعليقات

loleta1 2011-05-31
+1دى ذكرى جامده هههههههههههههههههههههه جيت تكحلها عمتها بس عاجبنى فيك أنك عبقرينوا ومبتكرههههههههههههههه
MaDa 2011-05-31
هههههههههههههههههههههههههههه اوي انا مرة فكيت التليفزيون الفديم بتاعنا الأبيض واسود ده وكان عندي 6 سنين بس فكيته ومعرفتش اركبه تاني وبسم الله ما شاء الله عملناه دولاب بعد كده ههههههههههههههههههههه مبقاش تليفزيون
loleta1 2011-05-31
هههههههههههههه اهم ماما وبابا أخبارهم أيه هههههههههه
MaDa 2011-05-31
الحمد لله تمام .. ربنا يسهل ويبقى في دردشة في الموقع عشان نتواصل اكتر واكتر
loleta1 2011-05-31
بإذن الله
زغباوية 2011-05-31
يانهار ابيض هو انا ممكن ولادي يعملوا فيا كدا
وايه كمان دا انت كارثة ههههههههه
loleta1 2011-05-31
ياحبيبتى مش الولاد بس ماخفى كان أعظم
MaDa 2011-06-01
ههههههههههههههههههههههههه
زغباوية 2011-06-01
وعايزة اعرف اكتشفوا الموضوع في الاخر ولا عدت
MaDa 2011-06-02
هم عرفوا بس بعد ما الموضوع اتنسى خالص وكان رد فعلهم انهم فضلوا يضحكوا واي حد ييجي يزورنا يحكولوا الموقف ده حتى وقتنا هذا بعد مرور سنين عليه هههههههههههههههههه
5
تعرفي يا لوليتا ان اسمك ده بيفكرني بذكرى مبنسهاش ابدا وبتموتني من الضحك ..
إضافة 2011-05-31
MaDa
11058

التعليقات

loleta1 2011-05-31
ده أسم الدلع طب سمعنى ولوعجبتنى هقولك على أسمى الحقيقى بس أوعى تضحك هههههههههه ولا تعلق كمان
MaDa 2011-05-31
بصي يا ستي .. انا كنت مدمن لوليتا وكنت بجيب بمصروفي كله لوليتا عشان حاجتين اكولها والعب بالكيس بتاعها بعد ما اخلصها .. المهم كنت في مرة في المدرسة في تالتة ابتدائي بالتحديد .. كنا بنجيب الوليتا انا واصحابي وناكلها وبعدين نلعب بالأكياس باعاتها نملاها مية ونفرقعها في بعد وكده اوي نملاها هوا ونفرقعها في بعض وكده يعني .. المهم كنا في الفسحة وخلصنا اللويتا وبنلعب بالاكياس كالعادة .. فانا اليوم ده اتفرقعت فيا كتير فكنت متغاظ فضلت مستنخبي ورا باب الفصل واللي يدخل افرقعها فيه .. لحد ما حظي المهبب فرقعتها في ابلة ليلى مدرسة الحساب وجت في عينها وعينك متشوف الا النور هههههههههههههههههههههههههه .. بعتتني للمدير بس عشان انا كنت الأول على المدرسة وكنت الطالب المثالي وكل الأساتذة بيحبوني سامحوني ومزعلوش وفي أساتذة قعدوا يضحكوا وقلبوها هزار .. بس كده وهي دي ذكرى اللويتا ههههههههههههههههههههههههههههههه
loleta1 2011-05-31
ههههههههههه لأ فكرتنى بأيام الشقاوة خصوصا فثانوى كنت الاولى على فصلى ولأن أسمى لميس كنت أحد الأوائل مكرر على المدرسة حسب ترتيب الحروف المهم كنت غاوية أقعد فى أخر دسك ومتصاحبة على كل العيال الفاشلة الملاحق وبحبهم جداوبغششهم فكانوا بيحبونى كمان وكنت زعيمة عصابة بيهم أوقات كنت أحب أغيب من المدرسة وكنت بخاف تضيع عليا حصص مهمة والبنات الفاشلة مش عايزة تروح البيت تساعد مامتها وكمان مش عايزين ياخذو حصص وكان فصلنا فى الدور الارضى كنا نجمع فلوس نجيب بيها طبق بيض ونديه لواحدة ساكنة قصاد المدرسة ترمى البيض من بالليل من شباك الفصل جوه الفصل انا أغيب براحتى وهما تانى يوم بعد الطابور ييجوا يدخلوا الفصل يلاقوا ريحته قبر فالمدرسات ترفض دخول الفصل ويقضوا البنات الحصص كلها فى الجنينة بتاعت المدرسة شوفت التكتيك ياباشا
MaDa 2011-06-01
ههههههههههههههههههههههههههههههههههههههههه انا كده جنبك صفر على الشمال .. تفكير عصابي منظم
loleta1 2011-06-01
أى أجرام
زغباوية 2011-06-01
الله الله الله ده على كدا هانلاقي اكبر تشكيل عصابي فى الموقع ربنا يستر
كل واحد يخلي بالو من نفسه
loleta1 2011-06-01
طب أعمل أيه يازوزو الجيش قالك أتصرف بس عموما أنا أليفة حاليا ومستأنسة بس بمزاجى
زغباوية 2011-06-01
لا شاطرة والشقاوة دي بتدل على الذكاء
MaDa 2011-06-02
مممممممممممم فعلا
5
انا أخت ل4 أخوات 3بنات وولد ولأننا كنا فى الغربة كان بابا بيخاف علينا فماكناش بنخرج والصحاب على الضيق قوى وكان حريص اننا نبقى متفوقين عشان كدة كان بيقفل باب غرفة اللعب والفيديو جيم والتلفزيونات بالقفل أيام الامتحانات
وطبعا لأن الوضع مش عاجبنا والممنوع مرغوب عملنا تشكيل عصابى وكل واحد فينا ليه وظيفة قمنا بتشريح تركيب القفل:
الاول كنا بنستخدم وسائل بدائية نفك مسامير رزة القفل أو ندق علية بالشاكوش من الجنب فتتفك دائرة صغيرة جانبية وبكل سهولة يتفك القفل بس وجدنا ان هذة الطرق بتاخذ وقت ومجهود ففكرنا وأقترحت حاجة أسهل
انا لأنى صغيرة وسفروته وأيدى خفيفة نشلت مفاتيح بابا وهونايم
وأخويا نسخ مفتاح الغرفة ورجعت المفاتيح مكانها تانى
وبقى كل واحد فينا ليه وظيفة:
فرد التمويه:حد يراقب الطريق يشوف بابا جه ولا لسة وينبهنا ويعطلوا شوية عشان نلحق نرجع الوضع لأصلة
حديفتح قفل الباب ويقفلوا بعد خروج الجميع
حد يطفى النور
وحد يطفى التلفزيونات ويرجع الاجهزه لوضعها
بس الحقيقة أننا أكتشفنا لية:
أولا أختى المسؤلة عن طفى النور وهى أعقل وأهدى واحدة فينا كانت من الخدة بتطفى النور قبل مانعمل أى حاجة وكل يخبط فى بعضه
ثانيا أذا كنا أذكياء فباباهو الاساس:
أولا لاحظ ان المروحة لسة بتلف بسيط خالص
ثانيا حط أيده على التلفزيون لقاه سخن
ثالثا كان بيحط حاجات فى أماكن بيعلم بيها الاوضة لوأتحركت او أتنقلت يبقى حد دخل الاودة (أمال الذكاء جه من مين)
بس كان نفسوا يعرف بندخلها أزاى وبعد كدة بفترة كبيرةأعترفنالوا فبقى بيسيب كل حاجة مفتوحة وقالنا كل واحد مسئول عن مستقبلة انا مش حأمنعكم من اى حاجة وأنتوا وضميركم
وعايزة أقولكم بقينا نلعب وضميرنا يوجعنا فنذاكر
وأهه طلعنا 4دكاترة ومهندسة ومن ساعتها وأنا شايفة أن ده أفضل أسلوب لتوجيه الاطفال للمذاكرة
ملحوظه(انا طلعت مهندسة لأنى بحب الرسم وصممت أدخل كلية فنون مش عشان المجموع)
إضافة 2011-06-01
loleta1
14181

