لا أحنا أم الدنيا ولا هنبقى أد الدنيا

2


مصر لا هي أم الدنيا, ولا هتبقي قد الدنيا, مصر مجرد بلد فاشل من العالم التالت كل شهرتها انها جنب اسرائيل و انه كان فيها ناس متحضرة بتبني مسلات و تماثيل من 7000 سنة

مصر شعبها مش أعظم شعب, 40% منهم جهلة رسميا و نص المتعلمين منهم جهلة بشهادات تعليمية, و نص الشعب عاوز يرجع يطبق قوانين العصور الوسطي تاني

مصر مافيهاش تعايش, و لا شغل الوحدة الوطنية, لا المسلم طايق المسيحي و لا المسيحي طايق المسلم و هما الاتنين مش طايقين حد تالت جنبهم (ملحد, يهودي, بهائي...)

مصر ما علمتش العالم و لا حاجة, التعليم الإبتدائي في مصر أسوأ تعليم في العالم و الإعدادي و الثانوي زيهم, و التطوير هو انك تشيل ستة ابتدائي و ترجع الثانوية سنتين مش أكتر, و مفيش جامعة مصرية من أفضل 100 جامعة, و لا 200 ولا حتي 300 و لا 400 و يوم ما البلية تلعب بنبقي في آخر 50 في اول 500, و الأشخاص الكويسين أكاديميا اللي فيها مشيوا خلاص, و الكويس اللي فاضل بيفكر يمشي

المصريين مش معروفين لا بقوتهم ولا بجبروتهم, مايكل فيليبس جاب ميداليات أكتر من كل المصريين في الأولمبياد, و مفيش رياضة مميزين فيها

المصريين لا شعب كريم و لا مضياف, نص السوريين اللي جم يلجأوا لمصر مشيوا بسبب التضييق عليهم, و كل العراقيين اللي جم قبل كده عانوا نفس المشكلة, الأفارقة بيتشتموا علنا في الشارع, و الأسيويين مجرد قصيرين و تجار شنطة, و الفلبينيين مجرد خدامين, و كلهم بيتشتموا لو معرفناش نطردهم

المصريين دمهم مش خفيف, سخرية المصريين من كوارثهم إسمها تبلد مش كوميديا, و انتا مش متفوق في صناعة الكوميديا ولا صناعة السينما عموما, و لا أي صناعة أصلا

بالتالي, كون حزنك الشديد سببه إن مصر ما طلعتش كاس العالم,و مش سببه كل اللي فات ده, فده سبب كفيل يخليني سعيد جدا انك عايش فى التخلف ده

فوق بقي, انتا ولا شئ في مسيرة الحضارة, و هتفضل طول عمرك كده لو كل اللي فوق ده سبب ما يستدعيش حزنك قد حزن الخروج من كاس العالم .

 

التعليقات

Fayez Eneim 2013-10-16
أتفهم غيظك من جهل مستشري وأتفهم -كذلك- ما ترتب عليه جلد شديد للذات. الحقيقة أنني لم أتابع ردة فعل الشارع لكني لم أكن أتوقع أن تصل إلى ضياع الوطن بكامله بالخروج من كأس العالم.
HoSSaM 2013-10-16
أنا مش متغاظ من الخروج من كأس العالم يا دكتور ولا الموضوع فارق معايا أصلاً
أنا كل اللى غايظنى البلد الغريبة دى بقيت نصين الأول فرحان بالأداء الهزيل والهزيمة المذلّه والثانى حزين للخروج من كأس العالم

