أي معرفة حضرتك بتنالها هتفيد طبعا
ما أجمل التدريب الصيفي!!
هيخليك تحب المذاكرة بتاعت السنة اللي جاية وتحتك وتعرف تركز على ايه.
حاول تسأل زمايلك اللي في السنين اللي قبلك عملو ايه أو خليك جرئ واعتبر انك بتدور على شغل حقيقي واتصل بالشركات المحترمة وقول عايز اتدرب
بص ياأفندم التدريب الصيفى دة أول خطوةبتثبتها فى عالم الشغل ماتتعاملش معاه على أنه ورقه وبتسلمها للكليه بالعكس أستغل كل لحظه
يعنى أدخل على النت فى مجالك ودور على المصانع اللى فمجالك وأختار الانسب من حيث المكان وسمعه القويه
حدد عدد المصانع وفيوم تزورهم واحد واحد وتطلب التدريب عندهم فى مصانع هترفض وفى اللى هيلاحظ جديتك وهيوافق ماتملش وتزهق
ركز وأستغل كل معلومه بتشوفها وبتسمعهالأنها هتفيدك فى الدراسه وفى الشغل بعد كده ولو فى مصنع سمحلك أنك تمارس تطبيق عملى أستغل ده جدا وكون لنفسك شخصيه لأن معالمك فى الشغل بتترسم من دلوقتى
أنا بقولك كنت بنت وتحت أيدى 50-80 عامل طباعه وكنت بشمر وبقف فوق الترابيزات وبطبع عينات المصنع وكنت بروح لمصانع طباعة الملابس الكبيرة زى جوكى والكونكريت والشوربجى وأشوف مكن الصباغه والطباعةوكمان تصنيع الملابس الجاهزه وده خلانى بعد كده يبقى عندى خبرة عمليه وتعامليه وصلتنى أنى أبقى مهندسة الطباعه المسئوله على مكن طباعة ملابس بينتج 30000 الف قطعه كل عشر دقائق ومسكت برضه فى فترة خط انتاج انك تشرف على العينه من أول ماتدخل وتتصنع لحد ماتتكيس وتتسلم للعملاءدة وانا بنت فمابالك بالراجل يلا عايزين همه ونسمع فيوم انك باش مهندس جامد
التعليقات
طبعا الاجابات اللى فاتت من مهندسين وانا مش مهندسة بس عندى كلام ولازم اقوله:
دلوقتى التدريب فى الصيف يعنى وقتك مش مشغول باى حاجة مهمة يعنى فاضى طيب ماتشغله بالتدريب اللى فى مجالك واكيد اكيد هاتستفيد وهاتزداد معارف وخبرات وتجارب عمرك ماهتنساها لانها فى سن فاصلة فى حياتك وبداية طريقك الفعلى فى الدنيا
هانفرض جدلا انك ماستفدتش بس انت نزلت وتعاملت مع الناس فى الشغل واحتكيت بيهم وعرفت الناس بتعمل ايه وماشية ازاى وده فى حد ذاته استفادة مهمة جدا هاتقدر من خلالها انك تحط تصور لحياتك المستقبلية
وتشوف اخلاقيات مختلفة تماما ومتنوعة من البشر (غير اخلاقيات اسرتك واصحابك)والظروف الاقتصادية للناس اللى حواليك
علاوة على انك هاتحاول تطبق اللى انت بتاخده او هاتخدوا فى الدراسة وده فى حد ذاته كفيل ان يربط بين المذاكرة والحياة العملية وده بيثبت المذاكرة فى الدماغ
ماتخدهاش على انها تدريب وواجب عملى مفروض عليك ...ممكن تعتبرها رحلة قصيرة لمحاولة اكتشاف الحياة العملية الفعلية
التعليقات
انا مش هاختلف مع اللي مكتوب في الاجابات فوق وبأكد عليه كمان.
بس ممكن اقولك خبرتي في موضوع تروح فين .... احنا كان عندنا ناس ناصحة وبتروح للدكاترة بتوع الكلية والمعيدين وتتطلب انهم يتدربو معاهم في مكاتبهم وبدون مقابل اولا كان بيستفيد خبرة وطبعا بيزود علاقته بالاصطف الجامعي وفي حالة ان الدكتور او المعيد رفض كان بيأخذو مجموعة ترشيحات منهم لاسماء مكاتب او شركات يقدرو يدربو معاهم.
وفي بعض السنوات الكلية هي اللي كانت بتوزع الطلبة علي اماكن معينه وطبعا الموضوع كان مش مجدي لأنها اماكن حكومية وكانت بتدينا الورق بتاع حضور التدريب وخلاص.
وربنا يوفقك
التعليقات