التعليقات

الاستاذة 2011-06-01
استاااااااااااااااذة ورئيسة قسم
MaDa 2011-06-01
تنظيم القاعدة المصري ههههههههههههههههههههههه
loleta1 2011-06-01
ههههههههههه وانا لوليتا لادن هههههههههههه
MaDa 2011-06-02
لوليتا قذافي هههههههههههههههههههههههههه
loleta1 2011-06-02
على فكرة انا عشت لحد ثانوية عامة فى ليبيا انت بتشم على ظهر أيدك ولا أيه التعليق ده فى الجون
MaDa 2011-06-02
صدفة صدفة .. حظ حظ .. هههههههههههههههههههه
loleta1 2011-06-02
رب صدفة خير من ألف معاد
loleta1 2011-06-02
مين أنتم ههههههههههههههههههههههههه
MaDa 2011-06-02
هههههههههههههههههههههههههههههه
الاستاذة 2011-06-02
بلاش قذافي لحسن يسقطوكي
ههههههههههههههه
shady 2011-06-02
يالهوى عليكى دة انتو عصابة فعلا
loleta1 2011-06-02
شفت بقى
زغباوية 2011-06-02
يانهار البيض الواحد يخلي بالو من عياله ويعملهم اللى عهايزينه بدل مايحصله كدا
starwar 2011-09-29
+1 ههههههههههههههههههه كده فضحتينا كانت أيام ياسكر
5
دي ذكرى جديدة افتكرتها
وانا صغيرة كنت بعمل شاي بالنعناع تحفة
وفي مرة كان عندنا ضيوف (موجه لغة عربية)وزوجته وكانوا بيحبوا يشربوا الشاي من ايدي وفي يوم قالولي اعملي شاي فقال عمو :
ايوه اعملي شاي بس( ويزوود)نعناع وطبعا انا فرحت اني بعمل حاجة بتعجب الناس وقمت عاملة الشاي ومزودة النعناع (وصاية بقى)
واول ماجه عمو يشفط اول شفطة لاقيته ساب الكوباية وفالي في غضب ايه اللي انتي عملتيه ده مش قلت لك (ويزوود ) نعناع قلتله يا عمو ما انا زودت النعناع
ضحك وفهم سازجت طفولتي وقالي (ويزوود) without نعناع يعني من غير نعناع خالص لانه مابيحبش النعناع اصلا
اصل الجهل باللغات وحش
إضافة 2011-06-02

التعليقات

shady 2011-06-02
حلوة دى
loleta1 2011-06-02
لأ جامدةياأستاذة
زغباوية 2011-06-02
حلوة
MaDa 2011-06-02
جامدة اوي .. واضح انه كان موجه شاطر D:
Emy S. Ahmed 2011-06-08
loooooooooool soooooo nice
loleta1 2011-06-08
يانينو حاولى تفتكرى حاجة وأكتبها ولو بالأنجليزى
زغباوية 2011-06-08
ليه كدا بس يالوليتا ده انا مصدقت تكتب شوية بالعربي
6
هى ذكرى مضحكة بس وانا كبير مش صغير , كنت فاتح محل فى 2003 كدة وكنت قاعد فيه انا و 3 اصحابى اتنين منهم جيرانى و واحد زميلى من الكلية وزميلى دة كان مربى دقنه كتير وقاعدين وصاحبى كان بيشرب دخان بايب ودخل علينا واحد جارنا تانى بس عبيط شوية كدة ومايعرفش البايب اسمه صبرى فقالنا اية دة قولنالو دى خلطة سحرية اللى بيشرب منها الشيخ دة بيعرف عنه تفاصيل حياته كلها, وطبعا هو مايعرفش زميلى وكان مربى دقنه فصدق وقال زاى طيب انا ها اشرب و ورينى ازاى هايعرف عنى حاجة , المهم انا قولتلو استنى انا هابتدى وشربت منه وكتب رسالة على الموبايل وكتبت فيها اسم مامت صبرى واسم ابوه وجدة , وقولت للشيخ الموبايل دة بكام ؟ راح رد وقال اى مبلغ وانا طبعا قلتله صح عرفت منين وهو كان فى نفس الوقت اللى بوريله الموبايل قراء الرسالة وفهم , صبرى شرب من البايب وبعديها سألنا الشيخ اسم مامته اية راح قايل , طيب اسم باباه طيب اسم جده راح قال كل حاجة الواد اتجنن بقى ازاى عرف ومحدش قاله حاجة قدامه وبعديها واحد من جيرانى اللى كانو معايا فى الاول زعق جامد فى الشيخ راح الشخ منزل علينه لعنة وبقى مش عارف يتكلم زى مايكون شلل نصفى و وقاع فى الارض وكدة وطبعا احنا كلنا بنمثل قدام الواد والشيخ راح حبكها وجرى وجرينا وراه وجبناه وقولناله لازم تفك اللعنة زى ماعملتها ,,الواد صبرى اتغاظ قوى من الشيخ واللى عمله في جارنا راح مزعق مع الشيخ , راح الشيخ منزل على صبرى لعنه انه بيكهرب , يعنى اى حد هايلمسة هايتكهرب , صبرى خاف بقى وكل مايسلم على واحد فينا نبعد عنه ونعمل كأننا اتكهربنا فعلا لدرجة اننا جرينا برة المحل فى الشارع منه وهو بيجرى ورانا و بيقول يا جماعة فى اية حرام عليكو وراح موقف واحد فى الشارع وقاله عمو ممكن تسلم عليا ,و الراجل شتمو وقال اللة يخرب بيت الحشيش ههههه , واحنا نروح للراجل ونسخنه ونقوله معلش اصله مجنون وتعبان نفسيا . مهما احكيلكو مش ها تتخيلو الموقف كان قد اية مضحك بجد
إضافة 2011-06-02
shady
8277