- أهملنا مصارحة أنفسنا وأصبحنا نتعلّق بأمجاد الماضى وطموحات أجددنا دون أن نفعل أدنى شئ حتى نكون مثلهم أو حتى لمواكبة مسيرة الحضارة التى نعيشها :(
Menem 2013-10-17
انا اوعدك ان كل ده هيتغير فى وقت ليس طويل ..فارجوك امسحها فى المرة دى ..وخد بالك انت من نفسك ..مصر عوزاك !!!
Fayez Eneim 2013-10-18
عندما حددت غيظك من الجهل المستشري أكبرت غضبك عن أن يكون بسبب الخروج ولكن بسبب جهل معنى المواطنة. كنت قد أشرت إلى استغرابي من حدوث حرب بين مصر والجزائر وتناسى جهًال الطرفين النضالات المشتركة والمعارك المشتركة والدم المشترك الذي سال على أرض مصر وأرض الجزائر وأرض فلسطين. وكنت قد حذّرت من تنامي أهمية السخافات هذه والتي قد تتسبب في حرب أهلية فحدثت حرب القاهرة - بورسعيد.
ما نحاوله معاً هو تطوير الوعي الاستراتيجي لأمن العالم العربي وكونه كتلة واحدة وهو ما سيصعد بالناس عن مستوى سخافات الكرة.
وكما قال لك الأخ عبد المنعم كل ما تراه مؤلما ومخزياً سيتغير. من ثقتي بالتغير قلت لأحد الشباب المصّر على "إنقلاب": هل منعت تسمية "انقلاب" لثورة يوليو 52 منعتها من إحداث هذا التغير المجتمعي الهائل؟ علينا أن نصل إلى حالة "الكلاب تعوي والقافلة تسير".
Fayez Eneim 2013-10-18
رأيت للتو الصورة وأراها معبرة عما يجول بخاطرك وأعيد لطمأنتك أني قارئ جيد لما بين السطور.
Menem 2013-10-18
احساس مفرح ومريح جدا ان تجد من يؤكد على صحة انفعالاتك التى لم تعبر عنها لاحد بعد !!
asmaa 2013-10-18
لا مصر ام الدنيا وهتفضل ام الدنيا والتخلف والجهل اللى انت بتقول عليها انت جزء منه ومع احترامى لوجهه نظرك كلامك مستفز جدااااااا
asmaa 2013-10-18
انا اصلا مش مويده للى بيحصل ف الكوره ده معلش لما حارش مرمه ياخد ملايين وحارس مدرسه او عماره ياخد بلالين فده فعلا تخلف وانا مش راضيه عنه بس مصر برده ام الدنيا
HoSSaM 2013-10-18
شكراً جداً لكلامك يا دكتور وطبعاً لكلام حضرتك يا عمو عبده
أنا لا أنسب لنفسى كتابه هذه الكلمات ولكنى وجدت فيها الحقيقة التى أحاول أن أوصلها لكافة المصريين

- لو نزل مسلم وكافر البحر ... من تعلم السباحه فقط هو من ينجو لأن الله لا تحابى الجهلاء

الظروف والوقت فى صالحنا كى نتعلّم ثم نعمل
HoSSaM 2013-10-18
@asmaa
أولاً: مبروك أنضمامك لأسرة زيدونى ودا.

ثانياً: مين اللى قال إننا مش جزء أصيل من دائرة التخلف والجهل :P المهم كل واحد مننا عمل إيه عشان نخرج بره الدائرة

- أنا قدمت نصائح منقوله وأنتى قدمتى شئ من تلك الدائرة

- حضرتك عايزه حارس مرمى منتخب مصر ياخد كام وإيه وجه المقارنه أصلاً بين الأتنين غير كلمة حارس ثم إن أصلاً لاعبى المنتخبات لا يتقاضون أجور من بلادهم لأنه واجب قومى أما راتبهم يتقاضونه من أنديتهم المقيدين بها شوفتى عدم المعرفه مستشرى أزاى
Menem 2013-10-19
شفت انت بقى اللى قلناه قبل كده محدش بيتعلم منه ازاى ؟؟؟ مش نتعلم نرد بهدوء على من ينتقدنا ؟ ما دام عندى حجة ارد بيها دون ان ارفع من حدة الصوت !! كلنا تقريبا ما نعرفش بعض لكن بنقرأ كلام بعضنا .. فالرد يكون بالكلام مش بالعض السريع !! تيجى نحاول من الاول ؟؟
HoSSaM 2013-10-19
على اسم مصر التاريخ يقول ما شاء
أنا مصر عندي أحب وأجمل الأشياء
بحبها وهى مالكه الأرض شرق وغرب
وبحبها وهى مرميه جريحة حرب
بحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هى فى درب
وتلتفت تلقيني جنبها في الكرب
والنبض ينفض عروقي بألف نغمة وضرب
على اسم مصر
زغباوية 2013-10-19
انت كاتب منقول ممكن اعرف من مين؟؟؟
Menem 2013-10-20
انقل بقى لمرحلة جديدة .. انك تطلع من جواك وتحط على الورق
زغباوية 2013-10-20
شكراً للتوضيح
زغباوية 2013-10-20
asmaa: اهلا بيكي فى زيدونى وشكلك داخلة حامية وانا معاكي فى هوس الكورة عند الناس والتعصب الشديد كمان واسعار اللاعبين مقارنة بدخول الناس الغلابة
ومعاكي ان مصر ام الدنيا ومش هاتبقى لأ دى هى اصلا اد الدنيا وما فيها بكل عيوبها قبل ميزاتها وعلشان كدا العين عليها من كل اللى حواليها
فى انتظار مشاركاتك ومواضيعك يااسماء :(

HoSSaM: على طووووووول الخط الاختلاف لايفسد للود قضية ومن اختلافنا بنطلع بمفاهيم وافكار جديدة
Fayez Eneim 2013-10-20
أنصحك بأن توضح أنتقاءك للمقال فيكون تعليقنا عليه أدق. منتظرين انتقاءاتك وكتاباتك.
HoSSaM 2013-10-20
عُلم يا دكتور
zedony.com - A mmonem.com production. عن زيدوني - Privacy Policy