فى اللى حاصل !

3

النهارده كأن مصر عبارة عن قطر مندفع بسرعة على سكته، لكن بعض الركاب فى بعض العربات يكسرون زجاج فرامل الطوارئ ، ويشدون اليد فتهبط سرعة القطار !!! مين دول بقى ؟..

مش معقول يكون المجلس الاعلى .. ومش ممكن يكون رئيس الوزارة ؟ يبقى مين ؟

ليه لغاية النهاردة ماشفناش اى تحكم فى الاسعار اللى بقت حرة حتى فى المنتجات المحلية المسعرة ؟

وليه واحنا فى ثورة افرض على المحافظات شخصيات من خارجها ؟

وهل المحافظ المعين هيكون ولاؤه لشعب المحافظة ولا للى فى ايده القرار ؟

وايه الفرق بين وزارة العمل والهجرة وبين وزارة التعاون الدولى ؟

أو وزارة التنمية الادارية ،والجهاز المركزى للتنظيم والادارة ؟ والجهاز المركزى للتعبئة والاحصاء

وايه معنى وجود المجالس القومية المتخصصة ، او مجلس الشورى ؟ وفيه غيرهم عشرات !!

وايه المصطلح الجديد دا اللى اسمه سلفيين .؟ ما كناش نعرفه السنة اللى فاتت!!

وليه دايما المناصب الاعلى حكر على اصحاب المناصب العليا ؟ وكأنها مكافأة لهم !! وكأن

مصر مفيش فيها حد تانى ينفع!!

فكروا شوية معايا وفكرونى انا ناسى ايه .. لان البلد هيكلها الادارى مفرشح قوى قوى ..

وميزانية البلد متبهدلة من المكافات الخيالية وتجديد المكاتب ..

وليه لغاية النهار ده ماطلعش حكم أو قرار بالعزل السياسى على كل الاعضاء العاملين فى

الحزب الوطنى سابقا ، مش هم اللى عاملين قلق فى البلد كل شوية ؟

وليه مش باين شغل من الحكومة الا رئيسها ؟ ومانعرفش بيعمل ايه وزير الزراعة ولا التضامن

ولا الكهرباولا غيرهم ؟ كل دى دراسات ؟


اشتركوا وتفاعلوا .. خليك ايجابى وفكر من اجل بلدك

 

التعليقات

محمد عبد المنعم 2011-04-26
الأسئلة كثير قوي بصراحة ... لكن أنا عارف إجابة السؤال رقم 57:
حاصل ضرب 5 في 6 يساوي 22 ... صح؟
أنا طبعا مبسوط من السؤال ده وأتمنى السيد رئبي الوزراء يطلع عليه ويجاوبك بنفسه
زغباوية 2011-04-26
احنا معاك فى الاسئلة دى

وممكن نكتب كل الكلام ده فى صفحة رئاسة الوزراء او حتى صفحة وائل غنيم اللى اسمها كلنا خالد سعيد بتهيألى ممكن ياخدوا الكلام ده ويوصلوه لرئاسة الوزراء لان عندهم اهتمام شديد باراء الشعب