التعليقات

safaa 2011-06-02
الله يسامحك ياشادى ..مش قادرة امسك نفسى من الضحك+1
loleta1 2011-06-02
+1مجرمين ياعينى على صبرى ده بريئ قووى بس دى عاقبة اللى يصاحب أشقياء زيكم لأ وألذ حاجة الراجل اللى بيقولة يخرب بيت الحشيش اللى ضيع دماغكم ده هههههههههههههههههههلأ جامدة وبتقولى عصابة ده أنتوا طلعتم تنظيم هههههههههههههههه
زغباوية 2011-06-02
ههههه طيب في الاخر عملتوا ايه في صبري فهمتوه ولا فضل مش عارف حاجة
shady 2011-06-02
يا جماعة انا معرفتش اقول الموقف صح لكن بجد مش متخيلين هستريا الضحك اللى نزلت علينا
shady 2011-06-02
اكيد فهم بقولك جينا من وراه وقولنا للراجل معلش اصله مجنون والراجل كان هايضربه واللهى واحنا سبناه ومشينا
MaDa 2011-06-02
هههههههههههههههههههه احلى حاجة سرعة البديهة والحبكة الدرامية ان انتو تقكروا بالسرعة دي ومن غير ما تغلطوا وشربتوه المقلب صح .. أستاذ يا شادي =)))))
mohamedfarghaly 2011-06-02
لا بس ياشادى ساعتها الواد صبرى فعلا صدق وكان ها يتجنن بجد ,, طب فاكر كان فى حد جاى من اخر الشارع و مش فاكر مين ساعتها فهمو و صبرى جاى يسلم عليه قام عامل متكهرب هو كمان دى بجد اللى خليتو كان ها يجرالو حاجة
safaa 2011-06-02
هو أنت اتفاقت مع شادى ياحمادة!!ربنا يستر على الموقع واللى فيه
shady 2011-06-02
dاقدملكو يا جماعة محمد فرغلى شريك فى هذه الواقعة وعلى فكرة صبرى لما قوف الراجل وسأله قاله عمو ممكن اسلم عليك ,الراجل قاله نعم يا اخويا , صبرى قاله انا بكهرب ههههه , واللهى ايام صحصح
safaa 2011-06-02
أهلا بك يامحمد فى الموقع..يالا شارك معنا وشارك كمان فى المسابقة الجديدة لاحسن مقالة او سؤال لشهر مايو..مع تمنياتى لكم جميعا بقضاء وقت ممتع على الموقع الجميل (زيدونى)
mohamedfarghaly 2011-06-02
اه والله يا شادى كانت ايام بس فينها دلوقتى بقى بيقولك صبرى دلوقتى بقى مخترع
shady 2011-06-02
سمخترع بس دة عبقرى
زغباوية 2011-06-03
اكيد بعد اللى عملتوه لازم يبقى مخترع علشان مايتضحكش عليه تاني
loleta1 2011-06-03
يمكن يكون بقت كهربته منه فيه
shady 2011-06-03
هههههههههههههههه
الاستاذة 2011-06-03
لأ دي بيني الكهربا بتاعة الشيخ زودت سرعة الذكاء اللي عنده
ههههههههههههههه
shady 2011-06-03
hhhhhhhh
starwar 2011-09-29
ههههههههههههههههههههه
6
يا جماعة انا هحكى موضوع صغير قوى بس من غير تريقة لو سمحتوا علشان انا كنت اذكى اخواتى :) كنت فى يوم لوحدى فى البيت والذكرى دى بقى وانا طفل يعنى مش فاكر كام سنة بس فى اول الابتدائى كدة , كان عندنا حوض سمك فى البيت , وانا كنت قاعد من المدرسة وماروحتش وكنت لوحدى فى البيت وفتحت التيلفزيون اتفرج على حاجات لقيت سمك شكله حلو قوى على القناه الاولى تقريبا , المهم اتغظت بقى لية السمك دة بيطلع فى التلفزيون و السمك بتاعنا مش بيطلع ,, روحت جايب السمك بالمية بتاعته وروحت حاطف فى التلفزيون من ورة كدة لقيت فتحات , المهم طبعا التلفزيون ضرب وفرقع وما بقاش يشتغل والسمك مات وحصل اللى حصل
إضافة 2011-06-08
shady
8277

التعليقات

محمد عبد المنعم 2011-06-08
على فكرة ممكن يكون اللي حصل ده صدفة بحتة ... ماتأنبش نفسك خالص !!
زغباوية 2011-06-08
هههههههههه طيب كمل وعملوا ايه معاك في البيت
وبعدين هو السمك مات من الخضة ولا اتكهرب ولا مات ليه؟
وكمان انت كنت حاسس بايه ساعتها؟؟؟
loleta1 2011-06-08
هههههههههههههههههههههههههههههههههههههههيعنى بدل ماتطلع السمك فى التليفزيون طلعتة للأخره عسل ياشادى أهو دى الذكريات الظريفة وفكرتنى بذكرى ليا برضه

أخويا كان مربى فراخ بلدى وكانت راقدة على بيضها أول كتكوت أنا أخذته وكنت بحبه قوى وكان بيقف على صوابعى ومش بيخاف وكنا فى الشتا وكنت خايفة عليه يبرد فنيمته جنبى وصحيت تانى يوم أدور عليه ويدوبك باقوم لاقتنى حولته ألى بفتيك وبعته وطلعته للأخره برضه
زغباوية 2011-06-08
يعيني الحمد لله مابحبش اربي اى حاجة
shady 2011-06-08
ممكن يا محمد محدش عارف :D
shady 2011-06-08
واللهى يا زغباوية انا مش فاكر اى حاجة خالص يدوب افتكرت الحوار دة بالعافية :)
زغباوية 2011-06-08
كويس كويس الذاكرة بدأت ترجع شوية بشوية عقبالي
shady 2011-06-08
ههههههه يا لوليتا عادى يعنى هى جات كدة معايا تفكيرى جابنى لكدة وانا طفل بقى وكمان انا قولت انى كنت اذكى اخواتى وقولت برضة مش عايز تريقة ,, لكن بالنسبة للبوفتيك دة حسبيى الله ونعم الوكيل
loleta1 2011-06-08
ههههههههههه من الحب ماقتل هههههههههههه والله عيطت عليه كتير خصوصا أنى انا اللى بطتته بس الدموع مش هترجعوا تانى
MaDa 2011-06-08
+1 ههههههههههههههههههههههه الله ينور يا شادي D:D:D:

