حصــــــــــرى لزيدونـــــــــــى بمناسبة شم النسيم

11
تلوين البيض بالالوان الطبيعية ودون التعرض لأمراض
تلوين البيض باللون الازرق : قد تستعجبوا انه هايكون طبيعى لا ده طبيعى 100 %
ضعى مع البيض وهو بيتسلق كرنب بنفسجى وكل ماتحطى اكتر اللون الازرق يزيد (تجربتى الشخصية ولم انقلها من اى حد)

تلوين باللون البنى او البصلى: قشر البصل

اللون الاخضر: بقدونس وكترى

اللون الاصفر: حاجات كتيرة :الحلبة, الكركم, الكارى, النعناع

اللون البنفسجى: الكركديه ولو كترتيه هايقلب على مزرق

اللون الاحمر او النبيتى: يتم باضافة البنجر (شكر خاص للعضو عبد المنعم علشان هو اللى فكرنى بيه)

الفراولـــــــــــــــة ايضا: بتدى لون احمر (فكرة لسة عاملاها)

اللون البرتقالى: يتم باضافة الجزر وكترى

لو افتكرت حاجة تانية هاقولكم على طول
وممكن تعملى حاجة ظريفة:
تقللى الماء لاقل من نصف البيضة بعد مايستوى البيض بماء فقط او باللون خفيف جدا وبعد كدا تزودى درجة اللون هاتلاقيه مكان الماء اللى واصل لنصف او اقل من نصف البضة عمل دواير بللون الغامق وبكدا نكون حصلنا على تأثيرات واشكال مختلفة وليس لون واحد فقط او ممكن ترشي نوع تانى على البيضة يعنى مثلا ترشي شوية كركم او كركديه او بن على البيضة وهى مبلولة هاتلاقي مكان الرش متلون
اغمق وعمل اشكال سيريالية :(
وانا بدور لاقيت الفيديو ده:


وكل سنة وانتم جميعا بخير {{uf:1244}}

 