انا ايجابية وحددتلك فى اى اتجاه تسير ومن جانبى هانشره على صفحة الموقع وعلى صفحتى الشخصية علشان الكل لازم يتفاعل ونوصل الكلام ده علشان عايزين اجابات فعلية على الاسئلة دى
safaa 2011-04-26
فين ياأبنتى.. دا كتبة فى المقالات .. هنرد عليه ازاى ..لأ ومش عاجبة حاجة
bigestman 2011-04-26
احسن تعليق هو حاصل ضلرب 5في6 لانه صح 100 في ال100 اما باقي الموضوع فكل الناس عارفاه
عبد المنعم 2011-04-27
عفارم عليكم ياعفاريت انتم!!!
hamada 2011-04-27
لك الله ياحاج منعم..........
loleta1 2011-05-02
مشوار الالف ميل يبدأ بخطوة بس من كتر الفساد والفاسدين فى حاله من البلبله وعدم النظام للاهداف
زغباوية 2011-05-06
من فضلكم شوفوا الموضوع ده اذا اعجبكم علشان نبدأ فى نشره وتوصيله للمسئولين
loleta1 2011-05-08
طبعا عندوا حق عمو فى كل كلمه بيقولها
زغباوية 2011-05-09
يالا نتكلم فى اللى حاصل اليومين دول ايه رايكم فى معركة امبابة اكيد مش سلفية ولامسيحية دى فلول وطنية يالا مستنيا ارائكم
عبد المنعم 2011-05-09
الظاهر هنرجع نسهر لحماية البلد زى ما كنا بنعمل ايام الثورة
زغباوية 2011-05-09
ربنا يستر شكل كدا لعب الكبار اللى بقوا صغار مانتهاش
loleta1 2011-05-09
كل ده شوية هبل على عك المقصود منه ضرب الامن والوحده والهاء المسئولين والناس عن محاكمات الفاسدين تقدروا تقولولى ليه كل شويه عملية تحصل كل مايبدأ الكلام عن محاسبة الكبار ثم ايه السلفيين اللى طلعم فجأه كده ده كله أجندات وشغل لعب من تحت الطرابيزة واللى يعيش ياما يشوف حسبنا الله وهو نعم الوكيل
safaa 2011-05-09
صباح الفل يالولو ..عندك حق ...ربنا يستر..
loleta1 2011-05-09
صباح الجمال ياطنط وسورى انى سوداويه كده على الصبح بس حقيقى دمى محروق من التخلف ده حراااام على دول ودول
safaa 2011-05-09
والله كلنا زعلانين على اللى بيحصل ..وخايفين على الثورة من الناس الجهلة أو المستفيدين من النظام السابق
عبد المنعم 2011-05-09
لو فيه حسم من الجيش والحكومة الناس المتخلفة دى تمنع من الخطابة منعا تاما لانهم بيهيجوا الناس اللى فى الغالب فاهمين حاجات غلط يعنى جهلة .. وعمرك ما تعرفى تتناقشى مع جاهل .. فلازم يتكتموا .. ولو اتهاونا معاهم الامور كلها هتبوظ ومصر تبقى وقعت .. لا قدر الله
loleta1 2011-05-10
المشكله ان كلوا بيحسس على كلوا فى نوع من الخوف من اتخاذ موقف حاسم عشان مايحصلش قلبانه بس ده اللى بيحصل ده حتى ضابط الشرطه دلوقتى لوشاف حاجه غلط بيفضل يقول بس يابابا بس ياحبيبى كده عيب وبيوقف يتفرج خوفا على حياته والجهله مافيش اكتر ولاابجح منهم خربوها منهم لله
عبد المنعم 2011-05-11
عموما ده كله طبيعى .. بعد قيام الثورات.. مزيد من الفهم والوعى والصبر ..
زغباوية 2011-08-20
يالا عايزين تعليقات على اللى حاصل اليومين دول
عبد المنعم 2011-08-20
هم مين اللى خربوها ياست لوليتا ؟؟
زغباوية 2011-08-20
ياعم عبدوا انا بتكلم على اللى حاصل اليومين دول ايه رايك؟؟؟
loleta1 2011-08-21
الجهله اللى بيستغلوا الثورة فى تحقيق مطالب شخصية أو خرق القانون ياعمو هما اللى بيخربوها

يازوزو أنا زعلانة من أستفزاز إسرائيل لينا ومحاولة جر الرجل إلى حرب فى الظروف دى بترمى الكورة وتقف تتفرج علينا الناس بتطالب بأخذ موقف والحكومة بتفكر لو ماأخذتش موقف الناس مش هتسكت ولو أخذت إسرائيل هتعمل فيها شهيده ربنا يستر


safaa 2011-08-21
عندك حق يالولو ربنا يسترها وتعدى الازمة دى على خير
زغباوية 2011-08-21
وَأَلْقَيْنَا بَيْنَهُمُ الْعَدَاوَةَ وَالْبَغْضَاءَ إِلَىٰ يَوْمِ الْقِيَامَةِ كُلَّمَا أَوْقَدُوا نَارًا لِّلْحَرْبِ أَطْفَأَهَا اللَّهُ وَيَسْعَوْنَ فِي الْأَرْضِ فَسَادًا وَاللَّهُ لَا يُحِبُّ الْمُفْسِدِينَ (64) (المائدة)
loleta1 2011-08-22
صدق الله العظيم /مفضوحين على طوووول ربنا يهدهم
zedony.com - A mmonem.com production. عن زيدوني - Privacy Policy