Emy S. Ahmed 2011-06-08
انت كنت موصيبه
loleta1 2011-06-08
أحم أحم مش لوحده يانينو وبعدين هو ولد أنا بنت أو..........مشروع بنت وفشل هههههههههههههههههه
Emy S. Ahmed 2011-06-08
looooooooool
shady 2011-06-08
شوفتو التفكير بيودى ل فين ,, الى الكهربائى :) ومعرفش يعمل فيه حاجة والتلفزيون باظ وجبنا واحد جديد :D
زغباوية 2011-06-08
كويس انه ماوداش في حتة تانية يعني كويس انك ماتكهرتش او جرالك حاجة
الاستاذة 2011-06-09
فكرة
انا كمان عايزة اجيب تليفزيون جديد وعرفت منك الفكرة خلاااااااااااااااص بس رد فعل زوجي هابعتهولك ايا كان
ههههههههههه
shady 2011-06-09
هههههه لازم اعرفه وربنا يستر عليكى
5
بمناسبة الكتكوت يا لوليتا وموقفك معاه .. انا ليا موقف مشابه كده بس مع اختلاف الكائن المشارك في الموقف

كانت أمورة وصغننة .. كبرت وترعرعت في بلكونة بيتنا .. انها بطة .. كان اسمها بطبوطة .. كنت بحبها اوي .. كنت بنام وانا سامعها بتقول باك باك باك .. كنت بحب كل يوم اتفؤج على ماما وهي بتظغطها واقولها يا ماما براحة عليها لما كانت بتحطها طبعا تحت رجلها .. المهم جه يوم الحادثة الأليم .. حادث مروع تقشعر له الأبدان وتشرئب له الأعناق

كنت لوحدي في البيت ومحدش موجود غيري انا وبطبوطة وطبعا ما اجتمع طفل وبطة الا وكان شوشو ثالثهما هههههههههههههه
قررت اني ازغطها .. قلت لنفسي ماما هتتأخر ويا حرام اكيد هي جعانة

المهم انا كنت بشوف ماما بتزغطها فول ودرة .. رحت جايب فول ودرة ودخلت عليه .. بصتلي بعينها ولسان حالها بيقول .. هتعل ايه يا مجنون ااوعي تكون ها .... ومكلتش الكلمة لقتني فوقها .. المهم مسكتها ودي تعافر معايا وانا مصمم لازم أزغطها .. وكنت بقول أزغطك منين يا بطة ههههههههههههههههه

المهم فضلت احط الدرة والفول في بقها وهي تعافر ومش عايزة وانا احط ومش فارقة معايا .. المهم حطيتلها حوالي كيلو فول على درة وسيبتها وقمت أجري ههههههههههههههههه بعد ما عملت عملتي

ماما جت لقيت بطبوطة يعيني عمالة تكح وفي كل كحة يطلع من بقها فول ودرة اللي انا حشيتها بيهم .. كانت بتحتضر .. المهم ماما جاتلي وسألتني انت عملت ايه .. اوعى تكون ....... ايوة يا ماما زغطتها
قالتلي عملت ايه .. حكيتلها كل اللي انا عملته . قالتلي شاطر برافو عليك .. بس المشكلة اني غملت كل حاجة صح الا اني محطتش الفول والدرة في مية .. زغطتها بيهم ناشفين .. فجأة لقيت ماما جريت وجابت السكينة ودبحت بطبوطة .. وانتهت حياتها المسكينة في اليوم ده وادفنت في بطننا

الأغرب من ده كله .. شعوري وانا باكلها بقى كان شعور غريب اوي .. كنت حاسس في بقى طعم الفول والدرة اللي انا زغطتها بيهم
وتوتة توتة فرغت الحدوتة هههههههههههههههههههههههه


طبعا انا حكيتها بشئ في حبكةدرامية للتشويق وإثارة ذهن القارئ
إضافة 2011-06-08
MaDa
11058

التعليقات

loleta1 2011-06-08
هههههههههههههههههههههههههههههههههههههههههههههههههه لأ ده أنا طلعت رحيمة موت الكتكوت على طول ماعذبتوش بالبطيئ أنا من اول الحدوته وانا هالكانه من الضحك شفت براءة الطفولة
loleta1 2011-06-08
على فكرة انا كان ليا مغامرات مع البط كان جدى مربى كتير فوق سطح بيت العيلة وكان يدينى ذرة مكسرة عشان أرميلهم ويأكلوا وأنا كنت مفترية شايفاهم جعانين وبرميلهم واحدة ذرة وأقعد أتفرج عليهم وهما بيتخانقوا ويضربوا بعض كان عمرى 5 سنين
زغباوية 2011-06-08
هههههههههههههه وجالك قلب تاكلها
وكمان طلعت مؤلف
3
really i want to tell you something but really i don't remember what i was doing when i was child but i remember things i did it when i starting playing badminton
but they are not so funny -i hate that days alot - all the people was treating me as a baby and my captain thought him self a funny man and his blood is like poison when i remember when he left the club all of the people was crying axcept me i was so happy ,
one day m training was fitness and games so i went to the club at 12 and i left it at 5 all this time i played only dames i do no fitness and that captain was sure that i did my fitness and i didn't do it -it was so funny -
i can't remember anything else now
إضافة 2011-06-08