إضافة 2011-04-17
من تأليفي
تعديل 2019-04-29

التعليقات

أم العيال 2011-04-17
هي فعلا بتتلون كويس لكن مش ممكن البيض يكونله طعم المكون اللي إحنا حاطينه يعني ممكن يبقي ريحتهحلبة مثلا؟
زغباوية 2011-04-17
لا تقريباً مابيكونش له نفس طعم الشئ المضاف ليه
الاستاذة 2011-04-17
انا جربتها مرة
بس مابتعطيش نفس نتيجة الالوان اللي كنا بنعملها واحنا صغيرين وكنا بنتمتع بيها
عبد المنعم 2011-04-18
افكرك بالبنجر يازغبوبة
زغباوية 2011-04-18
شكرا جزيلا ياعبدوا كنت فعلا نسيته هاروح احطه هو والجزر
زغباوية 2011-04-18
للاستاذة لو خليتى الولاد يساعدوكى فى وضع الحاجات الطبيعية دى فى ماية سلق البيض وتتفننوا سوا يعنى ممكن لما تستوى نضع جزء بسيط منها فى ماية زرقا وبعدين نقلبها ونضع الجزة الاخر فى الماية البصلى مثلاً هايفرحوا برضوا بالنتيجة لما يتحط كل البيض بالوانه المختلفة فى طبق واحد هايحسوا بالبهجة بضوا هى طبعا مافيهاش الوان صريحة زى الوان الفلوماستر والخشب بس كله علشان صحتهم
safaa 2011-04-18
بس برضة الطريقة القديمة بتفرح العيال أكثر وهى ..كل طفل يلون ويرسم اللى هيأكله ..عصفورة ،وردة ،شجرة ..بس بألوان أقلام مش فلوماستر.ومش لازم تكون ثقيلة وطبعا مش مكسورة
عبد المنعم 2011-04-19
بلافو يا اخت صفاء
زغباوية 2011-04-19
الفكرة انى براعى صحة ولادى فى كل حاجة ومش عارفة بصراحة اذا كانت الاقلام الخشب دى صحية ولا فيها نسبة رصاص او اى حاجة تانية تؤثر على صحتهم حتى لو كانت بنسب قليلة لان البيض بيمتص كل حاجة
safaa 2011-04-19
أحضرى بعض الملتسقات الطريفة ذات رسومات جزابة ،ثم الصقيها باحكام على سطح وحدات البيض المسلوق البارد ، وطبعا بمساعدة الاولاد .
safaa 2011-04-19
بلافو ولا برافو
عبد المنعم 2011-04-20
برافو يامعلم !!
safaa 2011-04-26
خلاص بقى كل سنة وانتى طيبة خليها للسنة الجاية ان شاء الله
hamada 2011-04-27
شكرا للافكار الجميلة بس هو البيض اصلا غالى وبعدين حنصرف عليه صبغة طبيعية من الخضار سواء البنجر والا غيره ودى كلها تكلفة على ميزانية الاسرة وبعدين نرمى قشر البيض فى الزبالة ... اعتقد انه من الافضل ناخد صورة للبيض بعد تلوينه علشان تكتمل الذكرى وبيقى فى حاجة فضلت بعد هذه التكاليف وكان الله فى عون رب الاسرة ....!!!!!!!!!!!
زغباوية 2011-04-27
فينك ياحمادة مش باين ليه
ثانيا الموضع مافيهوش تكلفة ولا حاجة دى قطعة صغيرة تؤدى الغرض ويكون شكل السفرة حلو
TOOTOOMEX 2011-04-27
افكار حلو والاولاد بتفرح بيها فعلا لما بتشترك فى العمل نفسه واحب اضيف الكركديه بيعمل لون نبيتى برده
أم العيال 2011-04-27
أنا الكركديه عمل معايا لون رصاصي ولما عملت (البيض الاحمر)كانت النتيجة إنه بقي إسود إسود إسود
زغباوية 2011-04-27
انتى حطيتى ايه؟ ولا اتحرق واتفحم
زغباوية 2011-04-27
الكركديه فعلا بيدى لون بنفسجى مزرق او على بين البنفسجى والرمادى
زغباوية 2011-04-27
وبعدين كويس اخترعتيلنا لون اسود جديدة دى قوليلى بسرعة حطيتى ايه؟
أم العيال 2011-04-27
والله يا أختي حطيت كركديه لقيته رمادي فاتح وبعدين زودته قلت يمكن يبقي بنفسجي ولا حاجة لقيته بقي رمادي غااااامق
قلت يا واد طنث خاااااااااالث
حطيت بيضة حمرا قلت يمكن ......لقيته أسود يا ولداه
عبد المنعم 2011-04-28
لأ بقى دا اسمه سحر يام العيال !!
زغباوية 2011-04-28
حلو اكتشفنا اللون الاسود بس ببراءة اختراع لام العيال
loleta1 2012-04-02
+1 ههههههههههههههههه عسل ياأم العيال
tafatifi 2013-04-30
حلوين اوي
شكلهم مغري
safaa 2013-04-30
ياترى فى عمان شم النسيم
زغباوية 2013-04-30
حتى لو مفيش هما يقضوه حتى لو يوم جمعة وياسلام لو يقولوا لاصحابهم المصريين او يروحوا الجالية المصرية ويتفقوا مع بعض ويعملوا الطقوس انا فولت كدا لبتوع البحرين وعجبتهم الفكرة
بس ماتفتروش فى الفسيخ علشان مانعملش ازمة سياسية بين البلدين :D
tafatifi 2013-05-01
هههههههههههههه
مفيش شم النسيم هنا . بس اتفقنا مع اصحابنا نخرج في أي حديقه ونقضي شم النسيم . بس بالرنجه فقط.

safaa 2013-05-01
طيب مافيش عندكم ترمس فى عمان علشان خاطر احمد :)
زغباوية 2013-05-01
طيب والبيض الملون
منة الزغبي 2013-05-09
حلوة ياماما
tafatifi 2013-05-12
عسل يا منه
tafatifi 2013-05-12
هييييييييييييييه .
جيبت ترمس .
zedony.com - A mmonem.com production. عن زيدوني - Privacy Policy