التعليقات

Emy S. Ahmed 2011-06-08
really i remember nothing except this if i do i will write it
loleta1 2011-06-08
من الواضح أنك مش بلعاه خالص يانينو
Emy S. Ahmed 2011-06-08
i hate him alot and i still hate him
loleta1 2011-06-08
شوية وهنشدك أكتر وتفتكرى أهه شادى فكرنى بالكتكوت حبيبى الله يرحمه هههههههههههه أنتى عسل يانينو
loleta1 2011-06-08
بس قلبك أبيض
Emy S. Ahmed 2011-06-08
thank you honey you are so cute and beautiful
loleta1 2011-06-08
وبعدين عادى جدا أديكى فكرتينى بالمدرسة فى ليبيا وأنا فى أبتدائى كان عندى مدربة جمبازباردة وسئيله وسم برضة جايبالى حصان كبير قوى وعايزانى أنط على المنط ومنه فوق الحصان وأفتح رجلى 180وأنزل قلتلها يافندم مش هقدر انا ليا فى الشقلبظات بس مافيش فايدة وصممت رحت جريت ونطيت المنط وفتحت رجلى وأخذت حصان الجمباز ووقعت بيه وأتكومنا كلنا فوقيهاوأتعورت بس صعبت عليا قوى لأنى مسحت تاريخها الفنى والرياضى
Emy S. Ahmed 2011-06-08
loooooooooool she is mad girl and you why did you agree leave the training and go when she ask you to do that :):):):):):):):):)
loleta1 2011-06-08
أصل ليبيا غير مصر يانينو هناك الرياضة والرسم والموسيقى كان عليهم درجات وتقدير ومسابقات وجوايز وكانوا لو شافوا حد متفوق بيخصصوله وقت معين عشان يتمرن لأنه بيجيب جوايز للمدرسة ويعلى ترتيبها بين المدارس
طبعا أنا كنت مكتسحة فى الرسم لأنى فنانه من يومى
وكنت شاطرة فى رياضات كتيره خصوصا الطايرة والتنس
وكمان الجمباز الأرضى حاجه بسيطة
يوميها كان فى حفلة مفاجئةومطلوب يتعمل فيها عرض انا صارحتها بقدراتى ولأنى صغيرة كان كفاية عليا الحصان الصغير لازم تجيبلى حصان الكبار وماكنش ينفع أتملص والوقعة كانت غير مقصودة بس كنت متوقعاها وأتمسح التاريخ لأنها أتصابت ونقلت من مدرستى
Emy S. Ahmed 2011-06-08
never mind but then don't do what you can't do till you be ready fo it :):):):):):):):):):):):)
loleta1 2011-06-08
ذكاء بقى تقولى أيه همممممممممممممممممم أيام
زغباوية 2011-06-08
يانينو راعي الناس اللى مالهاش في الانجليزي وهيا معنا نشطي لغتك العربية
4
العضوة مورا أتكلمت عن بعض الحشرات جيرانافى هذا العالم فكرتنى بموقف حصلى كرهنى فى كل حشرات الدنيا
كنت فى ليبيا فى الصيف والحر هناك بشع ومشبع بالرطوبة وكنا فاتحين الشبابيك عشان تجيب طراوة وماكنش ليه سلك وبطبيعة الحال لابسة صيفى حمالات وقفايا مكشوف
وقاعدة بتكلم مع أخواتى بمنتهى البراءة وفجأة سمعت حاجة بتقول زيييييييييييييييييييييييييييييييييييييييييييي ولزقة على قفايا أتاريها جرادةدخلت من الشباك و سابت البيت كله ومالقتش غير قفايا تركن فية طبعا ملمس رجليهاالخشن مايتوصفش ده غير هول المفاجأة
قعدت أجرى وأنفض فى نفسى وشعرى زى المجانين رايح جاى
وكان يوما فظيع

وبرضوا فاكريين يوم الجراد العظيم فى مصر
كنت فى الكلية وكلية فنون تطبيقية مليانةشجر وزرع وكنت برسم فى محاضرة طبيعة حية بيجيبوا ست أو راجل ونفضل نرسم فية المهم الواحد كان سامع صويت برة بنبص على الشباك كنت فاكراها عصافير كتير لحد ماأكتشفت أنها جراد غطيت كل حته فيا بالبالطو ومافضلش غير عيونى وماشية خايفة أدوس على حد منهم وروحت البيت
ولأن اللى بيخاف من العفريت يطلعله وأنا بلم الغسيل وماسكة فانيلة فى أيدى نطت منها جرادة فى وشى
وده يعلمكوا الحذر لايمنع قدر
إضافة 2011-07-27
loleta1
14181

التعليقات

shady 2011-07-27
:(
MaDa 2011-07-27
ههههههههههههههههههههههههههههه
زغباوية 2011-09-07
بخاف منه جدا ربنا يستر
5

هقول لكم حكاية حصلت منذ اكثر من 30 سنة
فية جارة ساكنة معانا فى العمارة وكل ماتشوف ابنى تقول لة
انتم عندكم أكل اية النهاردة!!..ابنى استغرب ولاص شوية ..
وقال لها (بولة).
ولما رجع البيت قال لنا اللى حصل
باباة قالوا جدع وقل ما تقول لك قول لها بولة
وهى كل ماتشوفة وتقول لة عندكم اكل اية!! يرد عليها بنفس الكلمة
لحد ما الست دى زهقت من الكلمة بولة
زارتنى مخصوص علشان تعرف ايه الاكلة الغريبة دى كل يوم بيأكل بولة,بولة
بولة طبعا مافيش اكلة اسمها كدة
حرمت بعدها تسألوا تانى
إضافة 2011-07-27
safaa
50523

التعليقات

loleta1 2011-07-27
طنط حشرية+1
shady 2011-07-27
ههههههه حلوة حكاية انها نزلت تعرف اية هيا , فضول الشعب المصرى
MaDa 2011-07-27
تلاقيها سألت حضرتك بتتعمل إزاي أو ممكن تعمليها ,ىجي ادوقها من ايدك :D:D
زغباوية 2011-09-07
+1
5
كان عندي 11 سنة .. مكنش حد في البيت وكنت جعان وماما كانت بره وأختي كانت في الدرس وهيتأخروا .. فقررت أدخل المطبخ وأعمل أكل .. فكرت كتير وفي الآخر قررت أعمل مسقعة ورز وسلطة .. المهم عملت المسقعة تمام التمام والسلطة وكنت مخلي الرز للآخر .. المهم بعد ما المسقع والسلطة خلصوا قلت ابدأ في الرز .. وفعلا حطيته على النار وهديتها خالص عشان يتشرب .. نفسي هفتني أجيب مخلل .. فقلت ايه هسيب الرز وانزل اجيب من على أول الشارع مخلل وارجع بسرعة .. كسلت أقوم اجيب المفتاح من البنطلون بتاعي من جوة وقكانت قدامي شنطة من شنط ماما .. وانا عارف انها مش بتاخد معاها مفتاح .. فمديت ايدي جواها وسحبت المفتاح ورحت قافل الباب ونازل .. نزلت جبت المخلل ورجعت في اقل من 5 دقايق .. والمفاجأة بقى بطلع المفتاح .. مطلعش مفتاح طلع ميدالية بس وانا مبصتش لما خدت ونزلت على اساس انه مفتاح .. طب والعمل .. الرز على النار .. اها النار هادية بس الوقت بيمر ..

مش معايا مفتاح .. مفيش طريقة للدخول .. مش معايا موبيل ولا ماما وقتها كان معاها .. اختي في الدرس وعرفش مكانه .. طب ايه العمل .. نزلت أدور على نجار وبالفعل لقيته وخدته من ايده وجريت على الشقة وكسرنا الكالون .. ودخلت لحقت طفيت البوتجاز .. الرز كان اتفحم :) وفضل قاعد جنب باب البيت لحد ما ماما وأختي رجعوا ولقوا الكارثة دي .. بس الحمد لله لحقت الليلة

وفي الآخر كلت المسقعة بالعيش :):)
إضافة 2011-08-07
MaDa
11058

التعليقات

shady 2011-08-08
كويس انك جتلك نفس اساسا بعد ما بوظت باب الشقة وحرقت الحلة :(
shady 2011-08-08
روحك رياضية
MaDa 2011-08-08
هههههههههههههههههههههههههه كويس ان انا نسيت اني كنت جعان .. وعملت ده كله لحد ما كلت :D
loleta1 2011-08-09
انت مجرم حقيقى مامتك ليها الجنة زى بابايا ومامتى تمام:-( بس الايام دى لاتنسى+1
MaDa 2011-08-09
أكيد لا تنسى ..مش عارف ليه ببقى فخور وانا بحكي المصايب دي ههههههههههههههههههههههههههههه :D
loleta1 2011-08-10
والله وانا ببقى سعيدة جدا
زغباوية 2011-09-07
دى اخرت السرعة فى التأنى السلامة
3
وأحنا فى ليبيا أختى فكرت فى مرة تقلى بطاطس وكانت صغيرة وقتها ونسيت البطاطس على النار فولعت البطاطس والطاسة كمان وطبعا لما هى شافتها مولعة طلعت ناصحة وراحت دلقت على الزيت مية وعينك ماتشوف إلا الدخان
حصل أنفجار بسبب دلق المية على الزيت والنار ولعت للسقف وطفاها أخويا بالتراب والمطبخ والبيت بقى أسود
ومن ساعتها كل ماأشوف هانى رمزى فى فيلم محامى خلع وهو بيقول لايمكن ان يختلط الزيت بالماء أفتكر الموقف ده
إضافة 2011-08-09
loleta1
14181

التعليقات

shady 2011-08-09
ههههههههههههههه حلو حوار هانى رمزى دة مسخرة :(
MaDa 2011-08-09
هههههههههههههههههههههههههه حصل معايا موقف الزيت لما ولع ده بس انا محططتش مية على الزيت .. انا فضلت أنفخ هوف هوف والنار مش راضية تنطفي .. رحت شايل الطاسة وهي مولعة وخرجتها برة الشقة وجبت رمل وطفيتها:D:D
loleta1 2011-08-10
هف هف يارايق بس كويس انك عملت كدة
MaDa 2011-08-10
خيال بقى ههههههههههههههههه
زغباوية 2011-09-07
ربنا ستر ومحصلهاش حاجة
starwar 2011-09-29
هههههههههههههه أنتوا مجرمين
3
انا هقولكم موقف جامد والله

انا كنت عند خالى وبعدين كان فى ضيوف كتار اوى وكدة ودخلنا نعملهم عشا الكلام دا قبل رمضان بيوم المهم خالى دا عندة نوننة كدة ولد صغير عندة حوالى شهر ونص وبنتة بقا كبيرة شوية اسمها تسنيم دى عندها 4 سنين عاوزة اقولكم ان من كتر ماهما بيفرقوا فى المعاملة بينهم وبيحبوا الولد اكتر وبقوا مش مهتمين بيها بقت بتكرة اخوها مووت المهم اية قبل ما ندخل نعمل العشا انا نيمتة فى اوضة كدة فيها القعدة العربى وسبتة وقفلت علية الباب بقا وكل شوية كنت بطمن علية المهم رجعت فمرة المطبخ وقلبى كالنى علية قولت اروح اشوفة ودخلت لقيت اختة حاطة فوقية شلتتين من القعدة العربى وقاعدة فوقيهم انتو متخيلين اصلاااااااااا ان ربنا انقذة من الموت باعجوبة بجد سبحان مين نجااااااة وبتقول اية بقا انا كنت بلعب معاة مكنش قصدى اموتة
طبعا وشة ازرق وودناة للدكتور وتعب اوى بس ربنا سترررررر
:-D
إضافة 2011-08-09
yara
1736

التعليقات

MaDa 2011-08-09
ينهااااااااااااار أبيض .. ربنا يستر بجد ولازم حد كبير يتكلم مع خالك ومراته ويفهموهم ان التفرقة في المعاملة دي من أخطر ما يمكن .. دي وصلت لدرجة خطيرة ولا يمكن تصورها .. واكيد تسنيم مش واعية أو فاهمة .. اللي بيحركها هي مشاعر الغضب والكره اللي جواها دون أي تفكير لأنها لا تعي ماذا تفعل .. ده غير انها كدبت .. يعني سلبيات بتزيد ولسة لو الموضوع متلحقش ممكن تزيد أكتر :) ربنا يستر
loleta1 2011-08-10
+1 لأ يايارا لازم تكلميهم يأخدوا بالهم منها ده بالعكس المفروض اى عيلة يجيلها بيبي جديد يدوا أهتمام للكبير لأنه هو اللى بيلاحظ وبيحس عن الصغير وبعدين لازم الكبار فى الحالات دى ياخدوا بالهم انا خالتى موتت أختهامن حبها ليها وهى فى نفس السن وبرضة كانت رضيعة بسبب أنها بدرتها بالبدارة زى ما بتشوف مامتها بتعمل فأتخنقت وده لأنها لاتعى ولحد دلوقتى ماحدش قالها على الموضوع ده عشان ماتتعقدش
وفى الأخر أقولك شوفى سلبياتنا بتعمل أيه
MaDa 2011-08-10
تمام يا لوليتا :(
yara 2011-08-12
صح والله يا جماعة وبعدين انا لما اتكلمت معاهم كانوا كمان لسة مش واخدين بالهم يعنى اصلا هما مش عندهم وعى بس بدئوا يتداركوا الموقف والحمدللة فهموا كل حاجة لان دا والله كان مسببلى ازمة كبيرة اوى لانى كنت حاسة ان ممكن البنت تموتها بجد وبقيت اجيب لتسنيم دى شوكولاتات وحاجت واخلى مامتها تديهالها ولما اخد النونو على رجلى اخد التاننية على رجلى وسعات كنت اجيب حاجة واقولها دى اختك جيباهالك وكدة يعنى وربنا يستتتتتتتتتتتتتتتر ومترجعش ريما لعادتها الاديمة والبنت تغير من اختها تانى هههههه
loleta1 2011-08-14
يارب يايارا بس برضه انا أطالب بذكرى ليكى انتى وانتى صغيرة او كبيرة ومنتظرة الرد
yara 2011-08-14
حاضر يا توتة دا انا شواااااااارع اصلا وليا مواقف كتيير فظيعة وهقولكم حاضر
MaDa 2011-08-14
هههههههههههههههههههههههههههههههههههههههه
loleta1 2011-08-14
سكر
yara 2011-08-14
ميرسى يا حببتى انتى الى سكراية والله
3
طبعا لأن انا فطوطة طول عمرى وغاوية مواقف
مرة كنا فى رحلة وكالمعتاد الأولاد والبنات بيركبوا عجل أوموتسيكلات
حاولت فى رحلة فى الأسماعيلية اركب عجلة كنت هنزل بيها فى النيل

ومرة تانية ركبت موتسيكل وراء زميل لأخويا فى الكلية ومسكت فى الموتسيكل وصممت ماأمسكش فيه وكنت حاطة روووج أحمر وراح مفرمل فأتخبطت فية فالتيشرت بتاعة أطبع شفايف حمرا وبقى طول اليوم عمال يصوت من اللى مامته هتعمله فيه لما تشوف الشفايف وقد كان وفرحت فية من كل قلبى عشان يبقى يفرمل فجأةمرة تانية
إضافة 2011-08-14
loleta1
14181

التعليقات

MaDa 2011-08-15
ههههههههههههههههه انا مت من الضحك بس نفسي أعرف حاجة .. هو في نيل في اسماعيلية :D
loleta1 2011-08-15
أيوة البحر كان جوة فى القرية السياحية وبره كان فى فرع صغير ترعة وكنت هنزل فيه فعلا ولسة لحد دلوقتى ماحاولتش تانى أركب عجل
MaDa 2011-08-15
مممممم بس ركوب العجل ده من أجمل الرياضات وركوبه كلعب في المصايف بيبقى تحفة .. لازم تجربي ومتخفيش :-P
loleta1 2011-08-16
هحاول بقى مع روزا بنتى اللى صورها على الفيس بوك وممكن بعجلة بسندات يدوبك مستوانا من مستوى بعض بس أيه رأيك فى عروستى؟
MaDa 2011-08-16
ما شاء الله عليها زي القمر .. شكلها بتحب الضحك واللعب .. بس ضحكتها عسولة أوي ما شاء الله .. ربنا يخليهالك وتفرحي بيها إن شاء الله .. وللأسف أنا مرتبط :D
loleta1 2011-08-17
الشرع محللك 4 يامادا :-Pبس ماتخافش انا مش هدبسك وعقبال ماشوفك عريس قد الدنيا وعلى فكرة هى غاوية ضحك زيي فعلا يامادا وده ألذ مافيها
MaDa 2011-08-17
ربنا يخليكي يارب .. وبالنسبة لموضوع اربعة .. فانا مقبلش على روز انها تبقى رقم اتنين أو تلاتة .. هي مقامها رقم واحد ولا قبلها ولا بعدها .. يا كده يا بلاش :D:D
loleta1 2011-08-17
والله يامادا الموضوع ده منتشر اليومين دول بشكل غريب أغلب مسلسلات رمضان جايبة رجالة متجوزة على زوجاتها فى السر أو بعلمها وكأنهم بيأكدوا على الموضوع ده وعند زوجى فى رجالة كتير فى شغلة عاملين كدة ويمكن من اللى شايفة يعملها هو كمان لأ واللذيذ فى الموضوع أن خالتى جاية من السعودية بتقول أنهم بينادوا بأن الزوج القادر يتجوز تانى عشان مايبقاش فى بنات من غير جواز
وفية رجالة بتقول انا حبيت تانى وتالت والستات زى الفاكهة كل واحدة ليها طعم ولون مع أنا كنت أعتقد أن اللى بيحب حد من قلبة ويتجوزة لايمكن يفكر فى غيره نهائيا بس يظهر الواقع غير كده
loleta1 2011-08-17
متخيل معايا الحال لما تكبر هيبقى أيه مع زيادة البنات وهيافة الولاد مش هتلعب فى رقم 2 هيبقى كويس لوحصلت تبقى من الأربعة:-Dبس انا عن نفسى هسيبها تعمل اللى هى عايزاة ولو نصحتها هقولها بلاها جواز أحسن:-P
MaDa 2011-08-17
لو الموضوع كده تبقى مصيبة .. المشكلة ان دلوقتي الشباب زي مانتي قلتي معظمهم هايف .. والبنات أكتر من الولاد .. لكن دول بشر مش أزايز عصير كل واحد ياخدلوا اتنين تلاتة .. والبنت من حقها ان يبقى ليها حياتها اللي بتحلم بيها ان يبقى ليها زوج ليها هي وبس زوج يحبها وتبقى هي كل حياته ومحدش يشاركها فيه .. واستحالة راجل يحب بجد حب صادق من كل قلبه ويص بره .. لأن اللي بيحب بجد بيبقى شايف حبيبته دي أحلى حد في الدنيا وعمره ما يشوف حد غيرها .. لكن اللي بيتجوز مرة واتنين وتلاتة عمره ما يكون بيحب والبنت اللي بتوافق دي بتبقى عايزة جوازة والسلام .. لكن استحالة انهم يكونوا بيحبوا بعض بجد .. محدش يقبل على حبيبه حاجة زي كده .. ربنا يلطف بينا ويجمع بين الأحباب ويهدي الناس للخير :(

وبالنسبة لروز متقلقيش عليها .. بكرة ان شاء الله تكبر وتفهم وتحس وإن شاء الله تقدر تختار الاختيار الصح واللي هيعتمد على القيم والمبادئ اللي انتي هتغرسيها فيها :-P
loleta1 2011-08-18
تمام ياريت كل الولاد زيك لأنها بقت ظاهرة وحشة قوييييي
MaDa 2011-08-18
ربنا يلطف بينا وبشبابنا وبيا وبروز وبكل الناس :D
4
أفتكرت موقف ماحصلش فيا بس كان لزميل ليا
الولد ده كان مهذب جدا ومحترم ومالوش فى البلاوى بتاعة الشباب
وكان على طول ملتزم ومش بيغيب فى الشغل
وفى مرة غاب يجى 3 أيام قلقنا وأتصلنا نطمن عليه قالنا لما هأنزل الشغل هقولكم حصل معايا أيه
أتاريه ساكن فى حلوان وكان معزوم على فرح لواحد قريبه وحد من الشباب راح حاطط فى المبخرة اللى فى أودة العريس حشيش أو بانجو وهو كان من ضمن اللى كانوا مع العريس ولأنه مالوش فى الكلام ده أتسطل وبيقول أنه أتمسك تحرى وأهله طلعوه وتانى يوم صحابه قالوله ده أنت بهدلت الدنيا أتحزمت ورقصت بلدى ورقصت بالسيوف كمان
عشان كده خللوا بالكم من المواضيع دى
إضافة 2011-08-23
loleta1
14181

التعليقات

safaa 2011-08-23
ربنا يسترها +1
MaDa 2011-08-24
ههههههههههههههههههههههههههههههه الحمد لله انه فاق قبل ما يروح القسم :D:D
6
الحمد لله الذاكرة رجعت لى :
انا مش بعرف كلمات المجاملة خالص يعنى زى ماتقولوا كدا مدب

وكنا فى الثانوى واحدة زميلتنا اختها حصلت لها حادثة الانبوبة تقريبا على ماذكر انفجرت فى وشها وماتت وجوزها فى المستشفى المهم اقولها ايه بقى
قولتلها الله جاب الله خد الله عليه العوض طبعا اصحابى ماتوا من الضحك وخدت تريقة ساعتها

وموقف اخر فرصة والذاكرة موجودة قبل ماتروح تانى
فى عزاء حد قربنا قابلت واحدة معرفة عمالة تتكلم ونتعرف على بعض وقامت تمشي فعلشان اجاملها قولتلها فرصة سعيدة وبعدين خدت بالى فعدلت كلامى وقولت نتقابل فى فرصة احسن بص خلاص كانت الكلمة طلعت
إضافة 2011-09-07

التعليقات

MaDa 2011-09-07
الصراحة حلوة :(
الاستاذة 2011-09-07
عملتها انا كمان يا زغباوية واخدت تريقة وتهزيق على الفرصة السعيدة والراجل ميت
زغباوية 2011-09-07
بصرة
Noura 2011-09-07
هههههههههههههه فرصة سعيدة
loleta1 2011-09-08
هههههههههههه الله جاب وخد ده إنتي سكره موتني من الضحك يازوزو
loleta1 2011-09-08
أيه يانورا مش ناويه تشاركينا بنوادرك؟ولا هتفضلي متفرج كده؟
Noura 2011-09-08
اصل انا هادية خالص ومطيعة وبنسى بسرعة:D
loleta1 2011-09-08
على بابا ده انا ماما أكيد في حاجة كده ولا كده:-(
Noura 2011-09-08
هههههههههههههههههه
starwar 2011-09-29
هههههههههههههههههههههههههههههههه بجد تحفه
6
وأحنا في ليبيا كان لينا ناس أصحابنا باباهم بيشتغل مهندس توزيع المياه في حديقة الحيوان بطرابلس فكان ليه سكن ملحق بالحديقة وكنا وكل أصحابهم المصريين بنتجمع عندهم ونعمل حفلات شواء في الغابات اللي هناك
طبعا كأطفال وشباب كنا حافظين الغابات دي حته حته وكنا بنلعب أستغماية مرة الأولاد يدوروا على البنات ومرة البنات يدوروا على الأولاد بس كنا لازم نمسك الكل لو فضل ولد أو بنت ماأتمسكوش والفريق أعلن إنهزامه نأخذ نقط أكتر وكنا بنعمل فورات لأننا كنا بنجمع يوميا كانت بنت الراجل ده بتاخد درس خصوصي وأبن المدرس وهو غريب عن الجروب كان بيجي يلعب معانا ولأن الأولاد مش بيحبوه فكانوا مطنيشينهومش بيخبوه معاهم والولد ده كان عليه صويته ولا أجدعها بنت
المهم البنات كانوا غالبين الولاد فكانوا مستحلفين لنا والليل غطى المكان كان كحل
الولاد أتجمعوا وطلعوا فوق شجرة كبيرة على فروعهاوطبعا في الظلمة مع الهدوءلايمكن نعتر فيهم مين بقى اللي لقيناه
الولد ده وإحنا بنجري وراه عشان نمسكه فضل يصوت
صويت فظيع
النتيجه إن الحرس بتاع الحديقة سمعوا الصويت وجريوا بالمسدسات على الغابة سمعوا صوت فوق الشجرة ضربوا طلقتين في الهواء الولاد كله رفع إيده وهما فوق الشجرة ونزله واحد واحد كان منظرهم كوميدي جدا وطبعا الكل إتهزأمن الأهالي لأن الحرس إعتقدوا إن في مصيبة بتحصل وكان ممكن حد يصاب ومن ساعتها إتمنعنا كلنا من اللعب جوة الغابات من أهلنا عشان خافوا علينا

وبرضه ساعات كنا نستخبى كل أتنين مع بعض انا وأخويا وليد إستخبينا وراء شجرة كبيرة في الظلمة وسندت عليها أريح لاقيت حاجة طرية في إيدي وبتلعب هاريت الدنيا صويت ورميتها عليه عشان ندله وخايفة وجريت وطلعت حرباية في الآخر بس برضه قالوا كان ممكن تبقى حاجة تانيه

وبرضه كان في ولد سوداني الله يمسيه بالخير كان إسمه إسماعيل كا ن إسود فحمه وسنانه لولي أبيض لماكان يستخبى في الغابة في الظلمة ماكناش بنعرف نمسكة وكنا نفضل ننادي علية أضحك ياإسماعيل عشان نعرف نشوفك ونشوف طقم اللولي ونمسكك
إضافة 2011-09-08
loleta1
14181

التعليقات

safaa 2011-09-08
ضحكتينى يالولو+1
زغباوية 2011-09-08
ههههههههه
MaDa 2011-09-09
هههههههههههههههههههههههههههههه
starwar 2011-09-29
+1 ده كان يووووووووووووم مايتنسيش ولاّ أيه يالولو
زغباوية 2011-09-29
على كدا starwar حد من اخوات لوليتا اهلا اهلا
starwar 2011-09-29
فعلا انا أخوها الكبير:-(
زغباوية 2011-09-29
ياهلا ياهلا ....منور الموقع
starwar 2011-09-29
منور بيكم كلكم :-(
zedony.com - A mmonem.com production. عن زيدوني - Privacy Policy